Bankar og braskarar

skipuleggja húsnæðisekluna með sveitarstjórnarmönnum hér sunnanlands.

Rétt eins og var eftir stríðið.  Þá leystu menn þetta með Höfðaborg og sænsku húsunum sem voru flutt inn. Og sumarbústöðum í Kópavogi og í Smálöndum.  Svo kom Smáíbúðahverfið. Menn byggðu sjálfir á lóðum sem sveitarfélögin sköffuðu fyrir lítið og á lánum. Nú er ekkert hægt nema emja og vandræðast. Þó er undravert hvað íslenskir trésmiðir eru fljótir að byggja þegar byrjað er á því. Tækninni hefur fleygt fram en það er eins og hún geri bara allt dýrara en það var.

Hinn nýja kynslóð sveitastjórnarmanna virðist ekki kunna annað en að búa til blokkarlóðir þar sem verktakar með bankaaðgang fá lóðir til að byggja tilbúnar íbúðir sem kosta 3-400.000 kr/m2 Engar aðrar lóðir eru í boði nema rándýrar með yfirtökugjöldum. Einbýlishúsalóðir á svona 15 milljónir og annað eftir því.Þeir virðast trúa því að fyrst kaupi menn lóðina og svo byggi þeir hratt og vel.  Ekki öfugt í neinu tilviki. Svo er hert útgáfa af Byggingareglugerð Kratanna frá ESB látin auka kostnað eins og hver vill með allgildri hönnun fyrir alla í hjólastólum. Ekkert lán nema að undangengnu greiðslumati sem leiðir til þess að lunginn af unga fólkinu getur aldrei eignast neitt húsnæði. Hér áður fór allt aflið í að byggja og fólk var svona búið þegar börnin fluttu að heiman.

Ég var að horfa á hverfi í Orlando sem er snyrtilegt með fullkomnum götum. Timburhús með bílskýlum svona í Mikðfellsklassa sumarbústaða. Hálfgerðir hundakofar finnst mér auðvitað núna miðað við flotta bústaði hjá okkur. En þetta eru einbýli sem kosta 8 milljónir þegar flutt er inn.  Með lóð.  Maður sér að það er byggt við þetta og sumstaðar eru komin flott hús.

Í Ventura getur fólk keypt íbúðir á þessu verði í fjölbýlum. Þarna eru eignaríbúðir en ekki félagslegar leiguíbúðir. Timburblokkir þjóta upp í nágrenninu. Líklega á félagslegum  grunni. Gólfin úr fjöldaframleiddum gitterbitum. Krossviður og aftur krossviður og tværfjórar. Sprinkler í hvert herbergi og ekkert getur brunnið..                    

Af  hverju er fólk knúið af ríkinu og bæjum að byggja hér 500 ára kastala sem þola fallbyssuskot í veggina og jarðskjálfta upp á 7 Richter. Af hverju ekki fjaðrandi timburhús sem eru enga stund í byggingu? Fjölskyldan getur byggt þetta undir handleiðslu fagmanna? Hvað liggur sveitarkassanaum á að fá peninga fyrr en fólk er flutt inn og farið að greiða útvsvar? Hvort vill maður búa heima á hótel mömmu eða fá 15 milljónir í húsnæðislán og flytja inn fyrir það?

Eygló setur lög og lög og Dagur pantar leiguhúsnæði.Ekkert gerist samt. Húsnæðiseklan er söm við sig. Hvar er Sjálfstæðisflokkurinn og eign fyrir alla-stefnan?  Skyldi enginn sveitarstjórnamaður geta hugsað um að gera fólki kleyft að byggja ódýrt?

Verður allt að þjóna bönkunum og bröskurunum? 

 

 

 

Athugasemdir

[Ingibjörg Magnúsdóttir, 31.3.2015 kl. 00:31]

Sæll Halldór, mig langar til að nefna það, í tilefni að þú fræðir okkur á að sveitarfélög lánuðu aðilum til að kaupa ódýrar lóðir eftir stríð til að byggja á.

Hér snemma á 7. áratugnum leigðu hjón sem ég þekki í kjallara í Kópavogi, þar sem þau hófu sinn búskap. Næsta skref var að komast í eigið húsnæði. Hann var smiður ... og þau byggðu í fjögurra íbúða húsi í vesturbæ Kópavogs.

Ég spurði fyrir nokkrum árum hvernig þau fóru að því að fjármagna þetta á sínum tíma. En á þessum tíma voru engin hefðbundin húsnæðislán í boði eins og er í dag. En þau sóttu um lán.

