Leita í fréttum mbl.is

Bloggfærslur mánaðarins, desember 2011

Ekki er allt sem sýnist

innanstokks í Samfylkingunni.

Kristrún Heimsisdóttir talar hreinskilnislega um það hvernig Árni Páll hafi orðið til þess að bjarga ríkisstjórninni á fundinum í gærkveldi á elleftu stundu. Þá höfðu allir valdafantarnir farið hamförum fyrir því að láta undan venjulegri Machtpolitík Jóhönnu og hótunum um stríð og stjórnarslit. Enda virðist Jóhanna aldrei hafa kunnað aðra leið í stjórnmálum en aðferð hins steytta hnefa ef marka má frásagnir fyrrum samstarfsmanna.

Á fundinum fóru þar fremstir Össur, Dagur og Hrannar í því að hóta mönnum hörðu. Svo merkilegt sem það hljómar, þá virðast fundarmenn í þetta sinn ekki hafa verið sammála um að láta berja sig til hlýðni. Þarna voru uppi harðar skoðanir sem ekki gáfu sig fyrr en Árni Páll beygði þær. Þetta boðar nokkur tíðindi um það að Össur virðist ekki vera sérstakur spámaður um forystumálin í þeim flokki.

En eins og þessi lýsing Kristrúnar er hreinskilin um gang mála hjá Samfylkingunni þá er meira á huldu hvernig Steingrímur fór að því að fá flokkinn til að slátra Jóni Bjarnasyni. Steingrímur grét að vanda yfir þeirri sorg sem hann bæri í hjarta yfir þessari blóðfórn. Ekki hefur verið mikið um fréttir af framgöngu einstakra manna á þessum fundi en út kom Steingrímur með það sem hann var búinn að semja um við Jóhönnu þó hann særi og sárt við lagði að þetta hefði ekkert með brotthvarf Árna Páls að gera. Enda virðist alræði Steingríms vera með þeim hætti, að allir flokksmenn glúpna fyrir sjónum hans þegar á hólminn er komið. Það er helst að menn áræði að senda honum tóninn úr öruggri fjarlægð og brúka jafnvel hin sverustu lýsingarorð um framgöngu formannsins sem yfirleitt ekki heyrast í öðrum flokkum.

Fyrir almenning sem tekur annarsvegar við fréttum um það hvernig ríkisstjórnin sé að leysa allra vanda og svo fréttum aaf þessu framferði öllu, er þetta varla ástæða til að fyllast sérstöku trausti til forystu ríkisstjórnarinnar. Það er varla mikil hvatnig eða forysta fólgin í ríkisstjórn serm virðist eyða meiri orku í að sjálfa sig og hagsmuni einstakra valdamannamanna heldur en hún eyðir í það að leiða þjóðna fram á við úr feni landflótta, hafta og atvinnuleysis.

Það er merkilegt að velta fyrir sér stöðu Hreyfingarinnar og Þráins Bertilssonar í þessu sambandi. Það virðist ekki þurfa lengur að kaupa þá með öðru en ábendingum um það að ella geti þeir orðið skyndilega kauplausir við að detta út af Alþingi. Og Guðmundur Steingrímsson virðist ekki hafa neitt að selja,- sem ýmsir töldu sig vita löngu fyrir þessa atburði.

Svo áfram heldur stjórnarlífið með flugeldasýningum og sprengingum eins og verið hefur. Enn er ekki fulllreynt, því enn er eftir Steingrímslota í bardaganum.

Það er heldur ekki allt sem sýnist fremur venju.


Hvaðan kom féið?

Svo hefur Morgunblaðið eftir Steingrími J. um afrek sín við endurreisn bankanna:

„Sem betur fer er hægt að fullyrða að í tilfelli Íslands mun ríkið fá fjármuni sína að mestu til baka eða halda verðmætum eignarhlutum í fjármálastofnunum ella. Ríkið hefur bundið samtals um 185 milljarða kr. í stóru bönkunum við endurreisn þeirra í formi eiginfjárframlaga og víkjandi lána. Ef staðan í dag er skoðuð er ljóst að ríkið hefur haft mjög góða ávöxtun á því fé sem það varð að binda í þetta verkefni, sem er um 250 milljörðum minna en upphafleg áætlun gerði ráð fyrir. Ætla má að ríkið fái þessa peninga að fullu til baka og komist frá endurreisn stóru bankanna án nokkurs taps í þeim skilningi að arðgefandi eignir og/eða endurseljanlegar eignir standi fyllilega undir því fé, sem ríkið hefur bundið í verkefnið, miðað við efnahagsreikninga bankanna. Þannig hafa fjármunir ríkissjóðs ekki farið í botnlausa hít heldur þvert á móti verið festir í verðmætum eignum. Í framtíðinni verður hægt að nota þessa fjármuni eða arðinn af þeim til þess að greiða niður skuldir og halda áfram við byggja upp íslenskt samfélag,“ segir Steingrímur.

