Beint lýðræði

er hugtak sem ýmsir lukkuriddarar í íslenskri pólitík hafa talað um hástöfum án þess að færa rök fyrir ágæti þess sérstaklega. Dæmi um beint lýðræði er kunnugt úr sögunni, þegar lýðurinn hrópaði "Krossfestið hann en gef oss Barrabas lauan!"

Aþeningar reyndu ýmislegt í lýðræðistilraunum. Þeir beittu hlutkesti við val í ríkisstjórn. Þar var gengið út frá því að allir menn væru jafnir og því jafnhæfir til að stjórna. Síðan komust menn til valda í kosningum eftir þvi hversu vel þeir töluðu svipað og nú.  Perikles sem varð þeirra farsælastur dó í plágunni 429 Fkr. og eftir hann komst Kleón sútari til valda sem kjaftaði sig upp í æðstu stöður sem stríðsæsingamaður. Hann hefur fengið misjafna dóma í sögunni karlinn sá vegna óraunsæs alþýðusnobbs sem endaði með því að hann féll með fulllum heiðri í styrjöld við Spörtu ásamt með Brasidas Spörtuforingja. Eftir það var fyrst hægt að semja frið þar sem hann hafði verið öðrum mönnum þverari.  Það gafst því ekki vel þá frekar en á síðustu öld að fela óbreyttum bæheimskum dáta  yfirstjórn herveldis svo sem ráða má af ummælum Hindenburgs um Hitler.

Fulltrúalýðræðið virðist hafa sannað sig til að vera það skársta stjórnarform sem völ er á. "Fólk er fífl" er haft eftir virtum manni úr viðskiptalífinu. Og víst er fólkið almennt yfirleitt ekki með þær upplýsingar handbærar til að geta tekið upplýstar ákvarðanir um öll mál. Þessvegna er alveg fráleitt að láta fólkið bæði greiða atkvæði um skatta sína og útgjöld ríkisins eins og dæmin frá Californiu er sögð sanna. Hinsvegar hafa áhrif hávaðans eins verið dýrkeypt frá dögum Kleóns til þessa dags. Íslensk pólitík er til marks um það hversu heimskir gikkir geta hossast hátt til áhrifa þjóðinni til sárrar bölvunar.

Það var því sem betur fer engin von til þess að Ólafur Forseti myndi láta þetta hávaðalið með undirskriftirnar trufla sig með veiðigjaldsfrumvarpið. Icesave var allt annað málefni, sem fór góðu heilli til þjóðarinnar.

Það væri óskandi að við þessi í þjóðinni fengjum að greiða atkvæði um inngöngu í ESB og jafnvel áframhald EES svo við gætum lokið þeim leiðindamálum einhvern tímann.

Að slepptu þessu óþarfa tali um beina lýðræðið sýnist manni fátt standa eftir af þessum tillögum stjórnlagaráðs em prófessor Þorvaldur Gylfason var svo andsetinn af að hann stofnaði stjórnmálaflokk þeim til framgangs. Af þeim flokki fréttist nú lítt sem ekki. Núverandi stjórnarskrá sýnist því alveg vera nægjanleg fyrir Íslendinga.

Það sem helst skortir er að þjóðin leiti skynseminnar í stað æsinganna yfir aukatriðum. Það er það beina lýðræði sem best myndi duga.

Athugasemdir

[Sigurður Þórðarson, 16.7.2013 kl. 11:32]

Það voru farisear og fræðimenn sem heimtuðu dauðadóm og smöluðu saman einhverjum æsingamönnum á Austurvöll þess tíma. Lýðnum hefur oft verið kennt um axarsköft farisea og fræðimanna síðan þá og jafnvel fyrr.

[Sigurður Þórðarson, 16.7.2013 kl. 11:46]

Lýðurinn var aldrei spurður um aðildarumsóknarferlið. Þvert á móti var möndlað um að menn svikju kosningaloforð til að komast í ríkisstjórn. Best og heiðarlegast er því að blása þetta ESB undirmál af með því að fresta öllum viðræðum um ótiltekinn tíma eins og núverandi stjórnvöld hafa réttilega gert. Viðræður ætti ekki að hefja aftur fyrr en samningsmarkmið og þjóðarvilji liggur fyrir.  Langt er í það og mörg brýnni verkefni liggja fyrir.