Ný ríkisstjórn.

Þá höfum við nýja ríkisstjórn.  Til hamingju með það. Í kvöld  munu  indíánarnir á Austurvelli væntanlega  stíga villtan dans við eldana sína og sprengja púðurkellingar. Hvað mun þessi nýja stjórn  afreka ?  Hverjar verða fyrstu ráðstafanir  nýrra stjórnar ? Ef hún þá þorir nokkuð að gera annað en tala um þjóðarhag.

Ég held hún athugi að stórhækka fjármagnstekjuskatt, setja á hátekjuskatt, hækka staðgreiðsluna, hækka öll gjöld og álögur til ríkisins , lækka vexti og verðtryggingu svo að sparnaður leitar frá bönkunum. Hún mun velta fyrir sér að auka útgjöld til félags-og heilbrigðismála. Við það vex verðbólgan  og gengið mun  líklega falla þar til að innflutningur stöðvast að mestu. Heimskreppan hefur áhrif á útflutninginn þannig að ekki blæs byrlega fyrir stjórninni.   Hún mun sjálfsagt auka veiðiheimildir og endurúthluta,   sem núna munu helst hækka fjallið af óseldum afurðum.

Hún mun líklega breyta einhliða  AGS samningum með auknum ríkissjóðshalla með óþekktum afleiðingum sem hljóta að leiða til aukinna hafta á landinu.   Verðbólgan  og atvinnuleysið geta því  auðveldlega farið í  óþekktar hæðir fyrr en varir.

Hugsanlega  mun þessi nýja stjórn fyrirskipa launa-og bótahækkanir yfir línuna. Þetta er jú ríkisstjórn Skallagríms og hins vinnandi fólks. Og svo auðvitað heilagrar Jóhönnu. 

Nema að stjórnin hafi vit á að gera helst ekkert eins og menn ásökuðu gömlu  stjórnina um að gera. Nema auðvitað að reka Davíð úr Seðlabankanum.

En geri hún eitthvað af ofansögðu þá hrynur hún ofan í rústakjallarann  í maí. Eftir kosningar fer næsta stjórn eins, en þá hafa  byltingaröflin og indíánarnir  bæst í ráðherrahópinn.

Loks þegar það er allt búið  fara menn að skima eftir leifunum af gamla íhaldinu. Menn fara að rifja upp gömul orð  Bjarna heitins Benediktssonar:  Munið það piltar, að þótt við séum vondir, þá eru aðrir verri.  Það munu menn um síðir sjá. 

2011 eða fyrr verða því aftur kosningar og þá fyrst held ég að Sjálfstæðisflokkurinn komi aftur að stjórn landsins. Þangað til verður langur tími og miklir erfiðleikar. Erfitt verður að koma fram pólitískum málflutningi fyrir ofurveldi Baugsmiðlanna. Pólitísk umræða mun því stjórnast að miklu leyti af hagsmunum Baugs. Nema að Sjálfstæðisflokkurinn fari loks að huga að nútíma fjölmiðlun. 

2015 hefur ástandið í USA hugsanlega lagast eitthvað og heimurinn þá líka .  En þá verður ESB umræðan löngu fyrir bí á Íslandi og enginn vill muna það sem hann segir  núna. 

Athugasemdir

[Predikarinn - Cacoethes scribendi , 27.1.2009 kl. 14:31]

Sælir.

 Þetta er góð greining á ástandinu. Sennilega sannferðug hugleiðing um framhaldið.

[Sigurður Þór Guðjónsson, 27.1.2009 kl. 16:13]

Hafi einhver reynt fyrir fimm árum að spá fyrir um ástand mála í ársbyrjun 2009 er hætt við að ekki hefði spáin ræst. Það er ekkert hægt að spá  nema þá helst um veðrið! 

[Haraldur Davíðsson, 27.1.2009 kl. 19:28]

Hver segir að þessu sé lokið ? Þetta er enganveginn ásættanleg niðurstaða, aðkoma hvers sem er af gömlu flokkunum er sama súpan...

..ekki horfa á þetta í gegnum nálarauga flokkspólitíkinnar, það eru til aðrar leiðir til að reka þetta land, þótt auðvitað sé verkefnið ætíð hið sama. Við breyttum rækilega til 1918 og 1944, og það getum við líka nú. Við stöndum frammi fyrir því sama að mörgu leiti, og það er svosem ekkert til að skammast sín fyrir, að breyta, bæta, og laga til...vaxa, dafn og þroskast. Lýðveldið er ungt og þetta er tækifæri til að sameinast um að vera ein þjóð, en ekki tvær eða þrjár eða....

Þú afsakar lengd pistilsins...góðar stundir.

[Sveinn Hjörtur , 27.1.2009 kl. 21:16]

Merkileg lesning og ágæt spá! Vona samt hún gangi ekki öll eftir!

kv.

[Þórir Kjartansson, 28.1.2009 kl. 08:37]

Já Halldór. Og allt sem að ofan er talið hefur hátt í tuttugu ára valdaseta Sjálfstæðisflokksins kallað yfir okkur.  Það eru nokkur ár síðan að ég fór að spá því að það tæki þjóðfélagið einhverja áratugi að jafna sig eftir stjórnartíð Dabba og Dóra.  Það er rækilega komið fram.