Velkominn Ólafur Liljurós !

Hinn 4. desember s.l. skrifaði ég eftirfarandi á þetta blogg:

"Mikið er gaman að Ólafur Magnússon skuli vera kominn aftur til starfa í Borgarstjórn Reykjavíkur og heill heilsu. Hann er eini maðurinn, sem við vinir Reykjavíkurflugvallar getum treyst á Borgarstjórn. Allir hinir eru annaðhvort hráir eða soðnir eins og Villi eða eindregnir andstæðingar flugvallarins í Vatnsmýrinni eins og sexmenningaklíkan öll í Sjálfstæðisflokknum, nema  kannske utan Kjartans eins.

Ólafur Magnússon er maður hreinn og beinn. Honum getum við treyst. Vonandi kemur hann saman góðum lista við næstu kosningar sem við getum stutt heilshugar til góðra verka. Margir telja að Sjálfstæðisflokkurinn sé  búinn að gera endanlega í buxurnar í borgarpólitíkinni og honum muni fáir  treysta héðan af. Flokkur, sem ekki getur ítrekað staðið saman, er eins og hús sem er í sjálfu sér sundurþykkt. Það mun riða til falls og fall þess verður mikið. Eða svo stendur í hinni góðu bók held ég.  

 Allt vinstragengið í nýja R-lista bræðingnum er líka alfarið á móti Reykjavíkurflugvelli.  Björn Ingi er eins og hann er, enn  staddur úti á Lönguskerjum.  Undir hans exi þora víst fáir að sofa lengur.

  Því er Ólafur maður okkar Vallarvinir ! Styðjum við Ólafs Magnússon til góðra verka ! Gerum framtíð Reykjavíkurflugvallar  að úrslitakosti í pólitísku vali mann og málefna "

Ég viðurkenni alveg að ég var svakalega svekktur á þessum tíma útí Sjálfstæðisflokkinn í Reykjavík vegna þess sem uppá hafði komið. Ég viðurkenni að ég hafi kannske verið of stórorður í hita leiksins. En þannig er minn heimski  háttur að tala beint út um það sem mér finnst og hugsa svo.

Það breytir því ekki að ég hef tröllatrú á Ólafi lækni og hvet okkur Vallarvini að styðja vel við hann. Hann hefur mikinn stuðning í flugvallar málinu og má benda honum á skoðanakönnunina hér á síðunni þar sem yfir níu af hverjum tíu vilja Reykjavíkurflugvöll áfram. Merkilegt er að Sjálfstæðismenn í borgarstjórn skuli ekki skynja þessa sannfæringu fólksins heldur margir  berja hausnum við steininn og heimta völlinn burt.

Nú eru fangelsismálin í uppnámi vegna síbyljunnar Hólmsheiðarflugvöll, sem öllum flugmönnum er ljóst að kemur aldrei í stað Reykjavíkurflugvallar. Það þarf engar veðurrannsóknir frekar á því., þetta er allt borðliggjandi.  Mosfellingar vilja ekki sjá flugvöll þarna heldur. Og vegna alls þessa  verðum við  þá væntanlega tugthúslausir næstu ár svo skemmtilegt sem það er fyrir almenning sem vill að glæpamenn séu í fangelsum en ekki lausir á götunum. Og það er einmitt í málefnasamningnum, að það eigi að hætta að berja fólk í miðbæ Reykjavíkur.

Vertu velkominn Ólafur læknir. Þú ert í læknishlutverki við að lækna gömul sár í pólitíkinni. Láttu andstæðingana  ekki stressa þig upp með skítkasti. Láttu samstarfsaðilana hafa fyrir nýju lífi og vinna verkin. Hugsaðu sjálfur um heildaryfirsýnina og stefnumótunina. Slappaðu vel af daglega og njóttu  félagsskapar vina þinna en eyddu ekki orku í að berjast við gjammandi anstæðingastóðið. Þú ert borgarstjórinn okkar allra sem unna Reykjavíkurflugvelli. Við styðjum þig !

Athugasemdir

[Bjarni Kjartansson, 22.1.2008 kl. 18:23]

Seg mér, minn kæri.  Hvenær fluttir þú í Rvík?  Hvernig í dauðanum getur Ólafur verið þinn borgarstjóri, ég hélt ap það væri hann Gunnar gott að búa í Kópavogi og nú raunar líka ,,gott að vera dauður í Kópavogi,"  eftir að Gunnar opnaði kirkjugarðinn.

Miðbæjaríhaldið

e.s.

Hann fer nú samt.

[Valur Stefánsson, 22.1.2008 kl. 21:36]

Jæja Dór, vér eigum von eftir allt

Nú erum við með Samgönguráðherra sem vill hafa völlinn þar sem hann er og einnig Borgarstjóra, betra getur það varla orðið.

Nú þurfum viði bara byggingaleyfi fyrir flugskýlum svo vélar þurfi ekki að vera úti einn veturinn enn.  Það þarf líka að hafa lóða skipti við HR og byggja nýjann háskóla á Keldnaholti. 

[Halldór Jónsson, 22.1.2008 kl. 22:27]

Mitt kæra Miðbæjaríhald, já það er bæði gott að lifa og vera vel dauður í Kópavogi, þar er allt til alls. Nema eini flugvöllur okkar er á Sandskeiði og þar má ekkert gera heldur en í Reykjavík.

Það breytir því ekki að ég vil styðja við Ólaf Magnússon og treysti á hann til verndar gegn  ofsóknum vallarfjánda. Ég vona að þú berir enn taugar til Tálknafjarðar þó að þú sért þaðan fluttur með þín sálarkeröld og íhald. Ég er fæddur í Reykjavík við flugvöllinn og þar eru mínar rætur.

Já Valur , nú er von í fyrsta sinn.

Ef hægt væri nú að sannfæra ráðamenn um það, að fluginu sé nauðsynlegt að fá að byggja yfir flugvélar sínar á Reykjavíkurflugvelli. Stálgrindahús, sem megi skrúfa niður og flytja suður á Patterson, þegar þeim þóknast að loka vellinum. Hvað eiga þessir menn á hættu með því að leyfa slíkt ?

Bjarni minn, sérð þú einhverjar hættur í því fólgnar ?

Aðstöðuleysi viðskiptaflugsins og einkaflugsins stendur allri flugstarfsemi fyrir þrifum. Ég held að það mynu verða byggðir nokkur þúsund fermetrar af nýjum flugskýlum á þessu ári ef þetta yrði leyft núna.