Burt með Schengen

er b oðskapur Helga Helgasonar stjórnmálafræðings úr Kópavogi.

Helgi segir m.a.:

"Það vakti athygli mína að í annars ágætri grein sem innanríkisráðherra skrifaði í Mbl. 12. október minnist hún ekki einu orði á eina verstu vá sem riðið hefur yfir íslenskt samfélag. Nefnilega Schengen. En eftir að hafa fylgst með þróun Schengen hér og annars staðar kemur mér það ekki sérlega mikið á óvart að yfirmaður þess ráðuneytis sem fylgdi því hvað harðast eftir að við gengjum í Schengen sé strax orðin samdauna því ásamt embættismönnum sínum.

 

Ögmundur Jónasson setti fram mjög trúverðuga kenningu sem hann kallaði ESB-heilkenni embættismanna. Þar útskýrði hann hvernig embættismenn fara ósjálfrátt að tala fyrir inngöngu í ESB vegna þess að málaflokkurinn býður upp á endalausar ferðir á ráðstefnur um alla Evrópu og verður að óbeinni launahækkun eða veitir ýmis fríðindi og lætur embættismanninum finnast að hann og skrifborðið séu gríðarlega mikilvægur hlekkur í framtíðarvelferð landsins.

 

Þannig virðist þetta líka vera með Schengen. Ef skoðað er hverjir innan stjórnsýslunnar mæla þessu misheppnaða og tilgangslausa samstarfi bót má sjá að það er yfirleitt efsta lag lögreglu og embættismanna í stjórnsýslunni. Þetta er einmitt fólkið sem Vilmundur Gylfason kallaði möppudýr. Oftar en einu sinni hafa óbreyttir lögreglumenn og félög þeirra ályktað um gagnsleysi Schengen. Í hvert sinn sem umræðan um hætturnar sem leynast í Schengen verður hávær bregðast embættismenn við með skýrslum þar sem tíundað er hversu gott það er fyrir þjóðina að vera í Schengen og iðulega tínd til rök sem falla að því....

 

 

.......Öll rök hníga að því að við eigum án tafar að segja upp Schengen. Þegar menn gera rannsókn í aðferðafræði leitast þeir við að bera saman atburði fyrir og eftir. Við vitum að fyrir Schengen þreifst ekki mansal á Íslandi, skipulögð glæpastarfsemi var nánast ekki til, fáir fangar voru útlendir glæpamenn, fíkniefni voru tæpast framleidd í stórum stíl í landinu. Og nú er það nýjasta nýtt, erlendir útigangsmenn eru orðnir svo ágengir að íslenskir útigangsmenn fá ekki lengur pláss í gistiskýlum ætluðum þeim (DV. 28.8. 2013). Á maður að hlæja eða gráta?

 

 

Á sama tíma og innanríkisráðherra skrifar fallega grein um hvað henni er annt um öryggi okkar hinna er allt við það sama og öryggi borgaranna getur bara versnað með áframhaldandi veru í Schengen. Og á meðan sækir efsta lag embættismanna í lögreglunni og innanríkisráðuneytinu áfram kampavíns- og koníaksfundi í Brussel eða fer í vettvangsferðir til Estrasaltsríkjanna til að sjá með eigin augum rússneska glæpamenn kaupa sér aðgang að Schengen á landamærunum eins og íslenska embættiskonan lýsti í fjölmiðlum fyrir stuttu.

 

Og hver voru viðbrögð hennar? Jú, þetta kom henni á óvart! Svo ekkert meira með það, því á eftir beið slökun á hótelinu, þægileg flugferð til Íslands og dagpeningar á eftir. Þjóðin vill úr Schengen. En duglausir embættismenn og stjórnmálamenn þora ekki. Þarf virkilega að fara að safna undirskriftum enn eina ferðina til að koma vitinu fyrir þetta fólk?"

