Umræðan gengur fram af mér.

Alveg gengur þetta Erópurugl fram af mér. Sérílagi fer flest , sem kemur frá Eiríki Bergmann og Þorvaldi Gylfasyni í taugarnar á mér. Þessir menn reka beinlínis móðursýkislegt trúboð í þá veru, að okkur sé brýn nauðsyn á fullveldisframsali til Brüssel.  Og auðvitað að henda okkar ónýtu krónu sem  fyrst og taka upp evruna. Við séum Evrópuþjóð og ekkert annað komi til greina.

 

Fjölmargir Íslendingar, þar á meðal ég,  líta ekki á sig sem sérstaka Evrópumenn og hafa talið sig litla samleið eiga með Hitler eða Jóni Bola. Þeir líta á sig sem þegna frjálsrar þjóðar,  sem hafi barist til fullveldis með þrautseigju og fórnum sem maður ekki fleygi frá sér í flumbrugangi.  Við eigum þetta  land líka, sem svo aðrir samlandar  hamast við sýnkt og heilagt að koma í hendur framandi þjóða og kynstofna. En við  þorum helst ekkert að segja fyrir rasistagarginu,  sem þá dynur á okkur. 

 

Þessir sömu sjá sem gleggst, að flestar framfarir,  sem orðið hafa í landinu síðustu öld komu ekki frá Evrópu .  Við erum nefnilega miklu líkari vesturheimsfólki heldur en nokkur stjórnmálamaður þorir að viðurkenna. Tengingar okkar vestur um haf hafa líka gert okkur miklu fyrri til en Evrópufólk almennt, að tileinka okkur nýjungar. Hvaðan komu tölvurnar, intenetið og farsíminn ? Hverjir voru langfyrstir í Evrópu að notfæra sér þetta ?

 

Enginn útskýrir hinsvegar hvernig þessi evruvæðing á að ganga fyrir sig. Á hvaða gengi verður skipt um innistæður í bönkunum.? Hverjir verða vextir á hússnæðislánunum verðtryggðu og öðrum langtíma verðtryggðum pappírum  þegar þeim verður breytt í evrur ?  Hvað verður um slíkar eignir lífeyrisisjóðanna ?  Hverjir verða innlánsvextirnir á evrubókunum sem gamla fólkið á að fá í staðinn fyrir gömlu verðtryggðu bækurnar. ? Hver verður framtíð sparnaðar í landinu þegar útlánsvextir hafa verið lækkaðir í svo til  ekki neitt og allir skulda bara í evrum í stað verðtryggðra króna ? En verðtryggð íslenzk króna er auðvitað stabílli en nokkur önnur mynt í veröldinni. Samt ber fólk hausnum við steininn og heldur því fram að evra á  6-8 % lánsvöxtum sé allt öðruvísi lán og betra en verðtryggð króna á 4.5 % lánsvöxtum. Hefur nokkur spáð í það hverjir yfirdráttarvextir séu í Þýzkalandi ? Eða innlánsvextir í USA ?

 

Hvernig ætla menn að fara með íslenzkt launaskrið þegar launakostnaður hér var 30 % hærri  hér en á evrusvæðunum árið 2007 ? Hvernig ætlum við að friða Eirík Jónsson og kröfugerðarkennarana,  sem sætta sig ekki við evrópsk kennaralaunakjör ?  Hvaðan koma evrurnar ef við  stórhækkum launin í landinu, annaðhvort með ofbeldi smærri hópa launþega eða jafnvel  yfir línuna með pennastrikum eins og vinstri stjórn Ólafs Jóhannessonar gerði 1971 ? Þá voru samflokksmenn þeirra fyrstnefndu við völdin. Skiljanlega klæjar þessa sósíalista  eftir því að þessir tímar komi aftur.  Sem þeir geta vel gert NB.

