Ásmundur bóndi !

Það var Kastljósþáttur  í kvöld þar sem saman komu Siv Friðleifsdóttir fyrir Framsókn, Illugi Gunnarsson fyrir Sjálfstæðisflokkinn, Ásmundur bóndi fyrir VG , Helgi Hjörvar fyrir Samfylkingu og Margrét fyrir Borgarahreyfinguna.

Mér þykir dapurlegt að verða að viðurkenna það, að sá eini sem virtist skilja hvað um var rætt, þegar EB málið kemur á dagskrá, var Ásmundur bóndi frá VG. Hinir þingmennirnir allir virtust halda að til stæði að greiða atkvæði um að fara í óskilgreindar aðildarviðræður.

Það var  eins og enginn nema Ásmundur hafi lesið bók Björns Bjarnasonar:"Hvað er Íslandi fyrir bestu " Einskonar Gagn og Gaman fyrir fólk sem vill kynna sér Evrópumálin.

Bóndinn Ásmundur kvað uppúr með það, að það væri ekki verið  að fara í neinar aðildarviðræður heldur væri verið að sækja um aðild að EB. Viðræðurnar myndu snúast um hvað Ísland gæti fengið undaþágur frá að láta yfir sig ganga. Menn sæktu ekki um inngöngu nema vilja fara inn.

Björn Bjarnason lýsir þessu ferli skilmerkilega í bók sinni. Undanþágur, eins og frá sjávarútvegsstefnu bandalagsins eða innflutningi á landbúnaðarvöru,  yrðu ávallt tímabundnar og algerlega á valdi ráðherranefndarinnar að framlengja eða afturkalla eins og raunar um öll frávik frá sáttmálum bandalagsins.  Það er stundum eins og Íslendingar haldi að EB. sé eitthvað nýstofnað apparat,  sem bíði þess bara að Íslendingar komi og umskrifi regluverk þess eftir sínu höfði.

Helgi Hjörvar hélt því svo blákalt fram, að gagnstætt Sjálfstæðisflokknum væru Samfylkingin og VG lýðræðisflokkar. Fulltrúinn  frá Sjálfstæðisflokknum lét þetta yfir sig ganga. ómótmælt. Þetta þótti mér harta að þola af hálfu þessa fyrrum Þjólífsrukkara. Orð hans  stóðu því óhögguð í þáttarlok. Ég held að þessi fulltrúi ætti að fara í endurhæfingu sem Sjálfstæðismaður og glöggva sig á þeim skyldum sem því fylgja fremur en að vera að skrifa langlokur í Morgunblaðið um efni sem hann skilur varla sjálfur.

 Mér finnst á skorta að fólk skýri fyrir sér að það er verið að greiða atkvæði á Alþingi Íslendinga, hvort sækja eigi um aðild að Evrópusambandinu.

Hvort fólki finnist það í lagi á þeim tímamótum, að jafnvel eitt atkvæði geti skipt sköpum þegar um er að ræða mesta fullveldisframsal Íslendinga frá 1262.

Í slíku máli hefði ég kosið að sjá aukinn meirihluta Alþingis eða þá að þjóðin kvæði upp afgerandi dóm í málinu. Mér finnst það varla sæmandi, að láta jafnvel eitt atkvæði, misjafnlega þroskaðs manns, mögulega ráða úrslitum í svo gífurlega miklu máli fyrir alla framtíð Íslands, hvort heldur er á Alþingi eða í þjóðaratkvæði.

Mér finnst skautað fram hjá því, að árið 2007 var Evrópunefndin, þverpólitísk nefnd undir formennsku Björns Bjarnasonar,  sammála um það, eftir þriggja ára vinnu, að telja hagsmunum Íslands best borgið utan EB. Einnig fram hjá því að  andsfundur Sjálfstæðisflokksins árið 2009 komst að sömu niðurstöðu  þó að það kostaði að einir tveir gengju úr flokknum eftir þau málalok.Samt berja sumir fulltrúar flokksins enn höfði við steininn og þrugla um aðildarviðræður þegar ekkert slíkt er á dagskrá.

Ég lýsi hér og nú aðdáun minni á  Ásmundi bónda og málflutningi hans . Svoleiðis menn vildi ég hafa fleiri í mínum flokki.

