Hvöt heimtar prófkjör

til framboðslista fyrir Borgarstjórnarkosningar í Reykjavík að vori.

Fréttablaðið birtir eftirfarandi tilkynningu frá Hvöt:

"Um öll Vesturlönd verður sú krafa sífellt háværari að auka beina aðkomu almennings að stjórnmálum. Þeir flokkar sem verða ekki við þeirri kröfu eru í mikilli hættu, þeir fjarlægjast fólkið, einangrast og missa af samtíma sínum.

Við Íslendingar höfum ekki farið varhluta af þessari þróun, stjórnmálin eru í mikilli deiglu þessa dagana, fylgið á hreyfingu, nýir flokkar hafa sprottið upp og krafa um breytt stjórnmál er hávær.

Við þessu þarf Sjálfstæðisflokkurinn að bregðast eins og aðrir hefðbundnir flokkar. Flokkar sem þróast ekki með samtíma sínum og tíðaranda eru í mikilli hættu, alveg óháð mikilvægi þeirrar stefnu og hugmyndafræði sem þeir standa fyrir. Það er ekki nóg að hafa góða stefnu ef enginn vill hlusta.

Við þessar aðstæður má það furðulegt heita að fámennur hópur í Valhöll ætlar nú að þrengja aðkomu almennra flokksmanna að vali á framboðslista Sjálfstæðisflokksins. Verði tillögur umrædds hóps samþykktar fá flokksmenn einungis að velja hver það verður sem leiðir lista flokksins, í önnur sæti ætlar fámennur hópur að velja vini sína á fundi í lokuðu herbergi.

Þessi tillaga færir Sjálfstæðisflokkinn áratugi aftur í tímann, frá fólkinu í átt að klíku- og fámennisstjórnmálum. Í stað þess að efla fólkið í Sjálfstæðisflokknum og treysta því til að velja frambjóðendur flokksins á að taka upp vinnubrögð löngu liðins tíma, vinnubrögð sem endurspegluðu allt annað þjóðfélag en það sem við búum við í dag.

Þessi tillögugerð er því fráleit í ljósi þeirrar þróunar sem nú stendur yfir í stjórnmálum og hún er til þess fallin að skaða Sjálfstæðisflokkinn í bráð og lengd. Aukin aðkoma almennings og aukið lýðræði eru lykilhugtök í stjórnmálum þessa dagana. Hin furðulega tillaga meirihluta stjórnar Varðar gengur þvert á slík sjónarmið og í raun vandræðalegt fyrir okkur Sjálfstæðismenn að fylgjast með fulltrúum þessa hóps reyna að rökstyðja hana á opinberum vettvangi.

Þar til viðhlítandi rök hafa verið færð fyrir nauðsyn þess að draga úr áhrifum almennra flokksmanna í Sjálfstæðisflokknum hljótum við að sameinast um að tryggja að þessi tillaga verði ekki samþykkt. Þvert á móti eigum við að kappkosta að Sjálfstæðisflokkurinn sýni í verki að hann treysti eigin flokksmönnum til að velja frambjóðendur sína.

Ef Sjálfstæðisflokkurinn treystir ekki eigin félagsmönnum, fólkinu sem myndar Sjálfstæðisflokkinn, hversu líklegt er þá að almenningur treysti Sjálfstæðisflokknum?"

Svo mörg voru þau orð.

Sjálfstæðisflokkurinn hefur á undanförnum áratugum einn haft þann styrkleika meðal stjórnmálaflokka að bjóða almenningi að velja framboðslista flokksins. Ég hef alltaf orðið var við það hinsvegar að það eru alltaf valdamenn innan flokksins sem treysta ekki dómi fólksins. Treysta ekki flokksmönnum og telja sig vita betur.

Nýlegt dæmi er þegar formaður flokksins kom til fundar Kjördæmisráðs Suðvesturkjördæmis þegar hann átti að vera byrjaður og krafðist þess að fá að breyta listanum sem stjórni ætlaði að leggja fram og sem kom út úr prófkjörinu.Fundarmenn voru látnir bíða meðan hann frekjaðist í því að færa þingmenn niður og troða sínum gæðingi inn á milli. Þeir voru allir svo miklir ræflar að láta formanninn kúga sig til verksins og mættu svo eins og barðir hundar á fundinn klukkutíma síðar og kysstu allir á vöndinn. Ekki fannst mér þeir rísa  hátt við þetta tækifæri þó að vesalingur minn lyppaðist líka niður fyrir ofbeldinu.

Það vildi nú svo seinna til að sá sem greinilega átti mestar líkur á að missa þingsæti sitt hélt því samt þrátt fyrir þetta vegna óvæntrar fylgisaukningar flokksins sem auðvitað var ekki vitað fyrirfram. Auðvitað geta allir skýrt slíkt sér í hag og þakkað sér án þess að í móti verði mælt.

