Vegarykið

sem var á öllum vegum landsins í gamla daga hefur minnkað með tilkomu olíumalarinnar á flestum vegum út um landið. Ýmsir fáfarnir vegir hafa fengið slitlag meðan aðrir bíða. Hvaða lögmál ræður geta menn dundað við að skýra, en líklega hefur þingmannadugnaður og atkvæðamisvægið eitthvað að segja.

Ég bý að hluta við Bræðratunguveg frá gömlu Tungufljótsbrú að nýja Flúðaveginum. Þessi spotti er mikið keyrður og hvenær sem er þurrt þá stíga rykmekkrinir til himins eins og í gamla daga og leggja sig yfir ferðamannaáninguna við Faxa.

Ég leitaði svara hjá Vegagerðinni hvort þetta gæti borgað sig að sjá allan ofaníburðinn hreinsast af veginum með þessum hætti þegar þurrt er og þegar rignir kemur þvottabretti svo hart að rútur geta ekki keyrt veginn. Ég gæti alveg verið rólegur var svarið, þetta hefur ekkert að gera með skynsemi. Peningaleysið og niðurskurðurinn væri orsökin

Ég fékk þær upplýsingar að þessi spotti minn yrði líkast til ekki lagfærður á minni lífstíð. Slíkt væri peningaleysið og niðurskurðurinn. Voila.

Rykbinding var mér sagt kostar 3 tonn af salti á kílómetrann og svo vinnan til viðbótar. Þó endingin sé varla nema 1-2 mánuðir, þá væri þetta þó skárra yfir blásumarið á þessum stað.Kostnaður yrði kannski hálfmilljón á kílómetrann yfir sumarið. Heflun og stöðugur ofaníburður á þenna veg hlýtur að kosta talsvert á hverju ári sem kæmi til móts við þetta.

Alvöru Klæðning á vegi kostar hinsvegar 10 sinnum meira. En dugir þá mörg ár væntanlega og kostar 5-6 milljónir á kílómetrann.

Ættu Íslendingar ekki að setja skyldubúnað í alla bíla sem skuldfæra fyrir aðgang að öllum jarðgöngum landsins þegar þau eru keyrð? Þá má leggja niður hliðið í Hvalfjarðargöngum og rukka fyrir Héðinsfjarðargöng, Vestfjarðargöng, Norðfjarðargöng, Vaðlaheiðargöng. Sáraeinfaldur og ódýr búnaður eins og SunPass í Ameríku skuldfærir smáupphæð fyrir hverja notkun á Visakortið. Í staðinn fá menn vegabætur og jarðgöng fyrr en ella.

Af hverju má þá ekki reyna eitthvað nýtt? SunPass kerfið getur meira að segja hleypt tilteknum Framsóknarmönnum og öðrum minnihlutahópum í útrýmingarhættu gratís í gegn ef menn telja það nauðsynlegt. En "Grimsby-lýðurinn" verði látinn borga eins og fyrri dagnn og standa undir framkvæmdunum.

Annars hafa menn bara vegarykið áfram.

Athugasemdir

[Þórhallur Birgir Jósepsson, 4.5.2012 kl. 08:49]

"Ég gæti alveg verið rólegur var svarið, þetta hefur ekkert að gera með skynsemi. Peningaleysið og niðurskurðurinn væri orsökin "

Þetta getur ekki staðist hjá blessaðri Vegagerðinni, því ástandið var engu skárra á meðan nóg var til af peningunum. Þarna veldur eitthvað annað.

[Gunnar Heiðarsson, 4.5.2012 kl. 12:45]

Ég leyfi mér að efast um að það sé tíu sinnum dýrara að leggja olíumöl á þennan veg, en að rykbinda hann og halda við svo sómi sé að. Hugsanlega er þó hægt að fá þennan mun með því að trassa verulega viðhaldið.

Eftir því sem mig mynnir, þá er þessi vegur sem þú nefnir uppbyggður og í raun tilbúinn til slitlags. Því ætti ekki að þurfa mikla undirvinnu. einungis afréttingu og slitlagið þar ofaná.

Þá gleimist oft það tjón bílar verða fyrir á malarvegum. Það er mikill kostnaður, sem að vísu fellur sjaldnast á vegagerðina.

[Halldór Jónsson, 4.5.2012 kl. 18:56]

Þórhallur,

Hefur ekki alltaf vantað pening hjá Vegagerðinni? Verkefnavalið var nú oft í gamla daga talið litað af pólitík, einn þingmaður var duglegur í Borgarfirðinum og það var byggð stór steinsteypubrú yfir Norðurá heim að atkvæðinu hans,"Og helvítis maðurinn gerði mér það að flytja barta yfir brúna þegar hún var komin" sagði þingmaðurinn í hreinskilni sinni.

Gunnar, ég veit ekki betri tölur en þetta, 5000 kall metrinn á 7.5 m. veg fyrir bundið slitlag. En hvað segirðu um mínar tillögur um SunPass kerfi í alla bíla og svo gjaldfærist á þeim stöðum þar sem gjald er sett. Ekkert vesen. Brotamenn á óskoðuðum bílum eða með lokuð kort vegna vanskila eru bara myndaðir og rukkaðir.

