Í Rusli

er Reykjavíkurborg ef lýsing Morgunblaðsins er rétt.

Í Leiðara stendur:

"Reykjavík er í rusli. Ruslið er úti um allt. Pappír og plastpokar mynda heldur ömurlegt skraut í runnum og trjám eða fjúka um í rokinu. Á götum, stéttum og stígum er sandur og möl eftir baráttuna við klaka og snjó vetrarins. Þegar blæs er svifrykið slíkt að fer yfir heilsuverndarmörk.

 

Sandurinn er nauðsynlegur til að hjálpa fólki að fóta sig í hálkunni, en þegar enginn er snjórinn og hálkan verður hann sóðalegur. Á meðan snjór er yfir öllu sést ruslið ekki, en þegar hann er horfinn blasir sóðaskapurinn við. Það sást berlega á myndskeiði sem birt var á mbl.is í vikunni

 

Merki vanrækslu eru mörg í borginni um þessar mundir. Göturnar eru eins og gatasigti. Í þeim eru litlar holur og stórar, grunnar og djúpar og sums staðar svo margar að færustu bílstjórar geta ekki sveigt hjá þeim öllum. Haft er fyrir satt að holurnar í götum borgarinnar séu fleiri en í Holuhrauni.

 

Þegar borgaryfirvöldum virðist sama um ástand borgarinnar er hætt við því að borgarbúum fari líka að standa á sama. Hætt er við því að þeir, sem alltaf hafa fyrir augunum rusl á víð og dreif, fyllist doða fyrir umhverfi sínu og sóðaskapurinn verði ávísun á meiri sóðaskap.

 

Það er ef til vill ekki jafn áríðandi að hreinsa borgina og að ryðja snjó til að koma í veg fyrir að umferð lamist. Það er engu að síður mikilvægt, ekki síst nú þegar kapp er lagt á að laða að ferðamenn sem aldrei fyrr. Sú Reykjavík, sem blasir við þeim, er heldur niðurdrepandi.

 

Það skiptir máli hvernig borgin lítur út, hvort við blasa hreinar götur og torg eða allt er á kafi í rusli og borgin virðist vera að drabbast niður."

Var þetta svona í tíð Birgis Ísleifs, Geirs Hallgrímssonar, Davíðs Oddssonar ? Ég minnist þess ekki.

Hvarvetna eru myndir af Degi Bergþórusyni með skófluna á loft að taka stungur fyrir nýjum framkvæmdum. Ef grannt er skoðað eru þetta mest allt stórframkvæmdir sem borgarbúar munu ekki nýta fyrr en löngu eftir að kjörtímabili Dags lýkur, ýmist á hönnunarstigi eða væntanlegar þaðan.

Dagur veifar skóflunni óspart og vísar veginn til framtíðarinnar sem er hvergi að sjá stað núna. Borgarsjóð vantar á leiðinni í tíu milljarða upp á að tekjur dugi fyrir útgjöldunum í A-hluta. Hann er einfaldlega réttur af með því að sækja það sem á vantar í B-hlutann þar sem sjóðir orkuveitunnar eru. Þannig fá íbúar  Kópavogs, Garðabæjar og  Hafnarfjarðar að taka þátt í að borga hallarekstur kraterísins í Reykjavík sem veifar skóflunni sem aldrei fyrr  með útgjaldadraumum til margra ára framtíðar.

 

Spurning er hvort kjósendur sætta sig við svona Pótemkíntjöld til fjarlægrar framtíðar tíma meðan allt annað er í rusli? 

Athugasemdir

[Jón Valur Jensson, 1.5.2015 kl. 15:25]

Hér mælirðu svo sannarlega orð að sönnu, Halldór. Margoft hefur mig langað til að rita um þessa ófyrirleitnu vanrækslu borgarstjórnarmeirihlutans við hreinlæti í borginni.

