Nálægðarsamfélagið

í pólitíkinni á Íslandi er sérstakt. Við þekkjum ráðamennina marga persónulega. Fólk heilsast á götu eins og aldavinir. Jafnframt er er engu gleymt. Gömul fyllerí og framhjáhöld gleymast aldrei. Náunginn er stimplaður ævilangt.Pískrað á bak við hann.

Það er víst þessvegna að það er basl hjá Gulla þetta með trúverðuleikann í pólitíkinni. Hann var of duglegur við að safna fé. Fé frá útrásarvíkingum sem öllu réðu í Den en er eitrað og er aðeins notað í illum tilgangi. Sem er skaði því strákurinn er svo fjandi góður, duglegur(munið ráðherradóminn) og sjarmerandi að það er vont ef að kraftar hans verða eyðilagðir og tapast þjóðinni þegar stöðugt er verið að harpa á þessu atriði en ekki spurt hvað Gulli vilji gera í dag? Er þá ómögulegt fyrir Gulla að byrja aftur. Á hann að vera brennimerktur um alla eilífð? Og Sjálfstæðisflokkurinn líka af því að Gulli safnaði líka fyrir flokkinn? Er ómögulegt fyrir Illuga að losna við sjóð 9? Ómögulegt fyrir Þorgerði að losna við kúlulánin? Bjarna við Vafninginn? Óla Björn við slaginn á Austurvelli? Björn Val við gamalt fallít. Ásbjörn við arðinn? Þráinn við listamannalaunin? Árna við áfallið? Og svo framvegis.

Það getur vel verið að niðurrifsöflunum takist að eyðileggja þetta fólk allt saman. Uppreisn æru virðist ekki vera til á Íslandi í nálægðarsamfélaginu. Við getum þá ragað út allt fólk sem einhverntíman hefur gert eitthvað annað en vera hvítasunnufólk. .En hvað fáum við þá í staðinn? Steingrím snjalla, heilaga Jóhönnu, Magnús Orra,Líney Rafneyju, Guðmund Steingríms,Lilju Mós, Guðbjart Hannesson, Elínu Hirst, eða hvaða óskrifuð blöð sem eru.

Þetta er eins og íslenskt gjaldþrot. Það er engin leið upp aftur á Íslandi. Þú ert brennimerktur til æviloka og eltur út yfir gröf og dauða af skattyfirvöldum. Þú sleppur aldrei, kennitalan er ónýt. Þú átt þér ekki viðreisnarvon. Það er ekkert hreint borð til fyrir þig. Það er best fyrir þig að hverfa og flytja til útlanda.

Það er ókosturinn við nálægðarsamfélagið. En það gefur líka tækifæri sem fólk á að nýta til að vera hreinskilið og hætta að þykjast vera yfir náungann hafið og breyskleika hans.Reyna að vera umburðarlynd og leita að hinu jákvæða í nálægðinni.

Athugasemdir

[Heimir Lárusson Fjeldsted, 26.9.2012 kl. 15:38]

Góð pæling.

[Halldór Jónsson, 26.9.2012 kl. 18:04]

Takk fyrir það Heimir. Fjarlægðin gerir fjöllin blá og mennina mikla segir rmáltækið. Kiljan segir held ég einhvursstaðar: Nálægðin var þess húss sannur óvinur.

Fjarska-fallegt er líka notað sem hugtak

[Ómar Bjarki Smárason, 27.9.2012 kl. 00:17]

Það er og verður alltaf erfitt að treysta stjórnmálamönnum sem staðnir hafa verið að því að skara eld að eigin köku nokkuð óhóflega. Og þá er sama hvort það hefur verið gert í eigin þágu eða í umboði "ættarinnar".

Og af hverju ætli að spillingarmálin séu að koma upp eitt af öðru, nema einmitt því að eftirlitsstofnanir, ráðherrar og embættismenn eru bara ekki að vinna vinnuna sína fyrir þjóðina heldur eingöngu að finna leiðir til þeirra kaka bakist nú aðeins hraðar og betur en okkar hinna. 

Er ekki mál til komið að það verði farið að taka til í kerfinu, hversu sárt sem þér nú þykir að "gömlu syndaselirnir" hverfi e.t.v. af sjónarsviði stjórnmálanna, a.m.k. tímabundið. Hverjir það verða kemur væntanlega í ljós í prófkjörum og svo eftir kosningarnar í vor....