Það mun vanta iðnaðarmenn

ef eitthvað færi að hreyfast í þessu landi, sem ég sé reyndar engin merki um.

Hér fæst ekki nokkur rafvirki til dæmis. Þeir eru allir farnir til Noregs og eru enn að fara. Ef eitthvað gerðist hér af viti þá er morgunljóst að þessir menn koma ekki heim til að vinna fyrir íslenska taxta. Það yrði því kaupsprenging hér á markaðnum. Nema ef bara Kínverjar yrðu fluttir inn eins og í Kárahnjúkum þar sem flestir okkar innlendu guttar voru komnir í bréfin hjá bönkunum. Það verður því þensla og verðbólga um leið og eitthvað færi í gang hérna. 

Það er ekki björgulegt útlit hjá einni þjóð sem er búin að tapa flestum iðnaðarmönnum sínum en á bara nóg af félagsfræðingum og opinberum starfsmönnum. Læknadeildin framleiðir helst lækna til útflutnings og þannig má lengi telja. Eftir sitja aldraðir sem ofsóttur minnihluti og enginn vill ráða í eitt eða neitt á vegum ríkis og bæja.

Kýrnar mjólka þó enn á íslensku þó ekki sé hægt að byggja ný fjós vegna skorts á iðnaðarmönnum.

 

 

Athugasemdir

[Anna Sigríður Guðmundsdóttir, 23.8.2013 kl. 21:22]

Halldór. Meiriparturinn af Íslands-börnum eru tækni, lista og iðnmenntunar-hæfileikafólk.

Réttur ungmenna til að mennta sig í sínum hæfileika/styrkleika, ætti skilyrðislaust að vera tilgangur með menntakerfi á Íslandi.

Það býr enginn til meðfædda persónulega styrkleika/hæfileika unga fólksins, í skólakerfi siðblindra menntamálastjórnsýslu-yfirvalda.

Það er löngu tímabært að yfirvöld átti sig á staðreyndum í raunheimum almennings.

M.b.kv.

[Jón Þórhallsson, 23.8.2013 kl. 22:19]

Sæll Halldór; þú ert oft með ágætar greinar/kemst að kjarna málsins.

Ég myndi vilja sjá þig flokka þínar færslur frekar eftir málaflokkum frekar en dagsetningum svo að þínar greinar gætu verið aðgengilegi í framtíðinni.

(Þetta er nú bara svona vinsamleg ábending).

[Halldór Jónsson, 24.8.2013 kl. 20:05]

Anna mín

"Kunst kommt nicht von Wollen, sondern können" sagði dr. Josef Göbbels við hina dáðu sænsku söngkonu Söru Leander.

Jón,

ég er ekki að flokka mitt blogg, það er alltaf skrifað í sama gírnum.

Mér hefur eiginlega aldrei dottið í hug að það væri til nokkurs nýtt, hvað þá að nokkur læsi það að einhverju gagni nema einhverjir fáir einstaklingar sem hafa ekkert annað að gera þá stundina.

Mér dettur hreinlega ekki í hug að framtíðin vilji hætishót hafa með þetta pár mitt að gera. Það er eiginlega mest gert mér til dundurs í einsemd minni og einangrun gamals manns.

En gömlu fólki er almennt hafnað af samfélaginu og hamingjan hjálpi þeim sem lenda í því að verða upp á það komnir. Það er hryllileg tilhugsun byggð á reynslu af því sem ég hef séð.

Ég hef fráleitt heldur lesið bloggin mín aftur í tímann að ráði, þetta eru bara ómerkilega dægurflugur, án nokkurs sérstaks tilgangs nema að hafa ofan af fyrir mér.Áhhrif hafa þau örugglega ekki á einn né neinn.