Leita í fréttum mbl.is

Bloggfærslur mánaðarins, febrúar 2008

Reykjavíkurflugvöllur-Gardemoen

Mér barst í hendur eftirfarandi frétt:

"Skv. könnun sem er gerð á hverju ári á meðal stjórnenda í Forturne 500 fyrirtækjum er Osló í neðsta sæti af 33 borgum í Evrópu.  Í þriðja sæti yfir það sem skipti þessa stjórnendur mestu máli eru "Transport links with other cities and internationally".  Þar fyrir ofan eru "Easy access to markets, customers or clients" og "Availability of qualified staff".  Osló er í næst neðsta sæti varðandi þennan þátt með sinn Gardermoen og sína hraðlest.  "

Þrátt fyrir að 60 % íbúa Reykjavíkur vilji hafa flugvöllinn á sinúm stað og gefi ekkert fyrir uppbyggingaráform borgarfulltrúanna í Vatnsmýrinni, þá böðlast þetta lið áfram eins og ekkert hafi í skorist. Ólafur F. borgarstjóri stendur einn eins og Skarphéðinn við gaflhlaðið. Skoðanakönnun er í gangi hjá MörtuSmörtu og svo líka hér á síðunni. Allt ber að sama brunni. Fólkið vill flugvöllinn þar sem hann er og uppbyggingu flugs á vellinum. Borgarfulltrúarnir eru einangraðir frá fólkinu og halda áfram að berja hausnum við steininn og vinna þau skemmdarverk á vellinum, sem þeir mega.

Vonandi fá þeir verðskuldaða útreið í næstu prófkjörum enda er afrekaskráin þeirra með þeim hætti síðustu mánuðina, að fátt gefur fyrirheit um endurnýjuð umboð.

Reynsla Norðmanna bendir til þess, að lestir komi ekki í staðinn fyrir flugvöll í hjarta borgarinnar. Flugvöllur er efnahagsleg nauðsyn. Án samgangna þrífst ekkert. Það er sama hversu menn lofsyngja reiðhjól og göngustíga, bíllinn og flugvélin eru undirstaðan sem efnahagslífið gengur á.   


www.martasmarta.blog.is

Marta smarta er alvöru bloggari þar sem 170.000 manns koma. Þar er í gangi skoðanakönnun um Reykjavíkurflugvöll. Þær tölur sem komnar eru ganga í sömu átt og mín vesæla könnun. Farið endilega á þessa síðu sem komið hér.

Séníin í Kaupþingi

Mér er sagt að séníin  Sigurður Einarsson og Hreiðar bánkastjóri hjá Kaupþingi séu búnir að setja ráðningabann á þvottakonur og aðra hjá fyrirtækinu. Kannske segja þeir einhverjum upp til viðbótar.

Voru þeir ekki með hálfan milljarð hvor í laun.  ? Það er eins gott að enginn stingi ekki uppá að þau verði lækkuð í einshverjum lummulegum Glitnisstíl !

Mikil svakaleg séní hljóta þessir menn að vera þegar maður hugsar að það væri hægt að ráða svona 20 hagfræðidoktora eða stærðfræðinga fyrir hvorn þeirra til að vinna hjá Kaupþingi.  Hugsið ykkur hvílík hrikaleg afköst hljóta að vera hjá þessum mönnum, sem þó enginn tók eftir þar sem þeir unnu áður.

Það er ekkert "Varaðu þig Valnastakkur, fallinn er hann fjögramaki " í Kaupþingi. Þar gengur allt sinn vanagang.


Styðjum Serba í Kosovo !

Það má aldrei verða að við svíkjum kristna Serba í Kosovo í hendur múhameðskra Albana með því að viðurkenna Kosovo. Vonandi höfum við stjórnmálavit til þess að halda okkur frá því.  

Múslímaþjóðirnar eru flestar  náttúrlegir fjandmenn Vesturlanda, enda boðar Islam   baráttu gegn flestu  því sem við höfum í heiðri.

Engar moskubyggingar hérlendis takk. Reynum að fyrirbyggja að hér verði upphlaup eins og við sjáum frá Danmörku. Til þess skulum við reyna að halda  Múhameðsfólki frá því  að flytja til Íslands sem við megum.  Okkar núverandi Múslímum  dugar alveg reseptið hans  Þorgeirs Ljósvetningagoða, sem leyfði heiðnum mönnum að blóta á laun í kristnu landi.


Vefarar keisarans !

