Leita í fréttum mbl.is

Bloggfærslur mánaðarins, júlí 2011

Hlustaðu !

sagði maðurinn sem var að koma úr löndum einræðis og kúgunar hafa lengi hljómað í huga mér sérstaklega eftir að ég fór sjálfur til Kúbu. Þar heyrist aldrei í flugvél, ekkert fæst af ensku lesmáli nema bækur um Catró og Ché, engin erlend blöð fást og  uxar draga kerrur á hraðbrautunum.

 Maðurinn sagði: "Hlustaðu á þetta dásamlega hljóð. Þotuhvininn. Þetta er hljóð frelsisins.  Það táknar, að ég og allir eru frjálsir að koma og fara. Þar sem ég bjó áður heyrðist þetta hljóð ekki enda var ég ánauðugur maður, sem ekkert mátti fara." 

 Þetta kemur í huga minn þegar ég er að fletta blaði "einkaþotumanna" eða viðskiptaflugsmanna ,"Bussiness / Commercial Aviation og les um tækniundrið Cessna Citation X cem flýgur í 45 000 feta hæð á Mach 0.85. Þarna uppi þar sem við sjáum þoturákirnar á himninum er önnur veröld tækni og dásemda sem er svo óralangt yfir drunganum, eymdinni og ömurleikanum í því landi þar sem ég er núna fangi í. Svona þota kostar samt ekki nema svona nokkrum sinnum verðmæti vínlagersins í gamla Kaupþingi sem nú er í fréttum.  Fyrir hrun voru líka komnar viðskiptaþotur í íslenska útgerð. Hvernær skyldi það verða næst?   

Hversu óralangt er á milli þessa fólks þarna uppi á himninum og fólksins sem styður núna kúgara mína og skaðvalda.  Hvenær skyldi frelsið og trúin á það koma aftur til lands sem núna fjötrar okkur föst? Hvenær koma þeir tímar aftur þegar maður sér von í augum fólksins í kring um sig? Hvenær kemur sá dagur að landflóttinn stöðvast og fólkið kemur aftur til síns fagra lands?

Eða hefur traustið beðið svo mikinn skaða að það taki svo óralangan tíma að það komi aftur að ég lifi það ekki? Það komi ekki aftur fyrr en að þetta fólk sem núna er við stjórn hefur einangrast í stjórnmálunum eins og það var í þau 20 ár sem því var haldið utan Stjórnarráðsins nú síðast? Þó að það yrði kosið frá á morgun muni það taka langan tíma fyrir fólk hérlendis eða erlendis að þora að gera eitthvað hérna til lengri tíma, ef það á von á því að þetta VG-fólk geti komið aftur til valda, með gjaldeyrishöft, átthagafjötra, persónunjósnir og atvinnufjandsamlega skattlagningarstefnu?

Allavega er gaman að hugsa til þess að veröldin er stórkostleg með alla þá tækni sem þar finnst.Mannkynnið er stórkoslegt en heimskan hinsvegar svo mikil og mikilvirk mannheimum í.  Fólkið í Sómalíu fær ekki matinn úr geymslunum vegna ríkjandi heimskunnar.En heimskan er mesta vandmál Afríku og orsökin fyrir ótímabæru afnámi nýlenduveldisins. Og raunar Íslands líka ef út í það er farið.

Í Noregi er bullandi atvinna og allir fá vinnu sem vilja á miklu hærra kaupi en almenningi býðst hér. Menn geta flúið héðan þangað slyppir og snauðir og byrjað nýtt líf eins og Norðmenn gerðu hingað fyrir 1200 árum. Þetta gerir fólkið okkar núna í stríðum straumum. Millistéttin er að hverfa úr þessu landi kúgunarinnar og bankaspillingarinnar. Eftir sitja þeir sem ekki geta lengur flúið og svo auðvitað Nómenklatúran, skilanefndirnar,  kvótagreifarnir og þeir sem enn hafa föst störf eins bankanenn og aðrir opinberir starfsmenn sem ekki verður fækkað.

Tæknin sem ég heyri að Norðmenn nota í mínu fagi lætur mig klæja í fingurna að fá að kynnast henni. En nú er kennitalan orðin svo úldin að líkurnar eru litlar að ég fái til þess nokkur tækifæri. Byggingariðnaður á Íslandi er líklega dauður til langs tíma þannig að maður fær líklega ekki fleiri tækifæri á sinni tíð. Ég hef því ekki neinar hrifningartilfinngar í brjósti þegar ég hugsa um þau móðuharðindi af mannavöldum sem nú ganga yfir íslenska þjóð, ég hef ekki gleði í hjarta þegar ég horfi á heimskupörin sem tröllríða öllu þjóðlífinu og streyma frá ráðleysingjunum sem nú sóla sig í upphafinni sjálfsdýrkun í ráðuneytunum meðan ríkinu blæðir.

