Aðgerða er þörf?

til að bæta stærðfræðikunnáttu segir skólameistarinn Guðrún Hrefna Guðmundsdóttir í Fréttablaðinu í dag.

Þar kemur helst fram sá skilningur að það sé skorturinn á háskólamenntun reikningskennara í skólunum( og væntanlega launflokkum einnig) sem veldur hinni hroðalegu stöðu í þessum málaflokki sem birtist í hverri úttektinni af annarri.

Grípum niður í grein skólameistarans:(bloggari feitletrar)

"Fyrr í þessum mánuði var birt úttekt á stærðfræðikennslu í framhaldsskólum. Samkvæmt niðurstöðum hennar er staða stærðfræðinnar í skólakerfinu vægast sagt dapurleg hvort sem litið er til kennslu, kennslugagna, námskrárviðmiða eða gæðaeftirlits.

 Í níu framhaldsskólum sem skoðaðir voru, hafði meirihluti kennara minni menntun í stærðfræði en krafa er um í lögum og reglugerðum. Þannig störfuðu samtals 73 stærðfræðikennarar í skólunum níu. Aðeins 18 þeirra voru með háskólapróf í stærðfræði og þar af kenndu 11 í Menntaskólanum í Reykjavík. Jafnframt kemur fram í skýrslunni að nemendur setjast á skólabekk í framhaldsskóla afar misvel undirbúnir úr grunnskóla.

 Námsundirbúningur og námshæfni nemenda annars vegar og gæði kennslunnar hins vegar eru augljóslega þeir þættir sem mestu ráða um árangur. En getum við sætt okkur við það að lítill hluti nemenda í íslenskum framhaldsskólum fái kennslu kennara sem eru menntaðir í stærðfræði? Er réttlátt að það séu fyrst og fremst nemendur sem koma inn í framhaldsskólann með háar einkunnir úr grunnskóla sem fá að njóta kennslu fagmenntaðra kennara á framhaldsskólastigi? Á tímum þar sem hrópað er á meiri kunnáttu í tæknigreinum, sem allar byggja fyrst og fremst á stærðfræðimenntun, vanrækjum við grunninn. Við verðum að bæta úr þessu þegar í stað. Góð stærðfræðimenntun á að vera almenningseign og ekki standa einungis til boða þeim nemendum sem læra fljótt og auðveldlega. Allir eiga rétt á að læra mikla stærðfræði. Góð stærðfræðimenntun er ein tryggasta leiðin til góðra starfa og afkomu á þeirri tækniöld sem nú er gengin í garð.

 

Hvað er til ráða? Skýrsluhöfundar leggja til ýmislegt. Það er mikilvægt að skoða tillögur þeirra vandlega og hefjast handa við áætlanagerð. Hugmynd þeirra um fagráð sem vakir yfir stærðfræðikennslu í landinu er borðleggjandi. Rétt væri að stofna það strax. Einnig þarf að grípa á lofti tillögu þeirra um að veita núverandi stærðfræðikennurum viðbótarmenntun í stærðfræði til að styrkja kunnáttu þeirra í greininni. Setja þarf inn einhvers konar hvata, til að greiða fyrir því að kennarar grípi tækifærið og sæki sér frekari menntun.

 

Um væri að ræða bráðaaðgerðir. Ég óttast að við höfum ekki tíma til að bíða eftir því að nógu margir einstaklingar ljúki háskólaprófi í stærðfræði og öðlist réttindi til að kenna í framhaldsskólum. Þeir fáu sem útskrifast með háskólamenntun í stærðfræði sækja að öllu jöfnu í önnur störf, sem njóta meiri virðingar og eru betur launuð en kennarastarfið hefur verið til þessa.