 

 

 

 

 

 

Athugasemdir

[Ómar Bjarki Smárason, 13.7.2009 kl. 21:49]

Góður að vanda, Halldór, og gott að fá úttekt á Kastljósninu áður en ég horfi á það. Þetta er svona eins og í hlutafélaginu okkar, en ég var alltaf hrifinn af því þegar þú varst nánast búinn að skrifa fundargerðina fyrirfram. Slíkt sparar vinnu!

En úr því Ásmundur bóndi er í VG, er þá nokkuð annað en að fara um sveitir landsins og kanna hvort ekki finnist fleiri honum líkir sem hægt væri að fá í leiðtogahlutverkið...? Kannski er það vandamál okkar hvað það koma margir þingmenn af mölinni eða malbikinu. Þegar við leituðum að starfsmönnum fyrir Suðurvík forðum, þá var það skilyrði að fólk væri úr sveit eða hefði a.m.k. verið í sveit..... við vildum fólk með verksvit!

[Jón Baldur Lorange, 13.7.2009 kl. 22:13]

Sammála þér Halldór að Ásmundur Einar Daðason, bóndi á Lambeyrum, stóð sig vel í þessari annars fróðlegu Evrópusambandsumræðu í Kastljósinu. Það kom mér ekki á óvart enda þekki ég hann bara af einu góðu. Hann stendur með sannfæringu sinni og stendur með landbúnaðinum og landsbyggðinni. Sem yngsti þingmaðurinn og nýr þingmaður þá sýnir þetta að töggur er í honum enda hefur hann sýnt það í fyrri störfum.

Þá ég sammála þér, eins og oft áður Halldór, varðandi frammistöðu Illuga Gunnarssonar, þingmanns flokksins okkar. Hann gerði meira úr ágreiningi stjórnarflokkanna en að halda á lofti stefnu Sjálfstæðisflokksins, sem var mótuð á landsfundinum, sem hefur reynst kórrétt og ég er stoltur af því að hafa verið einn af landsfundarfulltrúum sem studdi hana. Hins vegar með því að gera svo mikið úr ágreiningi stjórnarflokkanna þá lagði Illugi sitt af mörkum að þrýsta stjórnarflokkunum saman. Einkennilegur málflutningur fannst.

Hvað varðar málflutning Sivjar í Framsókn þá fannst mér hún í raun vera stjórnarþingmaður í Samfylkingunni og gerði lítið úr afstöðu eigin formanns.

Málflutningur Margrétar úr Borgarahreyfingunni voru mér vonbrigði og greinilegt að hún lætur Samfylkinguna mata sig í þessu máli.

Helgi Hjörvar kom ekki á óvart og bloggaði ég um málflutning hans fyrr í dag.

[Jón Baldur Lorange, 13.7.2009 kl. 22:39]

Ég verð síðan að bæta við lokaorðum Helga Hjörvar um að það yrði að gæta að hagsmunum fjármálafyrirtækja í samningaviðræðum við ESB! Svona eins og Samfylkingin hafi nú ekki aldeilis staðið á verði við hagsmunagæslu fyrir þau í ráðherratíð Björgvins G. Sigurðssonar með Jóns Sigurðsson, sem formann Fjármálaeftirlitsins, sem lét hafa sig út í að koma fram í auglýsingu fyrir Landsbankann í Bretlandi, eins og Egill Helgason vakti athygli á um daginn.

[Gústaf Níelsson, 14.7.2009 kl. 01:57]

Ásmundur bóndi fór á þing til þess eins að standa fyrir skoðanir, sjónarmið og stefnu klassískra framsóknarkomma, en ekki til þess að vera pólitískt jórturdýr fyrir Steingrím Jóhann, sem nú um stundir étur allt ofaní sig. Hann siglir að sönnu undir réttu flaggi.

[Jón Valur Jensson, 14.7.2009 kl. 02:19]

Gústaf, á Austurvöll með þig á morgun! Verðum þar kl. 5, og þú mátt gjarnan mæta miklu fyrr, og taktu marga með þér. Safnizt í hnapp og látið til ykkar heyra fyrir framan þinghúsið, þá bætast fleiri við – öll feimni og hlédrægni sendir bara allt fólkið heim.

Dapurlegt var að horfa upp á handvalið í þennan Kastljósþátt, af fimm manns var aðeins einn, Ásmundur Einar Daðason, andstæðingur innlimunar okkar í Evrópubandalagið. Þetta er ekki hlutleysi né hlutlægni, þáttarstjóri!

