Er þetta í lagi ?

spurðu menn sig um Jónas frá Hriflu þegar mönnum blöskraði framganga hans á árum áður.En Jónas bar þá ægishjálm fyrir allt stjórnmálalíf í landinu og engu ráði var ráðið nema hann kæmi þar að. Það fór geðlæknir heim til hans til að athuga hvort maðurinn væri hugsanlega búinn að ofkeyra sig. Auðvitað var geðlæknirinn úrskurðaður pólitískur flugumaður og rekinn og Jónas hélt áfram eins og ekkert hefði í skorist. En smátt og smátt einangraðist Jónas samt og menn fóru að sjá að maðurinn var varla einhamur í atferli sínu. Ekki vantaði þó sannfæringarkraftinn hjá Jónasi og trúna á eigið ágæti og allir sáu að hann lagði fram mikið starf. En stefna hans og hugmyndir voru bara ekki í lagi til lengri tíma litið.

Steingrímur J. Sigfússon var spurður um það í útvarpsþætti hvort hann ætlaði að hætta í stjórnmálum á einhverjum tíma. Hann sagði að það gæti hugsanlega komið að því. En ekki eins og á stæði, hans væri enn þörf til að leiða þjóðina út úr kreppunni. Helst virtist skoðun hans á sjálfum sér og mikilvægi sínu minna á söguna af Móses sem þurfti að leiða þjóð sína útúr eyðimörkinni.Því verki yrði hann að ljúka því það gætu það ekki aðrir.Er þetta ofmat á eigin ágæti eins og hjá Jónasi frá Hriflu?

Jón Valur Jensson skrifar um Icesave í Morgunblaðið á laugardaginn var. Þar bendir Jón á það,að 1. október s.l. hefðu 110 milljarðar verið fallnir á ríkissjóð Íslands í VÖXTUM einum, án afborgana, hefði verið staðið við Iceave I eða Svavarssamninginn sem Steingrímur var búinn að undirrita. Hvaðan hefðu sá peningur komið? Hvað var hægt að láta vera að greiða úr ríkissjóði umfram þær greiðslur úr ríkissjóði sem Steingrímur nú telur sér til tekna að hafa komið í veg fyrir og kallar hagræðingu? Svo sem niðurskurð í heilbrigðiskerfinu, lokun sjúkradeilda og lækkun bóta?

Ætla fjölmiðlar að taka undir með Steingrími að hann sé búinn að vinna stórvirki í endurreisn landsins? Hér sé allt að lagast, hagvöxtur að hefjast og landið að rísa? Á sama tíma sem met-landflótti er brostinn á? Útflutningshraði fólksins okkar hefur aukist um 40 % þegar hagvöxturinn er hafinn? Nú fara 7 manns úr landi dag hvern í stað 5 áður.Og æ fleiri hyggja á brottflutning samkvæmt traustum fréttum RÚV ? Vaxandi fjöldi fólks sér að þetta er ekki í lagi. Ríkisstjórnin hangir saman á Evrópubandalagsumsókninni, skattlagningarhagfræðinni og stóriðjufælninni. Fjárfestingar í atvinnulífinu fara ekki á stað við þessar aðstæður.

Steingrímur segir líka á öðrum stað að nauðsynlegt sé að halda ákærunni á Geir Haarde fyrir Landsdómi til streitu. Steingrímur er einn af forgöngumönnunum fyrir því að Geir var ákærður. Samt er talið að Neyðarlögin sem Geir flutti fram en Steingrímur stóð ekki að, hafi bjargað þjóðinni frá verra. Hver verður hans eigin hlutur þegar upp verður staðið? Mun einhver nenna að draga hann til ábyrgðar fyrir bankabraskið og Sjóvármálið svo eitthvað sé nefnt ?

Er það í lagi að skattleggja lífeyrisgreiðslur framtíðarinnar til að niðurgreiða vextakostnað almenning sem ríkisstjórnin ákveður sjálf að mestu leyti? Ríkisstjórnin stjórnar Seðlabankanum og réði Seðlabankastjórann. Hversvegna þarf ríkisstjórn að greiða niður vaxtastig sem hún stjórnar sjálf?

Einhver kynni að spyrja sig hvort þessi Steingrímur sé heppilegur til að leiða þjóðina áfram? Ég kem ekki auga á að svo sé. Hvað sem hann sjálfur segir um árangur sinn þá er hagvaxtarspá hans á hæpnum rökum reist og nýsamþykkt fjárlög hans með fæðingargalla þar sem útgjaldaliðir og tekjuliðir eru van- og ofáætlaðir. En hann virðist trúa blint á eigið ágæti og ekki afast eitt augnablik að hann viti einn alla hluti. Svona rétt eins eins og var með Jónas frá Hriflu.

