MP-Banki

er nú búinn að fá nýtt hlutafé og búið að bjarga bankanum frá lokun. Hann er líka búinn að fá sér Þorstein Pálsson fyrrum forsætisráðherra og ritstjóra Fréttablaðsins í stól stjórnarformanns.

Sem sagt, búið að flikka út á útlitið og styrkja innviðina. En hvað með framhaldið? Orðspor MP-banka er vægast sagt litað. Tiltektir bankans á fjársfestingarsviðinu eru ekki allar glæsilegar. Einn fyrrum bankastjóri MP sætir ákæru fyrir þátt sinn í Exeter-málinu. En þar hafði MP-banki milligöngu um að stela 1100 milljónum af BYR í þágu stjórnenda þess félags. Þar eru ákærðir Jón Þorsteinn stjórnarformaður, Ragnar Z. bankastjóri og Styrmir Þór Bragason bankastjóri MP-banka. Við ákæru slapp Birgir Ómar Haraldsson, varastjórnarmaður í BYR, sem þó fékk 200 milljónir af þessum peningum í sinn hlut í sama gerninginum með stofnfjársölu í dauðadæmdum BYR.

En fortíðin skiptir ekki máli. Nú er MP-banki eini bankinn sem lýtur ekki forsjá ríkisins. Almenningur ætti því að flykkjast til bankans og gera hann að peningastofnun fólksins. Hann ætti að verða viðskiptabanki almennings og banki sem almenningur gæti treyst að muni spila uppi á borðinu. Taka við gömlu sparisjóðahugsjóninni sem Steingrímur er búinn að stela og eyðileggja. Mp-banki má ekki að vera jafnframt fjárfestingarbanki sem stendur í stórum útlánum til stærstu og ráðandi eigendanna og viðskiptabanki með sparifé almennings. Þessar bankahefðir voru ekki virtar í gamla bankakerfinu. Þetta skeði í Landsbankanum undir forsæti mikillar skrautfjaðrar. Þetta skeði í Kaupþingi.Þetta skeði í SPKEF. Þetta skeði í BYR.Þetta skeði í Glitni.

Það er eðlilegt að fólk spyrji á hvaða leið MP-banki sé núna. Sé þessum banka treystandi fyrir sparifé eða eigi að endurtaka leikinn. Guðjón í OZ ætli bara að fá sér marga milljarða að láni út á þennan eina sem hann lagði inn.

Ég hef sett mitt traust á MP-banka og vil því styðja við einkabanka. Ég hvikaði ekki þó að bankinn ætti undir högg að sækja síðustu misseri. Ég vona að MP-banki muni ekki valda mér vonbrigðum.Ég er einkaframtaksmaður. Ég vil ekki ríkisrekstur.Ég vil viðskiptafrelsi en heiðarleika og traust í viðskiptum. Ég er Sjálfstæðismaður sem vill að hér myndist aftur bankahefð á heilbrigðum grundvelli eftir að siðferðislegir vanvitar eða hreinir glæpamenn hafa troðið allt slíkt í svaðið.

En aðeins MP-banki sjálfur getur komið fram fyrir almenning og skýrt frá áformum sínum. Hvort hann ætlar að láta af fyrri háttum í samanhræru viðskipta-og fjárfestingarbanka, hvort hann ætlar að takmarka útlán til einstakra lántakenda og TENGDRA AÐILA hverju nafni sem nefnist, við 1 % af bankanum eins og alvörubankar gera og lána ekki stórum hluthöfum sínum né veita þeim ábyrgðir utan efnahagsreiknings eða innan.

Þetta verður MP-banki að tryggja á einhvern sannfærandi hátt. Annars fær almenningur ekki aðra mynd af bankanum heldur en að hér sé sami grautur í sömu skál sé á ferðinni.Það leiðir aðeins til glötunar fyrir bankann. Og sem meira er, það fer endanlega með það litla sem almenningur kanna að hafa átt eftir af trausti á heiðarleika í bankastarfsemi.

Það er undir þér komið MP-banki.Þú getur orðið fyrirmynd. Þú átt leik í stöðunni!

Athugasemdir

[Ómar Bjarki Smárason, 27.4.2011 kl. 22:39]

Skelfing er nú gott að vera ekki ríkari en svo að maður þurfi ekki að hafa áhyggjur af því að tapa stórfé þegar eigendur banka fara að safna að sér fé til útflutnings jafn skjótt og möguleikar til þess opnast.... Það er svo miklu erfiðara að stela af manni skuldunum.....!