 

Það er búið að tala um að hér verði að ríkja jafnvægi þegar við göngum inní ESB. Er þetta jafnvægi að myndast núna með fjöldauppsögnum í atvinnulífinu og allsherjar kreppu  á fjármálamarkaði ? Ef ekki þá hvenær ?  Er ekki um að gera á þeirri vegferð að ná í eignir lífeyrissjóðanna og fara að lán þær út óverðtryggðar í evrum á lágum vöxtum eins og bankarnir vilja  ? Sé verðbólgan núll er verðtryggingin líka núll. Og hvað kemur verðbólgu á stað ?

 

Og öll alþýða vill auðvitað reka  Davíð úr Seðlabankanum og lækka vextina ?  Láta þjóðina á Útvarpi Sögu um hagstjórnina og Eirík um afnám kvótakerfisins.  Meðan það ekki gerist er ekki öll nótt úti með það að bjartari tíð sé í vændum.

 

Það er eins og enginn vilji vita að verðbólgan á evrusvæðinu nálgast það að verða jafnhá og hæstu langtímainnlánsvextir þar,  4.99  %. Er það þetta sem við sækjumst eftir ? Núll vexti á sparnað ?  Vaxtameðgjöf  á lánsfé ?  Það er bara talað útfrá hagsmunum skuldaranna í umræðunni hérlendis.  Aldrei minnst á þá,  sem reyna að spara.  

 

Hvað er að þessu fólki yfirhöfuð ? Það geta allir tekið upp evrur sem það vilja. Skipt sínum fé í evrur og lagt þær inná evrureikning í bankanum sínum. Samið um að fá launin sín greidd í evrum . Ég er viss um að Jói í Bónus gæti reddað evrumerkingum á vörurnar í hillunum og látið taka við evrum á kössunum. Af hverju þurfa menn að hlusta á þessa þvælu endalaust ? Af hverju taka þeir Þorvaldur og Eiríkur Bergmann bara ekki upp evrur fyrir sig ? Þeir sem það vilja ekki gera með þeim kumpánum geta gert það sem þeim sýnist.

  

Við hinir sem eru svo  vitlausir að halda því fram, að verðtryggða krónan sé sterkasta sparnaðarmynt í heimi, og það er staðreynd sem þeir fyrstnefndu mættu reyna að hrekja,  getum bara haldið áfram að vera til.  Hinir verða bara að reikna sig um á gengi dagsins þegar þeir skila framtalinu. Afganginn af árinu geta þeir lifað og hrærst í evrum eins og þá lystir.

 

Það er eins og menn tali sig alltaf framhjá þeirri staðreynd, að hér ríkir algert frelsi á fjármagnsmarkaði. Þeir nota hinsvegar málfrelsið til að garga á Geir Haarde og heimta að hann taki lán strax fyrir Seðlabankann til að redda vandmálum dagsins í gær ?  Skyldu þeir halda að þeir verði stöndugri til lengri tíma  ef Geir taki lán strax ? Ætli einhver  þurfi ekki að borga það lán ? Er ekki best að taka lán ekki fyrr en maður má til ?

 

Eru þeir sem æpa á tröppum heimsbankans um að Ísland verrrrði að taka lán hhhernig  og hhhaað sem það kostarrr og það strax  í dag með réttu ráði ?  Mér finnst það eiginlega stór spurning. Og svarið við því í bezta falli áhyggjuefni.     

Athugasemdir

[Magnús Þór Hafsteinsson, 22.7.2008 kl. 23:47]

Takk fyrir góðan pistil.

[Ómar Bjarki Smárason, 22.7.2008 kl. 23:55]

Góður að vanda og gott að vita til þess að þú hefur náð að öngla saman nokkrum krónum til mögru áranna....!

[Katrín, 23.7.2008 kl. 00:52]

Ja ..menn eru allavega ekki að auglýsa þá staðreynd að laun í ESB löndum eru að meðaltali 25 % LÆGRI en á Íslandi.  Og láta það alveg vera að minnast á þá breytingar sem framundan eru varðandi vægi landanna innan ESB sem mun færast frá því að hvert land hafi eitt atkvæði yfir í að vægi fari eftir fólksfjölda...og fleira mætti eflaust telja upp.