Veltir nokkur því fyrir sér hvernig Steingrímur fékk þessa 185 milljarða.

Var það eitthvað grundvallarlega öðruvísi en hinn illi prins sem blandaði kopar í silfurpeninga sína til að féfletta þegna sína ?

Er ekki auðvelt að þykjast vera bjargvættur þjóðar en beita sjónhverfingum sem fólkið lætur óátalið? Skilja menn ekki hversvegna stjórnin varð að fá sinn mann í Seðlabankann?

Hvaðan kom féið?


Gúttóslagurinn

er eitthvað sem ASÍ hreykir sér af. Sendir landsmönnum jólakveðjur þar sem slagnum er jafnað til Vökulaganna og Þjóðarsáttarinnar.

Í Gúttóslagnum réðust bullur úr skríl á lögregluna okkar. Stórslösuðu marga góða drengi að ósekju, sem báru þess ævilöng merki. Menn sem ég man eftir.

Ég frábið mér jólakveðjur frá samtökum sem hrósa sér af þessu verki.

Gúttóslagurinn var sorgaratburður en ekki sigur verkalýðsins.


Rabbatt !

er í augsýn í ríkisstjórnnni. Hún byrjaði með 12 ráðherra.Svo var slegið af tveimur. Og nú er búið að uppgötva að það þurfti bara 9 til að stjórna landinu. Enginn smá rabbatt það, úr 12 í 9.Það er búið að taka Vaskinn af.

Miðað við allt það sem þessi ríkisstjórn hefur framleitt má þá ekki búast við að nýja stjórnin framleiði í hlutfalli fjórðungi minna en hún byrjaði með? Fjórðungi minna af bjargráðum ? Verður ekki að hækka kaupið hjá þeim sem verða að vinna öll þessi verk fyrir hina? Skilja þeir ekkert pláss eftir sig?Hvað fær Hreyfingin? Hvað fær Sif? Verður ekki kaballinn að ganga upp?

Kemst blessað fólkið yfirleitt yfir þetta ? Raunar skildist manni á Steingrími að hann væri búinn að redda svo miklu í Fjármálaráðuneytinu að það væri í rauninni lítið eftir Oddnýju að gera. Rabbattstjórnin röskva.


Næsti þáttur

í hinni æsipennandi þáttaröð hjá ríkisstjórninni okkar er á morgun. Dagurinn á morgun verður mikill dagur í sögu lýðveldisins  . Ekki bara vegna áramótaskaupsins heldur líka hvernig spilast úr fundinum á Bessastöðum. Fer Jón, fer Árni, kemur Þór?. Kemur leynigestur sem óvænt bjargar málunum? Hvar er Sif? Nær Össur að fá  Jóhönnu til að hætta? Hver er arftakinn? Hvað verða margir eftir í VG með Steingrími? Hvað gerir Guðmundur?

Missið ekki af næsta þætti í hinni æsipennandi framhaldsþáttaröð um skjaldborgina um velferðina.  Sjáið hvað Ólafur Forseti verður glæsilegur þegar hann blessar fundinn. Verður hann eða fer hann? Tilkynnir hann eitthvað um það á Nýjársdag?

Maður getur varla beðið eftir næsta þætti.

 


Þéringar

báru á góma hjá okkur Jóni Ragnari rétt áðan.

Jón sagði svo:...." Svo vildi Margrét Tryggvadóttir hætta að segja "hæstvirtur" og "háttvirtur" af því að hún bæri ekki virðingu fyrir þessu fólki sem sat með henni á þingi. Hún áttaði sig ekki á því að ofangreind ávörp eru ekki til þess að gera einstaklinga háttvirta eða hæstvirta, heldur til þess að efla háttvísi í ræðustól. Svo er embættið sem viðkomandi gengir hæstvirt eða háttvirt, ekki endilega einstaklingurinn sjálfur.  Ýmsar siðvenjur tíðkast í siðmenntuðum ríkjum, þær eru mikilvægar undirstöður sem fá okkur til að bera virðingu fyrir lögum og reglum og ef þessar siðvenjur verða aflagðar, þá hefur það neikvæð áhrif á samfélagið í heild sinni, kannski gætir þeirra ekki svo mikið í fyrstu, en þá er lagt af stað í ákveðna vegferð sem ekki sér fyrir endann á. .."