Ég horfði á viðtal Egil Helgasonar við Skotana 2,  sem eru höfundar að Vatnsmýrartillögunni sem Hanna Birna var svo dolfallin yfir í sjónvarpinu á dögunum.

Mér fannst þeir boða nýja byggð í Vatnsmýri, sem nokkurskonar "Endlösung der Judenfrage". Endalok útþenslu borgarinnar, sem hefur verið að þenjast út til allra átta síðan ég man eftir mér fyrst og bærinn endaði í Sogamýri.   Sama Mene Tekel Kvosarspekingarnir hafa þulið æ oní æ.  Allt verður gott ef 15.000 manns flytja á flugvallarsvæðið og hjóla oní Kvos að fá sér einn kaldann.

Ekki stóð á Hönnu Birnu að lofsyngja glitvefnað Skotanna. Hún tók andköf í hrifningu yfir þessum teikningum öllum. Vissulega fallegum og gerðum úr besta hýjalíni og tölvukúnst, glitskýjum og speglunum í glergluggum húsanna á vorkvöldum í Reykjavík. Jafnvel seglbátar brunuðu á Tjörninni í logninu sem alltaf er í Reykjavík.

Síðan í byrjun janúar hef ég ekki vaknað einn einasta dag þar sem  hjólandi var um götur höfuðborgarsvæðisins.  Hvað þá að mig hafi langað í spásséritúr út á næstu biðstöð frístrætós. Það hefur hinsvegar verið Fokkerflogið yfir Kópavog flesta daga stundvíslega fyrir átta á morgnana meðan ég er að skafa klakann af einkabílnum. Besta vininn  sem maður á í svartnættinu á köldum skammdegismorgnum og treystir á til að koma sér í vinnuna heilum á húfi, börnunum í leikskólann osfrv. osfrv. Í Guðs bænum hættið þessum formælingum á einkabílnum. Hann er þarfasti þjónninn á hagvaxtaröld.  

 Og svo er það formúlan um vexti sem allir vefarar keisarans minnast ekki á. (1+r)^n x mannfjöldinn í dag.

Margfaldist og uppfyllið jörðina sagði Drottinn allsherjar. Með ca. 2 % fjölgun borgarbúa í 5 ár þá er Vatnsmýrin full eftir 5 ár.  Eru þá  fleiri  óbyggð svæði ? Laugardalurinn ? Hljómskálagarðurinn ? Kirkjugarðarnir ?

Hvert eiga þeir að fara sem fæðast eftir 5 ár ?  Og hvaðan eiga þeir að fljúga ?

Frá  Reykjanesbæ ?  

O santa simplicita sagði Bruno á bálinu. Og aðeins barnið sagði: Keisarinn er ekki í neinu !

 


Er hægt að bæta fyrir níðingsverk ?

Skelfing er að vita til þess, hversu mörg börn hafa þurft að þola margar raunir á borð við þær sem drengirnir í Breiðuvík þoldu. Og aðrir niðursetningar Íslands líka í aldanna rás.

Ég fæ ekki séð, að Lalla Johns verði greiði gerður með því að rétta honum seðlavöndul. Eða afkomendum þeirra látnu drengja, sem þarna áttu hlut að máli. Hugsanlega gerðu peningar einhverjum gott.

En er ekki aðalatriðið fyrir þjóðina að reyna að bæta sig ?  Reyna að líkna og bæta það böl sem við blasir. Af nógu er að taka. 

Hvernig eiga þjóðir að bæta þeim ungmennum sem féllu í styrjöldum misviturra ráðamanna ? Töpuðu stríði Hitlers ? Eða VietNam þeirra Kenndys og Johnsons, Íraks Bush-feðga  ? 

Sumt er ekki hægt að bæta fyrir nema með hugarbót. 


Gúrkutíð í pólitík

Jæja, þá hafa menn það. Gamli góði Villi ætlar að vera oddviti áfram í borgarstjórnarflokki Sjálfstæðismanna og hefur til þess yfirlýst traust hinna sex ! Ekkert þeirra langar opinberlega til þess að verða borgarstjóri ef Villi ætlar ekki að að þiggja starfið úr hendi Ólafs.

Hvað gat hann annars annað gert ? Neðan af botninum liggur bara ein leð- upp !  Gerir Sjálfstæðisflokkurin eitthvað fyrir hann svo vitað sé ?  Hefur hann annað til að lifa á en borgarstjórnarlaunin ? Búinn að verja allri ævinni til þess að vinna fyrir borgarbúa. Gerir svo  mstök í beinni útsendingu. Þá á  bara allt að vera búið og Svandís og lýðurinn heimta krossfestingu til að bjarga Sjálfstæðisflokknum !

