Halldór Jónsson

17.11.2013 | 13:58

Framtíð flugvallarins

í Vatnsmýri er jafn óviss sem nokkru sinni áður.

Horfurnar fyrir framtíð hans breyttust ekkert við prófkjör Sjálfstæðismanna í Reykjavík. Þáttökuleysi bendir ekki til þess að Reykvíkingar hafi teljandi trú á því að sá flokkur muni miklu breyta í málefnum borgarinnar í næstu kosningum.

Reykjavíkurflugvallar bíður því líklega framhald hins hægfara dauðastríðs sem hann hefur þurft að þreyja mörg undanfarin ár, nema fram komi einhver ný pólitísk öfl sem því geti breytt. Fyrir liggur nýtt Aðalskipulag sem gerir ráð fyrir lokun vallarins. Ekkert bendir til annars en að framkvæmd þess haldi áfram. Það sé því aðeins tímaspursmál hvenær völlurinn fari.

Engin uppbygging verður því eða endurnýjun á Reykjavíkurflugvelli næstu ár. Almannaflug og kennsluflug mun hverfa þaðan samkvæmt loforði innanríkisráðherra þó enginn viti enn hvert eða hvenær. Enda er almannaflug aðeins svipur hjá sjón frá því sem áður var.

Það er ekki hljómgrunnur fyrir því meðal borgarbúa að byggja upp Reykjavíkurflugvöll með aukinni starfsemi og aukningar umferðar vegna viðburða svo sem ráðstefnuhalds og þinga til dæmis í Hörpunni eða skjótara millilandaflug. Því miður stefnir ekki í slíkt.

Úrslit prófkjörs Sjalfstæðismanna eru hvergi nærri bindandi fyrir framboðslista vegna þáttökuleysis.Þegar eru umræður hafnar um uppstillingu eða breytingar á listanum sem út kom. Ekki myndi ég persónulega telja líklegt að einhver þröngur hópur flokksmanna geti stokkað framboðsspil eitthvað betur en þau tæplega 5 þúsund gildu atkvæði gerðu. Slíkt myndi hugsanlega kveikja meiri deilur en það myndi sætta.

Það blæs ekki byrlega fyrir Sjálfstæðisflokknum um þessar mundir í þeirri viðleitni að endurheimta fyrri styrk í Reykjavík eða á landsvísu. Má vera að tímarnir séu að breytast meira en við gerum okkur daglega grein fyrir. Fólk hugsi bara öðruvísi en það gerði.

Tilkoma Jóns Gnarrs voru merkileg tímamót í stjórnmálasögunni. Það kann að þýða það að fólk hefur ekki sömu trú og það hafði á því að einstakir stjórnmálamen snerti þess hag svo nokkru nemi. Því sé bara miklu meira að standa á sama en áður var og það segi við sjálft sig að þetta fari bara einhvernveginn, sama hverjir sem bjóða sig fram til starfa og í hvaða röð.

Menn geta velt því fyrir sér hvort horfurnar á því að Sjálfstæðisflokkurinn geti komið einhverju verulega meiru til leiðar eða skapað einhverja hrifningarvakningu ef hann setti Hildi Sverrisdóttur í efsta sætið, Halldór í annað, Þorbjörgu í þriðja, Júlíus í fjórða Áslaugu í fimmta, Kjartan í sjötta, Láru í sjöunda og svo framvegis. Myndi unga fólkið flykkjast á kjörstaði vegna bernsku Hildar, reynslu Halldórs og Evrópuhugsjóna, fyrirmennsku og ríkidæmis Þorbjargar, glæsileika Áslaugar Maríu og vinsælda Kjartans ? Tæknilega er þetta hægt.

En myndi það breyta einhverju fyrir Sjálfstæðisflokkinn?

Það myndi áreiðanlega ekki breyta neinu fyrir flugvöllinn. Framtíð hans yrði ekki í minni óvissu en áður.

Flokkur: Stjórnmál og samfélag | Facebook

Athugasemdir

Það felast í því ótrúleg tækifæri sem í Skerjafirði búum að það skuli vera búið að ákveða að flugvöllurinn skuli fluttur án ákvörðnar um áfangastað.

Nú getum við farið að skipuleggja nýja byggð á okkar einkalóðum, rifið okkar gömlu lágreistu hjalla og byggt hér blokkir í staðinn, væntanlega upp á allt að 20 hæðir. Ég er að spá í að fá nágranna mína með mér í smá skipulagsvinnu og sjá hvort við getum ekki loksins ávaxtað okkar land með því að byggja hér háhýsi í göngu- og hjólafæri við miðborgina.

Það er stundum betra að spila með en að vera að þreyta sjálfan sig og aðra með því að steitast sífellt á móti framförum......!

Ómar Bjarki Smárason, 17.11.2013 kl. 17:47