Ég vildi gjarnan berjast við þessar forynjur en það virðist enginn samhljómur til þess. Einn maður getur ekkert eins og allir vita.  Þögul uppgjöf virðist ríkja meðal almennings og fótatak útflytjendanna er stöðugt og hverfur svo út í buskann. Það er atkvæðagreiðslan með fótunum sem við erum að hlusta þar á.

 En hlustaðu samt á heiminn meðan þú getur. Það getur orðið langt í sólarupprás og fuglasönginn. En sólin er þarna samt einhversstaðar.


Hneykslaður?

eða er maður ekki bara orðinn svo dofinn á íslenska réttarkerfinu og stjórnmálaspillingunni að maður er orðlaus, -næstum því.

RíkistjórnaÚtVarpið sagði frá því að Seðlabankinn hefði rétt í þessu verið að selja ráðandi hlut í Sjóvá til valins hóps manna, þar á meðal kúlulánagreifa úr gömlu bönkunum og sllskyns fólki öðru á einhverja 5.7 milljarða. Þeir koma upp í þá 12milljarða sem Steingrímur J. lét í félagið SJOVÁ af því að það var búið að stela bótasjóðnum af aumingja félaginu.

Svo glytti í Karl Wernersson, stjórnarformann félagsins í baksýn. Þess sama sem sannarlega tók peningana, skipaði forstjóranum að afhenda sér þá ellegar ræki hann hann á staðnum. Hann sést í baksýn í fréttinni þar sem hann var að flýta sér, væntanlega til London þar sem hann býr í vellystingum og virðist laus allra mála.

Steingrímur J. Sigfússon lét íslenska ríkið lggja 12 milljarða inn í SJÓVÁ bara si svona. Fékk hann einhverjar fjárheimildir frá Alþingi? Hvaðan fékk hann heimildir til þess að gera þetta bara svona allt í einu? Það hefur kannski verið Már Guðmundsson sem veitti honum leyfið úr því hann er svo látinn selja þetta með svona 7 milljarða tapi og skýra frá þessum snilldarviðskiptum í fréttatíma RÚV eins og það hefði verið að versla með kaffipakka.Ekki að gefa 20 milljónir til Sómalíu eins og Össur gerði heldur gefa Wernersbræðrum 7000 milljónir, þrjúhundruðsinnm þá upphæð. Og Kalli var bara í góðum holdum á myndinni.

Þetta er kannski ekkert öðruvísi en að að setja 2 x 30 milljarða í tvo gjaldþrota sparisjóði sem eru svo seldir áfram fyrir einhverja leyndarmálasummur til óþekktra aðila? Eða 2x 30 milljarða í VBS og Saga Capital og tapa hverjum eyri? Eða safna fyrirtækjum í ríkisrekstur eins og Húsamiðjunni, Pennanum, BM Vallá, Steypustöðinni og svo áfram. Tapa bara eins og þetta sé glas af súrmjólk sem sé verið að sletta úr.

Finnst fólki, kjósendum VG líka, þetta vera í lagi allt saman? Er þetta rústabjörgunin eftir hrunstjórnina þar sem Jóhanna Sigurðardóttir var ráðherra í?. Hin þungbæra skylda sem Steingrímur talar um sem hann var kallaður til og neyddist svo til að hlýða rödd samvisku sinnar þegar hann leiðir Geir Haarde fyrir landsdóm?

Þetta eru bara ekki spilapeningar pólitískum Matador Steingríms J. og VG. Þetta eru skattpeningar íslenska ríkisins, sem þú átt og hefur lagt fram með sköttum þínum. Borgar á hverjum degi í VASKinum sem rennur til Steingríms. Þetta eru ekki aurar sem Steingrímur átti heldur þú.Það er ekki Steingrímur sem er að tapa á sölunni heldur þú. Og til hvers var hann að kaupa þetta á 12 milljarða þegar hann verður að selja þetta á slikk? Hver var þörfin ? Var það bara upphæðin, 12 milljarðarnir, sem búið vara að stela sem réð upphæðinni sem Steingrímur sletti í félagið? Ekki hvað var verið að kaupa? Hvað hefði kostað að reka félagið dag frá degi með ríkisábyrgð ef svo hefði þurft í einhvern smátíma?

