Var forysta Geirs

sem hann veitti þjóðinni á umbrotatíma þökkuð sem skyldi ?  Er það að verðleikum að láta Steingrím Jóhann með brostnu hjarta og náhirð Alþýðulýðveldisins draga Geir  fyrir Landsdóm?  Landsdóm sem virðist vera illa starfhæfur og ekki einu sinni skipaður flekklausu fólki.

Geir H. Haarde hafði forgöngu um setningu neyðarlaganna.  Þau björguðu landinu frá írsku leiðinni sem nú er til samanburðar við Ísland. Neyðarlögin komu í veg fyrir það að gjaldeyrisforða landsins væri kastað á skuldabál bankanna.  Þau tryggðu innistæður fólksins og létu þær njóta forgangs  fram fyrir erlenda banka og vogunarsjóði.  Geir H. Haarde kom í veg fyrir að hrunið yrði miklu verra en það þó varð. 

Geir H. Haarde gerði sitt besta og ríkisstjórn hans gerði rétt í erfiðri stöðu. Um það eru erlendir hagfræðingar nú sammála í flestum virtustu ritum heimsins.   Þó að stjórn hans hefði hugsanlega getað gert eitthvað betur fyrr þá er langur vegur til þess að forsætisráðherrann hafi framið vísvitandi glæpi gegn þjóðinni.  Kommarnir í báðum stjórnarflokkunum með dyggum stuðningi Baugspressunnar, hafa skipulega rægt Geir H. Haarde og allan Sjálfstæðisflokkinn í 80 ár síðan  þessir atburðir urðu.  Tuggnir hafa verið  í síbylju ómerkilegir aulabrandarar um manninn sem stóð þjáður í brúnni í gegnum mesta brotsjó sem á lýðveldinu hefur brostið. 

Nú þykist núverandi  forsætisráðherra  á sinn  forstokkaða hátt helst ekki hafa verið í stjórninni með Geir á þessum tíma.   En þar sat hún eins og í öðrum ríkisstjórnum aðgerðalítil nema til að garga á samráðherrana ef marka má samtímalýsingar á henni.   Áratuga ráðherramennska Jóhönnu Sigurðardóttur gerir hana auðvitað fyllilega meðábyrga í öllu sem vel og illa fór hjá ríkisstjórnum hennar í langan tíma til þessa dags.  Það er ekki mjög stórmannlegt núna að kenna öllum öðrum það sem miður fór en þakka sjálfum sér allt sem tókst.   En um það er tómt mál að tala við sumt fólk, það getur einfaldlega ekki betur.  

Nú er Geir H.Haarde  lögsóttur fyrir það að Lehman- bræður féllu, heimskreppan skall á  og loftbólubankarnir okkar hrundu eftir að glæpamenn  höfðu rænt þá innanfrá. Kaldhæðnin er að Þeir ganga allir lausir en Geir bíður réttarhalda. Ætli það séu margir Íslendingar sem telja sér sóma að þessu framferði?

Það hefur verið ómaklega að Geir H. Haarde vegið og honum ætti fremur að þakka það sem vel  tókst heldur en að hrekja hann með þessum hætti.   Málshöfðunin gegn honum fyrir Landsdómi er  svívirða sem  undirmálsþingmenn og illgjarnir á Alþingi Íslendinga hafa komið til leiðar.

 Megi þeirra skömm lengi uppi vera.  Geir H. Haarde verður þakkað þegar þeir verða gleymdir.

 

Athugasemdir

[Kári S. Lárusson (IP-tala skráð) 7.2.2011 kl. 00:16]

Sæll Halldór

Þó ég sé hundfúll út í Geir fyrir afstöðu hans til Icesave, er ég algerlega sammála öllu sem fram kemur í þessum ágæta pistli.

Hef fullkomna andstyggð á því fólki sem þarna sýndi sitt viðurstyggilega innræti.

"Undirmálsþingmenn" er sannarlega réttnefni.

[Helga Kristjánsdóttir, 7.2.2011 kl. 00:38]

 Sæll! Halldór ég sagði það fyrr og geri enn að mér finnst skömm að þessu. En hann er nokkuð brattur að sjá núna. KV.

[Sigurður Alfreð Herlufsen, 7.2.2011 kl. 10:23]

Blessaður sértu Halldór,

þú segir það sem segja þarf, en fæstir nefna.

