Lítill fugl

er að tína eitthvað upp í sig í rennusteininum þegar ég kem æðandi á stórum bíl með ljósum eftir götunni. Fuglinn hoppar uppá gangstéttarkantinn meðan ég fer framhjá og sé í baksýnisspeglinum að hann hoppar niður aftur og heldur áfram að tína.

Getur einhver sagt mér hvernig þessi litli fugl með svona agnarlítinn heila getur farið að því að vita það að bíllinn minn, sem hlýtur að líta út eins og risaolíuskip í mínum augum sé ekki nærri eins hættulegur og kötturinn sem lúrir í garðinum og situr um hann. Hvernig getur þessi litli fugl vitað að það er land hálfan hnöttinn í burtu  sem bíður þess að hann komi þangað eins og venjulega? Og hann gleymir því ekki á sólarströndinn í hitanum þar að á Íslandi er bjart allan sólarhringinn á sumrin?

Er ekki lífið undursamlegt og makalaust ?  Hvernig getur svona lítill fugl vitað öll þessi ósköp? Eða þá hvernig laxinn getur ratað um hin rámu regindjúp til Borgarfjarðar?

Er maður ekki í raun stoltur af því  að tilheyra mannkyninu þegar maður sér myndir frá Hubble- sjónaukanum af endimörkum alheimsins billjón ljósár í burtu? Að svona lítill maur eins og maðurinn geti vitað allt þetta?  Og svo hversu lítið hann veit um margt annað ? Hvernig þráin eftir því að eignast kjarnorkusprengju til að geta hent á hina óguðlegu knýr hann áfram til hetjudáða fyrir Guð og ættjörðina

Hvað á þessi litli fugl? 

Athugasemdir

[Sigurður Alfreð Herlufsen, 28.11.2010 kl. 21:40]

Það gleður mig oft að lesa bloggið þitt, þó aldrei meir en þegar þú sýnir þínar viðkvæmu hliðar.

Það fer þér afskaplega vel og þú mættir gjarnan gera meira af því !

[Hrólfur Þ Hraundal, 28.11.2010 kl. 22:17]

Skemmtilegar vangaveltur og þakka þér Halldór fyrir margt ágæt.  Það er líka skrítið að þar sem við myndum drepast úr hungri þar geta maurar og ormar lifað góðu lífi.  Ein viðmælandi Gísla af Lundareykjadal sagði að ormar væru ekki svo slæmir ef maður bara slökkti ljósið.

   

[Björn Birgisson, 28.11.2010 kl. 22:32]

Mælir svo fallega nýr maður á Stjórnlagaþingi Íslendinga? Þá er von! Takk!

[Helga Kristjánsdóttir, 28.11.2010 kl. 23:19]

  Þú ert skáld kallinn!  Ég kemst við! Kveðja.

[Halldór Jónsson, 29.11.2010 kl. 14:54]

Sigurður Helufsen,

þakka þér fyrir góð tilskrif sem endranær. Maður veðrast allur upp þegar maður fær svona kveðjur.Það sama gildir um hana Helgu, ég ykkur báðum mjög þakklátur fyrir ykkar orð.

Björn minn Birgisson, ég á nú ekki von á því að svo margir hafi greitt mér atkvæði að ég komist á þingið. Þekkirðu einhvern hefði hugsað um það ef hann hefði farið á kjörstað?

Já Hrólfur,

Þetta er allt spurning um vana. Ormar eru margir geðslegri en maður heldur þegar maður fer að skoða þá greyin. Þeir eru stórmerkilegir líka eins og ánamaðkurinn er og hans líf. Ég hef oft hugsað um það hvílíkt kvikindi maður er sem ætti skilið helvítisvist og brennistein fyrir að beita þessum vesalingum á öngul. En svo bítur laxinn á og maður breytist í algerlega blóðþyrsta skepnu sem drepur án þess að depla augum og rífur svo í sig kótiletturnar úr nestiskassanaum og segir meeee við kindurnar í haganum.

[Elle_, 30.11.2010 kl. 15:33]

Þekkirðu einhvern hefði hugsað um það ef hann hefði farið á kjörstað?  Og ég sem var að enda við að segja í öðrum þræði að ég hefði kosið þig.  Og fínn pistill.  Verður maður kannski líka að segja að þú sért skáld til komast í náðina?

[Halldór Jónsson, 30.11.2010 kl. 23:14]

Gamla bloggvinkona Elle, þú ert sko alltaf í náðinni hjá mér.

[Björn Birgisson, 1.12.2010 kl. 00:40]

Færslan er gullfalleg og allrar athygli verð. Sé það einhvers virði, þá varstu á mínum kjörseðli, einn 25 frábærra Íslendinga. Lítill fugl í Grindavík hugsaði til þín. 11 af þeim 25 sem ég kaus komust að. Ekki þú, en karlmennið grætur það ekki. Glottir út í annað og fær sér sítrón með góðvinum!

Bestu kveðjur, Björn