Fríkað út í Forsetakjöri

virðist vera það sem fólk gerir.

Ég man að Sigurður Helgason hjá Flugleiðum skrifaði neikvæða grein um Ólaf Ragnar á kjördag og rifjaði upp ávirðingar hans gagnvart Flugleiðum. Eins og við manninn mælt snérust konur í sundlaugunum sem ég þekki til fylgdar við Ólaf, sumar jafnvel á leiðinni á kjörstaðinn til að kjósa annan því Óli væri svoddan fíbjakk og kommúnisti.

Sama gerðist núna þegar Davíð fór að rökræða við Guðna. Konurnar í Sundlaugunum sögðust unnvörpum ætla að kjósa hann vegna hversu Davíð var mikill dóni í þættinum. Kallarnir sögðu frekar ja mikið assgoti var Dabbi góður að mala Guðna.

Til er gömul saga sem gerðist á Miðengi. Bóndinn á bænum hafði loks haft það af að leggja vinnukonuna þegar frúin kom óvænt að.Hún varð nokkuð ókvæða við og fældi bónda sinn upp með óbótaskömmum og hávaða sem heyrðist langar leiðir. Hann heyrðist samt tauta þegar hann hunskaðist út:" Ekki má nú mikið á Miðengi."

Það virðist algerlega tilgangslaust að halda spjallþætti um Forsetaframboð. Þá má ekkert frekar en á Miðengi forðum. Verður ekki næsti þáttur um gagnkvæma aðdáun með ræðu Páls um Pétur hversu langtum betri Forseti hann Pétur verði heldur en vesalingur minn hann Páll?

Herskonar farsi er þetta eiginlega. Fer ekki fólk að hlusta á kappræður til þess að sjá blóðið fljóta og hver kljúfi hausana betur en hinn? Verðum við kjósendurnir ekki að geta hnakkrifist um það í pottunum hver hafi verið meira ódó en hinn, hver sé sætust af konunum og svo um mælskuna og illgirnina?

Hvað eiga frambjóðendurnir sosum að tala um ef ekki hvorn annan? Þeir eiga ekki að hafa neina stefnu sjálfir þar sem þeir eiga að vera ábyrgðarlausir af öllu. Þeir eiga að vera hlutlausir gagnvart öllum, vinnukonum sem hefðarfrúm. Er ekki bara best að sleppa þessum sjónvarpsþáttum því þeir séu tilgangslausir, það séu allir búnir að ákveða sig hvort sem er.

Við bara fríkum út ef einhver ætlar að að setja út á okkar Forseta.

 

Athugasemdir

[Guðbjörg Snót Jónsdóttir (IP-tala skráð) 1.6.2016 kl. 10:42]

Sammála. Hins vegar mun ég sem dóttir fyrsta formanns Sjómannasambands Íslands aldrei kjósa þann mann, sem talar illa um sjómenn og gerir lítið úr afrekum þeirra, svo að ég held mig við Davíð. Við munum líka söguna. Ég veit heldur ekki, hvernig Guðni ætlar að fara að afsanna það, þegar Guðmundur Kjærnested sigldi Varðskipinu Þór stórlöskuðu, svo við lá, að hann sykki, inn til Seyðisfjarðar eftir átök við breska freygátu, og Bretarnir dáðust að seiglunni í íslensku varðskipsmönnunum. Hvað ætli Guðni muni eftir þessu, sem var aðeins strákpjakkur innan við tíu ára aldur á þessum tíma, og hefur sjálfsagt hugsað um allt annað en sagnfræðiheimildir og landhelgisstríð? Við, sem eldri vorum, munum þessa sögu betur og fylgdumst með fréttunum skelfingu lostin stundum. Ég kæri mig ekkert um þann mann á Bessastaði, sem talar niður íslenska þjóð og gerir lítið úr henni á alla lund, og virðir ekki sagnfræðilegar staðreyndir, eða vill halda sig við réttar heimildir, enda eru til heimildir fyrir þessu með Þór, og jafnvel þeir menn enn á lífi, sem unnu í Slippnum á Seyðisfirði og tóku á móti varðskipinu og geta staðfest ástandið á því, þegar það kom inn til hafnar. Guðni ætti að reyna að véfengja það eða afsanna! En það er líka rétt, sem þú segir, að þessir sjónvarpsþættir eru vita gagnslausir og hundleiðinlegir, ekki síst þegar um er að ræða fjölmiðla, eins og við búum við í dag. Það var eitthvað önnur öldin, þegar fyrri forsetakjör voru. Þá var hlustandi á Rúv og 365 miðla, en tæplega í dag, því miður.

[Valdimar Samúelsson, 1.6.2016 kl. 19:48]

Halldór ég hafði gaman að þessu með sundlaugar konurnar og sagði minni þetta þar sem hún móðgaðist út í Davíð en nú er hún komin aftur í Davíðslið og ein sem kom í heimsókn í eftirmiðdaginn sagði að Guðni væri að dala sem fyrsti kostur svo sjáum til. Kannski verður þetta keppni á milli Davíðs,Sturlu og Andra. Kannski eigum við að treysta Kellunum... 

[Helga Kristjánsdóttir, 3.6.2016 kl. 04:32]

 Ættum við þá ekki að sýna honum seigluna í okkur?Hversu öflug við vorum í ESB svika umsóknarferli Össurar,með allt að því A/4 örk úr pennanum án undirskriftar forseta vors. Eru ekki allir að sjá prettina.- Þeir sem aldrei hafa skipt sér af pólitík verða að átta sig á að nú er það landið,þjóðin sem er í útrýmingathættu. ....

[Halldór Jónsson, 3.6.2016 kl. 07:32]

Það er eins og skvetta vatni á gæs að reyna að rökræða við þessa þjóð. Hún er gersamlega rökheld. Guðni segir að þetta landhelgisstríð hafi verið hálfgert sport hvað sem þú hefur séð Guðbjörg. Þótt Davíð segist ætli að gera þetta fríkeypis, neinei þá reiknar 101 lýðurinn það í mínus strax og það dugar 365 miðlum og Þorvaldi, enda Guðni enginn ESB andstæðingur. Og svo er hann svo sætur og sjarmant, það skiptir engu hvað er í hausnum á honum. Helga, ég þykist vita aða þú hafir áhyggjur af því sama og ég. Vill ekki Guðni bara opna allt á gátt? Ekkert af því sem gerist annarsstaðar skeður hér.

Kosningarnar eru allt að því búnar þar sem góða fólkið og elítan er búin að gera upp hug sinn.