Fiskistofa flutt

til Akureyrar sisona. Ekki af því að hún sé ekki nógu flott með áttatíu starfsmenn í Hafnarfirði og gríðarlega flott vefsetur og kosti gríðarlegar upphæðir. Nei hún á að flytja vegna stjórnarsáttmálans  sem vill dreifa stjórnsýslunni um landið án þess að sérstakar hagkvæmni ástæður liggi að baki. 

 

 

Hvar þetta apparat er í ríkisbákninu sést af skipuritinu. Þarna er búið að búa til þrjú samsíða apparöt sem heyra undir eitt ráðuneyti með tengingu í annað. Til hvers er þetta svona?

Matvælastofnun er eitthvað sem mig grunar að fáir viti til hvers er eða hvað hún geri. Allir vita um Hafró sem er í mismiklu áliti þar sem mörgum finnst hún starfa mest í þágu stórútgerðarinnar til að stýra  kvótanum. En hann er að hluta til erfðagóss  útvaldra hópa sem hefur ákveðið gangverð sem aftur má ekki lækka vegna veðhagsmuna fjármálakerfisins.

Aðvífandi stjórnarherra frá Mars  myndi  líklega umsvifalaust sameina alla þrjá kassana undir ráðuneytinu og spara tvo forstjóra, jeppa,  skiptiborð, starfsmannafélög og húsnæði, Jafnvel renna Landhelgisgæslunni inn í þann kassa  líka.

Allt er þetta til þess að passa uppá innbyggða afbrotanáttúru allra þeirra sem standa í sjávarútvegi. Sé af þeim litið gera þeir eitthvað af sér,-það er allavega gengið út frá því sem vísu. Ef maður tæki kvótann í burtu og segði veiðið eins og þið viljið þar sem  þið fáið til þess leyfi, þá mega þessir kassar í skipuritinu  líklega flestur missa sig. Eru allir sannfærðir um að þetta sé blátær skipulagssnilli sem birtist í skipuritinu?. Finnst almenningi rétt að hann borgi fyrir þetta allt saman  með skattfé sínu?

Gaman er að sjá til stjórnarathafna sem eru jafn snöfurlegar og þetta útspil ríkisstjórnarinnar um að flytja þessa Fiskistofu til Akureyrar. Því ber að fagna og vona að tækifærið verði notað til að hagræða í leiðinni og fækka starfsfólki.  Hvernig væri að skoða fleiri svona stofnanir í leiðinni? Ryskja um kerfið svo um muni?

Það eru ekki alveg eins snöfurlegar framkvæmdirnar í uppgjörsmálum gömlu bankanna. Virðist ekki allt danka og danka og skilanefndirnar maka krókinn við að búa til óraunhæfa nauðasamninga sem gjaldeyrislaus Seðlabankinn getur ekki samþykkt?.  Sykurskatturinn er óbreyttur áfram til að draga úr heimabruggi? Auðlegðarskatturinn var ekki afnuminn heldur látinn ganga áfram eftir því sem Steingrímur og Indriði ákváðu?  Átti ekki allt að breytast og verða betra?

Manni finnst að þegar menn eru kosnir til að stjórna þá eigi þeir ekki að tvínóna við hlutina heldur bara stjórna. Reka þá pólitísku starfsmenn sem fyrri stjórn réði, alveg án tillits til hæfni þeirra. Bara vera ákveðinn í að láta til aín taka. Láta að sér kveða og stjórna. Kaus maður ekki stjórnarflokkana til þess? 

Vonandi fær þessi ákvörðun um að flytja Fiskistofu til Akureyrar ekki sömu örlög  og ákvörðunin að fylgja stjórnarsáttmálanum um að slíta aðildarviðræðunum við ESB. Heykjast á því vegna skrækjanna í aðildarsinnunum í Samfylkingunni og Vinstri Grænum. Hversvegna notuðu menn ekki sumarþingið sem var komiðí hús til að klára það mál? Hvað skyldi framhald þess máls annars verða? Uppgjöf fyrir Benna Jóh og öðrum kverúlöntum?

En það er fínt að flytja Fiskistofu til Akureyrar,ekki Timbúktú, og fækka þar mannskap um leið.