Engin vindorka á Íslandi?

skyldi maður halda vegna þess hversu íbúar eru öndverðir við öllum hugmyndum um nýtingu hennar.

Í Þykkvabæ skrifuðu einhverjir tugir undir mótmæli gegn vindmyllum og sveitarstjórnin lyppaðist niður. Engar vindmyllur fá að rísa. Engu breytir að slíkar framkvæmdir eru 100% afturkræfar mótsett við Hvammsvirkjun og Urriðafossvirkjun svo eitthvað sé nefnt.

"Stærsta sjávarvindorkubú heimsins hefur nú verið klárað fyrir rétt undan strönd Bretlands. Kostnaður við uppsetningu á orkubúinu var um 140 milljarða íslenskra króna. Hver vindmylla er um 190 metrar á hæð, til samanburðar má nefna að Hallgrímskirkja er rúmlega 75 metrar á hæð. Alls eru 189 vindmyllur sem geta framleitt 660 MW, en til samanburðar getur Kárahnjúkavirkjun framleitt 690 MW.

Það var danska fyrirtækið Orsted sem byggði og rekur orkubúið en framkvæmdir hófust árið 2015. Um 250 manns munu sjá um viðhald og rekstur orkubúsins."

Biokraft reisti 2 vindmyllur í Þykkvabæ fyrir nokkrum árum.Þær gengu áfallalaust nokkur ár þar til önnur brann og hefur ekki verið endurnýjuð.Nú er útséð um að fleiri vindmyllur fá ekki að rísa á þessum slóðum þrátt fyrir mjög hagstæð skilyrði.

Það er leitt að vindorkuna á Íslandi má ekki nýta.

Athugasemdir

[Þorsteinn Siglaugsson, 10.9.2018 kl. 10:15]

Þetta eru athygliverðar tölur. Miðað við síðustu tölur um kostnað við Kárahnjúkavirkjun sem ég sá við snögga leit var hann skv. Landsvirkjun 146 milljarðar árið 2008. Miðað við byggingarvísitölu er það um 260 milljarðar á núvirði. En þú ert semsagt að segja að með vindmyllum hefði mátt ná sömu orkugetu fyrir helminginn af þessu?

[Vagn (IP-tala skráð) 10.9.2018 kl. 10:47]

Og rekstrarkostnaður við Walney Extension vindorkubúið er það hár að ekki er hægt að selja orkuna á framleiðsluverði og skattgreiðendur þurfa að standa undir 80% af raforkuverðinu. Vindorka er dýr orka. Ending er ekki góð og viðhald mjög mikið, eins og dæmið í Þykkvabænum sýnir. Þess vegna hafa margir kosið að brenna frekar kolum sem gefa nærri fimmfalt meiri orku fyrir sama verð og virka í logni.

[Þorsteinn Siglaugsson, 10.9.2018 kl. 10:58]

Eftir snögga leit sýnist mér viðhaldið áætlað 1-2% af fjárfestingunni í vindmyllum. Ég er ekki frá því að það sé svipað í vatnsafli.

http://drømstørre.dk/wp-content/wind/miller/windpower%20web/en/tour/econ/oandm.htm

[Valdimar Samúelsson, 10.9.2018 kl. 12:53]

Það ætti að vera í lagi að leifa mönnum að reisa vindmillur ef þeir sýna framá að það sé ódýrari orka og standist umhverfis hugsun allmennings en málið er meir að menn eru ekki að hugsa um það heldur selja svokallaða umhverfisvæna orku á háu verði til Evrópu og láta svo ríkið kaupa kjarnorku framleitt rafmagi á pappírum frá Evrópu eða hver veit hvaðan sá aðilar fá hana.Kannski Kína. 

[Halldór Jónsson, 10.9.2018 kl. 14:12]

Það sem mér finnst kyndugast er að eigi maður land og vilji maður reisa á  vindmyllu þá getur nágranninn stöðvað það með því að mótmæla á grundvelli þess að honum finnist vindmyllur ljótar. Ég hef orðið vitni að því endurtekið að svona er þetta. Þú mátt ekki nýta eign þína.

