Á að láta síldina drepast?

aftur í Kolgrafarfirði með útför á kostnað ríkisins? Eða senda skip til að veiða hana? Er síld bara orðin verðlaus eða bara kvótalaus? 

Á hún bara að drepast þarna aftur? 

Sjálftökuliðið

hefur það fínt í þjóðfélaginu. Hvort heldur eru skilanefndir bankanna eða lífeyrissjóðakóngarnir, sem kosnir eru á sjálfstýringu. Engin merki sjást um það, að ríkisstjórnin ætli að taka á skilanefndunum og líklega þá heldur ekki á stjórnarfyrirkomulagi lífeyrissjóða.

Lífyerissjóðurinn minn, verslunarmanna, hækkar laun stjórnarmanns um 51 % frá árinu 2011 til 2013. Hækkuðu greiðslur til mín sem lífeyrisþega í hlutfalli?

Er svona miklu meiri vandi að stýra sjóðunum eftir hrun en var? Eða er þtta bara ekki rán um bjartan dag? Þarna er á ferðinni sjálftökulið sem ég veit ekki einu sinni hvað heitir, hef aldrei séð og aldrei kosið. 

 

 

Snowden nei takk

ég að minnsta kosti kæri mig ekki um svona svikahrapp sem nýjan Íslending.

Þessi Snowden er í mínum augum Quislingur sem svíkur þjóð sína og myndi svíkja okkur líka fá hann færi á því.

 Vonandi kemur hann sem fyrst fyrir dómara í Bandaríkjunum sem og Assange þar sem þeir eiga að svara fyrir gerðir sínar eins og aðrir þegnar. Bandaríkin eru réttarríki sem er alveg treystandi til að fara hæfilega með Snowden.

Uncle Sam og Talibaninn

eru sagðir ætla að setjast að samningaborði.

Er Talibaninn trúverðugur samningsaðili fyrir Uncle Sam? Stutt er síðan að eini góði Talibaninn var dauður Talibani.

 Stefna Talibana í þjóðfélagsmálum er vel þekkt. Þetta er andsetið lið sem kúgar og kvelur konur börn og drepur hvern þann í nafni Islam sem dirfist að mótmæla. Steinaldarfólk með byssur sem berjast á móti öllu sem við teljum til mannréttinda. Hvað er Sámur frændi að gera? Er Ingibjörg Sólrún á bak við þetta?

Mikið má Uncle Sam vera klárari en maður heldur  ef hann getur samið við Talibanann svo haldi. 

Af hverju ekki að veiða búrhval?

myndi mig langa að vita. Af hverju er þessi samkeppnisaðili okkar fiskveiða ekki drepinn eitthvað niður. Honum hefur fjölgað gríðarlega á undanförnum árum og étur miklu meira en það sem Hafró og bankarnir skammta okkur í þorskafla.

Kristján, af hverju veiðirðu ekki búrhval? 

 

Til hamingju Kristján

Loftsson með fyrstu langreyðina. Ég stóla á að þú veiðir mikið af þeim.

Og svo mættirðu líka veiða hundrað stykki af búrhval. Það er aðdáunarvert hvað þú hefur verið seigur að halda hvalveiðiútgerðinni á lífi í gegn um öll þessi mögur og dimmu ára pólitískrar forstokkunar og hótana umhverfisfasistanna. Við verðum að veiða hval vegna okkar sjálfra því þeir aféta okkar útgerð.

Þessir stóru hvalir éta að meira úr sjónum en við veiðum sjálfir. Við eigum að veiða þá hvali sem éta bolfiskinn okkar. Guðmundur Geirdal og félagar hafa endurheimt merki úr þorski sem þeir merktu hér sem einn af tíu í flóanum og var svo étinn af hval. 10 % af þessu úrtaki félaganna endaði í sem sagt hvalsmaga. Enginn veiddist af skipi.   

Til hamingju Kristján Loftsson, þú ert í rauninni landvættur! 

Hvernig eru lungun?

í Hvergerðingum?

Þetta dettur manni í hug að spyrja um þegar maður sér útlitið á háspennumöstrunum í Kömbunum. Þau eru galvaniséruð og úr stáli. Lungu manna eru úr lifandi vefjum. Er einhver tilbúinn að byggja sér hús við hliðina á þessum möstrum og láta forstjóra OR fullvissa sig um að allt sé undir mörkum?

