Siðareglur Handknattleiksfélags Kópavogs

Á heimasíðu HK er að finna heilmikinn bálk um siðareglur félagsins. Þar er maðal annars að finna þessa klausu:

"Stjórnarmaður/starfsmaður:

1.     Stattu vörð um anda og gildi félagsins og sjáðu um að hvorttveggja lifi áfram meðal félagsmanna
2.     Komdu fram við alla félagsmenn sem jafningja, óháð kyni, trúarbrögðum, stjórnmálaskoðunum, litarhætti og kynhneigð
3.     Hafðu lýðræðisleg vinnubrögð í heiðri
4.     Haltu félagsmönnum vel upplýstum og gerðu félagsmenn að þátttakendum í ákvarðanatöku eins og hægt er
5.     Vertu ávallt til fyrirmyndar varðandi hegðun og framkomu, bæði innan félags og utan
6.     Taktu alvarlega þá ábyrgð sem þú hefur gagnvart félaginu og iðkendum
7.     Hafðu ávallt í huga að í félaginu er verið að byggja upp fólk
8.     Rektu félagið ávallt eftir löglegum og ábatasömum reikningsaðferðum
9.     Notfærðu aldrei stöðu þína hjá félaginu til eigin framdráttar á kostnað félagsins. "

Ástæða þess að ég tilfæri þetta hér er að í gærkvöldi bárust þær fréttir að félagaskrár HK hafi verið teknar og skráðar inn sem hundruðir í Sjálfstæðisflokkinn til þess að öðlast þáttökurétt í prófkjörinu á morgun. Ég sá svo bréf sem segir að Gunnar Birgisson hafi ekki viljað samþykkja að afhenda HK  Kórinn, sem er eitt stærsta íþróttamannvirki á landinu, en Breiðablik er annað stórt íþróttafélag í bænum sem þá teldi á sig hallað.

 Einhver Ólafur Þór Júlíusson skrifar síðan undir þetta dreifibréf til félaga í HK, þar sem þessi tregða Gunnar er tíunduð. HK verði því að stuðla að falli Gunnars í kosningunum. Félagar skuli kjósa Ármann í 1. sætið, Hildi Dungal í annað sætið og Sigurjón, sem er formaður HK,  í þriðja sætið. Það er nokkuð ljóst að þetta getur ekki verið flokkað sem  spilling eða atkvæðakaup frá Gunnari Birgissyni að minnsta kosti. 

Til viðbótar var mér sögð sú saga að þessi sami listi hafi verið notaður til að skrifa þetta sama fólk  inní Framsóknarflokkinn, þar sem Ómar Stefánsson hyggur á kjör sem forystumaður eftir viku.Maður veltir fyrir sér útá hvaða brautir prófkjörsbaráttur flokkanna eru að fara. Hvort Breiðablik hafi ráð á að láta HK um svona aðgerðir eða verði að grípa til varna ? Eða hestamannafélagið Gustur, Gerpla eða Lions.

Þetta eru nýir tímar svo ekki sé meira sagt.Það er fróðlegt að lesa allar siðareglur HK í ljósi hinar góðu baráttu sem formaður félagsins  heyr á stjórnmálasviðinu og einkar fróðlegt fyrir foreldra að velta fyrir sér athöfnum barna sinna á sama leiksviði.  Börnin virðast vera orðin það afl sem úrslitum ræður um það hverjir leiði lista Sjálfstæðisflokksins og Framsóknarflokksins í kosningunum í vor.

Fyrir félagið væri að minnsta kosti  við hæfi að taka siðareglurnar útaf heimasíðunni fram yfir prófkjör og fresta þeim þar með.  

Athugasemdir

[Kjartan Sigurgeirsson, 19.2.2010 kl. 09:30]

Þú segir fréttir Halldór.  Ég vona að þær séu úr lausu lofti gripnar.  Sé þetta rétt má leiða að því líkum að lýðræðið sé orðið skrípaleikur, það verði barist í íþróttafélögum bæjarins um hvert þeirra eigi bæinn. Frekar ógeðfelld tilhugsun, Þá verða ekki önnur úrræði fyrir þá sem eru búnir að fá nóg af íþróttadýrkun  en að flytja úr bænum. 

[Kjartan Sigurgeirsson, 19.2.2010 kl. 10:08]

Heldurðu Halldór að þetta dreifibréf sé einhverstaðar aðgengilegt, væri gaman að sjá það.

[Halldór Jónsson, 19.2.2010 kl. 11:34]

Já, ég veit hvar það er.

[Halldór Jónsson, 19.2.2010 kl. 11:35]

Er þetta hinn nýji stíll atvinnumannanna í almannatengslum ?

[Pétur Halldórsson (IP-tala skráð) 20.2.2010 kl. 09:51]

Ég er búinn að sjá þetta bref og satt best að segja ofbýður manni við lestur þess.

Að HK skuli standa fyrir þessu og menn tengdir því félagi er ófyrirgefanlegt.

ER HK PÓLITÍSKT félagasamtök.????

Er eðlilegt að formaður þess notið það sér til framdráttar?? (sbr siðareglur sama félags)

Er eðlilegt að félag eins og HK hafi pólitíkus sem formann??