Hafðu kæra þökk fyrir að bera blak af Geir Haarde.

Þar fer vandaður maður.

[Adda Þorbjörg Sigurjónsdóttir, 7.2.2011 kl. 11:07]

Greinin segir allt sem þarf. Þróun mála hefur verið með ólíkindum og ótrúlegt að sumir geti horft í augu sér í speglinum á morgnana.

[Ágúst H Bjarnason, 7.2.2011 kl. 12:34]

Tek undir hvert orð frændi.

[Sveinn Egill Úlfarsson, 7.2.2011 kl. 20:14]

Geir var án efa klár á að brotsjór var á leiðinni og hóf undirbúninginn til að verjast eins og góður stjórnandi gerir. Þeir ráðherrar sem enn hanga á nöglunum í stólunum og voru í ríkisstjórn hans gerðu nákvæmlega ekkert til að hjálpa honum og voru eingöngu að vinna að eigin valdastólum til framtíðar og þáðu sína 30 silfurpeninga fyrir. Sagan mun dæma þau sem undirmálsfólk og hræsnara.

[Ómar Bjarki Smárason, 7.2.2011 kl. 22:47]

Vandaður maður Geir, um það efast fáir sem hafa eitthvað kynnst honum. Hann var hins vegar óheppilega trúgjarn á efnahagskerfi þeirra Björgólfanna og Baugsmanna líkt og ríkisstjórnin öll. Það bera ráðherrar Samfylkingar ekki síður ábyrgð en Geir. En að þetta mál hafi snúist upp í pólitískar ofsóknir gegn einum manni er núverandi valdhöfum vart til sóma og fer að minna nokkuð á aðferðir Pútíns gegn þeim sem ekki eru tilbúnir að beygja sig undir vilja hans......

[Starbuck, 8.2.2011 kl. 14:43]

Þvílík endemis þvæla!  Eina svívirðan við þetta mál er að ekki skuli hafa verið höfðað mál gegn fleirum í ríkisstjórninni.  Þetta lið bar mikla ábyrgð á þeim hörmungum sem yfir okkur dundu og ekki sér fyrir endann á.  Það var óheiðarlegt og stóð sig illa og átti fyllilega skilið að vera dregið fyrir Landsdóm!

Það er með ólíkindum að fólk skuli tala um þetta hrun eins og náttúruhamfarir sem ekki var hægt að ráða við.  Þetta voru hamfarir af mannavöldum og af stjórnmálamönnum báru Sjálfstæðismenn langmesta ábyrgð á því hvernig fór.

Ómar: Geir og hans ríkisstjórn ásamt fjármálahyskinu og stórbröskurunum lugu að þjóðinni um stöðu mála í aðdraganda hrunsins!  Hvernig getur þú kallað hann vandaðan mann?  Tökum eitt dæmi um blekkingar hans.  Hann laug því að þjóðinni á þjóðhátíðardaginn 2008 að ríkissjóður væri nánast "skuldlaus og lífeyrissjóðakerfið firnasterkt". http://www.forsaetisraduneyti.is/radherra/raedurGHH/nr/2959 Hið rétta var að ríkissjóður skuldaði nokkur hundruð milljarða og skuldir hans höfðu ekki lækkað í stjórnartíð Sjálfstæðisflokksins.  Lífeyrissjóðakerfið stóð og stendur á brauðfótum þó ýmsir blekkingameistarar reyni að telja okkur trú um annað.

Það má glögglega sjá á þessum pistli og svörum við honum að veruleikafirringin hjá sumum hefur ekkert minnkað við hrunið, aukist ef eitthvað er!

[Halldór Jónsson, 8.2.2011 kl. 18:53]

Starbuck,

Vinsamlega halda þig í burtu frá þessari síðu meðan þú skrifar fúkyrði undir dulnefni.

[Starbuck, 8.2.2011 kl. 23:34]

Ég heiti Vilhjálmur Hjaltalín Jónsson ef þér finnst það skipta máli.

Mér sýnist að ég sé ekki með meiri fúkyrði en þú sjálfur.  Ég tek sterklega til orða vegna þess að ég er kominn með æluna upp í kok af rugli eins og þessu sem þú býður upp á.  Sjálfstæðismenn virðast upp til hópa gjörsneyddir sjálfsgagnrýni og skynsemi og vera gjörsamlega fyrirmunað að læra af eigin afglöpum.