Ég svaraði þessu svona:  

" Það er gaman að þú minnist á háttvirtan og hæstvirtan. Þsð var nefnillega langafi minn og nafni þinn , Jón Ólafsson ristjóri sem kom þessari hefð á.  Og alveg eins og þú segir, til að efla háttvísi. Honum Jóni, þeim landsþekkta skammakjafti, ofboð lágkúra þingmanna eins og líklega Margrét líkist mest núna, sem báru enga virðingu fyrir fólkinu sem með með sat hvað þá stofnuninni þar sem þeir voru staddir í. Þegar svona alþýðlegar flatlendis...  komu ofan úr afdal  rmeðal manna, sögðu þeir hver  öðrum til syndanna á alþýðumáli sem þeir voru vanir að nota í réttunum, sem gekk fram af Jóni, sem var búinn að dvelja langdvölum vestanhafs og lært þar mannasiði. Honum ofbauð þessi hegðun og sá auðvitað að mannasiðir voru forsenda þess að þingstörf gætu skilað árangri en færu  ekki í keppni í bölvi og ragni. "

 Það er miður ef þingmenn átta sig ekki á því sem að baki ávörpunum hæstvirtur og háttvirtur býr.Það er auðvelt að sjá fyrir sér að ekki verður mikið úr þingstörfum ef menn eru uppteknir af þvi að svivirða hvorn annan með skrúðmælgi en gleyma málefninu.

dr.Gylfi Þ. Gíslason er í hópi þeirra kennara sem ég haft besta á lifsleiðinni. Hann var afburðamaður og fjölvígur, Við urðum góðir kunningjar síðar á ævinni og hann óx í mínum augum til æviloka. Hann gekk ríkt eftir þvi að menn þéruðuust í þriðja bekk. Kennararnir gerðu það líka flestir en sumir voru   minna fyrir það.

þéringar voru lagðar af í einhverri alþýðu-niðurávið-snobbmennsku sem komst í tísku. Þá tók þjóðin stórt stökk niður á við í almennri siðmenningu. Þéringar eru allstaðar notaðar meðal siðmenntaðra þjóða. Ekkert af neinu snobbi heldur til að ná meiri árangri í umræðum og starfi því menn vanda sig betur og gera kröfur til sjálfs sín og annarra. Ég held að agavandamál í skólum séu mikið af þessum toga. Einar Magg sagði í tilefni þess að Kristinn Ármannsson varð rektor: "Kristinn er séntilmaður, það brúkar enginn kjaft við séntilmann." Það varð og svo að Kristinn hafði góða stjórn á skólanum og allir báru virðingu fyrir honum.

Ég held að þéringar í framhaldsskólum og á Alþingi milli stjórnmálaflokka að  minnsta kosti gætu vrið til gagns.


Kúbein

er verkfærið sem Hreyfingin virðist ætla að beita til að koma sér inn í Jóhönnustjórnina.

Þeir senda út fréttir um að þeir krefjist að forsetinn skipi þjóðstjórn. Svo greiði þjóðin þjóðaratkvæði um þessa þjóðstjórn. Og ef þjóðin vill ekki þjóðstjórnina þá verði bara Alþingiskosningar. Þeir segja ekki hvað þeir geri ef Jóhanna lætur undan.

Geta þessi "við eplin með" komið með stærri yfirlýsingu?

Það er skiljanlegt að þeir reyni að sprikla eitthvað meðan þeir eru enn á Alþingi. Því með ólíkindum væri ef þeir eigi einhvern hlut að máli eftir þingkosningar. Slík er afrekaskrá þeirra á þingi.

Þeir hafa þó komið einu fram sem halda mun nafni þeirra á lofti. Þeir hættu að mæta með slifsi á þingfundi. Það er að segja karlarnir. Ég veit ekki hvað konurnar gerðu?

Kannski þær hafi bara keypt sér kúbein?