Ég get ekki annað en tekið hressilega undir með Helga vini mínum. Glæpastarfsemin sem hefur flætt yfir okkur er öll tilkomin vegna þessarar  niðeufellingar á landamæragæslu sem Schengen hefur fært okkur. Við ættum að segja þessu samstarfi upp eða túlka það að eigin geðþótta eins og Danir gerðu.

Burt með opin landamæri til Íslands, Verum ekki að flytja inn vandamál þegar við eigum kappnóg af þeim sjálf. 

 

Athugasemdir

[Helga Kristjánsdóttir, 21.10.2013 kl. 09:53]

Formaðurinn var spurður á fundi upp í Hlíðarsmára,hvort hann styddi afnám Shengen,hann svaraði nei. Í bili þokum við því ekkert,nema þá helst ef embættismenn túlkuðu það af eigin geðþótta að hætti Dana.

[Eyjólfur G Svavarsson, 21.10.2013 kl. 10:41]

Halldór ég er alveg hissa á því að við skulum ennþá vera í Schengen. Það sjá allir hvað þetta er vont fyrir okkur, nema möppudýrin. Þarf virkilega undirskrifta söfnun til að ganga úr þessu apparati, það virðist þurfa orðið undirskriftasöfnun fyrir of mörgum málum sem eru áríðandi!!

[Hrólfur Þ Hraundal, 21.10.2013 kl. 12:41]

Tek undir hvert orð í grein Helga Helgasonar í MBL í dag og það er mér áhyggjuefni að ekki skuli vera til stjórnmálaflokkur á Íslandi sem sér hagsmuni sína í að sinna vörnum. 

ESB límið sem límdi saman Icesave kjánana í Sjálfstæðisflokknum hefur ljóslega verið ansi seigt.   

[Halldór Jónsson, 21.10.2013 kl. 13:13]

Takk fyrir þetta Helga. Björn Bjarna hefur varið þetta í líf og blóð sem sá eini frammámaður okkar sem ég hef heyrt í um þetta.

Eyjólfur og Hrólfur. Ég held að við getum verið í Schengen en haft vegabréfaskylduna eins og okkur sýnis ef það er málið. Það þarf bara að spíssa möppudýrin í ráðuneytunum af eins og Helgi bendir á.

[Sigurður Alfreð Herlufsen, 21.10.2013 kl. 13:39]

Ég var svo bjartsýnn að ég gerði ráð fyrir að þetta yrði eitt af fyrstu embættisverkum nýrrar ríkisstjórnar, að losa okkur út úr frjálsu flæði glæpamanna til Íslands.

[Halldór Þormar Halldórsson, 21.10.2013 kl. 16:28]

Þetta er svolítið skondin umræða. Nýlega voru gerðar opinberar upplýsingar um afbrotatíðni í ríkjum innan ESB. Þar kom í ljós að langmesta og raunar eina aukningin á afbrotatíðni var í Bretlandi og á Írlandi. Það er sérstakt vegna þess að þetta eru einu ríkin í ESB sem eru ekki aðilar að Schengen :)

Það er nefnilega þannig, gagnstætt því sem flestir halda að afbrotatíðni er á hraðri niðurleið um allan hinn vestræna heim. Ísland er ekki undantekning í því. Heimur afbrotamanna hefur breyst mjög mikið á undanförnum árum og harðnað, en hvort Schengen er endilega ástæða þess held ég að sé vafasöm fullyrðing. Á hverjum degi eru fréttir um handrukkara og ofbeldismenn sem öllum er talin stafa ógn af. Þeir eru sífellt mynd- og nafnbirtir, en kannski hafið þið tekið eftir því að það er ekki eitt útlent nafn á meðal þessara heimilisvina þjóðarinnar.

Hvort það sé eitthvað vit í að vera í Shcengen samstarfinu veit ég ekki og hef efasemdir um það, en það hefur ekki kostað okkur flóðbylgju afbrota eins og leiða má af umræðunum að framan.