Finnt öllum þetta bara í lagi? Er ekki þetta fjármálasnilli Steingríms J. Sigfússonar í hnotskurn? Manni sem kígjaði ekki við Icesave l,ll eða lll klyfjunum sem hann vildi fyrir hvern mun koma á þjóðina. Og selja svo Íslandsbanka og Kaupþing til einhverra sem hann þekkir ekki einu sinni aðspurður í dag? Var það þetta sem var það besta fyrir íslensk heimili að fá erlenda vogunarsjóði sem innheimtumenn á verðtryggðum skuldum sem ekki var hægt að leiðrétta af umhyggju fyrir bönkunum nýju sem Steingrímur "fullfjármagnaði" og hreykti sér af?

Hvernig getur VG sagst vera alvörustjórnmálaflokkur með svona afrek formannsins í farteskinu? Er svona erfitt að vera fjármálaráðherra og skila ríkissjóði með 10 % halla af vergri landsframleiðslu? Alveg svipað eins og í Grikklandi og á Spáni?

Allt í einu uppgötvaðist sem sagt að það var búið að stela bótasjóði SJÓVÁ. Bótasjóður er heilagur sjóður tryggingafélags sem það fær að mynda með þáttöku ríkisins með skattfríðindum. Sjóðurinn verður þessvegna opinber sameigneign skattborgara landsins og eigenda félagsins. Að stela honum er því að hluta til stuldur frá ríkinu sem stundum þykir athugavert.Fyrir utan það að vera glæpsamlegt tilræði við grandalausan almenning landsins.

En ekki þegar Steingrímur J. Sigfússon tekur ákvörðun um að bjarga SJÓVÁ frá gjaldþroti og lokun. Hvaða ástæðu bar til þess? Nokkur? Samkvæmt öllum viðskiptalögmálum átti ekki að skipa skiptastjóra í félagið? Og hugsanlega taka þjófana sem bokkuð vitað er hverjir eru höndum og hneppa í gæsluvarðhald þangað til að þeir skiluðu peningunum til þrotabúsins? Því 12 milljarðar gufa ekki sporlaust upp. Það er ekki eðli peninga sagði Eva Joly.

Fólk sem var með tryggingar hjá SJÓVÁ, eins og ég til dæmis. hefði auðvitað staðið uppi uppi meða allt ótryggt. Við vorum búin að vera það lengi en vissum það bara ekki. Hvað var svona voðalegt við það? Hefði ég ekki bara farið niður í TM og tryggt? Allir hefðu bara orðið að fara annað með tryggingar sínar samkvæmt lögmálum markaðarins. Þau tryggingafélög sem ekki voru komin á hausinn áttu auðvitað að njóta sigursins án afskipta ríkisins. SJÓVÁ væri bara horfið. Átti ekki alveg eins að fara með steypustöðvar og önnur fallítt fyrirtæki bankanna? Hversvegna fá ekki lögmál kapitalismans að ráða?

Ef ég væri ekki orðinn svo gersamlega kexsaður á íslensku réttarfari og þeirri spillingu sem mér finnst vaða hér uppi í skjóli stjórnvalda, þá hefði ég líklega hneykslast. En þar sem ekkert kemur manni á óvart lengur í afrekaskrá þessarar ríkisstjórnar og ástandinu í Alþýðulýðveldinu Íslandi, þá fer maður bara að hlakka til helgarinnar.


Evrópuherinn

Það er eitt mál sem Evrópusinnum skýst dálítið yfir í umræðunni, en það eru samþykktirnar í Lissabon sjórnarskránni, sem við munum undirgangast með inngöngunni sem gera það að verkum , að Íslendingum býðst að leggja okkar skerf fram til hermála Evrópusambandsins.  Unga fólkið okkar fær þar tækifæri til að gegna herþjónustu í Evrópusmabandinu og gera Ísland þar með að þjóð meðal þjóða sambandsins. Eitthvað sem sjálfvirðing þjóðarinnar hefði ef til vill ekki slæmt af.

Það er þekkt staðreynd að Íslendingar eru illa bagaðir af agaleysi. Ókurteisi, ruddaháttur  og skepnuskapur í umgengni ríður hér húsum eins og frásagnir um umganginn í miðborg Reykjavíkur eftir fyllerín þar heimsfrægu  Makalaust að eigendur öldurhúsanna skuli ekki vera látnir kosta þrifin að einhverju leyti þar sem tengslin eru augljós. Ég veit ekki hversu mikið  t.d. Hótel Geysir í Haukadal greiðir til viðhalds á hverasvæðinu eða vertshúsið við Gullfoss greiðir til viðhalds göngustiganna, en tengslin eru þar líka nokkuð augljós milli aðstöðu og einkagróða. Auðlindagjald þykir sjálfsagt í fiskveiðum svo dæmi sé tekið.

