Moðsuðan

birtist í Morgunblaðinu í dag.

Þar er beint haft eftir Hjálmari Sveinssyni bókmenntafræðingi skipulagsmála hjá Reykjavíkurborg:

"Engin önnur lausn í boði Hann segir að markmiðið sé að hlutfall þeirra sem notist við almenningssamgöngur fari úr 5% í 12% árið 2030. ,,Að mínu mati er engin önnur lausn í boði [en að leggja áherslu á almenningssamgöngur]. Það er búið að margreyna hitt víða í heiminum og m.a. í Reykjavík.

Með því að bæta sífellt við nýjum akreinum og mislægum gatnamótum, þá fyllast þessar nýju akreinar um leið,“ segir Hjálmar. "

Af hverju fer þá ekki fólkið í almenningssamgöngurnar en bíður heldur í bílunum sínum á yfirfullum götunum meðan strætóarnir keyra tómir?

Skyldi fólkið heldur virkilega vilja einkabílinn heldur en almenningssamgöngur? Af hverju kýs það þá Hjálmar?

Ekki úthluta lóðum því þá er bara byggt á þeim.Ekki byggja götur því þá fyllast þær bara af umferð. Ekki byggja hjúkrunarheimili né spítala því þá bara fyllast þær byggingar af rúmliggjandi fólki.Ekki byggja skóla eða ný hverfi því þá bara fyllast þau af börnum. Er ástæða til að byggja kirkjugarða á dýrmætum útivistarsvæðum þar sem hægt væri að hjóla?

Er þetta ekki moðsuða meirihlutans í Reykjavíkurborg?

Athugasemdir

[Halldór Jónsson, 22.12.2016 kl. 09:01]

Svo skrifar Ívar Pálsson viðskiptafræðingur:

Sósíalista- tvíeykið sem heldur skipulagi Reykjavíkurborgar í helgreip sinni opinberar ídealisma sinn í staðnaðri jólaumferðinni þar sem andstæðingur þeirra er meginþorri almennra borgara sem kjósa að ferðast um á bílum. Dagur B. Eggertsson borgarstjóri hefur marg- rætt það hvernig samgöngumáta hann vill að við notum en nú bætir Hjálmar Sveinsson, formaður umhverfis- og skipulagsráðs vel í og lýsir sýn sinni við Morgunblaðið 19/12/2016. 

Umferðarkerfið springur hvort eð er

Hjálmar segir það engu breyta þótt byggð verði mislæg gatnamót því framtíðarspár um umferðarþunga sýni að gatnakerfið muni springa ef umferð vegna einkabílsins eykst á sama hraða og hún hefur gert liðna áratugi. "Ef umferð eykst eins mikið til ársins 2040 og hún gerði árin 1987- 2012 þá verður hér allt stopp" segir Hjálmar. Þá rifjast upp fyrir mér skrif hans á vefnum hjalmar.is um aðalskipulagið árið 2014 þar sem segir m.a.:  "Skipulagið markar tímamót. Með því er horfið frá bílmiðuðu skipulagi borgarinnar, sem hefur ríkt hér í 50 ár, og tekið upp skipulag sem setur manneskjuna í öndvegi." 

Einnig segir hann, ef byggt verður í austurjaðri borgarinnar:

"Þá verða úthverfi að innhverfum og bílaumferðin á stofnbrautum borgarinnar austur og vestur kvölds og morgna margfaldast.Það mun lengja vegina í borginni, kalla á óhemju dýrar framkvæmdir við umferðamannvirki, auka svifryksmengun og vinna gegn almenningssamgöngum, hagkvæmri nýtingu innviða og skynsamlegri landnýtingu. Það er algjörlega glatað."

Þessum bílum verður ekið

Þetta er í höfði Hjálmars, en hver er svo raunveruleikinn? Fólk endurnýjar bíla sína og vill nota þá, hver metmánuðurinn rekur annan í bílasölu og umferð. Ferðamenn (fjölgar um 30% á ári) sem hingað koma vilja gjarnan líka vera á bíl eins og heimamenn, enda er það sjálfsagt hér í rýminu á norðurhjara. Tölurnar sýna skýrt að yfir 80% ferðalaga fólks á Reykjavíkursvæðinu á veturna er á bílum, þrátt fyrir gott framboð strætisvagna.

Áætlun Samfylkingar

Um 12.000 bílar bættust í umferð Reykjavíkur á þessu ári en Hjálmari Sveinssyni finnst ekki vert að framkvæma í takt við þróunina, heldur í samræmi við stefnu hans og Dags sem hefur beðið skipbrot, enda hefur stuðningur við Samfylkinguna í borginni helmingast frá síðustu kosningum. 