Er ekki rétt að anda með nefinu aðeins augnablik. Villi og Ólafur F hafa  úrslitaáhrif á framvindu mála þar sem eftir er kjörtímabilsins. Við skulum ekki gefa hann Villa  uppá bátinn. Kom ekki Nixon aftur tvíefldur á sínum tíma með nýtt og frísklegt útlit ? Eiga ekki allir skilið að fá annað tækifæri ? 

Jafnvel Össur líka. Mér finnst að Gísli Marteinn ætti bara að hlæja með okkur hinum yfir  gamanmálum Össurar. Mér finnast skrif hans oft vera í Heljarslóðarorustustíl Gröndals og orðfærið oft kyngimagnað og kenningaríkt. Það er óráð að hegða sér eins og Hillary greyið Clinton, þegar hún byrstir sig á Obama og allir sjá að hún er húmorslaus leiðindakelling, sem er búin að tapa.

Í mínum huga verður slagurinn fyrir vestan nú á milli Obama og McCain. Ég held að Bandaríkjamenn séu ekki tilbúnir að kjósa Obama og er tilbúinn að veðja einum bjór á McCain ef hann ekki dettur afgerandi á hausinn  eða segir eitthvað "vilhjálmslega vitlaust ".


Össur og framtíð Gísla Marteins

Það er ástæða fyrir vini Reykjavíkurflugvallar að taka eftir því, að Össur Skarphéðinsson spáir heldur illa fyrir pólitískri framtíð Gísla Marteins.Gísli er í flokki höfuðandstæðinga vallarins þannig að það er ástæða til þess að lesa hvað Össur segir. Mér finnst ástæða til að skeyta pistli Össurar inní hér á síðuna fyrir þá sem ekki lesa kannske Össur : 

 Össur skrifar:

"Byltingin étur börnin sín. Það sannast á Gísla Marteini. Hann var í lykilstöðu þegar hann hóf byltinguna gegn Vilhjálmi Þ. Vilhjálmssyni. Gísli var nýbúinn að fá fleiri þúsund aktvæði í slag um efsta sætið við Villa – og var sannarlega hinn smurði kandídat heimastjórnarvængsins til íhaldsþinga. Topparnir elskuðu hann, og litu á frægt sjónvarpsandlit sem tryggingu um atkvæði og vissa greind götustráksins. 

