Hlutafé einhver?

Svo segir í Morgunblaðinu í dag: 

 "Tap af rekstri WOW air á árinu 2013 nam 330 milljónum króna og nemur uppsafnað tap síðastliðinna tveggja ára yfir 1.100 milljónum króna. Eigið fé félagsins var 350 milljónir króna í árslok 2013, þrátt fyrir að hlutafé þess hafi verið aukið um 500 milljónir króna á því ári.

 

Hlutafé WOW air er allt í eigu Títans fjárfestingafélags ehf. sem er í eigu Skúla Mogensen, forstjóra og stofnanda félagsins. Hlutafé WOW air var aukið um 20 milljónir króna að nafnvirði á genginu 25 í nóvember síðastliðnum og nam því heildarfjárhæð aukningarinnar 500 milljónum króna. Fram kom í tilkynningu í tengslum við hlutafjáraukninguna að hún væri meðal annars til komin vegna fyrirhugaðrar sóknar félagsins á Norður-Ameríkumarkað.

 

»Við erum mjög ánægð með hvernig sumarið og haustið hefur þróast,« segir Skúli »Hins vegar urðum við fyrir verulegum kostnaði þegar við þurftum að fresta Norður-Ameríkuáformum okkar síðastliðið vor. Þessi breyting gerði það að verkum að við þurftum að leggja niður eða breyta flugi fleiri þúsund farþega með tilheyrandi kostnaði.«

 

Skúli segir afkomu fyrstu sex mánuði ársins vera verri en stjórnendur félagsins höfðu gert ráð fyrir. »Allt útlit er hins vegar fyrir góða afkomu á seinni hluta ársins. Ljóst er að þriðji ársfjórðungur er sá besti í sögu félagsins bæði hvað varðar sætanýtingu, tekjur og afkomu.«

 

Spurður um mögulega hlutafjáraukningu, svarar Skúli því til að WOW air sé skuldlaust félag sem hafi alfarið verið fjármagnað af Títan fjárfestingafélagi, sem hafi lagt WOW til 1.500 milljónir til þessa.

»Títan mun halda áfram að styðja við bakið á félaginu eins og þarf en jafnframt gæti verið áhugavert að fá inn fleiri fjárfesta að félaginu þegar fram líða stundir,« segir Skúli.

 

Hann segir enga ákvörðun hafa verið tekna um hvort eða hvenær félagið fari í hlutafjáraukningu.

 

»Við erum að fjárfesta mikið þessa dagana í Norður-Ameríkuáformum okkar og áframhaldandi uppbyggingu WOW. Við gerum ráð fyrir að fjölga farþegum um 60% á milli ára og áætlum að þeir verði um 800.000 á næsta ári, úr 500.000 farþegum í ár,« segir Skúli.

 

Fram kemur í ársreikningi WOW air að í nóvember 2013 hafi þrotabú IEMI, áður Iceland Express, sett fram kröfu um greiðslu 166,4 milljóna króna vegna meintra eftirstöðva af umsömdu kaupverði rekstrarhluta og tilgreindra eigna Iceland Express á árinu 2012. Stjórnendur WOW telja hins vegar að kaupverðið sé nú þegar að fullu greitt og því sé krafan óraunhæf. Að sögn Skúla á WOW air enn í viðræðum við þrotabúið vegna þessa, en að öðru leyti vill hann ekki tjá sig um gang viðræðna."

Hvað er það sem knýr athafnamanninn og snilling eins og Skúla Mogensen til að berjast í þessum lággjaldaflugrekstri? Hvað er það sem knýr MP-banka(sem Skúli ræður eitthvað líka) til að ýta frá sér venjulegum viðskiptamönnum sem vilja eiga venjulegan reikning í einkabankanum sem var þó eini bankinn á íslenskum markaði sem ekki var í eigu erlendra vogunarsjóða eða ríkisins.

Einkabanki sem við einfaldir trúðum einlæglega á eftir skellinn 2008 og fyrir Skúla. Er þetta fórnarlund hjá Skúla eða þrá eftir að útdeila ölmusu til bágstaddra? Eða vill hann líkjast Jóni Ásgeir? Warren Buffet kaupir aldrei hlutafé í flugfélögum. Álítur þau líklega ekki arðgæf til lengdar.Líklega enn síður í lággjaldaflugfélögum. Enda er Buffet líklega gamall og úreltur en Skúli ungur og áræðinn.

Vill einhver kaupa hlutafé til að hjálpa Skúla? 

Athugasemdir

[Jóhann Elíasson, 23.9.2014 kl. 22:35]

Í bók eftir Michael Porter On Competition, er sagt frá arðsemi fjárfestinga í hinum ýmsu greinum atvinnulífsins í Bandaríkjunum.  Í þessum atvinnugreinum er mesta arðsemin (kemur ekki á óvart) í verðbréfa- og hlutabréfasölu en þar var arðsemin 40,9% en lægst var hún hjá flugfélögum 5,9%.   Meðaltalið var um 15% og var um að ræða 31 atvinnugrein. Sú útgáfa bókarinnar sem ég á er síðan 2008 og síðan þá hafa orðið miklar breytingar næstum allur kostnaður flugfélaga hefur hækkað mun meira en sem nemur tekjuaukningunni og kæmi mér ekki á óvart þótt þessi tala væri nálægt 2% í dag eða jafnvel  enn lægri.  Hefði ég yfir að ráða fjármagni myndi ég setja það í flest annað en flugfélag................

[Halldór Jónsson, 24.9.2014 kl. 07:46]

Þá er það spurning um husjónirnar, að hjálpa öðrum til að gera góðverk sem er að gefa fátæku fólki kost á fljúga ódýrt um stundarsakir að minnsta kosti? Sem er göfugt í sjálfu sér en líklega ekki neitt sem menn fá þakkað fyrir eins og varð á sínum tíma með arnarflug, Express ofl.