Audi et alteram partem!

sr. Ólafur Skúlason biskup þarf löngu látinn enn að þola umræður um sekt eða sakleysi um barnaníð í eigin fjölskyldu og víðar. Orð standa gegn orði. Nú hefur fjölgað þeim orðum fleira fólks sem standa fremur til sýknu en sektar.

Engin réttartæk sönnun hefur komið fram saknæmt eða ósiðlegt atferli sr. Ólafs. Aðeins munnlegar frásagnir einstaklinga sem segjast tala í nafni sannleikans og nauðsyn þess að fá að létta af sér sálarlegum byrðum vegna einhvers sem Ólafur átti að hafa gert þeim í fyrndinni. Ekkert þessa fólks hefur borið um ákveðna líkamlega valdbeitingu sr. Ólafs gagnvart því. Sem væri þó nærtækt þar sem sr. Ólafur var mikill maður vexti og áreiðanlega heljarmenni til burða. Eru sögur af því að þessu afli hafi verið beitt gegn lítilmögnum?

Við sem umgengumst þennan ljúfa mann í Sundlaugunum höfðum ekki af honum ótta vegna greinilegs líkamlegs afls hans og karlmannlegrar byggingar. Við höfum ávallt haft mikla fyrirvara gegn því fári sem á þessum félaga okkar dundi lífs og liðnum. Okkur hefur fundist að allan vafa eigi að túlka honum sem öðrum sakborningum í vil. Maður sé saklaus þar til sekt hans er sönnuð. Engin sekt hefur verið sönnuð heldur er aðeins um framburð og áburð að ræða um löngu liðna og ósannanlega atburði, sem áttu að hafa átt sér stað áratug fyrr eða meira.

Ég sjálfur ber ekki kala til öfuguggans sem leitaði á okkur jafnaldrana ítrekað í gamla daga á slökkvistöðinni niður við Tjörn. Við sluppum frá honum flestir án varanlegs skaða, Til hvers ættum við að berja okkur á brjóst í fjölmiðlum í dag? Þessi maður var greinilega fatlaður einstaklingur og afbrigðilegur. Ég held að hann hafi aldrei verið kærður einu sinni. Ég hef ekki heyrt að neinn okkar hafi þurft áfallahjálp síðar á ævinni vegna þessa. Enda var víst ekki búið að finna hana upp þá.

Ég trúi engu misjöfnu um sr. Ólaf Skúlason fyrr en beinar sannanir eða yfirgnæfandi líkur væri að því leiddar sem ekki verður. Látum þennan látna mann í friði. Minnumst þess nú hvað hann gerði vel. Er ekki hugsanlegt að einhverjir sem hann hjálpaði í lífinu og var góður vilji segja af því sannar sögur?

Audi et alteram partem!

Athugasemdir

[Vilhjálmur Örn Vilhjálmsson, 8.11.2011 kl. 11:08]

Sæll Halldór, þetta eru mjög hættulegar skoðanir sem þú hefur, en engu að síðar siðferðislega réttar, og örugglega lagalega séð.

Dómstóll götunnar hefur dæmt Ólafs biskup sem ég þekkti ekkert, en sá dómstóll hefur ekkert vægi nema í misjafnlega góðri samvisku þeirra sem í honum þykjast sitja.

Allt misjafnt tal um sekt manna, sem ekki hefur verið sönnuð, varðar reyndar einnig við lög, þó ekki lög háttvirts hæstaréttar ræsisins, sem nær oftast hefur upplýsingar sínar frá Gróu á Leiti.

[Kristján P. Gudmundsson, 8.11.2011 kl. 13:47]

Ágæti bloggvinur, Halldór Jónsson, ég er enn sem oft áður, hjartanlega sammála þér og einnig bloggvini okkar Vilhjálmi Erni, sem mér finnst ávallt flytja erindi sín gætilega og af sanngirni.                                      Mál Ólafs heitins biskups Skúlasonar hafa farið gjörsamlega úr böndum og andi Gróu gömlu á Leiti hefur svifið víðar en yfir vötnunum. Mál er að linni !

Með góðri kveðju úr Fjallabyggð, KPG.