Evrópuherinn

Það er eitt mál sem Evrópusinnum skýst dálítið yfir í umræðunni, en það eru samþykktirnar í Lissabon sjórnarskránni, sem við munum undirgangast með inngöngunni sem gera það að verkum , að Íslendingum býðst að leggja okkar skerf fram til hermála Evrópusambandsins.  Unga fólkið okkar fær þar tækifæri til að gegna herþjónustu í Evrópusmabandinu og gera Ísland þar með að þjóð meðal þjóða sambandsins. Eitthvað sem sjálfvirðing þjóðarinnar hefði ef til vill ekki slæmt af.

Það er þekkt staðreynd að Íslendingar eru illa bagaðir af agaleysi. Ókurteisi, ruddaháttur  og skepnuskapur í umgengni ríður hér húsum eins og frásagnir um umganginn í miðborg Reykjavíkur eftir fyllerín þar heimsfrægu  Makalaust að eigendur öldurhúsanna skuli ekki vera látnir kosta þrifin að einhverju leyti þar sem tengslin eru augljós. Ég veit ekki hversu mikið  t.d. Hótel Geysir í Haukadal greiðir til viðhalds á hverasvæðinu eða vertshúsið við Gullfoss greiðir til viðhalds göngustiganna, en tengslin eru þar líka nokkuð augljós milli aðstöðu og einkagróða. Auðlindagjald þykir sjálfsagt í fiskveiðum svo dæmi sé tekið.

Ungir menn í herþjónustu læra að bursta skó sína og hegða sér eins og siðaðir menn í hernum. Þetta eimir eftir í þeim síðar í lífinu.   Því verður ekki trúað að Íslendingar ætli bara í Evrópusambandið til að byggja alla sína tilveru á því að vera stikkfrí, stikkfrí frá fiskveiðisstefnu sambandsins, stikkfrí frá hermennsku, stikkfrí frá því að uppfylla skyldur sínar. Vilji bara taka fyrir sig en ekkert að láta í staðinn, ekki vera fullgildir félagar heldur svíkja aðra eins og þeir geta meðan þeir græða sjálfir.

Það er einhver fóbía í gangi hér í hinni opinberu og miðstýrðu umræðu,  sem bullar um það að Íslendingar séu vopnlaus þjóð og friðelskandi sem aldrei taki þátt í hernaði og bla bla. Við höfum bara verið svo fáir að við höfum ekkert haft fram að leggja.  Innrætið okkar er ekki hótinu skárra en hjá Agli Skalla ef út í það er farið.  En það er áróður kommúnistanna gegn hermennsku hjá okkur af því að hún færi fram í hópi vestrænna þjóða sem stýrir hugsuninni.  Í því skyni níða þeir niður hermennsku fyrir okkur eins og að sé eitthvað niðurlægjandi og fyrirlitlegt í allri hermennsku þó þeir sjálfir hafi tekið fagnandi þátt í hermennskuþjálfun í austantjaldslöndunum og hafi haldið því fram að "hér mætti skjóta án allrar miskunnar ef það kæmi Rússum að gagni." Þeir gleyma því að hermaður er opinber embættismaður þjóðar sinnar sem getur verið jafnstoltur af starfi sínu eins og hver annar,  prestur, kennari eða bankastarfsmaður. Maður hittir aldrei Bandaríkjamann sem er ekki stoltur af því að hafa verið í hernum og þjónað föðurlandinu.

Kannski lagast þetta með uppeldið hjá okkur og umgengnina þegar ungir Íslendingar fara að gegna herþjónustu í Evrópuhernum og við hættum að hugsa bara um undanþágur og sérréttindi og förum að axla samevrópska ábyrgð eins og í fiskveiðimálum. Ég hef séð marga unglinga hérlendis sem hefðu gott af því að læra að bursta skó og temja sér kurteisi í framkomu eins og menn og draga lærdóm af því að vera opinberir og ábyrgðarfullir embættismenn þjóðar sinnar eins og hermenn eru.

Kannski er Evrópuherinn það sem okkur vantar hvað mest?