Ríkisstjórnin virðist lifa í þeim heimi að þjóðin hafi yrfirþyrmandi áhuga á ráðherraköplum hennar og jafnvel stjórnarskrárbreytingum og inngöngu í ESB. Það er alls ekki svo að fólk beri afgerandi meira traust til Steingríms eða Jóhönnu en til dæmis Jóns Bjarnasonar? Fátt bendir í raun til þess að svo sé.

Eitt má telja nokkuð víst að þetta Alþingi sem heldur þessari ríkisstjórn á lífi með baktryggingu hinnar nýju stjórnmálastjörnu Guðmundar Steingrímssaonar er í minnkandi áliti meðal fólks. Það trúir ekki að að þingið muni koma sér saman um raunhæfar leiðir. Það sé ekki lengur traustsins vert? Ríkisstjórnin á líklega vísan stuðning Hreyfingarinnar ef í harðbakkann slær. Óvíst er hvort Hreyfingin á afturkvæmt á Alþingi í nýjum kosningum og að ógleymdum launaða listamanninum? Þetta fólk kærir sig ekki um kosningar og því situr þessi stjórn og situr.

Þessi staða er þjóðinni ekki til framdráttar og tefur fyrir að batinn komi. Er ekki fullreynt að úrræði Steingríms í efnahagslífinu sem eru skattar á skatta ofan eru ekki í lagi og leiða ekki til neins nema meiri þrenginga og meiri landflótta? Er það ekki nægur vitnisburður um ríkisstjórnina að fólkið greiðir atvkæði með fótunum?

Eða er stjórnarandstaðan svona hræðileg að þetta sé bara í lagi þessvegna? Hún bjóði ekki uppá neitt? Þessu virðast stjórnarsinnar trúa og hafa yfir oft á dag.

En geta menn haldið þessu fram eftir að Sjálfstæðisflokkurinn hefur lagt fram ítarlegar efnahagstillögur sínar og síðan lagt fram heildarstefnu eftir landsfund sinn? Hvað kostar það þjóðina að halda áfram á núverandi helvegi í tvö ár í viðbót í stað þess að gefa uppá nýtt? Fyrir eigin upphefð eru menn tilbúnir að fórna öllu öðru. Það er þetta sem verðfellir stjórnmálin í huga fólksins. Þegar við blasir að árangur er ekki að nást þá er bara hangið og hangið.

Þetta er ekki í lagi.

Er það kannski ekki í lagi að hugsa svona?

Athugasemdir

[Agla, 12.12.2011 kl. 15:49]

Hugsanlega misskil ég færsluna en mér finnst þetta afskaplega óvandaður málaflutningur hjá þér.

Mér finnst þú vera að bera brigður á andlegt heilbrigði eins af samborgurum okkar af því að þú sért ýmsum gerðum og ákvörðunum hans ósammála og þú virðist telja máli þínu helst til stuðnings að "hann var sagður hafa ráðist á þennan sama Geir í þinginu og barið hann bókstaflega við annað tækifæri".!

Mér er líka illskiljanlegt hversvegna þú blandar "geðrannsókninni" á Jónasi frá Hriflu inn þessa færslu þína.

[Agla, 12.12.2011 kl. 21:15]

Ofanskráð athugasemd mín varð gerð  kl. 15.49 við upprunalegu færsluna  þína sem birt var kl. 13.22.

Kl. 19.22  var upprunalegu færslunni breytt  verulega og úr henni voru m.a. fjarlægð þau orð sem ég vitnaði í í athugasemd minni hér að ofan:

"hann var sagður hafa ráðist á þennan sama Geir í þinginu og barið hann bókstaflega við annað tækifæri" .

Vegna þeirra breytinga sem þú hefur gert á þinni upprunalegu færslu undir þessari fyrirsögn, án þess að svara  birtri athugasemd minni við henni, finnst mér eðlilegt að þú eyðir  án tafar ofanskráðri athugasemd við upprunalegu færsluna  ásamt þessari athugasemd.  

[Halldór Jónsson, 12.12.2011 kl. 22:59]

éG KANN EKKI AÐ EYÐA ATHUGASEMDUM, EF ÞAÐ ER ÞÁ HÆGT