Vonandi skemmti fólkið sér

á stjórnarskrárfundinum um helgina.

Þorvaldarhirðin dreifði sinni útgáfu af nýrri stjórnarskrá á fundinum í óleyfi og óþökk fundarboðenda en komst upp með það.Ennfremur að hleypa upp fundinum með bægslagangi og frammítökum við litla hrifningu fundarmanna.

Allt þetta sýnir lýðræðisástina sem er þessu stjórnlagaráðsfólki í blóð borið og gefur fyrirheit um hvernig stjórnarskrá það vill setja öðru fólki. En manni sýnist að þessi helgarsamkunda hafi ekki verið allskostar dús við aðgerðir hirðarinnar gömlu. 

Svo líklega hefur ný stjórnarskrá heldur fjarlægst heldur en hitt. Sem betur fer líklega  þar sem 1944 útgáfan hefur alveg dugað til þessa eins og sannaðist best í Icesave dellunni sem stjórnmálamennirnir ætluðu að neyða ofan í þjóðina. Enda sýnir sagan að þeir gefa lítið fyrir einhverja stjórnarskrá ef þeim svo sýnist og telja sér henta.

Bjarni Benediktsson  vill því fara hægt í stjórnarskrárbreytingar og manni virðist ekki illa tekið í það þó að Þorvaldur Gylfason eigi eftir að hafa um það einhvern langhund að líkindum.

En vonandi skemmti fólkið sér og fékk góðan viðurgjörning hjá Kötu allsherjar.

Athugasemdir

[Þorsteinn Siglaugsson, 11.11.2019 kl. 10:33]

Þessi uppákoma er enn ein birtingarmynd spillingarinnar sem viðgengst á Íslandi: Þegar einhverjir fínimenn heimta að fá að þvælast inn á fundinn er þeim auðvitað leyft það. Ekki af því að þeir hafi eitthvað sérstakt til málanna að leggja, heldur bara af því að fundarstjórunum finnst þeir of fínir til að neita.

[Vagn (IP-tala skráð) 11.11.2019 kl. 19:11]

"Vilt þú að tillögur stjórnlagaráðs verði lagðar til grundvallar frumvarpi að nýrri stjórnarskrá?" --Já 67% ---Nei 33%

Munurinn á lýðræðisást þeirra sem styðja og fagna því að niðurstaða þjóðaratkvæðagreiðslunnar skuli hundsuð af stjórnvöldum og þeirra sem berjast fyrir því að farið sé eftir niðurstöðu þjóðaratkvæðagreiðslunnar er öllum augljós.

[Þorsteinn Siglaugsson, 11.11.2019 kl. 21:23]

Það voru 36% eða 37% kjósenda sem vildu leggja þessar tillögur til grundvallar, ekki 67%. Stór hluti kjósenda sat nefnilega heima. Og hvers vegna var það? Það var vegna þess að það lá alveg ljóst fyrir að stjórnlagaráðið hafði ekkert umboð til eins eða neins og kosningin var ekki bindandi kosning heldur fremur skoðanakönnun.

Upphaflega átti að setja á stjórnlagaþing og Alþingi hafði samþykkt valdheimildir til þess. En kosningin fór í handaskolum. Í kjölfarið var skipuð nefnd. En nefndin hafði engar valdheimildir.

Þetta er nú sannleikur málsins.

[Vagn (IP-tala skráð) 12.11.2019 kl. 12:46]

Stór hluti kjósenda sat heima, í öllum kosningum sitja einhverjir heima. Og hvers vegna var það? Það veit enginn, enginn hefur spurt þá. Það eina sem er vitað er að þeir settu ákvörðunina um hvort tillögur stjórnlagaráðs yrðu lagðar til grundvallar frumvarpi að nýrri stjórnarskrá í hendur hinna. Af þeim sögðu Já 67% og Nei 33%.

Upphaflega átti að setja á stjórnlagaþing og Alþingi hafði samþykkt valdheimildir til þess. En kosningin fór í handaskolum. Í kjölfarið var skipuð nefnd. En nefndin hafði engar valdheimildir. Nefndin þurfti engar valdheimildir, stjórnlagaþinginu var heldur ekki ætlað að hafa valdheimildir. Nefndin var ekki að breyta neinu bara að koma með tillögur. Ríkisstjórnin hafði, og hefur, valdheimildir til að skipa nefndir. Alþingi hafði samþykkt valdheimildir til þess að fram færi kosning um stjórnlagaþing, Lög nr. 90 25. júní 2010.