Ungir menn í herþjónustu læra að bursta skó sína og hegða sér eins og siðaðir menn í hernum. Þetta eimir eftir í þeim síðar í lífinu.   Því verður ekki trúað að Íslendingar ætli bara í Evrópusambandið til að byggja alla sína tilveru á því að vera stikkfrí, stikkfrí frá fiskveiðisstefnu sambandsins, stikkfrí frá hermennsku, stikkfrí frá því að uppfylla skyldur sínar. Vilji bara taka fyrir sig en ekkert að láta í staðinn, ekki vera fullgildir félagar heldur svíkja aðra eins og þeir geta meðan þeir græða sjálfir.

Það er einhver fóbía í gangi hér í hinni opinberu og miðstýrðu umræðu,  sem bullar um það að Íslendingar séu vopnlaus þjóð og friðelskandi sem aldrei taki þátt í hernaði og bla bla. Við höfum bara verið svo fáir að við höfum ekkert haft fram að leggja.  Innrætið okkar er ekki hótinu skárra en hjá Agli Skalla ef út í það er farið.  En það er áróður kommúnistanna gegn hermennsku hjá okkur af því að hún færi fram í hópi vestrænna þjóða sem stýrir hugsuninni.  Í því skyni níða þeir niður hermennsku fyrir okkur eins og að sé eitthvað niðurlægjandi og fyrirlitlegt í allri hermennsku þó þeir sjálfir hafi tekið fagnandi þátt í hermennskuþjálfun í austantjaldslöndunum og hafi haldið því fram að "hér mætti skjóta án allrar miskunnar ef það kæmi Rússum að gagni." Þeir gleyma því að hermaður er opinber embættismaður þjóðar sinnar sem getur verið jafnstoltur af starfi sínu eins og hver annar,  prestur, kennari eða bankastarfsmaður. Maður hittir aldrei Bandaríkjamann sem er ekki stoltur af því að hafa verið í hernum og þjónað föðurlandinu.

Kannski lagast þetta með uppeldið hjá okkur og umgengnina þegar ungir Íslendingar fara að gegna herþjónustu í Evrópuhernum og við hættum að hugsa bara um undanþágur og sérréttindi og förum að axla samevrópska ábyrgð eins og í fiskveiðimálum. Ég hef séð marga unglinga hérlendis sem hefðu gott af því að læra að bursta skó og temja sér kurteisi í framkomu eins og menn og draga lærdóm af því að vera opinberir og ábyrgðarfullir embættismenn þjóðar sinnar eins og hermenn eru.

Kannski er Evrópuherinn það sem okkur vantar hvað mest?


Minna bankakerfi?

Svo stendur í fréttum: „Credit Suisse, annar stærsti banki Sviss, hefur tilkynnt að bankinn muni segja upp um 2000 starfsmönnum vegna minnkandi hagnaðar af starfseminni.“

Á Íslandi deila menn um það hvort ríkið þurfi að borga 30 eða 40 milljarða með því að Landsbankinn taki yfir rekstur SpKef. Það er líka deilt um það hvort ríkið muni þurfa að borga þá eða svipaða upphæð til viðbótar til þess að Íslandsbanki geti tekið yfir BYR.Og gleymum þá alveg Sjóvá og öllum öðrum afrekum Steingríms J. í endurreisn Íslands eftir hrunstjórnina sem Jóhanna sat í.

Vandamál þessara fyrirtækja er til komin af því að allskyns þjófar og bófar voru búnir að hirða allt nýtanlegt úr þessum fyrirtækjum. Altt menn sem ganga lausir og liðugir um og bísperrtir í dag. Afganginn megum við fíflin eiga, sem stundum eru kallaðir skattgreiðendur og á hátíðarstundum hæstvirtar kjósendur, sem er hugsanlega einhver íslensk andategund í útrýmingarhættu eftir ESB aðildina? Svona álíka eins og önnur útdauð tegund og var kölluð sparendur fyrir tíma kúlubréfanna, púnktanna og gíranna.

Það er töluleg staðreynd að bankastarfsmenn á Íslandi munu vera um þrisvar sinnum fleiri miðað við höfðatölu en í Bandaríkjunum. Afskipti ríkisins á Íslandi af bankamálum viðast hinsvegar öll við það, að varðveita störf bankamanna? Halda öllum afgreiðslum opnum osfrv? Hvergi má fækka starfsmönnum heldur viðhalda öllu eins og það er?

Hvergi sér þess merki hinsvegar að þessir sem eru með peningana ætli að skila þeim til baka. Það á bara að prenta nýja seðla handa nýjum bönkum og bankastarfsmönnum sem enginn veit einu sinni hjá hverjum vinna að stærstum hluta?

Hveernig ætlar Credit Suisse að fara að?


