The Wild We(n)st(re) Show

Buffolo Bill náði miklum vinsældum í Bandaríkjunum á sínum tíma. Billi ferðaðist með the Wild West Show um víða vegu og er enn heimsfrægur fyrir. Bill þessi var alíslenskur maður sem hét Vilhjálmur úr Skagafirði að því að Kiljan segir. En hann varð frægur fyrir að drepa fleiri vísunda á dag en nokkur annar úti á gresjunm meðan rányrkjan stóð þar yfir.

Nú er kominn fram nýr Billi í póltíkinni. Hann heitir Guðmundur Steingrímsson og virðist ætla að toppa gamla Billa í vísundadrápi. Nema Guðmundur drepur af sér flokka og kjósendur þeirra á vinstri vængnum sem enn ganga á hugsjónagresjunum göfugu. Og up rísa nýir kjósendur eins og Einherjar í Valhöll þegar þeir hafa drepið af sér mótstöðumenn í gamni og skemmtilegheitum.

Guðmundur er búinn að skilja Samfylkinguna eftir flegna á blóðvellinum, og Framsóknarflokkinn að minnsta kosti haussviðinn sem hélt að hann ætti alla þessa góðu flokksætt trygga. Og nú ætlar Guðmundur að stíga inn í villta vinstrið með enn einn flokkinn okkur til bjargar. Þó að ekki hafi enn fundist nafn á sýningna er þegar búið að ráða í sýningarstjóraembættin en í þeim verða Guðmundur og Heiða Ríó-Helgadóttir. Stefnuskráin og nafnið á flokknum kemur svo síðar.

En allir sem eitthvað fylgjast með pólitík vita fyrir hvað Guðmundur stemdur eftir áralanga hugsjónabaráttur hans. Enda hefur hann verið óþreytndi að kynna kjósendum sinum hugsanir sínar á umliðnum árum í ótal blaðagreinum og fjölmiðlauppákomum auk þess sem hann leikur listavel á hljóðfæri. Heiða mun svo væntanlega sjá um það sem útaf stendur.

Vinstri menn almennt virðast ekki getað tollað lengi saman í aðeins tveimur hlutum, sem hétu Alþýðuflokkur og Alþýðubandalagið þegar Kommúnistaflokkurinn var búin nað myndbreytast næst síðast.
Eftir var að að stofna

Bandalag jafnaðarmanna
Samtök um kvennalista
Samtök um jafnrétti og félagshyggju
Þjóðvaka, hreyfingu fólksins
Hreyfinguna
Samfylkinguna
Vinstrihreyfinguna - grænt framboð
Þjóðvarnaflokkinn Frjálsa þjóð,
Samtök frjálslyndra og vinstri manna(hvernig sem menn geta séð samhengi þar á milli)

Allt er þetta auðvitað af því að jafnaðarmenn eru svo jafnir að þeir geta ekki staðið hlið við hlið frekar en svínin í sögu Orvells. Allt sameinast svo í því sem afi Guðmundar sagði og faðir hans gerði að sínum: "Allt er betra en Íhaldið".

Svo á að vera gaman í þessum nýja flokki, annars hættir hún Heiða. Hvað þarf að ganga á til að Guðmundur hætti er ekki gefið upp fyrirfram enda á það ávallt að koma á óvart svo það sé þá skemmtilegt eins og dæmin sanna.

Aðalatriðið að þetta á að vera skemmtilegt segir hún Heiða.

Athugasemdir

[Sigurður Alfreð Herlufsen, 10.12.2011 kl. 22:21]

Jæja Halldór, nú færðu Nóbelinn fyrir þennan pistil !

Einhvern veginn hef ég á tilfinningunni að þú hafir misst niður einn eða fleiri flokka í þinni ágætu upptalningu !

Það er auðvitað aukaatriði.

Aðalatriðið er sú staðreynd hvað jafnaðarmönnum gengur illa að fóta sig saman í einni stórri heild.

Kannski er það vegna þess að þá yrði að umbera töluvert frjálslyndi í bland með pólitíkinni, og þá er þetta allt komið í hring, þannig að farið er að snerta stóra flokkinn á hægri vængnum !

Það gengur auðvitað ekki, því þá er ekki lengur hægt að sverja af sér "íhaldið", eða þetta meinta frjálslyndi frá hægri.

Meinið er nefnilega það að ekki er hægt að halda saman pólitískum flokki án þess að hann hafa í sér samnefnara stjórnmálanna, sem einmitt er frjálslyndið, ef hann á að höfða til fjöldans.

[Rafn Haraldur Sigurðsson (IP-tala skráð) 10.12.2011 kl. 22:23]

Buffalo Bill, Buffalo Bill.
Never missed and never will;
Always aims and shoots to kill.
And the company pays his buffalo bill.

Í Wyoming er bær sem telur um 8000 manns sem ber nafnið Cody í höfuðið á  William Frederic Cody öðru nafni Buffaló Bill sem hafði lifibrauð sitt af því að veiða vísunda fyrir járnbrautaverkamenn og svo náttúrulega showið sitt.  En samkvæmt þessu hér er hann Húgenotti af frönskum ættum en fæddur í  kofa vestur af Mississippi

[Sigurður Þorsteinsson, 11.12.2011 kl. 05:45]

Það er hrein unun að lesa svona blogg í morgunsárið. Styð tilnefninguna í Nóbelinn.

[Halldór Jónsson, 11.12.2011 kl. 10:42]

Takk fyrir innlitið allir og alltaf þykir manni lofið gott.

Rafn,

Ég held að ég hafi trúað þessu síðan ég las held ég Alþýðubókina eftir Kiljan. Nú á ég þessa bók ekki lengur en kannski getur einhver flett þessu upp. En Kiljan er í Ameríku einhverntímann 1925 þannig að hann hefur þá hitt einhvern annan mann eða impostor frá originalnum.

[Halldór Jónsson, 11.12.2011 kl. 21:07]

Rafn Haraldur

Bestu þakkir fyrir að senda þessa tengla inn á Bufalo Bill Cody og setja minn kúrs réttan í honum. Þetta hefur verið mikilmenni, fæddur fjórum árum á undan langafa mínum Jóni Ólafssyni f.1950 og dáinn ári á eftir honum 1916. Kiljan hefur greinilega ekki hitt hann Bill sjálfan. En þvílíkt safn er þarna í Cody og margt að skoða.