Hálfsannleikur

eða rangupplýsingar er það sem einhverjir í bókabransanum eru að dreifa í auglýsingaskyni fyrir jól og áramót. Þeir gefa út einhverja metsölulista yfir þær bækur sem mest seljist. En það fylgir aldrei nein einasta sölutala. Brakið selst mest , svo Arnaldur ofrv. Vá, voða spennandi! En veit nokkur neitt um raunverulegan eintakafjöldann?

Mér var sagt hér um árið að til dæmis Bónus og fleiri slíkir stórmarkaðir léku það að taka út þúsundir bóka hjá forlögunum og setja undir borðin hjá sér til þess að litlu bóksalarnir næðu ekki í neitt. Allir voða glaðir í forlaginu og höfundarnir að rifna úr monti yfir því að vera metsöluhöfundar. Svo kæmu endursendingarnar í janúar. Þá lækkuðu nú sölutölurnar umtalsvert. Og utan af landi er svo verið að senda afganga næstu tvö árin þannig að endanleg tala fæst aldrei.

Svo að enginn veit í raun og veru hvaða bók hefur raunverulega selst og í hvaða magni. Þetta er bara partur af auglýsingamennskunni að blekkja fólk til þess að það kaupi þessa bók en ekki hina af því að hún seljist svo vel.

Og það veit ég af eigin raun, að án auglýsinga selst engin bók. Púnktur. Auglýsingar geta hinsvegar selt Norðurljósin níu sinnum ef því er að skipta.

Hálfsannleikurinn selur hinsvegar heilmikið.


Samfylkingin ber ábyrgð

á Lýbíustríðinu. Össur gat komið í veg fyrir það en gerði það ekki.

Í viðtali á ÍNN kom eftirfarandi fram:

"Davíð sagði að stuðningur Íslands hafi aldrei verið neitt annað en pólitískan þar sem aðkoma þjóðarinnar hafi ekki verið nein að þeirri innrás umfram það. Líbía hafi verið allt annar handleggur. Þar hafi Nato farið í stríð og sá reginmunur sé á að þegar Atlantshafsbandalagið fari í stríð verði allar þjóðir þar innan að samþykkja það, þær hafi neitunarvald. Davíð gekk svo langt að segja Samfylkinguna hafa staðið að árásunum á ríki sem ekki hafði gert árás á bandalagið. Vinstri grænir hafi látið sér duga að bóka eitthvað í ríkisstjórninni sem hægt verði að lesa eftir 30 ár.

Hann gagnrýndi þá sem hæst höfðu um þátttöku Íslands í innrásinni í Írak, sem hafi verið engin, en á sama tíma hafi þeir farið af stað í aðgerðir gegn Líbíu. „Þangað sem menn áttu ekkert erindi og þá er látið eins og það sé ekkert atriði,“ sagði Davíð. Og gekk jafnvel enn lengra og sagði Samfylkinguna bera fulla ábyrgð á því sem í Líbíu gerðist við loftárásir Nato."

Er það virkilega svo að Össur hefði getað beitt neitunarvaldi? Hefði hann gert það, hvað þá? Hugsanlega verra? . En það er umhugsunarvert að NATO fór í stríð við aðila sem ekki hafði ráðist á það.

Nú dugar ekki að segja, ekki benda á mig!Á þessu ber Samfylkingin ein ábyrgð!


Að gera glæpamenn ríka?

spyr Jón Magnússon hæstaréttarlögmaður á bloggi sínu. Hann er að fjalla um ofsagróða fíkniefnabarónanna í Mexico og víðar.

Spurningunni um það hvað eigi að gera þegar ekki gengur að uppræta eiturlyfjaneysluna svarar Jón ekki beinlínis, enda svarið viðurhlutamikið. Fólkið virðist ekki trúa því að fíkniefni séu afskaplega skaðleg fyrir heilsuna þar sem það neytir þeirra svo óhikað.

Á hinn bóginn blasir við að fólk hefur unnvörpum hætt að reykja í sjálfsvarnarskyni. Því sannað var að reykingar drepa fólk. Fíkniefnaneysla veldur auðvitað mikilli ógæfu eins og reykingar líka gera þó hljótt fari. Og margur væri sá lífs sem nú er fallinn fyrir aldur fram ef hann eða hún hefði aldrei komist í samband við þessi fíkniefni tóbak og allt hitt.