Reykjavíkurflugvöllur

Ég rakst á gamlar hugleiðingar mínar um Reykjavíkurflugvöll. Vegna þess að Ögmundur Innanríkis hefur talað af einhverju viti þegar kemur að flugvallarmálinu, þá dettur mér í hug að skeyta nokkrum línum hér inn. 

" Ég les í blaðinu þeirra í Orlando viðtal við mann, sem er að koma úr Sovétríkjunum gömlu. Hann grípur í ermi blaðamannsins og segir: Hlustaðu á þetta dásamlega hljóð. Þotuhvininn. Hann segir við blaðamanninn:  Þetta er hljóð frelsins. Það táknar, að ég og allir eru frjálsir að koma og fara. Þar sem ég bjó áður heyrðist þetta hljóð ekki enda var ég ánauðugur maður, sem ekkert mátti fara. Einu þotuhljóðin sem ég heyrði voru frá herþotum drottnaranna, sem sáu til þess að ég gat engin samskipti haft við umheiminn. 

Ég hugsa til okkar. Um Reykjavíkurflugvöll fara hálf milljón manna árlega ?. Hvað koma þeir með ? Hugmyndir í höfðum sínum ? Peninga í vösunum  ? Hvað er þetta fólk að vilja hingað ? Sækja teikningar til Arnar arkitekts eða kaupa Osramperur til heimilisins ?   Er þetta ekki  frjálst fólk í frjálsu landi með auðæfin í höfðunum  og peninga í vösunum. Er víst að meirihluti borgarbúa vilji skipta á  þessu fólki og flugvellinum ? Hvert vilja Reykvíkingar að þetta fólk fari heldur en í Vatnsmýrina ? Til Keflavíkur ? Munu þá ekki ríkisstofnanirnar, sem þetta "útálandi-lið" er að heimsækja,  verða fluttar þangað ? Verður ekki nærtækara að hafa alla landsbyggðarþjónustu í Keflavík heldur en í Reykjavík , sem gefur sýnilega lítið fyrir  þessar  gestakomur á flugvöllinn? 

Hversvegna er fólk á móti Reykjavíkurflugvelli ? Er það á móti flugi ?. Er það hrætt við að fá flugvél í hausinn ? Hefur það hugleitt að þoturnar yfir í Íslandi væri mínútu á leiðinni niður ef þær dyttu ? Er fólk almennt meira hrætt við flugslys en bílslys ?  Eða hafa menn ekki hugleitt málið til enda ? Hversvegna er fólkið í Grafarvogi mest á móti flugvellinum í skoðanakönnunum ? Eru mannslíf í Alþingishúsinu meira virði en önnur mannslíf almennt ?... .....Ef það er svona nauðsynlegt fyrir Borgarlandið, að þétta byggðina, hversvegna byggjum við þá ekki líka í Hljómskálagarðinum, , Landakotstúni, KR-vellinum, Laugardal og á Miklatúni ?  Höfum við yfirleitt nokkur ráð á opnum eða grænum svæðum yfirleitt   

Ég spurði sjálfan mig líka þetta kvöld, hvar þeir vegir myndu liggja, sem myndu tengja þessa nýju byggð í Vatnsmýrinni við atvinnusvæðin, sem liggja nú flest viðsfjærri Kvosinni. Munu menn leggja mikil jarðgöng í gegnum hálsa og holt, munu þeir byggja svifbrautir og einteinunga til þess að flytja fólkið að og frá Kvosinni ?   Sá sem lítur á landakort af höfuðborgarsvæðinu ætti fljótt að komast að því, hversu meistaralega flugvöllurinn er staðsettur  í útjaðri þess. Ingólfur Arnarsson sá líka hversu veður þarna er miklu betra en í nágrenninu. Þessvegna eru hvergi betri flugskilyrði en þarna. Gamla Kvosin er í útjaðri byggðarinnar. "Altstadt" sem verður aldrei miðbær framtíðarinnar. 

 

Vilja Reykvíkingar efla Keflavík umfram eigin borg ? Um það greiða þeir atkvæði í marz n.k."

Eins og línurnar bera með sér eru þær skrifaðar fyrir atkvæðagreiðsluna um flugvöllinn fyrir 10 árum eða svo.Sem sumir segja núna að sér bindandi. En 29 % kjósenda minnir mig mættu og munurinn varð ekki marktækur með eða á móti. Síðan þetta var hef ég farið til Kúbu. Þar heyrist aldrei í flugvél. Eina sem sésta á lofti eru fluglar himinsins. Er þetta dásamlegt eða ekki?