Kveðjur yfir heiðar og fjöll 

[Predikarinn - Cacoethes scribendi , 23.7.2008 kl. 01:48]

Sæll kæri Halldór. Ég get tekið undir flest það sem þú nefnir til sögunnar í þessum góða pistli. Ég vil benda á stórfróðlegan pistil Brimborgarsjórans Egils einmitt um Evrumálin. Slóðin inn á nýjasta pistilinn hans læt ég fylgja með. Inni í upphafi þess pistil er slóð inn á 3 aðra pistla hans um sama efni :

Mótmælin í evrulandi gegn evru breiðast út

By the way, ég held ekki að Brúnastaðasonurinn sé með réttu ráði í þessari umræðu.

Alea iacta est

[Gunnar Rögnvaldsson, 23.7.2008 kl. 09:44]

Kærar þakkir fyrir góðan pistil Halldór.

Þið verið að flýta ykkur áður en gullna hliðið lokast

Íslendingar hafa alltaf fengið mun betri innlánsvexti í bönkum sínum en við höfum fengið hér í ESB. Þarna á ég við mismuninn á milli útláns- og innlánsvaxta. Oft hefur maður þurft að gera sér að góðu neikvæða vexti á 0,3% á innistæðum.

80% húsnæðislánin til 30 ára eru hér í 4% verðbólgunni veitt á 7% vöxtum, og svo koma oft viðbótarlánin upp að 90-95% veðs, ef það er þá hægt að fá þau, á miklu hærri vöxtum og verri kjörum.

Rekstrarlán til t.d. byggingameistara eru komin upp í 10-14% vexti, allt eftir hversu góður pappír þú ert, og þeir fara hækkandi eftir því sem verr gengur í byggingabarnsanum, en hann er núna að fara á hausinn í mörgum löndum ESB og því vonlaust fyrir marga að fá fjármögnun. Bankaráðgjafar segja einfaldlega nei, og ráðleggja mörgum að loka fyrirtækjunum og deyja drottni sínum - eða fara til fj.

En hve heppilegt það var fyrir Samfylkinguna að þessi fjármálakreppa kom, ástamt hráefna og matvælaverðbólgu. Og gleðin freyddi svo yfir barminn á gleðibikarnum við sjokk-hækkun olíuverðs. Núna á svo að sjanghæja Íslendinga inn í 27klúbbinn í austri í miðju áfallinu. En þessi klúbbur hefur sífellt verið að dragast afturúr efnahag Bandríkjanna og Íslendinga mörg undanfarin ár.

Breytt mynd af ESB - höfuðstefna

Bestu kveðjur

[Guðrún Atladóttir (IP-tala skráð) 23.7.2008 kl. 11:00]

Góðurrrrrr

[Halldór Jónsson, 24.7.2008 kl. 08:32]

Takk öllsömul fyrir að nenna að lesa þetta hjá mér.

Sérstakar þakkir færð þú, Gunnar Rögnvaldsson, fyrir tengilinn inná þínar upplýsingar um ESB. Ég hvet alla til að kynna sér þær staðreyndir málanna sem þar birtast.

Ég hef lengi verið þeirrar skoðunar að ESB verði aldrei jafnokar USA vegna þess að Bandaríkin eru þjóð sem getur beitt einum vilja að einu marki. Það getur lausknýtt og sundurþykkt hagsmunabandalag eins og ESB aldrei gert, hvað þá eftir að fátæk og spillt múslímaríki  eru komin þangað inn.

Bandaríkin hafa sín Megavandamál eins og allar aðrar stærðir hjá þeim. En þeir hafa einn Megafána og eitt Megaþjóðþing og það gerir gæfumuninn. Og þeir hugsa þarafleiðandi talsvert öðruvísi en austurþýzkir sósíalistar eða gamlir búlgarskir kommúnistar gera.

Kannske þessvegna er get ég ekki litið á mig sem einhvern staðlaðan evrópumann eins og Eiríkur Bergmann og Þorvaldur Gylfason segja að ég eigi að vera.