Er þjóðin að átta sig?

á því að framhald vinstri stjórnarinnar boðar henni engan fögnuð hvað þá að henni sé frelsari fæddur í Steingrími Jóhanni,  í jötu heilagrar Jóhönnu undir verndarvængjum vitringanna og fjárhirðanna í skilanefndunum eilífu?

Reykjavík síðdegis gerði könnun 9.nóvember s.l.. og spurði hvaða flokk menn myndu kjósa það augnablikið. 20 %  svarenda nefndu Lilju Mósesdóttur og hennar óborna flokk, 6 % Guðmund Steingrímsson og Besta flokkinn hans.  En aðeins 9 % nefna nú Samfylkinguna og 4 % Vinstri Græna. Fylgi ríkisstjórnarflokkanna í prósentum er því komið samanlagt niður í sæmilegan kampavínsstyrkleika eða 13%

Þrátt fyrir hraustlegan áróður á Sögustöðinni og samanlagðra Baugsmiðlanna gegn gömlu flokkunum þá nefna nú 42% Sjálfstæðisflokkinn og 16 % Framsóknarflokkinn.  Og sannast þá enn að enginn veit hvað átt hefur fyrr en misst hefur.

Samkvæmt hefðinni tolla félagshyggjumenn ekki saman til lengdar fremur en sletta af kvikasilfri. Því félagshyggjumenn  eru svo miklir einstaklingshyggjumenn að þeir eru óðar komnir í hár saman við minnsta andblæ.  Þeir  renna til og frá og enginn getur staðsett þá nákvæmlega. Að því leyti svipar þeim til elektrónunnar sem margir segja af miklar sögur þó þeir hafi aldrei séð hana sjálfir.  En hún bara er þarna auðvitað eða öllu heldur var þarna, rétt eins  eins og VG var á Akureyri án þess að nokkur viti í rauninni hvað gerðist þar.   

Vinstri menn núna virðast reiðubúnir að flykkja sér um Lilju Mósesdóttur sem er væntanlega eitthvað annað en eitthvað annaðið hjá Steingrími Jóhanni á Bakka. Og svo virðist vaxandi fjöldi treysta Guðmundi Steingrímssyni betur til afreka í Evrópumálunum heldur en Jóhönnu sjálfri og Össuri.

Táknar þetta að þjóðin sé að átta sig á því að hún elti mýrarljós skattahækkana og niðurskurðar í velferðarkerfinu út í ófærur?  Valdi ráðleysi í stað ráðdeildar? Valdi kyrrstöðu í stað kraftaverka?

Er  þjóðin að átta sig á þessu ?

 

 

 

Athugasemdir

[Jón Steinar Ragnarsson, 14.11.2011 kl. 14:04]

Hvert var svarhlutfall? Þ.e. Hve mörg prósent tóku ekki afstöðu?

[Eyjólfur G Svavarsson, 14.11.2011 kl. 15:11]

Lilja þarf að fara að flíta sér, Það vantar góðan og trúverðugan flokk með Sjálstæðisflokkinum, Samfylkingin Vinstri grænir og framsókn eru ekki boðlegir að mínu mati!! Það sjá allir að Samfó og VG eru ekki að ráða við að stjórna landinu, burtu með þau strax!!! Kosningar strax, það er ekki eftir neinu að bíða. Fáum hjólin til að snúast!!

[Jón Ríkharðsson, 14.11.2011 kl. 15:42]

Ég ætla rétt að vona að fylgið nái svipuðum styrkleika og alkóhólmagnið er í Pilsner, því það er raunhæft.

Ekki er ólíklegt að 2.5% þjóðarinn sé raunverulega á sama plani og ríkisstjórnin, hinir eru í þrjóskukasti vegna þess að þeim hefur verið talin trú um að Sjálfstæðisflokkurinn hafi valdið hruninu á fjármálamörkuðum heimsins, en vonandi fer forysta flokksins að grípa til varna ásamt okkur Halldór minn.

Ég hef svo mikla trú á þjóðinni, að ég efast um að það séu margir vinstri menn til hér á landi, þá meina ég alvöru vinstri menn.

[Halldór Jónsson, 14.11.2011 kl. 18:41]

Það stóð nú ekki Jón Steinar. Vonarðu að þetta sé vitleysa?

Eyjólfur, Við gerum okkar besta er það ekki.