Enn eru  þessi þriggja manna "samtök um betri byggð " á ferðini að útmála hagnaðinn af því að loka flugvellinum . Sem betur fer er Ögmundur búinn að svara þeim fullum hálsi. Reykjavíkurflugvöllur lengi lifi! 

Borgið 12% eða..!

þið fáið ekkert ærkjöt. Þá flyt ég það bara út. Þannig hljóðaði hótun  forstjóra Slátursfélags Suðurlands í sjónvarpinu í gær. Það eru engir samningar. Hann er búinn að ákveða að bændur fái 12 % meira fyrir kjötið í haust. Þið eigið bara að borga. Er einhver þingmaður að gera athugasemdir? Nei, þeir eru í fríi.Seðlabankinn sagði á gær að stýrivextirnir væru orðnir neikvæðir.Og Steingrímur sagði að það væri bara bjart yfir með 123 milljarða í ríkissjóðshalla.10 % halla af vergri þjóðarframleiðslu. Og allir sjá hvað Steingrímur er góður fjármálaráðherra að redda þessu.

Ef íslenskir neytendur væru ekki þeir endemis ræflar sem þeir eru og láta bjóða sér allt, þá ættu þeir að láta í sér heyra. En neðanjarðarhagkerfið er líklega orðið svo stórt hér á landi  að mönnum er alveg sama um svona skíterí. Það borga þetta allir nema einhverjir gamlir ræflar em geta ekki borgað þetta. Við borgum bara 30% í rafmagnið, x % í hækkun fasteignaskatta, 2 $ fyrir bensínlítrann þegar hann kostar 1 $ í Bandaríkjunum osfrv. Hvað, þetta er ódyrasta bensín í Evrópubandalaginu segir RíkistjórnarÚtVarpið og það er okkur nóg.

Ef einhver segði við þennan sláturfélagskall:  OK farðu bara með ketið þitt alltsaman og troddu því...Og stæði við það að kaupa það ekki eins og Gylfi hjá ASÍ sagði þegar hann var búinn að gera "kjarasamninga" uppá 4.5% og eingreiðslur.

En það bara gerir enginn. Við borgum bara 12 % í þetta eins og önnur prósent í hvaða hækkun sem er.

 Við erum bara ræflar. 


BÖNNUM,bönnum,bö....

er lausn vinstrimennskunnar og ofstjórnarsinna við öllum vandamálum. Og leggjum á skatta til að aðfla fjár til að framfylgja bönnum.

Ég skrifaði fyrir nokkrum dögum svo:"...Er hægt að undirbúa varnir gegn svona með öðru en upphrópunum um bönn við byssum, bönn við áburði, bönn við andúð á Islam, bönn við því að vera á móti stjórnlausri fjölgun innflytjenda?... "

Það stendur ekki á því. Nú er Ögmundur farinn af stað með að endurskoða vopnalögin. Arnþrúður geysir sig á Útvarpi Sögu og hneykslast á lögreglunni að tala um að það sé auðvelt að búa til sprengjur úr áburði. Agalegt af löggumanni að tala svona segir hún. Og blessað fólkið hringir inn og óskapast yfir því að byssur séu ekki skráðar og gangi milli manna án þess að þær séu skráðar og bullar áfram um hluti sem það þekkir ekki.

Auðvitað er þessi umræða byggð á vanþekkingu. Byssur eru undir miklu og góðu eftirliti. Ef einhver gerist brotlegur með ólögleg vopn eða meðferð þá er það alvarlegt mál. Að halda það að að menn geti bara keypt sér áburðarpoka og búið til sprengju er bull. Það er getur enginn nema fleira komi til sem ekki liggur á lausu og Arnþrúður má alveg varpa öndinni léttara yfir því.

Það er nóg af hlutum í umhverfinu sem má nota sem vopn ef brotaviljinn er fyrir hendi. Skrúfjárn er til dæmis hættulegt vopn og maður hefur verið veginn með slíku verkfæri svo ég man til.

Mér finnst meira liggja á að við förum að horfa á okkur sjálf. Hvernig erum við?

Mér er sagt að það verði að fara heilar sveitir manna á göturnar í miðbænum til að hreinsa ruslið eftir skrílinn sem er blindfullur í miðbænum á nóttunni. Menn fleygja frá sér tyggigúmmí, brjóta flöskur ó götunni frekar en að láta þær í rusladall, henda sígarettustubbum frá sér, hegða sér eins og svín. Ætli þetta fólk hafi verð uppalið til að láta svona heima hjá sér? Af hverju eru veitingahúsin ekki gerð ábyrg fyrir þessum kostnaði borgarinnar sem af starfseminni hlýst? Af hverju hagar fólk sér illa? Eru heimilin ekki að standa sig, skólarnir ? Af hverju er ekki sekt við því að fleygja frá sér rusli á götuna? Og líka að selja mönnum eitthvað sem þeir verða vitlausir af ig verða að svínum?