[Vagn (IP-tala skráð) 10.9.2018 kl. 14:31]

Þú mátt ekki slá blettinn þinn á nóttunni þó þú egir bæði blettinn og sláttuvélina. Þú mátt ekki hækka húsið þitt um fjórar hæðir þó þig langi til að horfa niður til nágranna þinna. Og þú værir snarlega handtekinn og lokaður inni ef þú stæðir á flautunni í þínum bíl á þínu bílaplani við þitt hús á þinni lóð. Eignarétturinn veitir þér enga heimild til að ganga á rétt nágranna þinna og rýra verðmæti eigna þeirra eða valda óeðlilegri truflun. Og vindmillur eru bæði ljótar og hávaðasamar.

[Hilmar (IP-tala skráð) 10.9.2018 kl. 15:31]

Það er ansi margt sem segja má um vindmyllur, og flest af því er neikvætt. 

1. Uppgefin framleiðslugeta rafmagns er alltaf uppgefin við hámarksafköst. Hámarksafköst miðast við vindhraða 20-23 metra á sekúndu. Reynsla Bandaríkjamanna er sú, að raunveruleg framleiðsla sé um 50-60% af framleiðslugetu. Vindmylla skilar engu á logni og hægum vindi, og hana þarf að stöðva þegar vindur fer upp fyrir 23 metra á sekúndu.

2. Vindmyllur í Bandaríkjunum eru í flestum tilvikum uppsettar vegna þess að ríkið greiðir 1/3 af kostnaði, fylki greiða oft 1/3 og fjárfestir 1/3. Framlög ríkis og fylkis er óafturkræf. Vindmylluna má afskrifa á fimm árum. Að liðnum þessum fimm árum, er vindmyllan einfaldlega seld til nýs rekstraraðila, og þá hefst nýtt afskriftartímabil. Sem þýðir að fyrirtæki á borð við stórar endurskoðunarskifstofur, lögfræðistofur og álíka fjárfesta grimmt í vindorku. 

3. Vindmyllur framleiða aldrei uppgefnar tölur. Uppgefin framleiðslugeta er alltaf miðuð við bestu skilyrði. Reynslan í Bandaríkjunum sýnir að raunveruleg framleiðsla er 50-60% af uppgefinni framleiðslugetu. Framkvæmda- og framleiðslukostnaður er því töluvert hærri en gefin er uppvið byrjun framkvæmda.

4. Gríðarlegt landflæmi þarf til að framleiða orku með vindmyllum. Það þarf u.þ.b. 10-20 hektara til að framleiða 1 MW. 

5. Raforka framleidd með vindmyllum er afar ótrygg. Eins og veðrið er akkúrat núna, í þessum skrifuðu orðum, þá væri raunveruleg framleiðslugeta mest hugsanleg 10% af uppgefnum afkastatölum. Þetta á við um landið í heild. Þetta þýðir að atvinnulífið getur ekki treyst á þessa orku.

6. Vindmyllur hafa afskaplega mikil áhrif á sitt nærumhverfi. Í fyrsta lagi, þegar vinstyrkur er nægur til framleiðslu, þá fylgir framleiðslunni sífelldur hvinur sem berst töluvert langa leið í loftinu. Þess utan þá berast lágtíðnihljóð í jörðu langa leið. Þetta er svona svipað og íbúar í nokkrum húsum frá sé með standandi partý og spilar tónlist með miklum bassa. Í sjálfu sér ekki hávært, en ótrúlega hvimleitt. Það er samfella í hljóðinu, og er mest áberandi um kvöld og nætur, þegar fólk vill hafa ró og næði. 
Í öðru lagi þá hefur stærð spaðanna þau óæskilegu áhrif að sólarljós blikkar í sífellu undan sól. Þetta reynist sumum ákaflega erfitt að lifa við. 

Þá má margt meira segja, en ég nenni því ekki.