Svo birtir Moggi gagnrýnislaust viðtal við Orkuveituna um það hvernig allt verði í  lagi þegar þeir byggja gasskiljustöð svo þeir geta farið að dæla drullunni niður í grunnvatnið okkar svo við getum fari að drekka það í stað þess að anda því að okkur þegar þeir eru búnir að hrista kokkteilinn með manngerðum jarðskjálftum.

Er ekki sú leið til, að hreinlega þétta þetta gas niður í bernnisteinssýru og selja hana svo úr landi sem verðmætt efni. Þó við þyrftum að niðurgreiða það í orkuverði þá er mér spurn hvort það væri ekki skárra fyrir lungun?.

Má ekki spyrja Pálma Stefánsson um það? 

 

Ekki gátu þeir stillt sig

hjá RÚV í kvöldfréttunum að sækja túlkinn Guðna sagnfræðing til að skýra það út fyrir áheyrendum að í raun hefði Sigmundur Davíð farið með  harla  vafasamar fullyrðingar þar sem fyrri stjórn hefði gangsett allt þetta AGS- ferli með löglegum hætti sem lögleg stjórnvöld og aðildarviðræðurnar við ESB líka.

Af hverju þurfti að sækja akkúrat þennan sagnfræðing til að gefa út álit á ræðunni sem áheyrendur voru að meðtaka milliliðalaust?  Af hverju voru ekki Stefán Ólafsson og Baldur Þórhallsson líka sóttir og því ekki  bara Steingrímur J. Sigfússon til viðbótar til að tryggja að áhorfendur RÚV færu nú ekki út af sporinu ef þeir yrðu að hlusta einir og óstuddir?

Er þeim ekki lengur sjálfrátt þarna á RÚV með geta ekki stillt sig um að snúa út úr öllu sem nýja ríkistjórnin  lætur frá sér fara af því sú gamla hafi eiginlega verið betri? 

 

 

 

Góð ræða hjá Sigmundi Davíð

á Austurvelli í morgun.

Vera kann að einhverjum hafi sviðið undan hreinskilni forsætisráðherrans unga. En þeir sem vilja verja fullveldi Íslands gagnvart hverjum sem er var án efa skemmt.

Fleiri orð þarf ekki að hafa um þetta frábæra dæmi um ræðumennsku stjórnmálaleiðtoga. Öðruvísi manni áður brá. Einkum voru orð hans um hvað á skortir að Evrópusambandið sanni sig gagnvart Íslendingum og líka eigin þegnum athyglisverð. Ríkisútvarpið verður líklega ekki lengi að leita að og kynna álit Össurar eða Steingríms J. á orðum núverandi  forsætisráðherra. 

Sigmundur Davíð flutti frábæra ræðu við þetta tækifæri sem náði ótrúlega vel til þeirra málaflokka sem ríkisstjórnin hefur sett í öndvegi.

 

Takk Óli

verður maður að segja eftir að horfa á þennan stórkostlega leik Íslendinga við Rúmena.

Þvílíkur íþróttamaður  hefur Ólafur Stefánsson verið og fyrirmynd manna frá æskudögum. Hann á fáa sína jafningja nokkursstaðar.

Takk Óli! 

Jafnrétti

er í reynd komið á í Noregi. Svo segir i fréttum:

"Norska þingið samþykkti í fyrradag, föstudag, að konur skuli gegna herskyldu ekki síður en karlar og eru fyrsta ríkið í Evrópu og fyrsta aðildarríki Atlantshafsbandalagsins, sem tekur upp herskyldu kvenna að sögn Reuters-fréttastofunnar. Réttindi og skyldur eiga að vera hin sömu fyrir alla, sagði Laila Gustavsen, stuðningsmaður frumvarpsins..."

Leiðir það ekki hugann að þjóðernisvitund sem hérlendis er mest afflutt og fyrirlitin enda fellur ekki að alþjóðahyggju kratismans. Kratar vilja framselja óhikað fullveldi Íslands til Brüssel þrátt fyrir sjö alda baráttu fyrir að endurheimta það úr Gamla Sáttmála. Evrópuherinn á að verja okkur gegn öllu illu úr því að Kaninn nennir því ekki.  Sjálfir ætlum við að vera stikkfrí í öllum varnarmálum eins og venjulega.

