Stjórnarskrábullið enn

Björn Bjarnason gefur glöggt yfirlit yfir stöðu stjórnarskrárbullsins sem fjörtíuþúsund fífl og veggjakrotarar  halda að sé hægt að keyra í gegn einn tveir og bíngó.

Þau virðast ekki vita hvaða leið stjórnarskrárfumvarp þurfi að fara. Ef til vill halda þeir að undirskrift þeirra á plagg Katrínar Oddsdóttur sé nóg til þess að tillaga svonefnds stjórnlagaráðs sem búið er að dæma ónothæft af Feneyjanefnd og Hæstarétti sé nægileg til þess að sú ritsmíð taki gildi sem ný stjórnarskrá lýðveldisins Íslands.

Þvílík fífl segi ég nú bara.

Björn skrifar:

"Katrín Jakobsdóttir forsætisráðherra hefur á kjörtímabilinu beitt sér fyrir samstarfi formanna allra flokka um áfangaskiptar breytingar á stjórnarskránni. Þetta samstarf formannanna er nú í uppnámi.

Í dag (20. október) verða undirskriftir um nýja stjórnarskrá afhentar forsætisráðherra.

Þennan dag fyrir átta árum var lögð fyrir þjóðina spurning um hvort leggja ætti tillögur stjórnarlagaráðs til grundvallar frumvarpi að nýrri stjórnarskrá.

Það gerði alþingi með frumvarpi sem sent var Feneyjanefndinni, sérfræðinganefnd Evrópuráðsins um stjórnarskrármál. Nefndin dæmdi frumvarpið úr leik 11. febrúar 2013 og síðan hafnaði alþingi frumvarpinu.

Í meðförum fréttastofu ríkisútvarpsins hefur inntak atkvæðagreiðslunnar 20. október 2012 breyst. Þetta sagði til dæmis í hádegisfréttum 19. október:

„Með nýju stjórnarskránni er átt við frumvarp stjórnlagaráðs til stjórnskipunarlaga sem samþykkt var í þjóðaratkvæðagreiðslu fyrir átta árum upp á dag á morgun.“ Í Kastljósi að kvöldi 19. október sagði stjórnandi „þetta [frumvarpið] var samþykkt í þjóðaratkvæðagreiðslu“ og spurði hvort þingið þyrfti því ekki að fara að því.

Að fréttastofan fari hvað eftir annað rangt með eðli atkvæðagreiðslunnar fyrir átta árum er sjálfstætt rannsóknarefni. Þátttakan í atkvæðagreiðslunni var dræm, og niðurstaðan var aðeins ráðgefandi fyrir alþingi en ekki bindandi. Alþingi hefur þegar fullnægt því sem um var beðið af þeim sem greiddu atkvæði 20. október 2012

Katrín Jakobsdóttir forsætisráðherra hefur á kjörtímabilinu beitt sér fyrir samstarfi formanna allra flokka um áfangaskiptar breytingar á stjórnarskránni. Þetta samstarf formannanna er nú í uppnámi.

Föstudaginn 16. október lögðu þingmenn Pírata og Samfylkingar auk tveggja þingmanna utan flokka fram þingfrumvarp með tillögum stjórnlagaráðs. Þar birtist tillaga um breytingar á stjórnarskránni frá formönnum tveggja flokka.

Í dag skrifar Þorgerður Katrín Gunnarsdóttir, formaður Viðreisnar, grein í Fréttablaðið þar sem hún segir sig frá frekara samstarfi um breytingar á stjórnarskránni. Hún vill þó ekki kannast við eigin ábyrgð heldur kastar henni á herðar Katrínar Jakobsdóttur forsætisráðherra eins og þessi orð sýna:

„Ég er sammála Katrínu Jakobsdóttur þegar hún segir að Alþingi skuldi þjóðinni löngu tímabærar breytingar á stjórnarskrá. En hún er verkstjóri þingmeirihlutans. Það er á hennar ábyrgð að leggja fram tillögur í samræmi en ekki ósamræmi við traustar vísbendingar um meirihlutavilja þjóðarinnar.“

Þetta er ódýr leið frá vandasömu verki, Þorgerður Katrín er þingmaður eins og Katrín Jakobsdóttir. Forsætisráðherra eða þingmeirihlutinn ber enga lögbundna skyldu í þessu efni.

Píratar, Samfylking og Viðreisn nota tímamótin núna til að slíta samstarfi flokka um stjórnarskrárbreytingar. Forsendurnar fyrir verklagi forsætisráðherra eru þar með brostnar. Stjórnarskrárklukkan hefur verið færð átta ár til baka"

Í gildi er stjórnarskrá lýðeldisins Íslands frá 1944. Þar eru ákvæði um það hvernig megi breyta henni.Til þess þarf breytingin að fara í gegn um 2 þing með kosningum á milli og samþykki 2/3 þingmanna þarf í báðum tilvikum til þess að þjóðin fái þessa nýju stjórnarskrá. Veggjakrot og djöfulgangur á RÚV breyta þar engu um. 

Þau halda kannski að það ríki almenn ánægja með moðsuðuna sem fyrir liggur sem var samin af vinstrisinnum 2012. Ég hef lesið hana og er sammála Feneyjanefndinni að þetta sé ónýtt plagg og ekki standast lágmarkskröfur sem gerðar eru til Gagnfræðaskólastíla hvað orðalag og hugsun varðar. Því kemur svona delluplagg ekki til greina að nota sem stjórnarskrá frekar en flest annað sem frá Þorvaldi Gylfasyni og Pétri Gunnlaugssyni á síbyljuútvarpinu Sögu kemur á hinu pólitíska sviði.Ég hygg að þjóðin væri fljót að kveða upp slíkan dóm ef hún væri spurð.

Ég kem ekki auga á nauðsyn þess að ógilda núverandi stjórnarskrá og taka upp þetta endemis plagg þeirra Þorvaldar.Mér finnst margt annað vera mun meira aðkallandi heldur en þetta.

Ég minni á að yfir áttatíuþúsund manns skrifuðu undir áskorun á Borgarstjórn Reykjavíkur  um að láta Reykjavíkurflugvöll í friði.

Dagur B. Eggertsson og hans vinstra fólk gaf nákvæmlega ekkert fyrir þessar undirskriftir og heldur ótrauður áfram eyðileggingarstarfi sínu  á Reykjavíkurflugvelli og öllu sem honum tengdist. 

Halda menn að  eitthvað meira mark sé tekið á þessum helmingi minni lista Katrínar Oddsdóttur?

Skiljanlega fer  það í taugarnar á fólki að kvótaeigendur geti fengið að greiða tíkall fyrir helming kótans en leigja restina út fyrir tvöhundruðkall! En breytir einhver stjórnarskrá þessari staðreynd? Er þetta ekki einfalt mál fyrir Alþingi?

Hættum þessu stjórnarskrárbulli og snúum okkur að meira aðkallandi hlutum.