 

Ef til vill er kostur að sækja til útlanda góða og vel menntaða stærðfræðikennara. Enn ein lausn til að bæta almenna stærðfræðimenntun og gæta jafnræðis gagnvart nemendum er að hefja umfangsmikla framleiðslu á kennsluefni á myndbandi sem sett yrði á netið. Fyrirmynd eru fyrirlestrar Khan Academy, sem margir íslenskir nemendur njóta nú þegar góðs af, ásamt stærðfræðinemendum um heim allan. Slíkt efni á íslensku greiðir fyrir sjálfsnámi, jafnar tækifæri nemenda og getur orðið kennurum í skólunum ómetanlegur stuðningur.

 

Mennta- og menningarmálaráðherra, Illugi Gunnarsson, hefur þegar lýst því yfir að skýrsluna beri að taka alvarlega og að hrinda þurfi af stað aðgerðum til að bæta stærðfræðimenntun í landinu. Við skólafólkið þurfum síðan að fylgja málinu í höfn. Í meðfylgjandi töflu er gróf flokkun á athugasemdum skýrsluhöfunda ásamt tilraun til að tilgreina undir hverja úrbætur um einstök atriði heyra.

 

Við getum vel breytt þessu ef við tökum höndum saman! "

Er ef til vill sá vandi sem konan talar um að kennarar sem eru að kenna reikning í framhaldsskólum séu sjálfir fórnarlömb þeirra vitlausu kennslu sem leitt hefur til ófærni í reikningi í áratugi? Kunni sjálfir ekkert of vel að reikna? Samhliða fækkun karlkyns reikningskennara í framhaldsskólunum held ég líka þar sem ég minnst fárra góðra kvenkennara í reikningi um mína daga. 

Ég efast um að hann Gunngeir Pétursson hafi haft nútíma háskólamenntun í að kenna reikning í Gaggó þegar ég var þar. En þessi maður kunni að kenna og æfa okkur. Lét okkur reikna og reikna og við allir krakkarnir elskuðum þennan einstaka mann. Hópuðumst í kring um kennaraborðið þar sem hann hjálpaði hverjum og einum og við fundum framfarirnar koma yfir okkur. Við vorum ekkert öðruvísi en krakkarnir í dag. En kennararnir okkar voru öðruvísi en kennararnir í dag þó þeir hafi kannski ekki haft prófskírteinin í glerrömmum. Við Gunngeir urðum vinir ævilangt og áttum mörg samkipti eftir þetta sem öll voru á sama veginn vegna ljúfmennsku hans.

Ef þessi ágæta kona vildi gera sér ljóst, að geti nemandi ekki margfaldað saman þriggja stafa tölu með blýanti á blaði(án reiknivélar eða síma) hiklaust í síðasta bekk í grunnskóla eða deilt á sama hátt, þá þýðir ekki að reyna að fara að kenna þessum nemanda algebru eða flatarmálsfræði í Gaggó. Hann verður vonlaus og stefnir í brottfall.

Þetta væri einfalt próf fyrir Illuga að framkvæma ef hann vill fá nákvæma stöðu "stærðfræðikennslu" í landinu. Og áreiðanlega skilvirkari en rándýrar útttektir. Þessi nauðsynlega færni nemenda hefur ekkert að gera með háskólamenntun stærðfræðikennara eða launaflokka að gera. Þetta er bara spurning um smá vinnu sem felst í því að nemandi kunni margföldunartöfluna. Utanað, án tölvu eða síma.

Reikningur krefst æfingar og skýrrar skriftar. Aftur og aftur. Þetta er bara spurning um nemendur læri þær aðgerðir sem reikningur byggist á og sé æfður í þeim. 

Athugasemdir

[Halldór Jónsson, 2.8.2014 kl. 11:29]

Ég held að athuhasemdaleysi við þessa færslu sýni hvað er að Þetta þjóðarmein er til staðar en enginn vill tala um það. Það er búið að vinna stórskemmdir á skólanum með allskyns dellumakeríi frá Svíþjóð eftir að þeir eru sjálfir hættir að nota það eins og mengin á sinni tíð sem eyðulögðu heila kynslóð Íslendinga em eru REIKNINGSFATLAÐIR á eftir. Þessi kynslóð skiptir sér ekki af reikningkennslu né heldur þeir sem svo er ástatt um.