Og fengu neitun. Nema með því skilyrði að kjósa ákveðinn flokk sem var við völd í Kópavoginum á þeim tíma.

Nú voru góð ráð dýr. Þau snéru sér að 'góðum' einstaklingi sem þau höfðu góð fjölskyldutengsl við (en ekkert skylt), en það var Alþýðubandalagsmaður, og síðar þingmaður. Hann reddaði þessum ungu hjónum, þannig að þau fengu lán!

Og þeim vegnaði vel í lífinu og eru nú komin á eftirlaun.

[Hrólfur Þ Hraundal, 31.3.2015 kl. 07:37]

Já Halldór og til hvers fundu menn upp húsaleigu bætur sem gera ekkert annað en að hækka húsaleigu.  Húsaleigu bætur eru handa leigusalanum þó þær fari í gegnum leijandan.

[Halldór Jónsson, 31.3.2015 kl. 08:45]

Ingibjörg, ég er ekki fróður um það hvort menn hafi fengið lánaðr lóðir íKópavogi í den,. En það kann að vera.

Hrólfur, auðvitað eer þetta rétt hjá þér. Styrkir til fátækra renna alltaf til hinna efnaðri.

[Gunnar Heiðarsson, 31.3.2015 kl. 09:27]

Sæll Halldór og takk fyrir ágætan pistil.

En það þarf ekki að örvænta, Dagur reddar þessu, eða þannig. Borgarstjórn var á dögunum að kynna nýtt íbúðahverfi í Reykjavík. Það er að sjálfsögðu niður í miðbæ og fellur undir það sem "sérfræðingarnir" í Tjarnarkofanum kalla "þétting byggðar.

Þarna er um að ræða litlar íbúðir, væntanlega fyrir þá sem minna mega sín eða eru fastir á götunni. Meðalstærð íbúðar er um 60m2 og innifalið í þeirri tölu geymsla. Ekki kom fram í kynningunni hvernig bílastæðamálum væri háttað, en miðað við fyrri "afrek" þessa meirihluta má gera ráð fyrir að þau séu naumt skömmtuð.

Þetta er auðvitað frábært framtak hjá Degi og félögum í Tjarnarkofanum. Þarna er svo sannarlega hugsað til þeirra sem vantar húsnæði og komið til móts við það fólk, unga fólkið sem er að hefja sinn búskap. Enda ætti kytra upp á 60m2 að meðtaldri geymslu, að duga flestum sem fyrsta húsnæði.

Svo er bara spurning hvernig unga fólkið á að finna sér fjármagn til að kaupa herlegheitin. Fermetraverð þessara íbúða er að meðaltali um ein milljón króna!! Víst er að fólk sem er að hefja búskap á í fæstum tilfellum 60 milljónir undir koddanum og það verður því að redda láni fyrir kaupunum. Kannski Dagur líti þetta háa verð sem tryggingu fyrir því að ekki verði mögulegt fyrir þetta fólk að eignast bíl, að þar sé lausnin á bílastæðafæðinni fengin.

Eins og ég skil þinn pistil er megininntak hans það að fólk fái að leggja meira eigið vinnuframlag í byggingu síns húsnæðis, sé ekki bara þiggjendur stórverktakanna. Þannig var þetta megnið af síðustu öld, fólk vann eins og það gat sjálft við byggingu eigin húsnæðis. Þetta hafði ótvíræða kosti, sparaði fólki lántökur og gerði það ánægðara með sitt. Það byggði sjálft það sem það bjó í.

En eins og þú nefnir, þá ná klær ESB hingað til lands og þær eru ekki hrifnar af slíku framtaki. Megin þemað á þeim bænum er þiggja það sem að er rétt og borga ríflega fyrir.

Og þannig ætlar Dagur að leysa húsnæðisvandann. Hann finnur einhvern blett niður í miðbæ, þar sem lóðaverð er hærra en á nokkrum öðrum stað innan borgarmarkanna, færir þessa lóð í hendur fjármálamanna sem aftur ráða einhverja verktaka til að byggja örsmáar og rándýrar íbúðir. Svo verður þetta fólk sem leitar sér húsnæðis bara að borga svona eins og eina milljón fyrir hvern fermeter sem það þiggur úr hendi Dags og það í grjóthörðum peningum. Vinnuframlag er ekki í boði. 

[Halldór Jónsson, 3.4.2015 kl. 09:20]

Gunnar Heiðarsson

ég held að þú sjáir þetta fyrir.

Með þennan Hjálmar Sveinsson í liðinu eru Degi allir vegir færir.Óvinir Reykjavíkur eins og hún var eitt sinn eru þessir í  meirihllutanum.