[Þorsteinn Siglaugsson, 10.9.2018 kl. 16:04]

Það er stór kostur við vindmyllur að umhverfisáhrif þeirra eru að fullu afturkræf. Vitanlega reisir enginn vindmyllur í þéttbýli og það er auðvitað eðlilegt að fólk vilji síður hafa þær í bakgarðinum. Líklega er heppilegast að reisa vindmyllugarða fjarri mannabyggð. Þannig má lágmarka áhrifin á nærumhverfið.

Hvað kostnað og framleiðslugetu varðar er það viðfangsefni þess sem fjárfestir í vindmyllunum að taka ákvörðun um hvort fjárfestingin sé skynsamleg. Ég veit ekki til þess að orkuframleiðsla með vindmyllum sé ríkisstyrkt hérlendis svo hagkvæmnin kemur þá skattgreiðendum í raun og veru ekkert við.

[Hilmar (IP-tala skráð) 10.9.2018 kl. 16:22]

Nei, ríkisstyrkir, eða skortur á þeim, útskýrir ekki áhuga á vindmyllum á Íslandi. En ríkisstyrkir og afskriftareglur útskýra af hverju vindmyllur eru reistar í Bandaríkjunum. Ef engir ríkisstyrkir væru í boði, og afskriftir yrðu lengdar í t.d. 20 ár, n.b. ef hún er í rekstri, þá myndu þær verða mun færri en raun ber vitni. Þegar skattalegt hagræði og ókeypis peningar frá almenningi ræður úrslitum, frekar en verð og eftirspurn, þá er eitthvað að.

Það er ekkert útilokað að einhverjir bændur sjái sér hag í byggingu vindmyllna, og í eðli sínu, þá væru þær byggðar á landi þeirra, og eins stutt frá notkunarstað eins og kostur er, þar sem raflagnir í jörð eru dýrar. Flestir bændur eiga nágranna, og í sumum tilvikum hefði bygging vindmyllu áhrif á þá, og þá er það spurningin hvor er rétthærri, sá sem hagnast á byggingunni, eða sá sem þarf að þola áreiti óbætt.

Þá er eftir að minnast á, að afar ólíklegt er að ráðist verði í gerð vindmyllugarða, án þess að ríkið kæmi að því með einhverjum fjárframlögum. Það er reynsla allra þeirra landa sem ráðist hafa í slíkar framkvæmdir. Ólíklegt að veski okkar skattborgara yrði látið í friði ".. í þjóðhagslega hagkvæmum framkvæmdum"

[Valdimar Samúelsson, 10.9.2018 kl. 17:29]

Ég verð að segja að ég yrði ekki hrifin ef ríkið styrkti vindmillubóndann en allir vita að þetta er óhagkvæmt eins og Gufan en báðar þessar aðferðir krefjast mikils viðhalds. Enron á sínum tíma gafst upp en það þurfti að skipta um gírkassanna oft. Ég hefði haldið að menn fengju að setja upp vindrafstöðvar fyrir sjálfan sig en ég var með 500watta fyrir nokkrum árum en það kostaði rafgeyma en núna er hægt að selja inn á línukerfið.

[Þorsteinn Siglaugsson, 10.9.2018 kl. 19:24]

Þekki þetta nú ekki nógu vel með kostnaðinn. En það er athyglivert að t.d. samkvæmt heimildinni að neðan er kostnaður á framleidda MWst sá sami í vindorku og vatnsorku.

https://www.windpowermonthly.com/article/1455361/tipping-point-2017-wind-cost-analysis

Ath. að hér er aðeins verið að horfa á kostnaðinn, mögulegir styrkir koma hér ekkert inn. Ef þetta er rétt er nokkuð ljóst að í rokrassgati eins og á Íslandi ætti vindorka að geta orðið mjög ákjósanlegur kostur. Og þá er líka mikilvægt að koma í veg fyrir að fólk lendi í vanda eins og vindorkubóndinn í Landeyjum, að framleiðslan sé allt í einu stöðvuð með geðþóttaákvörðun sveitarstjórnar.