Teikn á lofti

hvað varðar jákvæðar horfur í efnahagsmálum.

 Olíuframleiðsla heimsins heldur áfram að aukast og birgðasöfnun Bandaríkjanna heldur áfram. Verð á olíuvörum ætti því að geta lækkað enn fremur frá því að lækkunarferlið hófst í byrjun júní.

Þetta getur þýtt viðsnúning í rekstri íslensku flugfélaganna og efnahag alls almennings á Íslandi.

Efnahagur okkar byggist í miklum mæli á verði á olíu. Hún er grundvöllurinn undir allri okkar efnahagsstarfsemi hvað sem öllu CO2 bullinu líður. allt tal um orkuskipti er meira og minna í lausu lofti því það er jarðefnaeldsneytið sem er undirstaðan.

Hinsvegar er olíumarkaðurinn ólíkindatól. Hann á það til að rjúka upp skyndilega án auðsærra skýringa og síðan kollsteypast án þess að spyrja nokkurn leyfis.

Byltingin hljóðláta í shale-vinnslunni sem hófst í Bandaríkjunum eins og aðrar framfarir í tækni, hefur sett ótrúlegt strik í reikninginn og breytt heimsmyndinni. Ofurveldi Arabaríkjanna í olíu er horfið og þeir hafa ekki lengur kverkatak á heiminum eins og þegar olíukreppan reið yfir hálfri öld.

Það eru kannski meiri  líkur en minni á því að efnahagur okkar á Íslandi eigi eftir að styrkjast  með lækkandi olíuverði á þessu ári og næsta.

Til hliðar má sjá þróun hráolíuverðs síðastliðin 3 ár. Núna er verðið undir 63 dollurum fatið en var undir 30  dollurum fyrir þremur árum.

Það er greinilegt að allt getur gerst á þessum markaði sem er einn sá viðkvæmasti fyrir hverskyns stjórnmálsviptingum sem  enginn sér fyrir í dag.

 

Það eru ýmis teikn á lofti

Athugasemdir

[Ómar Ragnarsson, 4.11.2018 kl. 20:12]

Þegar litið er fljótt á grafið er engu líkara en að framleiðslan hafi margfaldast á níu mánuðum, en þegar tölurnar eru skoðaðar, sést gamalt trix, að sýna aðeins efsta hluta magnsins, sem um er að ræða, en láta 97 prósent þess detta út fyrir neðan grafið. 

Tölurnar segja hins vegar að framleiðsla Bandaríkjanna hafi aukist um rúmt eitt prósent, OPEC-ríkjanna um rúmt eitt prósent, en framleiðsla annarra ríkja um 2,5 prósent. 

[Halldór Jónsson, 4.11.2018 kl. 21:28]

Það er rétt Ómar. Spurningin hvað gerist á morgun? Hafa aðgerðir Trumps gegn Iran áhrif eða ekki ? Þ eir eru að æsa sig í mótmælum í dag á afmæli sendiráðstökunnar sem Carter klúðraði..

[Ómar Ragnarsson, 4.11.2018 kl. 21:55]

Það var eðlilegt að Carter, sem æðsti yfirmaður heraflans, tæki afleiðingunum af hinu misheppnaða björgunarleiðangri. Honum var þó vorkunn hvað varðaði það að trúa og treysta herforingjunum. 

Hvað Íran snertir, þá mun það að olíuútflutningur þeirra kunni að minnka aðeins gera stöðu þeirra sterkari síðar, þegar þeir hafa "geymt" hluta olíuforða síns í jörðu. 

Því að olíulindir eru takmörkaðar auðlindir. 

Og svipað gerðist og 1968, að Nixon og Reagan tókst báðum með bragðvísi að seinka góðu fréttunum fram yfir kosningar, annars vegar að fá Suður-Víetnama að samningaborði 1958, og hins vegar að fá Írani til að skila gíslunum 1980. 

[Halldór Jónsson, 5.11.2018 kl. 07:34]

Hvað Íran snertir, þá mun það að olíuútflutningur þeirra kunni að minnka aðeins gera stöðu þeirra sterkari síðar, þegar þeir hafa "geymt" hluta olíuforða síns í jörðu. 

Því að olíulindir eru takmörkaðar auðlindir. 

 

Ég held að þú áttir þig ekki á því Ómar að það er til svo mikið af olíu og gasi að Íran hefur svo til ekkert að segja. Þessvegna lækkar olían núna. En hvað geriat næst veit ekki ég.