Nú bíða menn hvað þessi sami formaður gerir á Landsfundi Sjálfstæðisflokksins. Ætlar hann að treysta flokksmönnum til að velja í embætti eða ætlar hann að stjórna flestu sjálfur? Maður bara bíður eftir því hvað óróasveit unglinganna dettur í hug eins og síðast þegar Áslaug Arna velti Gulla og skrílslæti þeirra og Unnar Brár komu í veg fyrir vitrænar umræður um málefni flóttamanna og hælisleitenda í fundarlok.

Eftir svona flokkslegar uppákomur geta menn svo sem efast um það hvort eigi yfirleitt að halda þessi prófkjör af því að sé niðurstaða ekki einhverjum þóknanleg eða tæknilega bindandi, þá megi breyta henni?  Menn geta þá líka spurt sig til hvers einhver kjördæmisráð eða skipulagsreglur séu yfirleitt þegar hægt er að breyta öllu eftir smekk einstakra manna. 

Mín reynsla er sú að það hafur alltaf leitt til verri vegar í kosningum fyrir Sjálfstæðisflokkinn ef fitlað er við niðurstöður prófkjara, hversu óánægður maður er með niðurstöðuna. Og mín reynsla er orðin talsvert löng þó vitlaus sé.

En maður er yfirleitt alltaf óánægður í pólitík því auðvitað veit maður sjálfur alltaf best og betur en þessir kjósendaasnar. En svona er þetta bara. Það er nefnilega móðgun við þá flokksmenn og stuðningsmenn sem lögðu á sig að mæta og kjósa, að segja við þá þið eruð fífl sem ég ætla að hafa vit fyrir af því að ég er svo sniðugur. Auðvitað geta prófkjör mistekist en yfirleitt bara ekki ef kjörsóknin er í lagi. Yfirleitt vinnur nefnilega besta fólkið.

Þetta held ég að Hvatarkonur sjái talsvert skýrar en þessi stjórn Varðar sem viðrað hefur hugmyndir um handval frambjóðenda eins og var tíðkað hér áður fyrr.

 

Athugasemdir

[Gunnar Heiðarsson, 18.8.2017 kl. 21:15]

Sæll Halldór

Auðvitað er galið að bjóða kjósendum upp á prófkjör og fikta síðan í niðurstöðum þess. Annað hvort er prófkjör eða uppstilling!

Vandi Sjálfstæðisflokks í Reykjavík er þó ekki hvort farið er í prófkjör eða uppstillingu, vandinn þar á bæ er skortur á frambærilegu fólki.

Nú hefur Halldór Halldórsson ákveðið að víkja og er það vonandi flokknum til hagsbóta. Nokkrir hafa verið nefndir sem arftakar og sumir jafnvel boðið sig fram. Enn sem komið er hefur þó enginn sem hefur getu og kjark stigið fram né verið nefndur. Þetta fólk sem nefnt hefur verið er auðvitað allt hið ágætasta fólk, svona eins og Halldór Halldórsson. En það fer þó ekki alltaf saman gæði og staðfesta.

Það er magnað að sá stjórnmálaflokkur sem ber höfuð og herðar yfir aðra stjórnmálaflokka, skuli ekki finna sér frambjóðendur við hæfi, frambjóðendur sem eru tilbúnir að standa á sinni sannfæringu og gildum síns flokks. Auðvitað er slíkt fólk til innan flokksins og jafnvel innan borgarmarka Reykjavíkur. Meir heyrist þó til slíkra einstaklinga utan borgarmarkanna.

Það er á kristaltæru að ef flokkurinn finnur ekki frambjóðanda sem hefur kjark og þor til að standa á stefnu flokksins og þá persónutöfra sem til þarf að sannfæra kjósendur, munu vinstri afturhaldsöflin halda velli í höfuðborg okkar landsmanna.

kveðja

[Húsari. (IP-tala skráð) 19.8.2017 kl. 10:02]

Sæll Halldór.

Kann að vera að sá texti sem þú birtir hér
sé skoðun formanns Hvatar en ekki tilkynning
frá Hvöt ?

Ekki svo að skilja að hvatarkonur geti ekki hamið
hvatir sínar á ritvellinum öllu heldur
að rétt skuli vera rétt.

[Halldór Jónsson, 19.8.2017 kl. 10:06]

Já Gunnar Heiðarsson

Þú hefur líklega lög að mæla sem oftar í hinni stóru mynd. Ég er hræddur um að eitthvað mikið þurfi að gerast í framboðsmáli flokksins ef breyting eigi að verða á. Það verða að koma til persónutöfrar og sannfæring hjá þeim  leiðtoga sem tekur verkið að sér, ef einhver virkilega hæfur finnst.Því miður hefur enginn enn bent mér á þann líklegan kandidat sem býr yfir nægilega ferskum og söluvænum hæfileikum til þessa verkefnis. Kandidatinn verður líka að vilja sjálfur en ekki láta nauðugur undan þrýstingi.