Stopp í umferðinni

Á meðan kúgunarfélagarnir eru við stjórn stíflast umferðin meðvitað, enda er það beinlínis í skipulaginu að hægja á henni. Það tókst nokkuð vel því að meðal- ferðatími fólks til vinnu og skóla hefur lengst um 12 mínútur á nokkrum síðustu árum. Þannig fórnum við 24 mínútum á dag vegna stefnu þessa fólks sem er þvert á vilja einstaklingsins til að stýra sínu lífsmynstri sjálfur. 

Kjósið þau burt

Það mun taka fjölmörg ár að vinda ofan af þessum uppsöfnuðu mistökum í borginni, en bráðum kemur tækifærið til þess að hefja það langa leiðréttingarferli og kjósa fólk til valda í Reykjavík sem vinnur fyrir borgarbúa en ekki gegn þeim.

 

[Halldór Jónsson, 22.12.2016 kl. 09:03]

Niðurlag Ívars er því miður eina úrræðið sem er í boði. En hugsið ykkur hvílikar skemmdir þessir menn eiga eftir að vinna samfélaginu á því sem eftir lifir kjörtímabilinu? Það er meira en ár sem verður lengi að líða hjá bíleigendum.

[Bjarni Jónsson, 22.12.2016 kl. 11:15]

Það er farsakennt, hvað eftir aðalmanni Samfylkingar í skipulagsmálum er haft, að viðbótar akreinar fyllast strax af bílum.  Forsjárhyggjan ætlar lýðnum að draga þá ályktun, að þess vegna sé það engin lausn á umferðarteppum að bæta við umferðarmannvirkjum.  Hugarheimur þessa Hjálmars Sveinssonar er orwellskur.  Stóri bróðir, hér Dagur & Co., ætlar að þvinga lýðinn út úr bílunum og í sporvagna eða langa strætisvagna.  Þetta hugarfar er með endemum á Íslandi 21. aldar, en tíðkaðist á meðal einvalda á miðöldum, sbr "Vér einir vitum".  Það ætti fyrir löngu að vera búið að sparka þessu afturhaldi út í hafsauga.

[Hörður Þormar (IP-tala skráð) 22.12.2016 kl. 12:41]

Fyrir allmörgum árum var Hjálmar Sveinsson með þáttaröð í ríkisútvarpinu sem fjallaði um Prússland. Þóttu mér þessir þættir áhugaverðir, en er samt að mestu búinn að gleyma efni þeirra.

Svo sem kunnugt er þá var Friðrik mikli Prússakóngur einn helsti frumkvöðull hins menntaða einveldis og stjórnaði þegnum sínum í anda þess.

Það skyldi þó aldrei vera að Hjálmar hafi ekki heillast af hugmyndafræði þessa mikla kóngs og einsetji sér nú að stjórna ferðamáta fávísra íbúa þessarar borgar með visku og föðurlegum myndugleik í anda hins menntaða einveldis?

[Sigurður M Grétarsson, 22.12.2016 kl. 16:03]

Helstu ástæður þess að það eru flestar ef ekki allar borgir í heiminum að reyna að draga úr notkun eiknabíla eru að þeir valda mikilli mengun, miklum hávaða, kalla á sífellt meira pláss undir vegi og bílastæði sem er þá oft á kostnað opinna svæða, þennja út byggðina sem veldur því að menn verða enn háðari bílum og lengir það ferðatíman auk þess sem það leiðir til minni hreyfingar sem er skaðlegt fyrir lýðheilsu fyrir utan skaða á lýðheilsu vegna mengunar og hávaða fyrir utan það að fjölgun einkabíla fjölgar bílslysum. Í dag deyja fleiri af völdum mengunar frá bílum heldur en í bílslysum.

Það er forræðishyggja þegar stjórnvöld reyna að breyta hegðun manna þó hún bitni aðeins á þeim sjálfum. Það að stjórnvöld fari út í aðgerðir til að draga úr hegðan sem bitnar á öðrum en manni sjálfum er allt annar hlutur. Það að einstaklingur ákveði að fara í bíl í stað strætó, á hjóli eða gangandi veldur bæði óþægingum og skaða fyrir aðra. Þess egna er það ekki skýlaus réttur manna að fá að nota einkabíl í þéttbýli og fullkomkega eðlilegt að reynt sé að sporna við því. 

