Kosningar strax

er orðin hávær krafa um allt þjóðfélagið.

Á Alþingi hefur Hreyfingin gengið fram fyrir skjöldu með þessa kröfu. Björn Bjarnason er sama sinnis á sinni Heimasíðu og má ætla að hann tali fyrir sálina í Sjálfstæðisflokknum sem endra nær. Innan hans eru hinsvegar þó nokkrir þingmenn sem eru hræddir um að missa embættin í nýjum uppstillingum og mega ekki til þess hugsa.

Ingibjörg Sólrún kvað uppúr með það, að andrúmsloftið á Alþingi sé nú orðið eitrað í samanburði við að vera slæmt fyrir gærdaginn. Samfylkingin er líka ekki lengur stjórntækur flokkur fyrir aðra en Vinstri Græna sem flökrar ekki við neinu sem fyrir þá er sett. 8 þingmenn Samfylkingarinnar sýndu það að þeir eru reiðubúnir að færa stjórnmálin inn í réttarsalina sem útrás fyrir pólitískar hefndaraðgerðir, sem Jóhanna formaður lýsti yfir að hefði verið að stefnt frá upphafi málsins, að friða fólkið með blóði einhvers annars en hennar eigin.  Hún lyppaðist auðvitað sjálf niður á hólminum að reka rýtinginn  í Ingibjörgu Sólrúnu eða Björgvin  en treysti á sitt fólk til þess. Þar biluðu nokkrir á sama hátt og sviku formanninn í því að svíkja fyrrum formanninn og ráðherrann. Dýrð þessarar hálfkommafylkingar verðu öllum ljós eftir þessa atburði.

Steingrímur J. Sigfússon var átakanlega ömurlegur  þegar hann lýsti sorg í sínu hjarta með það að ákæra Geir H. Haarde sem hann reyndi ákaft að mynda stjórn með í trúnaði. Þeim trúnaði hélt Geir  í gegn um þykkt og þunnt hversu sem Steingrímur froðufelldi undir svívirðngalestrinum um Geir.  Hver íslenskra stjórnmálamanna vill eiga náttstað undir öxi Steingríms J. Sigfússonar og meðreiðarsveina hans  eftir síðustu atburði ?  Sýndust engum nema mér krókódílatárin trilla niður rauðu úlfshár kommúnistans sem gægjðust upp um hálsmálið við þetta tækifæri? 

Manni rann til rifja að horfa á Lilju Mósesdóttur í sjónvarpinu  lýsa ofbeldi því sem formaðurinn beitir í þingflokknum. Ég gat ekki betur skilið hana en að hún væri komin á fremsta hlunn með að flýja í "athvarfið" undan ofbeldisöflunum á þessu kærleiksheimili sem Steingrímur kennir við norræna velferð. Ég vona að hún átti sig á því að hennar hugsjónir og hagfræðikunnátta myndu fá meiri framgang í Sjálfstæðisflokknum en í þessum kommúníska óskapnaði og fornaldareðlu í hagfræði, sem Vinstri hreyfingin-Grænt framboð eer sem stjórnmálaflokkur. Minnsta kosti hef ég reynt að berjast fyrir svipuðum hugmyndum innan Sjálfstæðisflokksins og Lilja hefur verið með. Ég hef ekki haft erindi sem erfiði en myndi gjarnan vilja vera þar í bardaga með svo vel þenkjandi  manneskju sem Lilju.

 Það þarf að fara langt aftur og víða til að finna jafningja Steingríms J. Sigfússonar að allri pólitískri gerð. Ekki er hægt að ímynda sér að nokkur flokkur annar muni vilja koma nálægt honum nema með tíu feta stöng.  Svo gersamlega er þessi maður búinn að ganga fram af öllum sem með stjórnmálum fylgjast. Hver er tilbúinn að trúa því að þessi maður muni nokkurn tímann standa við pólitísk fyrirheit? Getur einhver komið með eitthvað stefnumál sem hann hefur ekki svikið fyrir eigin völd og vegtyllur? Maðurinn sem enn reynir að leggja Icesave reiðinginn á þjóðina. Kann ekkert nema hækka skatta og bjóða upp heimilin eftir forskrift AGS, sem hann dýrkar sem Guðinn sinn. Lilja vill reka AGS í burt og hætta nauðungarsölunum. Þar er ég henni að minnsta kosti sammála.

Það er rétt hjá Ingibjörgu Sólrúnu að andrúmsloftið á Alþingi er orðið svo eitrað, að það verður að lofta út. Hreinsa burt eins mikið af gömlu dóti og kjósendur eru frekast tilbúnir að gera. Það er rétt hjá Þór Sari og Birni Bjarnasyni að þjóðin vilji kjósa. Ekki kjósa neitt tilgangslaust stjórnlagaþing í nóvember heldur Alþingi með völd til að gera eitthvað í málefnum þessarar þjóðar. Sem er í bráðum vanda stödd.

Kosningar strax! 

 

Athugasemdir

[Vilhjálmur Eyþórsson, 30.9.2010 kl. 01:19]

Aldeilis frábær pistill hjá þér eins og raunar oft áður. Annars er öll þessi uppákoma svo svívirðileg að vart er hægt að koma orðum að, en fólk fær því miður þá þingmenn (og borgarstjóra og forseta) sem það verðskuldar.

Skömm og svívirða þeirra sem að þessu stóðu mun verða upp svo lengi sem land byggist. 

[Halldór Jónsson, 30.9.2010 kl. 08:08]

Takk fyrir Vilhjálmur. Fuglsminni kjósenda er áhyggjuefni en því miður staðreynd.

Síðast var kosið í landsdóm 2004. Á þá ekki eftir að kjósa nýtt fólk í Landsdóm ? Ég leit yfir listann um þá sem þá voru kosnir í blaðinu. Ég get ekki komið auga á að þetta fólk verði þóknanlegt Atla og Steingrími þannig að þeir verði að fá þarna sitt fólk ef árangur eigi að nást. Á Alþingi eftir að kjósa eða eiga þessir áð sitja?

[Kristinn Karl Brynjarsson, 30.9.2010 kl. 12:21]

Þakka góðan pistil Halldór.  Þetta er bara ekkert öðruvísi.

En varðandi þingkosna dómara í landsdómi, þá rennur skipunnartími þeirra út í maí á næsta ári.  Núna fer rannsókn málsins fram fyrir landsdómi.  Fer sú rannsókn fram fyrir fullskipuðum landsdómi, eða hverjir verða viðstaddir þá rannsókn?  Fari rannsóknin fram fyrir fullskipuðum landsdómi, þá er það vart verjandi að 8 dómendum sé skipt út fyrir nýja í miðju kafi.  

 Kannski fer rannsókn ekki fram fyrir fullskipuðum dómi, þá gæti þetta sloppið til hvað það varðar.  En á þá að treina rannsókn málsins fram í mai á næsta ári?