Malarvegirnir eru hroðalegar afturgöngur frá því í gamla daga. Þeir eiga hvergi að vera til. Það er rétt hjá þér, þegar allt er reiknað þá verðaur allt dýrara.

[Gunnar Heiðarsson, 5.5.2012 kl. 09:29]

Almennt séð er ég á móti vegtollum, tel við greiða meira en nóg gegnum gjöld af eldsneyti.

Vegtollar eru þó ekki óþekktir á Íslandi, eins og við vitum. Þar er þó um að ræða einkaframkvæmdir sem eiga að borga sig upp. Óréttlætið við t.d. Hvalfjarðargöngin er að ekki skuli koma til frádráttar sá mikli kostnaður sem ríkið hefur sparað vegna viðhalds vegarins um Hvalfjörð. Sú stærð átti vissulega að koma sem lækkun kostnaðar við byggingu gangnanna, jafnvel þó þau væru byggð af einkaaðilum. Þá er einnig órétlæti að meðan maður ekur þessa rúma fimm km. sem göngin eru, þá greiðir maður tvöfaldann skatt, annars vegar til Spalar og hins vegar til ríkissins gegnum eldsneytisgjöld.

Eins og ég segi þá er ég almennt séð á móti veggjöldum. Það er þó ekki svo að ekki sé hægt að réttlæta slík gjöld, þegar um einkaframkvæmd er að ræða, þá á ég við ekta einkaframkvæmd, ekki gerfi einkaframkvæmd eins og ætlað er með Vaðlaheiðagöng.

En það þarf að fara varleg í allar kerfisbreytingar og frumskilyrði að önnur gjöld lækki á móti. Þessi leið gæti fljótt undið utaná sig og nægir að hugsa til þess ef sá fjármálaráðherra sem hér var við völd frá febrúar 2009 til síðustu áramóta, hefði haft svona skattstofn. Hann hefði sannarlega nýtt sér hann!!

Kosturinn við eldsneytisgjöld er að hver borgar til samfélagsins eftir akstri og hvernig ökutæki hann velur sér. SunPass kerfið getur þjónað á sama hátt og hefur að auki ýmsa kosti. En öll tækni er þó þeim annmarka háð að einhver getur komist framhjá henni.

Í dag eru þessi eldsneytisgjöld svo há að vegagerðin ætti ekki að skorta fé. Vandinn er að vegagerðin fær bara ekki þetta fjármagn, það er notað til annara verkefna. Það er ekkert sem segir að gjöld innheimt með öðrum hætti skili sér betur til þess er þau eru ætluð.

Þá má ekki gleyma þeirri staðreynd að virðisauki er lagður á þá skatta sem eru inn í verði eldsneytis. Að leggja skatt á skatt er auðvitað siðleysi.

Skattlagning er alltaf vandmeðfarin. Sumir, einkum þeir sem eru á vinstri væng stjórnmála, er gjarnir á að misnota þá. Það er þó ekkert að því að greiða skatta fyrir það sem maður notar, vandinn er að sá skattur er gjarnan nýttur til einhvers allt annars. Flóknir skatar eru sýnu verri og eftir því sem skattstofnum fjölgar, verður misnotkun ríkisvaldsins auðveldari.

SunPass kerfið er notað sumstaðar erlendis og í raun ekkert sem mælir gegn því að taka það upp hér. En ekki sem viðbót, heldur í staðinn fyrir eldsneytisgjöld. Það hefur þann kost að hægt væri að hafa mismunandi gjöld eftir því hvar ekið er. T.d. væri gjaldið hæst þegar ekið væri um dýr jarðgöng en félli alveg niður þegar ekið er eftir malarvegum. Þetta myndi virka sem hvati á stjórnvöld að útrýma malarvegum og bæta vegakerfið. Það væri vissulega hægt að nýta þetta kerfi á margan hátt og það myndi útrýma þörf fyrir litað og ólitað eldsneyti og það svindl sem það býður upp á.

Ég er því ekkert á móti SunPass kerfinu, en alfarið á móti því að það yrði tekið upp sem viðbót á það sem fyrir er.

Kveðja

[Halldór Jónsson, 5.5.2012 kl. 15:14]

Margt mælir þú þekkingu og viti Gunnar.

Ástæða þess að ég velti fyrir mér SunPass er að með því gætum við fengið ýmsar framkvæmdir fyrr og notið þeirra hérna megin grafar. Ég var ekki endilega að hugsa þetta sem viðbót fyrir þá skatta sem fyrir eru. En hætt er við að svona maður eins og Steingrímur J. myndi ráðast til atlögu við okkur ef hann fengi færi á því og þar með yrði kerfið að nýju kúgunartæki.

En hugmyndir þínar eru nýjar fyrir mér og koma fyllilega til skoðunar með mismunandi gjöld eftir því hvar ekið væri. Eiginlega bráðsnjallt hjá þér.