Strax þegar í fyrsta meirihlutann kom fóru að vakna efasemdir um Gísla. Hann átti erfitt með að tjá sig æsingalaust, var linur í þáttum, og í starfinu sjálfu fékk hann undarlega djúpan áhuga á að drepa máva á tjörninni.Hvað lá eftir Gísla Martein þegar kom að atburðarrásinni kringum REI? Ekkert, nema hræin af mávunum sem hann lét embættismenn skjóta og stillti sér svo upp hjá einsog Rambó sjálfur. Þetta verkaði hálfhjákátlegt og á þessu stigi var stjarna hans þegar tekin að hníga. Æstur gjallandi í stað glaðrar raddar sjónvarpsbarnsins, tindrandi augu spámannsins sem var eins og að koma úr langri föstu utan af eyðimörkinni – þetta varð að myndinni af hinum unga stjórnmálamanni, sem minnir í dag óþægilega á framkomu nýja borgarstjórans. Það  rímaði alls ekki við myndina af hinum sterka unga leiðtoga sem maskinan reyndi að breiða út. Ég sá þetta sjálfur í þáttum, þar sem við sátum og Gísli var einsog festur upp á þráð.REI málið hamfletti hann svo einsog lundann, sem sjávarúvegsráðherrann veiðir árvisst án leyfis. Allir vissu, að hann var operatörinn í árásunum á Vilhjálm, beinlínis til að klekkja á manni sem sat í stöðu, sem hann girntist. Gísli lék rulluna svo illa, að engum duldist að hann var maðurinn sem stýrði aðförinni að borgarstjóranum, missti atburðarrásina úr höndum sér af pólitískum barnaskap, og var því gerður ábyrgur fyrir missi meirihlutans og mestu niðurlægingu Sjálfstæðisflokksins í áratugi..Í flokknum er honum kennt um ófarir flokksins, auk Villa sjálfs. Það kom augljóslega fram í könnun Capacents í kvöld, sem var í senn krýning Hönnu Birnu og pólitísk fall Gísla Marteins.Mér er til efs að hann fari aftur í prófkjör. Asnaðist hann til þess er líklegt að hann fái mjög veika kosninga, og endi sem liðið lík í pólitísku tilliti. Ég dreg því þá ályktun af þróun mála í borginni, að Gísli sé eitt þeirra tveggja fórnarlamba sem liggja í slóð REI. Hitt er Vilhjálmur sjálfur - amk. einsog sakir standa.Tragikómedían í atburðarrásinni er sú, að hinn örvumprúði bardagamaður sem ætlaði reka Vilhjálm Þ. Vilhjálmsson ofan ætternisstapa, og taka þá orkubræður Hjörleif Kvaran og Guðmund Þóróddsson í bókstaflegt slátur – er sjálfur fyrsta vegna fórnarlamb REI málsins. Eftir könnunina í kvöld er ferill Gísla Marteins í raun búinn. Hann á engan séns í leiðtogasætið, og fær að híma í nefndum fram að prófkjöri, sem hann verður varla svo vitlaus að fara í til þess eins að hrynja niður listans í stöðu hins dauða hross sem allir munu beita svipu sinni og pískum á. Gísli Marteinn er búinn sem stjórnmálamaður af stærð, meðan Hanna Birna er að vaxa upp í verulega öflugan stjórnmálamann, og mun auðvitað taka sviðið.Og meðan Villi þraukar sem borgarfulltrúi – sem ég vona hann geri – er útilokað að setja byssuna á Hjörleif og Guðmund, hversu hrokafullir þeir kunna að hafa verið gagnvart særðu stolti Júróvisjónstjörnurnar. Það er einfaldlega ekki hægt að reka þá ef enginn borgarfulltrúi axlar ábyrgð með svipuðum hætti og Björn Ingi, sem endurheimti æru sína.Hinn grátlegi gamanleikur atburðarrásarinnar er sá, að maðurinn sem startaði henni og ætlaði að láta hana lyft sér til æðstu metorða í borginni – þvi auðvitað var plott Gísla Marteins að veikja Villa nóg til að hann sjálfur fengi oddvitastöðuna – liggur í pólitísku blóði sínu fyrir eigin tilverknað og á sér varla afturkvæmt hema kraftaverk gerist. Hann klúðraði fyrsta sandkassaleiknum sínum.Biblían segir að vísu að kraftaverkin gerist á morgnana, en þá er Gísli yfirleitt sofandi – meðan götustrákar einsog ég blogga á örmiðli mínum og Þorsteinn dómari Oddsson á Vef-Þjóðviljanum sínum."

 

 

Svo mörg voru þau orð. Við verðum að vona að hið pólitíska landslag geti breyst til batnaðar fyrir Reykjavíkurflugvöll. Það er það eins sem getur bjargað honum ef það er þá hægt héðan af.
mið., 20 feb. 2008 02:12

 

Patterson er póllinn

Það rann upp fyrir mér hér um kvöldið, að Reykjavíkurflugvöllur á sína helstu óvini í röðum stjórnmálamanna. Þeir verða því ekki vændir um að hlaupa eftir skoðunum almennings heldur hafa sína sjálfstæðu stefnu. Þeim er slétt sama hvað almenningur hugsar eins og þau 60 % höfuborgarbúa, sem vilja Reykjavíkurflugvöll á sínum stað samkvæmt könnun Fréttablaðsins. Hvað þá þau meira en 90 % aðspurðra hér á þessari vesölu bloggsíðu.

 

Ég hlustaði á Hönnu  Birnu lýsa tillögu um nýtt skipulag í Vatnsmýri af  innblásnum  ákafa, sem ég hef ekki séð hjá henni áður. Gárungarnir hafa stundum  áður nefnt hana "harðbrjósta Hönnu " sjálfsagt eftir slagaranum gamla, til þess að lýsa ótilfinningaþrungnum stjórnmálastíl hennar, þar sem hún haggast hvergi, hörð og óvægin.  Enginn þarf að fara í grafgötur með það, hvar hún stendur í flugvallarmálinu eftir þessa yfirferð.

