"Greiða ber út í krónum"

Svo segir í Morgunblaðinu á forsíðu:

"Slitastjórnum föllnu bankanna ber engin skylda til að greiða kröfuhöfum í gjaldeyri heldur er það þvert á móti í samræmi við skyldur þeirra og meginreglur kröfuréttar að við úthlutun sé aðeins borgað út í krónum. Skiptir þá engu þótt um sé að ræða gjaldeyriskröfur enda hafi þær orðið að kröfum í íslenskum krónum þegar föllnu bankarnir fóru í slitameðferð.

 Þetta kemur fram í dómi sem féll í Hæstarétti í fyrradag um ágreining um gengisviðmiðun við útgreiðslur til forgangskröfuhafa gamla Landsbankans (LBI). Lögmenn sem Morgunblaðið hefur rætt við og hafa kynnt sér dóminn segja að hann sæti miklum tíðindum. Það veki ekki síst eftirtekt að þrátt fyrir að það hafi alls ekki verið ágreiningsatriði í málinu þá leggi Hæstiréttur áherslu á að slitastjórn geti ávallt staðið skil á greiðslum til kröfuhafa í krónum.

 Niðurstaða dómsins gæti haft mikla þýðingu fyrir uppgjör gamla Landsbankans, Glitnis og Kaupþings. Fram til þessa hafa slitastjórnir Glitnis og Kaupþings stefnt að því að ljúka við nauðasamninga, sem voru sendir til Seðlabanka Íslands í árslok 2012, svo hægt sé að hefja útgreiðslur í gjaldeyri til kröfuhafa. Samtals nema erlendar eignir föllnu bankanna um 2.300 milljörðum. "

 

Ég er sjálfur ánægður með að Hæstiréttur Íslands hafi komist að sömu niðurstöðu og ég var kominn að fyrir löngu:

 

Að Steingrímur J. Sigfússon hafi reynst afglapi í fjármálum á sinni ráðherratíð. Það sannaði hann meðal annars með gjaldeyrisbréfinu sem hann lét gera milli gamla og nýja Landsbankans. Ekki skárri gerningur heldur an afskipti hans af sparisjóðunum SpKef og BYR, Saga Capital og VBS . Allt kostar það skattgreiðendur ómældar fjárhæðir. Ríkisstjórnarár hans og Jóhönnu eru ein samfelld harmsaga sem endar með dómi Hæstaréttar.

 

Ég er búinn að margendurtaka það að þrotabú Landsbankans og hinna bankanna líka eigi að borga út í íslenskum krónum pro rata eins og önnur íslensk þrotabú. Enginn hefur virt mig viðlits, hvorki stjórnmálamenn né aðrir.

 

Kannski einhverjir taki þá meira mark á Hæstarétti en mér sem segir núna líka:

 

Greiða ber út í krónum. 

Athugasemdir

[Jóhann Kristinsson, 27.9.2013 kl. 14:37]

Kanski að Landsdómur ætti að taka á afglöpum í starfi þeirra Steingríms Jóhanns Sigfússonar og Jóhönnu Sigurðardóttur?

Kveðja frá Niamey Niger.

[Rafn Guðmundsson, 27.9.2013 kl. 16:23]

ég sá þetta líka og tel þetta góðar fréttir en ég er ekki viss. ekkert eða lítið rætt um þetta í fjölmiðlum að mínu viti. kannski eru þetta ekkert góðar fréttir

[Halldór Jónsson, 27.9.2013 kl. 16:34]

Landsbankinn er einhver heilög belja í hausnum á þingmönnum. Þeir geta ekki hugsað sér tilveruna án LANDSBANKANS.

[Ómar Bjarki Kristjánsson, 27.9.2013 kl. 17:42]

Eg er ekki að sjá frettina eða merkilegheitin við þetta. Í raun hefur umrætt alltaf legið fyrir að tæknilega séð væri hægt að greiða út í krónum. Enda eins og farið er yfir í pistli, að við það bankinn er settur í slitameðferð voru allar kröfur færðar yfir í kröfur í íslenskum krónum.

Vandamálið er: Hvað er svona gott við það að greiða erlendum kröfuhöfum út í krónum?

Þá erum við að tala um svo og svo mörg hundruð milljarða ef þúsundir af krónum hérna inni í eigu erlendra sem vilja helst fara með þær út - og hvað?

Þetta væri allavega ekki til að auðvelda losun hafta.

Þetta er í raun ekki það merkilega við dóminn. Það merkilega er að Hæstiréttur Íslands hafnar því að erlendum kröfuhöfum sé greitt á genginu 2009.

Ef fallist hefði verið á upplegg Slitastjórnar Landsbankans - þá hefði það þýtt að kröfuhafar hefðu tapað stórkostlega á gengismun. Hæstiréttur hafnaði því. Og í hópi kröfuhafa var íslenska ríkið með Lárus Blöndal í broddi fylkingar.

[Ómar Bjarki Kristjánsson, 27.9.2013 kl. 17:43]

Edit: ,,Þá erum við að tala um svo og svo mörg hundruð milljarða ef ekki þúsundir milljarða af krónum hérna inni í eigu erlendra sem vilja helst fara með þær út - og hvað?"

[Halldór Jónsson, 27.9.2013 kl. 23:06]

Takk frir góðu vinir.

En er það ekki rétt sem John Maynard Keynes sagði?:

"In the long tun we are all dead."

Raknar og trosnar sá hnútur sem fastast vér bindum.

2008 hverfurt í sjó áranna. No big deal.