PS. Margrét Tryggvadóttir vill umfram allt að við Íslendingar höfum eitthvað að BJÓÐA Evrópubandalags-stórveldinu í "aðildar"viðræðum! Ætlar hún þá að láta BRUSSELVALDIÐ í staðinn gæta réttar OKKAR og hagsmuna við samningaborðið?! Hún er greinilega tabula rasa í þjóðvarnarmálum, grænni en Steingrímur J. og þessi Björn Valur (endurborinn afspringur Macchiavellis?) sem skreið upp bakið á honum í NA-kjördæmi. Fullveldissinnar hefðu betur boðið fram.

[Sigurður Þórðarson, 14.7.2009 kl. 05:30]

Takk fyrir góðan pistil Halldór.

Ég myndi vilja hafa þjóðholla menn eins og Ásmund bónda í öllum flokkum. Björn Bjarnason hefur greinilega kynnt sér evrópumálin rækilega það hafa þeiraftur á móti ekki gert sem eru kallaðir til sem álitsgjafar í svokölluðum "fræðsluþáttum" RUV um málið eða ég réttara sagt vona að það sé ástæða þess að staðreyndum er þar snúið á haus.

[Guðbjörn Guðbjörnsson, 14.7.2009 kl. 09:12]

Þótt ekki sé ég sammála frænda mínum Ásmundi Einari Daðasyni stóð hann sig afskaplega vel í Kastljósinu í gær, eins og hann á kyn til .

Ásmundur er ekki einungis bóndi í Laxárdal í Dölum vestra, heldur búfræðingur frá Hvanneyri og með B.S. gráðu í búsvísindum frá sama skóla.

Íslenskir bændur hafa oft verið með gleggstu mönnum landsins, þannig að það kemur mér ekki á óvart að þeir viti sínu viti. 

[Jón Ingi Cæsarsson, 14.7.2009 kl. 11:25]

Það kemur ekkert á óvart að bóndinn sé á móti aðild. Það er yfirlýst stefna bændasamtakanna og því fylgir Ásmundur eins og menn gera gjarnan þegar þeir horfa á mál frá sínum sjónarhóli.

Þetta er ekkert flókið Halldór. Ísland sækir um aðild að ESB sem við eigum þegar 80% aðild að í gegnum EES saminginn.

Viðræður fara fram og samingsdrög gerð. Þau fara í þjóðaratkvæði og ef meirihluti þjóðarinnar segir já förum við í ESB ef ekki, förum við ekki í ESB.

Þetta er lýðræðislegasta aðferð sem til er til að útkljá þetta mál á lýðræðilegan hátt. Hagsmunaðilar og trúabragafræðingar á báða vegu eiga ekki að ráða því hvar og hvernig þetta mál endar.

[Gunnar Rögnvaldsson, 14.7.2009 kl. 11:38]

Guð minn góður.

Ég var að horfa á skjá einn umræður um Icesave málið. Þetta er sennilega í annað skipti sem ég hef horft og hlustað á þennan mann sem heitir Árni Páll. Þetta er sprenghlægilegt. Alveg sprenghlægilegt. Hvernig getur Samfylkingin þorað að leggja öll sín egg í póltíska lausn þegar hún er mönnuð pólitískum trúðum sem andstæðingar okkar leika sér að og eru að springa í buxurnar yfir þangað til þeir neyðast til að fara á klósettið til að pissa ekki á sig af hlátri við fundarborðið yfir aumingjaskapnum í þessum vesalingum þjóðarinnar. Guð minn góður. Þetta er Chamberlain í þriðja veldi. Þvílíkur sirkus! Þvílíkur sirkus maður!

.

Þetta er 100 sinnum meira incompetent fólk en ég hélt

.

Takk fyrir góðan pistil Halldór

.

Ég er miður mín!

[Emil Örn Kristjánsson, 14.7.2009 kl. 13:37]

Góður pistill, Halldór. Mér þykir það þó grunnt í árinni tekið að segja að þetta vera mesta fullveldisframsal frá 1262. Það er vissulega rétt en munurinn er sá að hér er í raun um algert fullveldisafsal að ræða. Gamli sáttmáli gerði þó ráð fyrir að Íslendingar næðu íslenzkum lögum. Auk þess sem hann var með uppsagnarákvæði.