Við leysum ekki skrílsmennskuna með bönnum. Vantar ekki heldur tilfinnanlega uppeldi og aga í þetta þjóðfélag ?


"You aint seen nothing yet!"

sagði Steingrímur þegar hann var að ræða um skattahækkanir sínar.

50% yfir áætlunum er hallinn á ríkissjóði síðasta árs. Einhverjir 123 milljarðar í stað 82. Það er árangur norrænu velferðarstjóranrinnar í ríkisrekstrinum á síðasta ári. RÚV minnir að sjálfsögðu á það við fréttaflutninginn, að þetta sé minni halli en árið áður og þessvegna skulum við vera ánægð með afrek Steingríms J.Sigfússonar við endurreisnarstörfin eftir hrunstjórnina!

Ríkissjóðshallinn er núna nærri 10 % af landsframleislu! Gæti Steingrímur þetta ef hann ætti ekki prentvél til að prenta krónur? Hvar fengi hann Evrur til að borga þetta? Kannski getur Jóhanna svarað því?

Steingrímur nýr saman höndunum af ánægju. Nú getur hann loksins sýnt okkur hvað hann átti við þegar hann sagði hin fleygu orð um skattahækannirnar væntanlegu:

"You aint seen nothing yet!"


Útflutningur á uppblæstri

landsins er það sem verið er að gera þegar lambakjöt er selt úr landi.

Íslenskur sauðfjárbúskapur er rekinn á landeyðingu fyrst og fremst, þar sem sauðfé er beitt á sameign þjóðarinnar eða það sem eftir er af villtu gróðurlendi landsins. Ástand þess og uppblástur blasir við öllum sem vilja sjá. Þetta er dýrasta kjötframleiðsla sem hægt er að bjóða uppá við það skipulag sem ríkir og sú sem verst fer með landið þar sem sauðfjárbændur rækta ekki upp heldur eyða landkostum. Framleiðendur eru að taka til sín sem þeirra er ekki. Þeir eru ekki að rækta kjötið á eigin landi heldur þjóðarinnar

Sé verðið á lambakjöti ekki greitt niður um helming væri lítil von um að selja tægju af kjötinu hér innanland þar sem neytendur myndu snúa sér alfarið að ódýrara kjöti. Þetta skeður allt í gegnum búvörusamninga svonefnda og beingreiðslur tl bænda sem kemur í stað fyrir uppbæturnar gömlu.Neytendur láta segja sér þá sögu að þetta sé í þágu fæðuöryggis sem er auðvitað blekking því ef innflutningur til landsins myndi stöðvast þá verður olíulaust og þá sveltur þjóðin nær samstundis.

Út yfir allan þjófabálk tekur svo þegar ræktað svo mikið lambakjöt að það er verið að selja kjötfjallið út. Hér áður fékk SÍS fastar greiðslur fyrir geymslukostnað á kjötinu hvort sem nokkurt kjöt var í geymslunum eða ekki og hirti svo uppbæturnar en borgaði bændum eitthvað skiterí einhverjum árum seinna ef þá nokkurntímann.

Hér áður fyrr var allur lambaketskaballinn spilaður á ríkisins kostnað, sem er auðvitað bara skattgreiðendur, með útflutningsuppbótum. Nú bregður svo við að neytendum er hótað með því að þeir fái ekkert lambakjöt ef þeir borgi ekki umsvifalaust verðhækkanir sjálftökumanna, í verðsamráði fyrir opnum tjöldum auðvitað, að ketið verði þá bara selt til útlanda sem vilji borga hærra verð en Íslendingar.Forstjóri SS segir okkur bara si sona að hann hækki ketið um 12 % í haust. Engir samningar heldur diktum. Og ærkjötið miklu meira af því það seljist svo vel í útlöndum. Skyldi hann kunna annan?

Það er verið að segja okkur að kraftaverkið hefur sem sagt skeð, Baldvin Jónsson er búinn að koma því til leiðar að íslenskt ærkjöt selst á hæsta verði í útlöndum. Það skeður náttúrlega ekki öðruvísi en að annað ærkjöt frá NýjaSjálandi og Ameríku sé á sama verði þar sem bragðið er alveg eins og ég get vottað af reynslunni. Og þá spyr maður, hversvegna fáum við ekki slíkt kjöt hingað í verðsamkeppni, sem allir landsmenn eiga að búa við á öðrum sviðum, svo sem í bensínverði, bankastarfsemi,sjávarútvegi og kvóta, osfrv.Allir nema sauðfjárbændur? Eða er víðar pottur brotinn?

