Hver er boðskapur Framsóknar?

spyr maður sig eftir lestur fréttar frá næstum því formanni flokksins. 

 

Þingmaður Höskuldur Þór Þórhallsson þingmaður Framsóknar. 

 

..."Ég hef nú sagt á einhverjum fundum að við eigum að vera opnir fyrir vinstra samstarfi en um leið eigum við ekki að útiloka eitt eða neitt,« segir Höskuldur Þórhallsson, þingmaður Framsóknarflokksins, aðspurður út í ummæli sem hann lét falla á kosningafundi á Grenivík á dögunum þess efnis að Framsóknarflokkurinn ætti að vera opinn fyrir samstarfi á vinstri vængnum. »Ég held að það sé einstakt tækifæri til þess að mynda miðju- og velferðarstjórn.«

 

Halda öllu opnu

 

Höskuldur bendir á að það sem skipti öllu máli sé að Framsóknarflokkurinn starfi með fólki sem er reiðubúið til að stíga þau skref sem flokkurinn hefur lagt áherslu á í kosningabaráttu sinni. »En hvort sem það er til vinstri, á miðjunni eða til hægri, það verður bara að koma í ljós eftir kosningar,« bætir Höskuldur við. Aðspurður hvort þetta sé einungis hans afstaða eða opinber afstaða flokksins segir Höskuldur þetta vera sína afstöðu. »Afstaða formannsins hefur verið, og ég styð það, að halda öllu opnu og vilja ræða við þá sem treysta sér í verkefnin framundan,« segir Höskuldur."

Á heimasíðu flokksins er þessi skilgreining:

"Framsóknarflokkurinn er frjálslyndur félagshyggjuflokkur sem vinnur að stöðugum umbótum á samfélaginu og lausn sameiginlegra viðfangsefna þjóðfélagsins á grunni samvinnu og jafnaðar. Hann stendur vörð um stjórnarfarslegt, efnahagslegt og menningarlegt sjálfstæði Íslendinga, byggt á lýðræði, þingræði og réttaröryggi. Framsóknarstefnan setur manninn og velferð hans í öndvegi. "

Sterk staða Framsóknarflokksins hefur  löngum byggst á misvægi atkvæða. Þeirra sterkustu vígi er fámenn kjördæmi með mikið vægi.

Félagshyggja er rauður þráður í stefnu flokksins. Fyrri forystumenn höfðu gjarnan yfir máltækið:"Allt er betra en íhaldið"  Þetta réði löngum  afstöðu flokksins við stjórnarmyndanir og sögðu að hjarta flokksins slægi ávallt til vinstri. Samvinnuhreyfinigin var hið mikla lím sem flokkurinn byggðist á. Á því byggðist fjármálaveldi flokksins sem nú er sagan ein.

Opið í báða enda og segjum bæði JÁ JÁ og NEI NEI. Man einhver eftir þeim árum Framsóknar?  Ólafur Jóhannesson var árum saman foringi Framsóknar. Hann hleypti verðbólgudraugnum lausum árið 1971 með því að hækka öll laun í landinu um 20 % með taxtahækkunum og styttingu vinnuvikunnar.

Þeir Sjálfstæðismenn sem ætla að kjósa Framsóknarflokkinn að þessu sinni hafa sjálfsagt gert þennan möguleika upp við sig. Er vinstri stjórn svipuð þeirri núverandi þeirra óskastjórn? 

Er Framsóknarflokkurinn heill í því að ganga ekki í ESB? Á hann ef til vill auðveldara með að ná sameiginlegum fleti við Samfylkinguna í því máli en Sjálfstæðisflokkurinn? Framsóknarflokkurinn er um margt traustur flokkur góðra manna sem sækja vinsældir langt út fyrir flokksgirðingar. Þeim fannst  hugsanlega að þeir ættu undir högg að sækja í stjórn með aðild Davíðs sem er litríkur persónuleiki.  Sjálfstæðisflokkurinn sjálfur ætti hugsanlega auðveldara með að semja um málefni við Framsóknarflokkinn en ýmsa aðra flokka sem munu verða á þingi. Tilhugsunin um aðra vinstristjórn í líkingu við það sem enn situr er hinsvegar nokkuð hrollvekjandi fyrir marga Sjálfstæðismenn. En greinilega ekki alla. Ekki er líklegt að slík stjórn sitji út kjörtímabilið að fenginni fyrri reynslu af vinstristjórnum Framsóknarflokksins.

En allir ganga óbundnir til kosninga eins og þeir segja. Því verða kjósendur glöggt að hlusta og reyna að túlka boðskapinn sem út gengur frá áhrifamönnum flokkanna. 

Athugasemdir

[Samstaða þjóðar, 15.4.2013 kl. 16:56]

Það er með ólíkindum að þingmaður Framsóknar skuli tala um samstarf við leifarnar af ríkisstjórn Jóhönnu Sigurðardóttur. Ég þykist viss um að Framsóknarflokkur muni klofna í þrjá hluta ef það verður gert, eins og orðið hafa örlög annara flokka sem snerta hið eitraða peð – Samfylkinguna.

Þegar við metum þessi ummæli Þórhalls, verðum við að hafa í huga neyðarlega stöðu hans eftir formannskjörið 2009, þegar hann tapaði fyrir Sigmundi Davíð. Þeir tókust einnig á um fyrsta sæti framboðslistans í Norð-austur kjördæmi, fyrir komandi kosningar.

Getur verið að Sjálfstæðisflokkur hafi séð að sér og hætt að gera ómálefnaleg hróp að Framsókn? Við þurfum á báðum flokkum að halda í nærstu ríkisstjórn og gleyma hroðanum sem er að hrökklast frá völdum við auman orðstír. Hvor flokkanna fær fleiri atkvæði er minni háttar, miðað við mikilvægi þess að þeir taki höndum saman og hefji kraftmikla endurreisn.

Loftur Altice Þorsteinsson.

 

 

[Halldór Jónsson, 15.4.2013 kl. 21:39]

Já Kollege Loftur

ég verð nú að segja með þér að ekki er það lystugt slátrið af stjórninni. Ekki er víst meða kærleikana á milli prúðuleikaranna.