 

Áður var vitað um afstöðu Gísla Marteins, sem gárungarnir kalla stundum "Lilla Klifurmús" , líklega þar sem honum finnst hann sterklega koma til greina að verða borgarstjóri á undan Hönnu í 2. sætinu,  fari svo að Vilhjálmur Þ., sem kallar sjálfan sig "gamla góða Villa " , en gárungarnir Villa viðutan af einhverjum ástæðum, hætti við að verða Vilhjálmur annar  á borgarstjórnarstóli.  Svo merkilegt sem það er, þá hefur gamli góði Villi það í hendi sér að enginn annar setjist í stólinn, nema að sjálfstæðisflokkurinn klofni og fjórði meirihlutinn verði myndaður eftir árið. Til þess þarf hinsvegar meðal annars samhenta sexmenningaklíku og endurnýjun stjórnmálalegra lífDaga á vinstri vængnum .  Mér er ekki kunnugt um neina aðra í borgarstjórnarflokki sjálfstæðismanna, sem vilja Reykjavíkurflugvöll á sinum stað, svo dult sem sumir menn þar á  bæ hafa farið með raunverulega afstöðu sína.

 

Enginn  borgarstjórnarfulltrúi  hefur mér vitanlega lýst sig afdráttarlausan flugvallarsinna nema Ólafur F. núverandi borgarstjóri. Þannig þarf margt  að breytast og mikið eigi framtíðin að skera úr einhverju sem varðar þennan flugvöll.    

 

Það var nokkuð  greinilegt af máli Hönnu Birnu , að sjálfstæðisflokkurinn í borgarstjórn, bíður færis á að loka vellinum og byggja í Vatnsmýrinni. Hvað svo sem aðrir segja, þá er þetta stefnufastur flokkur , sem menn geta þá kosið útá það málefni ef ekki önnur.

 

Þessi hálfdauði Reykjavíkurflugvallar  er líka farinn að há framþróun flugsins hér á Íslandi verulega . Ekki má gera neitt á vellinum fyrir flugið, hvorki byggja þjónustubyggingar né annað,  af því að menn eru alltaf að þrátta um sömu málin, Löngusker, Hólmsheiði osfrv. Flugfólkið þarf að fara að taka af skarið og gera eitthvað í nálinu. Fara að gera sínar ráðstafanir og hætta að bíða eftir þessum stjórnmálamönnum, sem aldrei klára þetta mál hvort eð er.

 

Ég hef áður bent á það, að lítið mál er að gera Patterson flugvöll að miðstöð hluta innanlandsflugs, einkaflugs og viðskiptaflugs. Þangað liggur beinn og breiður vegur og eru allir íbúar höfuðborgarsvæðisins,  sem búa austan við læk og kvos fljótari að fara eftir  þangað en niður í svonefndan miðbæ Reykjavíkur. Hvað þá að fara útá einhverjar flugvallarleifar í Skerjafirði , sem á að bjóða uppá sem málamiðlun þegar byggt verður á N-S brautinni. Þetta verður aldrei nein  nothæf lausn, sem blasir við flestum nema  auðvitað stjórnmálamönnunum í borgarstjórn Reykjavíkur. Þeir hafa sýnt sig að vera  bara ekki færir um að leysa þetta mál og því verða aðrir að gera það fyrir þá.

Hvorki Löngusker né Hólmsheiði eru annað en dýrar málalengingar í óraunhæfri umræðu. Þetta er bull frá upphafi til enda og verður aldrei að veruleika. Páll Bergþórsson hefur bent á að Hólmsheiði er alltaf lokuð vegna lágskýja meðan enn er yfir lágmarki í Reykjavík. Það eitt er næg ástæða til að hætta að tala um flugvöll þar.

Á Patterson eru líklega eitthvað lítið verri flugskilyrði en í Reykjavík. En þar er greitt aðflug úr öllum áttum og sléttlendi í kring. Nógu langar flugbrautir fyrir flestar  vélar.   Það er hægt að aka flugvélum þaðan uppá Keflavíkurflugvöll meira að segja   Þar er nóg pláss fyrir allt það sem flugið þarfnast, ef menn vilja þá hafa eitthvað flug í kringum sig, sem er önnur spurning.  

 

Reykjanesbær þarf auðvitað að svara því, hvort hann er reiðubúinn til þess að verða þannig sú höfuðborg  Íslands í viðskiptum og samgöngu , sem óhjákvæmilega fylgir þessu umstangi öllu. Því að fólkið fer þangað sem umsvifin eru. Gömul bárujárnsnostalgía  og kvosarrómantík dugar ekki til að stöðva þá þróun. Það er ekki seinna vænna en að byrja þá umræðu fyrir alvöru.

