Af hverju ekki þjóðaratkvæði?

Nú er hafin undirskriftasöfnun á netinu til stuðnings því að Icesave samningnum sem Alþingi vill samþykkja verði vísað til þjóðaratkvæðis.

Manni skilst á sumum þingmönnum að þetta máli henti ekki til þjóðaratkvæðis. Ekki veit ég hvernig ber að skilja það öðruvísi en að þjóðinni sé ekki treystandi til að taka rétta ákvörðun í málinu.

Það er sjónarmið útaf fyrir sig að þjóðinni geti verið mislagðar hendur í svona flóknu máli. Tilfinningasemi þjóðar geti borið rökhyggju ofurliði. Þjóðum sé nauðsynlegt að viðhafa fulltrúalýðræði vegna þess að kjósendur geti ekki haft þá yfirsýn sem til þarf í öllum málum.

Tæknilega hyllir undir það að til dæmis posakerfið eða heimabankakerfið geti staðið undir víðtækum atkvæðagreiðslum sem megi allavega nýta til skoðanakannana ef ekki annars.Framtíðin kann að bera með sér tíðari þjóðaratkvæðagreiðslur en verið hafa og tæknilegri. Til góðs eða ills.

Fyrir ári síðan fengum við áskorun frá forsvarsmönnum ríkisstjórnarinnar að samþykkja Icesave ll. Þeir bönnuðu sínu fólki að fara á kjörstað og gengu á undan með góðu fordæmi í andstöðu sinn við inngrip Forsetans í samningaferlið.

Þá er líklega nærtækt að spyrja sig að því, að hafi sú atkvæðagreiðsla verið góð og niðurstaðan rétt, hvað er þá í veginum með að endurtaka hana? Er það ekki nema styrkur fyrir Alþingi og samninganefndir af hafa reynt að rata rétta leið og geta vísað til þjóðaratkvæðis því til styrktar?

Hvað hefur breyst sem gerir Icesave málið núna ófært til þjóðaratkvæðagreiðslu?

Athugasemdir

[Kristján P. Gudmundsson, 13.2.2011 kl. 18:40]

Flestir stjórnmálamenn viðurkenna, að atkvæðagreiðslan um ICESAVE 6. mars í fyrra hafi leitt til betri samnings (#3). Sú staðreynd bendir til, að ný atkvæðagreiðsla geti komið þjóðinni til góða, ef við höfnum þessum svikasamningi aftur. Við getum ekki látið það spyrjast um okkur, að við látum þennan óvissu samning yfir okkur ganga og niðja okkar.

 Kv.,KPG.

[Halldór Jónsson, 13.2.2011 kl. 20:20]

Já sæll Kristján apótekari

Nú í kvöld eru komnir 8700 á listann, sem eru eitthvað 2000 í dag og söfnunin er ekki formlega hafin.

Mega þeir ekki vera bara fegnir þingstrumparnir að geta sagt við retann, við vildum borga en helvítis pöpullinn vildi bara ekki hlusta á okkur. Þessir líka asnar sem samt eru þeir sömu og kusu okkur. Ærli þeir kjósi okkur nokkuð aftur?

[Halldór Jónsson, 13.2.2011 kl. 20:21]

Bretann ekki retann

[Friðrik Hansen Guðmundsson, 13.2.2011 kl. 22:15]

Þetta er sami bull samningurinn og síðast. Bretar og Hollendingar eiga að fá 49% af eignum þrotabús Landsbankans, þvert á lög og reglur Íslands og ESb og skilanefnd Landsbankans fær 51% af þrotabúinu upp í Icesave.

Það sem vantar upp á að þessi 51% dugi upp í Icesave eiga bændur, sjómenn og launafólk á Íslandi að borga.

Valið sem við stöndum frammi fyrir er:

•Icesave 3 sem mun kosta okkur 25 til 230 milljarða

•Dómstólaleiðin sem mun kosta okkur 0 til 140 milljarða.

Það er bara eitt hægt að gera. Taka aftur fram fyrir hendurnar á þinginu og hafna þessum samningi.

[Halldór Jónsson, 13.2.2011 kl. 22:39]

www.kjosum.is

Látum Forsetann skera úr málinu.

[Elle_, 15.2.2011 kl. 00:29]

En harðstjórnin er á ofsaflótta og í ofsaflýti undan bæði forsetanum og lýðræðinu.  Verður forsetinn kominn til landisns??