Það hfeur einnig sýnt sig að mannlíf verður miklu betra í borgum sem eru þétt byggðar og llitið um umferð einkabíla heldur en í stjárbýlum borgum þar sem nánast öll umferð er í einkabílum. Allavega sækist fólk mun frekar í að setjast að í slíkum borgum.

það er hlutverk bortarstjórna að skipuleggja borgirnar þar með talið samgöngukefið þannig að það komi hentugast út fyrir alla borgarbúa í heild. Þlíkt skipuleg felur oft í sér aðrar lausnir en hver og einn borgarbúi myndi helst vilja fyrir sig. Það er eðlilegt vegna þess að einstaklingar hugsa fyrst og fremst um sína persónulegu hagsmuni en ekki heildarhagsmuni en það er hlutverk stjórnvalda að huga að heildarhagsmunum.

[Halldór Jónsson, 22.12.2016 kl. 18:51]

Góður kommi Sigurður M. Eitt sinn skáti-ávallt skáti.

[Elle_, 22.12.2016 kl. 19:44]

Halldór, mér fannst við hæfi að setja fyrirsögn Ívars yfir pistli hans sem þú vísaðir í, með.
Kúgun Hjálmars og Dags gegn borgurunum þarf að linna

[Halldór Jónsson, 22.12.2016 kl. 21:13]

Elle, ég bara kann ekki að gera neitt til að breyta athugasemdum. Það er eins og ég geti ekki lært þetta þó að þú sért búin að reyna að kenna mér þetta. Hvernig á ég að fara að því að setja inn fyrirsögnina?

[Elle_, 22.12.2016 kl. 21:56]

Halldór minn, þú getur ekki breytt ath.semdum í Moggabloggi en þú getur falið þær og skrifað nýjar. (Maður getur það í Fésinu).  Þú gast þannig skrifað nýtt comment og bætt inn í og lagað það sem þú vildir.

Það gerirðu svona: 1. Ýtir (með örinni) á Stjórnborð. 2. Ýtir á Blogg. 3. Ýtir á Athugasemdir. 4. Finnur athugasemdina sem þú vilt fela (getur ekki eytt í Moggabloggi) og ýtir á + (plúsinn).  5. Ýtir á Fela athugasemd.  Nú ertu búinn að fela það sem þú vildir losna við og getur skrifað nýtt comment. 

Viljirðu setja inn fyrirsögnina dregurðu músina yfir fyrirsögnina í pistli Ívars, ýtir svo á CTRL (neðst til vinstri á lyklaborðinu) + C saman (copy).  Setur örina þar sem þú vilt setja fyrirsögnina og ýtir svo á CTRL + V (paste) saman og og fyrirsögnin birtist, í þinni síðu í rauðu.  Þetta kenndi ég þér aldrei fyrr samt, bara að fela.

Get it? 

[Anna Sigríður Guðmundsdóttir, 22.12.2016 kl. 22:41]

Veit ekki hver stjórnar umferðareyjunni Íslandi í dag persónulega og ábyrgt. En svona illa virkar því miður sem nothæft bandalag, þetta eyjunnar móðurfélag: ESB.

Ég flakkaði dálítið í strætó í dag, og fannst skömm að því hversu mikils er ætlast til af strætóbílstjórum í staðnaðri snjóumferðinni. (óvætur snjór 22 des. á Íslandi?).

Það getur enginn strætisvagnabílstjóri keyrt yfir aðra bíla til að halda áætlun. Vonandi skilja það flestir strætófarþegar.

M.b.kv.

[Helga Kristjánsdóttir, 23.12.2016 kl. 05:37]

"Fer þá enginn með Steindóri" Skilja engir nema gamalmenni!!!

[Anna Sigríður Guðmundsdóttir, 23.12.2016 kl. 20:49]

Helga. Það er á ábyrgð fróðra gamalmenna og annarra menna, að útskýra fyrir þeim sem yngri eru og ófróðari. Ef fólk þykist geta sloppið við að upplýsa opinberlega, það sem er ekki í lagi, þá er það fólk ábyrgt fyrir þögguninni og glæpa-meðvirkninni.

Afleiðingar þöggunar eru á ábyrgð þeirra sem þegja yfir glæpum, og skelfilegum afleiðingum þöggunar og tilheyrandi sjúklegum ofbeldisafleiðingum.

Ef þú veist eitthvað sem aðrir vita ekki um glæpi Helga, þá ber þér skylda til að segja frá þeim glæpi, til að forða samfélaginu frá hættu.

Ekki benda bara á aðra og fría sjálfan sig þar með allri ábyrgð! Því þannig virkar ekki siðað tjáningarfrjálst réttarríkis-samfélag.

M.b.kv.