 

 Því tel ég að komið sé að því,  að allir sem flugi tengjast fari að hugsa sjálfir fyrir sig og hætti að hlusta á þetta karp lengur. Geri eitthvað í málinu en hætti að sóa tímanum í vitleysu,  þjóðinni allri til tjóns. Auðvitað hefði verið hægt að leyfa þjóðinni að afgreiða málið um Reykjavíkurflugvöll með atkvæðagreiðslu við forsetakosningarnar nú í sumar til að höggva á þennan hnút.  En það þorir Vatnsmýrarfólkið auðvitað ekki, þar sem lokunin yrði kolfelld.

 

Það er líka  eiginlega of seint núna, að bjarga Reykjavíkurflugvelli. Yfirfirvöld Reykjavíkur eru langt komin með að eyðileggja völlinn  með stöðugum byggingum á athafnasvæðinu.  Að mínum dómi er vandamálið því að verða óleysanlegt þar sem erfitt er að stöðva byggingar Háskólans í Reykjavík, sem einar sér gera völlinn ómögulegan til framtíðar. Þegar umferðarvandamálið með Hringbrautina og Landspítalann bætist svo við, þá er þetta  fullkomnuð. Tíminn er því kominn að mínu mati, þó menn auðvitað vilji telja sér trú um annað.

 

Reykjavíkurflugvelli verður varla bjargað héðan af þegar stjórnmálamennirnir eru flestir í baklás. Hefja þarf því undirbúning að raunhæfum ráðstöfunum.  Ég held að Patterson flugvöllur sé  póllinn .  


Lassarónar með lambhúshettur

Alveg gengur fram af mér þegar verið er að sýna myndir í sjónvarpinu af glæpamönnum á leið inn í réttarsal til að þola fangelsisdóma fyrir misgerðir sínar.

Í stað þess, að þeir séu leiddir í járnum í réttarsalinn eins og glæpamenn eru yfirleitt meðhöndlaðir annarsstaðar,  þá spranga þeir inn í réttarsal glaðklakkalegir með kaffibolla í hendinni með svartar hryðjuverkahúfur á hausnum svo hvítmatar í glyrnurnar. Á eftir fylgja laganna verðir og fylla útí skjáinn. Þannig verða  þeir auðþekktir á götu,  ef lagsbræður krimmanna kynnu að vilja eiga við þá orðastað á Laugaveginum.  

Í lögreglusamþykkt segir held ég,   að enginn megi ganga grímuklæddur á almannafæri. Af hverju má þetta fólk dylja andlit sín við þessi tækifæri en ekki lögreglufólkið, sem er í beinni hættu vegna afskipta sinna af þessum glæpamönnum.  ?

Ef við hefðum þá sannfæringu, eins og Bandaríkjamenn til dæmis, að síbrotaglæpamenn eigi  að vera í fangelsum í stað þess að vaða endurtekið uppi meðal almennings , þá yrði margt öðruvísi í þessu þjóðfélagi. Líklega dygði að ca. 2 % þjóðarinnar væru að jafnaði í fangelsum til þess að hér yrði  friðvænlegra  samfélag en nú er.   Í stað þess ríður linkindin húsum og  konurnar í Vesturbænum gráta í  vorkunnsemi sinni og skortur á rasphúsum hefur þjakað þjóðina allt frá dögum Arneusar útileguþjófs. 

 Enda er þjóðríkinu yfirleitt  nokkuð sama þó að þegnar þess  steli  hver frá öðrum eða lumbrist meðan þeir láta eigur ríkisins og starfsmenn þess í friði. Við þau tækifæri er réttvísin yfirleitt töluvert viðbragðsnarpari en þegar þau Jón og Gunna eiga í hlut.   


Höfundur

Halldór Jónsson
Halldór Jónsson

verkfræðingur, flugdellukall, tennis-og badmintonspilari

-ekki góður í neinu af þessu-

Heimsóknir

Flettingar

  • Í dag (19.3.): 4
  • Sl. sólarhring: 10
  • Sl. viku: 76
  • Frá upphafi: 3417884

Annað

  • Innlit í dag: 3
  • Innlit sl. viku: 58
  • Gestir í dag: 3
  • IP-tölur í dag: 3

Uppfært á 3 mín. fresti.
Skýringar

Eldri færslur

Innskráning

Ath. Vinsamlegast kveikið á Javascript til að hefja innskráningu.

Hafðu samband