Kínverjum kennt að fljúga !

Ég las það í Baugstíðindum að nú ætli Keilir að kenna Kínverjum að fljúga. Ekkert er til sparað og keyptar hafa verið dísilflugvélar af bestu gerð með glerborði, eitthvað sem enginn Íslendingur gæti látið sig dreyma um að kaupa. Nema fyrir opinbera peninga dettur mér í hug án þess að hafa hugmynd um hver á þennan Keilir eða hvaðan aurarnir koma.

Ég dundaði mér við það í atvinnuleysinu að þýða bókina Sagittarius Rísandi eftir Cecil  A. Lewis. Þessi strákur  fór sautján ára í breska flugherinn 1915 og var sendur yfir til Frakklands með þrettán tíma flugreynslu.Honum tekst að fljúga alla  styrjöldina á enda, gegn öllum líkum þar sem hans líkar höfðu þriggja vikna lífslíkur á vígstöðvunum.

Eftir stríðið fer hann um 1920  til Kína að kenna Kínverjum að fljúga til undirbúnings stofnunar flughers Kínverja. Lýsingar hans á þessum tíma eru stórkostlegar og því viðfangsefni að koma flugi til skila í framandi bændaþjóðfélagi í gegnum tungumálaörðugleika til kínversks nemanda. Ég hefði talið  líklegt að lýsingar Lewis væru  holl lesning hverjum þeim sem ætlar að endurtaka þetta hlutverk, sem ég les nú um að Keilir sé að byrja á núna. En kannski er allt flug orðið svo breytt að menn þurfi ekki lengur að vera fæddir flugmenn til að geta flogið, öll tilfinning úrelt, allt orðið ríkisvædd skrifborðsmennska.Og Íslendingar teknir við að þjálfa kínverska stríðsflugmenn sem koma kannski seinna að heimsækja okkur í öðru hlutverki.  

Og svona til að barna söguna af mér og Lewis þá fékk ég auðvitað öngvan til að gefa bókina út svo ég gerði það bara sjálfur. Bókin er komin út og fæst í bókaverzlunum. Ég vona að einhverjir flugkallar og kellingar kaupi hana sér til ánægju, svo ég þurfi ekki að brenna upplaginu. Fyrir utan gagnsemi leiðbeininganna um að kenna Kínverjum að fljúga, þá fannst mér sjálfum bókin hin skemmtilegasta og áhrifamikil. Og svo er hún það víst líka að margra annarra dómi og það alþjóðlega.  Hún var skrifuð árið 1936 og hefur aldrei verið úr prentun síðan, þannig að það hlýtur að vera eitthvað við hana. allavega fannst mér það og hún er sönn frásögn athuguls manns sem lifði af ótrúlega tíma. Ég vona að þýðing mín verði ekki talin gera minningu Lewis skömm til en auðvitað má að öllu finna.

Menn geta googlað Cecil Arthur Lewis sér til fróðleiks og kynnst honum þar fyrir ekki neitt. Og margt fleira um stóra stríðið 1914-1918 sem kostaði nærri tíu milljónir hermanna lífið. Það er til dæmis  hægt að horfa á tvöhundruðþúsund hauskúpur af þeim í glerkjallaranum undir kirkjunni í Verdun. Þar fannst mér  eins og önnur heimstyrjöldin hafi aldrei átt sér stað, slík var helgi þess staðar þegar ég kom þangað.

En gaman verður að fylgjast með Keili kenna Kínverjum að fljúga !

 

Athugasemdir

[Hörður Halldórsson, 21.10.2009 kl. 19:41]

Örugglega góð bók.

[Ómar Bjarki Smárason, 21.10.2009 kl. 21:40]

Þú ættir að huga að því, Halldór, að fá bókina þýdda yfir á Kínversku og koma henni á markað þar. Sá markaður gæti verið sínu stærri en sá íslenski.....

Ég á eina grein um jarðhita sem skrifaði ásamt Jens Tómassyni á Orkustofnun á sínum tíma, sem snúið var á Kínversku. Þetta var í ráðstefnuhefti. Reyndar er ég ekki dómbær á hvernig til hefur tekist með þýðinguna, en það er kannski rétt að halda þessu til haga ef mann langar að hasla sér völl í jarðhita í Kína..... Ef af því verður skal ég taka nokkur eintök af bókinni þinni með, í kínversku þýðingunni.....

[Halldór Jónsson, 21.10.2009 kl. 22:24]

Takk fyrir Hörður, þeir sem lesið hafa segja að hún sé góð. Einn alvöru bókmenntamaður sagði meira að segja að þetta væri ein besta stríðsbók sem hann hefði lesið.

Ómar,það er ekkert mál að þýða úr ensku á kínversku með google translate. Hef prófað það og enski textinn komm nærri eins til baka þegar öfuga leiðin var prófuð. Skal ráðast strax í að þýða ef þú getur selt svona tvö eintök á hverja milljón Kínverja. Ég veit ekki hvort skýrslan þín yrði með stærra upplag. 

[Predikarinn - Cacoethes scribendi , 22.10.2009 kl. 02:30]

Kæri Halldór. Það verður að taka þessar þýðingarvélar með nokkrum fyrirvara enn sem komið er. Sérstaklega hvað varða mál- og setningarfræði.

Ég bað google að þýða þessa frægu setningu „Hver á þessa bók” og var auðvitað að vonast eftir svarinu „Hot spring river this book”. Svar google var eftirfarandi á nokkrum alþekktum tungumálum : á ensku „Each of this book”, dönsku „Hver af denne bog”, norsku „Hver av denne boken”, sænsku „Var och en av den här boken”, spænsku „Cada uno de este libro”, þýsku „Jeder von diesem Buch”, ítölsku „Ciascuno di questo libro”, hebresku „כל הספר הזה”, grísku „?ά?? έ?? ??ό ???ό ?? ????ί?”, velsku „Mae pob un o'r llyfr hwn”, írsku „Gach ceann de leabhar seo” og loks á ylhýru frönskunni „Chacun de ce livre”.

Þetta kennir manni sennilega að það er nauðsynlegt að yfirfara hverja þýðingu til lagfæringar, svo ekki sé talað um að ljá þýðingunni fegurð og jafnvel hrynjandi á stundum.

[Predikarinn - Cacoethes scribendi , 22.10.2009 kl. 02:34]

Hmm. Moggabloggið kann ekki að skrifa grísku haha.Sjáum hvort html hamur ræður við það :

?ά?? έ?? ??ό ???ό ?? ????ί?

[Predikarinn - Cacoethes scribendi , 22.10.2009 kl. 02:34]

Nei ekki heldur