En það hefur auðvitað verið hér sú opinber stefna að halda sauðfjárbændum við á hugurmörkum með því að láta þá hokra með óhagkvæmar bústærðir sem flesta þannig að eymdin verði nógu útbreidd með dreifingu kotbýla um allt land.Nú eru bændur sem óðast að selja jarðirnar til útlendinga þanngi að málin eru kannski að leysast á annan hátt. Framóknarflokkurinn þurfti á atkvæðunum að halda í sveitunum sem réðu landinu og gera enn í skjóli atkvæðamisvægisins.Nú sækir hann fylgið því á mölina þar sem bændurnir verða eftir landssöluna til útlendinganna.

En svo skeður það furðulega, Þessi verðkúgun suaðfjárbænda hækkar allar verðtryggðar skuldir heimilanna í landinu verulega með vísitöluáhrifunum. Það er neytandinn sem borgar uppúr öðrum vasanum fyrir kjötið án þess að gera sér ljóst að hann borgar aðra eins upphæð úr hinum vasanum með Steingrím J. sem millilið í hvert sinn sem hann kaupir ket. Og hækkar svo húsnæðislánin á sjálfum sér um margar prósentur í leiðinni. Minnir þetta ekki á söguna um brjálaða hattarann hjá Lísu í Undralandi?

Landsins vegna ber auðvitað að halda sauðfjárrækt í lágmarki þanig að hún tæplega dekki eftirspurnina. Nema sauðfé gangi á ræktuðu heimalandi bænda Það sem á vantar má flytja inn og láta samkeppnina þannig njóta sín.

En það má auðvitað ekki. Við flytjum því upplásturinn ótrauðir út áfram og enginn fær gert við því.


Skuldaþakið

sem Obama er að reka sig í er sagt vera 14.300 milljarðar dollara. Republikanar hafa eitthvað með það að gera að hann megi ekki hækka þetta með því að prenta meiri peninga.

Obama ætti að koma hingað og hitta mesta hagspeking allra tíma á Íslandi, Steingrím J. Sigfússon. Hann hefur alveg eins og Obama yfirráð yfir prentvél sem hann notar til að framkvæma hugdettur sínar. Vanti 17 milljarða í Sjóvá, 20 milljarða í BYR og SPKEF eða nokkurhundruð í Samfylkingarbankana þá eru þeir bara prentaðir og enginn virðist kæra sig um það að leita að því hvernig hann færir þetta í ríkisbókhaldi eða Seðlabanka. Þetta bara hverfur.

Icesave-þingmennirnir 59 niður við Austurvöll virðast ekki spá mikið í þetta enda líklega ekki uppnæmir af smámunum eftir ískalda matið. Afleiðingin er að Steingrímur er valdamesti Íslendingur fyrr og síðar og notar prentvélina eins og hann eigi hana sjálfur. Með efnahagslegum skilningisleysi sínu og skatthugsun er hann að reisa múrana um Alþýðulýðveldið Ísland sem mun færa þjóðfélagið og lífskjör þegnanna aftur til fortíðar. Það mun taka áratugi að ná þjóðfélaginu út úr þeim ógöngum sem þessi ríkisstjórn er koma landinu í ef það þá tekst nokkurntíman í náðarfaðmi Evrópusambandsins.

Skattekjur falla þrátt fyrir stöðugar hækkanir á sköttum, atvinna dregst saman, atgervisflóttinn stendur dag og nátt, engin fjárfesting á sér stað í landi þar sem enginn eygir að nein betri framtíð sé í augsýn. Ríkisstjórnin ætlar að sitja eitt og hálft ár í viðbót í boði Þráins Bertelssonar. Og fólkið spyr líka nú orðið: Býður einhveer betur? Hvar er stjórnarandstaðan? hefur hún einhver ráð? Framtíðin virðist ekki björt fyrir aldraða sem ekki geta flúið.

Það er gott að hér er ekkert skuldaþak til að þrefa um.


Næsta síða »

Höfundur

Halldór Jónsson
Halldór Jónsson

verkfræðingur, flugdellukall, tennis-og badmintonspilari

-ekki góður í neinu af þessu-

Heimsóknir

Flettingar

  • Í dag (19.3.): 2
  • Sl. sólarhring: 8
  • Sl. viku: 74
  • Frá upphafi: 3417882

Annað

  • Innlit í dag: 2
  • Innlit sl. viku: 57
  • Gestir í dag: 2
  • IP-tölur í dag: 2

Uppfært á 3 mín. fresti.
Skýringar

Eldri færslur

Innskráning

Ath. Vinsamlegast kveikið á Javascript til að hefja innskráningu.

Hafðu samband