Áfengi er greinilega fíkniefni og hættulegt. Það hefur eiturverkanir og getur drepið. Ethýlakóhól er eina alkóhólið sem mannslíkaminn virðist þola í einhverjum mæli án þess að deyja eða bíða varanlegan áþreifanlegan líkamlegan skaða.Og það eina sem gefur áhrif sem menn elska frá fornu fari. Strákar verða ófeimnari við stelpurnar, málhaltir tala, leiðinlegir verða fyndnir að eigin áliti og aðrir hlæja að fúlum bröndum þeirra. Góðir menn verða betri og vondir menn verri við vín.

Það er afleiddi skaðinn af allri þessari neyslu sem við er að fást. Sá félagslegi sem lögreglan, spítalarnir og heimilin fást við alla daga. Menn gera þetta eða hitt í fylleríi, vímu eða fráhvarfi sem þeir gerðu ekki annars. Það er erfitt að mæla eituráhrifin beinlínis af hinum ýmsu vímuefnunum. Það er varla vitað hvernig þau virka. Öll þessi efni hafa hinsvegar eftirsótta ljúfa hugsanabrenglun í för með sér. Líkamlegar eftirstöðvar eru fremur tilgátur en staðreyndir, því margur forfallinn neytandi virðist alheilbrigður þegar hann hættir neyslunni. Það er ekki svo ef menn taka inn bráðvirkt eitur eða reykja svo lungnakrabbi myndist.Fyllibyttan virðist ná sér fljótlega þegar rennur af henni og timburmennirnir hverfa. Um það bil 4 % mannkyns fer í misnotkun á einhverju þessara efna. Hin 96 % verða að sæta böðum og bönnum vegna þessa litla hóps, ekki fá að kaupa parkódín í apótekum eða brennsluspritt osfrv.

Hver er þá sérstaða áfengisins? Áfengið er einokað af ríkisvaldinu og notað purkunarlaust í fjárkúgunarskyni af horuðum almúganum sem ekki má brugga eða smygla. Öreigar sem ofurríkir kaupa það á tíföldu verði í ÁTVR. Það er af sem áður var þegar ríkið hélt því fram að verðið yrði að vera svona hátt til að drykkju minna af því svo að til væri fyrir mjólk handa börnunum. Kannski að einhverjir hafi trúað þessu í alvöru.
Áfengið leiðir meiri hörmungar yfir miklu fleiri í heiminum öllum heldur en hass og kókaín. Svo hvað er til ráða?

Í gamla daga smygluðu farmenn brennivíni til að græða á sprúttsölu.Leigubílstjórar seldu sprútt. Það var álitin sjálfsögð þjónusta í ofstjórnuðu umhverfi. Landabruggarar reyndu að framfleyta sér í samkeppni. Eftirspurnin var alltaf næg og allir vildu kaupa ódýrara sprútt en fékkst í ríkinu á tíföldu verði. Hversvegna vill ríkið þá ekki græða á dópsölu alveg eins og sprúttsölu í stað þess að fela glæpamönnum það? Hver er eiginlega munurinn?

Bindindismaðurinn Jón Magnússon spyr hvað eigi að gera? Ég vil svara spurningunni þannig, að það sé rétt að velta því fyrir sér í alvöru að ríkið fari að selja dóp á einhvern hátt. Ekki kannski endilega yfir búðarborðið til hvers sem er, heldur á stjórnaðan hátt sem auðveldlega má reka á þjóðhagslega betri,heilsufarslega áhættuminni og á meira forvarnahátt en nú er.

Er ekki ofrausn að bara glæpamenn verði ríkir á því í skúmaskotum að færa fólkinu það sem það vill greinilega og við getum ekki stoppað hvað sem við reynum? Og gegnir í raun ekki sama máli með elstu atvinnugreinina?
Af hverju að gera bara glæpamenn ríka á því að sjá um þjónustu við fólkið ?


Næsta síða »

Höfundur

Halldór Jónsson
Halldór Jónsson

verkfræðingur, flugdellukall, tennis-og badmintonspilari

-ekki góður í neinu af þessu-

Heimsóknir

Flettingar

  • Í dag (19.3.): 8
  • Sl. sólarhring: 10
  • Sl. viku: 80
  • Frá upphafi: 3417888

Annað

  • Innlit í dag: 5
  • Innlit sl. viku: 60
  • Gestir í dag: 5
  • IP-tölur í dag: 5

Uppfært á 3 mín. fresti.
Skýringar

Eldri færslur

Innskráning

Ath. Vinsamlegast kveikið á Javascript til að hefja innskráningu.

Hafðu samband