Virkisvetur.

Það eru runnir upp tímar á Íslandi, sem mig hefði aldrei órað fyrir að koma myndu hér á landi.  Alþingi reynir að halda fund í eldsbjarma frá Austurvelli og taktfastur trumbusláttur dansandi mótmælendanna fyrir utan yfirgnæfir ræðuhöldin innanstokks. Rúður brotna og það er ráðist á lögregluna. Stærsti stjórnarmeirihluti Alþingis gefst upp og segir sig frá ógnvænlegum erfiðleikum sem hrannast að þjóðinni.

Við tekur nú einhverskonar stjórnmálabarátta í skini eldanna  frá samkomum "mótmælenda". Ný og óþekkt öfl munu taka við stjórn landsins. Ef því verður þá hægt að stýra því héðan af.  Sumum finnst svigna feiknstafir í framtíðarhorfum  landsins.   Verið getur að þær verði lygilegri en nokkurn órar fyrir á þessari stundu. Sjá menn fyrir sér að hér gæti orðið  hungursneyð á vori ?  Niðurbrot laga og réttar ? Skeggöld, skálmöld ?

Hinn nýi stíll gerendastjórnmálanna mun sjá til þess, að  venjulegir stjórnmálaflokkar munu vart geta haldið fundi án þess að óeirðir verði á fundarstað.  Í skugga alls þessa ætla menn á landsfundi, í prófkjör og svo Alþingiskosningar í byrjun maí.  Skyldu slíkir atburðir fá að fara fram án bálkasta og slagsmála ? Er engum hugsað til fyrri hluta síðustu aldar í Þýzkalandi ?

Napóleon mikli sá sig á sínum tíma tilneyddan að ríða inn í þinghúsið  og reka þingmenn frönsku byltingarinnar út með brugðnu sverði. Þeir höfðu þá prentað peninga handa fólkinu til að gera það ánægðara í eymdinni. Allt kom fyrir ekki.  Napóleon keisari setti alþýðuna í einkennisbúninga og hóf tveggja áratuga styrjaldir. Íslendingar eiga engan Napóleon, sem stillt getur til friðar ef fámennt lögreglulið okkar verður undir í átökum.     Hvað ætli við gerum  þá ? Burstum rykið af Gamla-Sáttmála, sem var víst aldrei sagt upp ? Biðjum um norsk langskip ?

Skyldum við gefast upp á lýðræðinu og fela öskurkórunum og grjótkösturunum völdin ?   Það virðist sama hvað gert er. Öllu er mótmælt með hávaða og ólátum. Jafnvel þó ríkisstjórnin sé fallin er haldið áfram. Gamlárskvöldsstemning ríkir  á torgum hvert einasta kvöld.  Ólæti ólátanna vegna.

 Virkisvetur.    

    

Athugasemdir

[Friðrik Hansen Guðmundsson, 26.1.2009 kl. 22:50]

Það var gaman að lesa þessa grein þína. Skemmtilega stílfærð lýsing á einkennilegum dögum.

[Ómar Bjarki Smárason, 27.1.2009 kl. 00:23]

Þú ert raunsær að vanda Halldór. Kannski að Samfylkingin finni sinn Napóleon í Evrópusambandinu....? En auðvitað eigum við fyrst að setja langskip á flot og sigla til Niðaróss á fund Noregskonungs eins og forferður okkar gerðu þegar nauðsyn krafði.... Það er stórsnjallt hjá nýjum formanni Framsóknar að bjóða Samfylkingu og VG upp á stuðning eða hlutleysi. Þetta gæti aukið fylgi Framsóknar verulega, þegar í ljós kemur hvað Samfylking og VG ná illa saman!

[Óskar Helgi Helgason (IP-tala skráð) 27.1.2009 kl. 01:14]

Heill og sæll; Halldór, sem og aðrir, hér á síðu !

Afar myndræn lýsing; kalt, en napurt raunsæi, kemur fram, í þinni lýsingu, verkfræðingur góður.

Getur hugsast; að meinsemdin liggi, fremur í þjóðareðlinu, en í afkára hætti frjálshyggju þeirrar, hver farið hefir, sem logi um lendur og akra, Halldór ?

Hallast ég fremur; að hinni seinni tilgátu - hvar svo stutt er um liðið, frá þeim kynslóðum, hvar nýtni og nægjusemi voru fremur iðkaðar, hinu fremur.

Með beztu kveðjum /

Óskar Helgi Helgason 

[Halldór Jónsson, 27.1.2009 kl. 11:40]

Þessi athugasemd er sett inn til að athuga hvort allt virki

[Halldór Jónsson, 27.1.2009 kl. 13:48]

Takk fyrir að lesa þetta hjá mér. Ég bjóst nú frekar við skömmum en hlýjum orðum.

Ég var að reyna að senda ykkur svar í morgun en kerfið virkaði ekki. Stjórnin hefur sett inn línu til prufu.

En það sem ég ætlaði að segja við ykkur er að nú er komin ný ríkisstjórn. Þá munu  indíánarnir á Austurvelli væntanlega  stíga villtan dans við eldana sína og sprengja púðurkellingar.

Hvað þessi nýja stjórn muni afreka ? 

Hún mun stórhækka fjármagnstekjuskatt, setja á hátekjuskatt, hækka staðgreiðsluna, hækka öll gjöld og álögur til ríkisins , lækka vexti og verðtryggingu svo að sparnaður leitar frá bönkunum. Hún mun auka útgjöld til félags-og heilbrigðismála. Verðbólgan vex og gengið mun því líklega falla þar til að innflutningur stöðvast að mestu.  Hún mun auka veiðiheimildir,  sem núna munu hækka fjallið af óseldum afurðum.

Hún mun líklega breyta einhliða  AGS samningum með auknum ríkissjóðshalla með óþekktum afleiðingum sem hljóta að leiða til aukinna hafta.  Verðbólgan  og atvinnuleysið geta farið í  óþekktar hæðir og við gætum séð neyðarskýlin.

Líklega mun hún fyrirskipa launa-og bótahækkanir yfir línuna. Þetta er ríkisstjórn Skallagríms og hins vinnandi fólks. Og heilagrar Jóhönnu. 

Nema að hún hafi vit á að gera helst ekkert eins og gamla stjórnin. Nema auðvitað að reka Davíð.

En geri hún eitthvað af ofansögðu þá hrynur hún ofan í rústakjallarann  í maí. Eftir kosningar fer næsta stjórn eins þegar byltingaröflin og indíánarnir  hafa bæst í ráðherrahópinn.

Loks þegar það er allt búið  fara menn að skima eftir leifunum af gamla íhaldinu. Menn fara að rifja upp gömul orð  Bjarna heitins Benediktssonar:  Munið það piltar, að þótt við séum vondir, þá eru aðrir verri.  Það munu menn um síðir sjá. 

2011 eða fyrr verða aftur kosningar og þá fyrst held ég að Sjálfstæðisflokkurinn komi aftur að stjórn landsins. Þangað til verður langur tími og miklir erfiðleikar.

2015 hefur heimurinn hugsanlega lagast eitthvað. En þá verður ESB umræðan löngu fyrir bí á Íslandi og fæstir vilja þá muna hvað þeir sögðu um það mál á þessum tímum.