Á hvaða braut eru Íslendingar eigilega sem þjóð?  Er þeim slétt sama um hvernig allt veltur bara ef þeir sjálfir höndla einhvern stundarávinning?

Er allt til sölu hugsunin efst á baugi sé verðið rétt?  Jafnvel jafnréttið líka?

 

Bankaleynd

verður Óla Birni Kárasyni að yrkisefni á T24. Hann krefst þess að allir þingmenn Sjálfstæðismanna leggi fram frávísunartillögu við tillögu forsætisráðherra um upplýsingaöflun vegna skuldaleiðréttinga heimilanna.

Sem kunnugt er þá náði Óli Björn ekki kosningu til þings. Sem er um margt skaði því Óli Björn er með réttsýnustu mönnum og góður íhaldsmaður eins og þeir gerast bestir.  En dugar að vera svo fastur í hugmyndafræði að slíta nún stjórnarsamstarfi vegna einstaks máls ? Ég trúi því ekki að Óli Björn skilji að ríkisstjórnarmeirihlutinn verður að halda saman.

Auðvitað er marg rétt af því sem Óli Björn segir og margt á ekki að viðgangast í lýðræðisríki. Í Þýskalandi eru til dæmis 3 leyndarmál virt. Ríkisleyndarmál, bréfaleyndarmál og bankaleyndarmál.

Ekkert af þessu er virkt á Íslandi. Öllu er kjaftað og öllu lekið sem hægt er að stela og birta í DV til dæmis. Pósti er stolið og birtur á slúðurfjölmiðlum og sumir blaðamenn hreykja sér af upplýsingastuldi og neita að gefa upp heimildarmenn. Hver er afstaða Óla Björns sem blaðamanns til slíkra einkamála?

Svo er það skrípaorðið bankaleynd. Veit Óli Björn ekki að kommarnir eru löngu búnir að afnema hana? Skattstofurnar eru beintengdar inn í bankana og hafa upplýsingar um hverja krónu sem þar er í eigu einstaklinganna. Hvaða bankaleynd er þá verið að tala um? Jú, hverjir fá afskrifað og hverjir fá  lán. Það er þar sem helst er spillinguna að finna en ekki hvað menn eigi á bankabókinni.

Óli Björn ætti að útskýra hverig þetta getur samrýmst hans hugsjónum ef ekki má sannreyna í þessu sérstaka tilviki sem fyrir dyrum stendur, að menn eigi skilið skuldaleiðréttingu. Auðvitað er þetta allt hið skelfilegasta mál að svona skuli komið fyrir þjóðinni að við þurfum að standa í þessu. Enginn vildi taka undir þá leið, að leiðrétta skuldirnar með einföldum flutningi vísitölunnar afturábak fyrir alla frá 2007-2008 og höfuðstólslækkun í hlutfalli við það með annað óbreytt. Þeir sem eru farnir á hausinn og búnir að missa allt yrðu að fá aðra úrlausn og nýjir skuldarar fengju auðvitað ekkert. Svo vildi ég líka nota gjaldeyrishöftin til að bæta kjör almennings í stað taxtahækkana. Færa handstýrt gengið niður og lækka verðlag í stað þess að hækka það.  En enginn vildi heyra það heldur. 

Auðvitað ætti hér að ríkja bankaleynd, bréfaleynd og ríkisleynd. En Ísland er sú tegund af lýðræði að þetta er ekki hægt. Við getum því bara haft neðanjarðarhagkerfi, einkavinavæðingu  og hverskonar svindl og pukur en ekki neitt heiðarlegt eða uppi á borðinu þó að Óli Björn vilji hafa slíkt í hávegum. Allt okkar kerfi er orðið svo sjúkt og rotið að það er ekki í augsýn. Og veruleg siðferðisbót er ekki í augsýn að mínu viti.

Og líklega er það svo um alla veröld að Stóri Bróðir er allstaðar meira nálægur en var. Sjáið bara hvernig Svissarar melda þýska skattsvikara, þýskar skattstofur kaupa stolnar upplýsingar af glæpamönnum  og Danir borga verðlaun fyrir að menn kæri nágrannann. 

Ég vona að menn slíti ekki stjórnarsamstarfinu strax því mér finnst margt ógert þó við séum ekki að gera mál úr einhverri bankaleynd sem er í rauninni ekki til á Íslandi.