Athugasemdir

[Rafn Haraldur Sigurðsson (IP-tala skráð) 28.7.2011 kl. 17:23]

Flottur pistill hjá þér, en sennilega fær Össur undanþágu frá herþjónustu eins og öllu öðru í Evrópusambandinu nema kanski fiskveiðum þar sem við þurfum eingar undanþágur að hans sögn.

[Gunnlaugur I., 28.7.2011 kl. 18:12]

Sæll Halldór.

Eins og ég hef oft mjög gaman af því að lesa fróðlega pistlana þína og oft, en alls ekki alltaf er ég sammála þeim.

Þá skil ég samt illa þessa meintu "kommúnistafóbíu" þína, þó ekki sé ég á þeirri línu þó ég hafi lengst af talið mig til vinstri í pólitík, en er reyndar fyrir lífstíð hreinsaður af því að ég geti stutt Samfylkinguna sem ég gerði í fyrstu.

Ég held nefnilega eins og skoðanir þínar eru og þú ert innréttaður að þá hefðir þú á unga aldri svona svolítið ferkantaður eins og þú ert orðið alveg ágætis efni á sanntrúaðan Sósíalista, ef ekki hreinan Komma.

Það hafa kannski aðeins verið uppeldis aðstæður og kreðsurnar sem settu þig kannski alveg óvart hinu megin við strikið.

Ég vona að þú takir þessu ekki illa heldur frekar sem góðlátlegum húmor sem sýnir aðeins hversu stutt getur verið á milli raunveruleikans og sjálfrar hugmyndafræðinnar ! Sjálfur átti ég foreldra sem voru alveg á sitthvorri línunni ! Var reyndar nokkuð pólitískt þroskandi ! Bestu kveðjur !

[Halldór Jónsson, 28.7.2011 kl. 21:18]

Ekki veit ég hvar þú varst Gunnlaugur á dögum Sovétsins. Þeir sem þjónuð málstað þeirra eru margir sprellifandi í dag. Þeir voru kallaðir kommúnistar þá þér til upplýsingar. Ég nota orðið "kommar" oft sem safnorð yfir svokallaða vinstri menn sem virðast aldrei vita hvað þeir vilja hvað þá að þeir geti setið á sárshöfði hver við annan.

Rafn Haraldur, það urðu margir hissa þegar Össur taldi Íslendinga ekki þurfa neinar undanþágur. Enda er það mála sannast að þær yrðu aldrei nema til skamms tíma. Fiskveiðistefna Sambandsins liggur fyrir og frá henni verður ekki kvikað skiljanlega.

[Gunnlaugur I., 29.7.2011 kl. 15:59]

Sæll Halldór.

Ja þó ég hafi verið mikill vinstri maður á unga aldri í mikilli andstöðu við föður minn en til mikils fagnaðar fyrir móður mína, þá var ég aldrei kommi og þó var ég skráður í Alþýðubandalagið um einhvern tíma.

Margir vina minna sem voru í þá tíð raunverulegir byltingarsinnar og voru í Fylkingunni og Marx Lenínistunum töldu AB vera smáborgaralegan krataflokk og einnig ferlega endurskoðunarsinnaðan og langt í frá hæfa til þess að leiða alvöru sósíalisma eða fylgja kenningum í anda Marx og Leníns, sem voru þeirra Guðir.

Ég var andstæðingur Sovéttsins frá unga aldri og taldi það algerlega óhæfa stefnu og ekki til eftirbreytni fyrir nein þjóðfélög.

Þeirri stefnu hef ég verið trúr og tel markaðsdrifinn þjóðfélög vinna best að því að byggja upp hagvöxt og velferð, þó svo að þar þurfi að koma til sterkt aðhald almennings og stjórnvalda. Tel þennan voðalega Bankakapítalisma dæmi um illa heppnaðan loftbólukapítalisma sem þurfi að koma böndum yfir.

Svo erum við báðir sannir andstæðingar ESB helsisins, þannig að það er ekki svo langt á milli okkar í skoðunum tel ég.