Háa C-éið

var saga eftir Ingimund, öðru nafni Kristján Linnet bæjarfógeta, sem skrifaði skemmtisögur í gamla daga í Speglinum og víðar.  Þessi var um söngvara sem missti röddina og og læknir hans setti í hann háa-céið í formi einhver apparats. Svo söng söngvarinn háa-céið á konsert en það hætti ekki tónninn og beljaði meira en Guðmundur Jónsson í langa tóninum í Hraustir Menn,  óstöðvandi þangað  til læknirinn  loksins æpti þegar söngvarinn var orðinn kolblár í framan  "Taktu það útúr þér maður og þá loks gat söngvarinn stoppað og náð andanum. 

 

Nú hefur Lilja Mós stofnað enn einn smáflokkinn til höfuðs fjórflokknum. Þessi nýi á að belja áfram óstöðvandi á háa Céinu um allt sem hinir sviku, norrænu velferðina og allt það. Þetta er mikið happ að fá svona nýjan flokk til dæmis í staðinn fyrir Atta Kitta Gauju með allt frjálslyndið og svo Þór Saari og brotin útúr honum þegar hann dettur út næst.  Það vildu svona flokk eins og Atta Kitta Gauju  ekki nokkur maður til lengdar og hugsjónamennirnir síkátu   hlupu fyrir borð einn af öðrum. Og flestir þeirra ganga bara í  þennan viðbjóðslega fjórflokk aftur þaðan sem  þeir komu. Sagan geymir marga svona smáflokka sem lifna eins og stjörnuhröp og lýsa skamma stund áður en þeir slokkna.  

 

Svo er víst von á Guðmundi Steingrímssyni með enn einn flokk sem öllu á að bjarga þar sem enginn vildi hann í fjórflokknum. Hann verður að belja einhverja nótu eins og Lilja og kannski velur hann kontra A svona til að hafa sérstöðu.  Hugsanlega verður þetta svipað  með hana  Lilju Mós blessaða. Þegar Háa-Céðið hefur flautað um stund verður hún að taka það útúr sér eins og söngvarinn sæli til að ná andanum.

 

Og þá eru kjósendur kannski fljótir að gleyma flautinu.

 

Athugasemdir

[Sigurður Þorsteinsson, 8.2.2012 kl. 23:51]

Að lesa Halldór vin minn Jónsson fyrir svefninn er algjörlega frábært. Talar tæpitungulaust og með einstaklega skemmtilegum stíl.

[Jón Ríkharðsson, 9.2.2012 kl. 02:10]

Halldór minn, í bloggheimum dvelur marglitur hópur fólks.

Sumir eru þannig, að þótt ég hafi ágætis lýsingarorð yfir þetta ágæta fólk, þá treysti ég mér ekki til að birta þau á opinberum vettvangi, ég er hræddur um að mbl.is myndi snarlega loka á mig ef ég léti það eftir mér.

En svo er fólk eins og þú og nokkrir fleiri sem lýsa upp myrkur vanþekkingar margra sem telja sig þó vita allt, en þeir sjá aldrei ljósið. Ég skal fúslega viðurkenna að ég fæ oft innblástur frá þér, sem ég nota svo í mín eigin skrif. Ég les alltaf pistlana þína, en stundum er ég ekki í stuði til að kommentera, þannig að ég læt þá lesturinn nægja.

Þessi pistill hjá þér er með þeim betri sem ég hef séð, hvert einasta orð er meitlað og svo satt, samlíkingin með háa Cið á vel við, því þetta lið hefur hátt um stund en gefst svo upp.

Það er nefnilega betra að nýta orkuna vel, staldra við og hugsa áður en farið er að tjá misvitrar skoðanir á opinberum vettvangi.

Þetta er kannski svolítið háfleygt hjá mér, en stundum finnst mér gaman að láta hugann flæða og tjá þær hugsanir sem koma, þessi pistill hafði bara þessi áhrif á mig og ég vil þakka þér fyrir hann.

[Halldór Jónsson, 9.2.2012 kl. 21:30]

Þakka þér fyrir vinur Ziggi, nú höfum við eitthvað að tala um á laugardaginn eftir tíðindi dagsins.

Jón Ragnar, kærar þakkir fyrir þín orð, manni hlýnar um hjartarætur hafi manni tekist að framkalla eitt og eitt bros einhversstaðar og snert streng sem endurhljómar þangað til að aðrir fara að syngja líka.Þannig verður það með þig þegar þú ferð í baráttuna fyrir alvöru.