Margoft hefur maður þurft að tæma skóla vegna malar sem berst ofan í þá. Margítrekað meiðir það augu mín að horfa upp á ruslið og sóðaskapinn sem safnast upp í runnum og hvar sem er á víðavangi nálægt gönguleiðum í borginni og situr þar óhreyft mánuðum saman!

Þessi borgarstjórnarmeirihluti er vangæfur að sjá þetta ekki eða forhertur að bjóða borgarbúum og ferðamönnum upp á það að hafa þetta fyrir augunum sýknt og heilagt, árstíð eftir árstíð!

Svo ættu þeir að lesa greinina eftir Guðrúnu Helgu Sigurðardóttur í Fréttablaðinu í dag: Af stríðsástandinu í miðborginni.

En inn á flugvallarmálið og svik borgarstjórnar við lýðræðið í því máli kem ég inn á í grein minni í dag:  Hafa Píratar ekki gælt við öfgar í formi anarkisma? Trúverðugri en gömlu flokkarnir?

[Heimir Lárusson Fjeldsted, 1.5.2015 kl. 19:11]

Sýndarmennska er mennska hliðin á Degi B Eggertssyni.

[Ingibjörg Magnúsdóttir, 1.5.2015 kl. 23:20]

Hæ allir borgarbúar, og þið strákar, Halldór og Jón Valur. Hættið þessu væli og farið að taka til hendinni. Ég ætla að gera það líka: þegar ég fer í göngutúr í mínu nágrenni (ég vona að þið séuð sjálfir rólfærir og getið gengið ykkur til heilsubótar) ætla ég að taka með mér plastpoka og hanska, og hirða upp rusl sem veður á vegi mínum. Mig munar ekkert um það.

Árangursríkt gæti verið, ef borgin, eða áhugafólk, auglýsi rusladaga, sem hafi það að markmiði að íbúar borgarinnar taki til og týni upp rusl. T.d. 2. og 3. helgi í mánuði.

Ég útiloka 1. helgi, því þá eru allir nýbúnir að fá útborgað og margir að spóka sig í Kringlunni og Smáralind. Og í síðustu heldi í mánuði er minna um rusl, t.d. kók og kaffimál úr pappa, af því að það er minna um svona í lok mánaðar þegar fólk er orið blankt.

Og mikið rusl safnast í trjárunnum og steinum þangar sem það hefur fokið í vetur. Það ætti að hvetja fólk til að taka til í sínu nánasta umhverfi.

Það hefur yfirleitt virkað vel þegar hreinsunarátak er í gangi. En hér fyrr á árum voru ruslatunnur á vegum borgarinnar merktar: "Hrein torg - fögur borg" - Það mætti endurvekja þetta átak. En það er ekki nóg að skrifa þennan texta á tunnurnar: best er að auglýsa átak á ljósvakamiðlunum.

Hundaeigendum er t.d. gert að vera með plastpoka á sér og hirða upp skítinn jafn óðum, þegar þeir fara með hundinn í göngutúr. Og þeir borgarbúar sem eiga ekki hund, geta búið sér til jákvætt verkefni í sínum göngutúr: taka með sér poka og hirða upp smá rusl á leiðinni.

Ef allir leggjast á eitt, lítur borgin hreinni út.

[Halldór Jónsson, 2.5.2015 kl. 14:06]

Ingibjörg

Og verður þá Dagur Bé endurkjörinn fyrir sérstakt hreinsunarátak sitt. Þetta er góð hugmynd sem á mikkinn rétt á sér. Borgararnir þurfa að vera vakandi. En þeir eiga hinsvegar ekki að velja sér algert forstuleysi. Borgarstjórinn ætti að upptendra fólk með forystu sinni , fá fólkið með sér.Í stað þess virðast flestir í fýlu. KAnnski að þessir Piratar geti náð upp gíraðri stemningu með hassvöndul í kjaftinum og veifandi hrífum í hreinsunarátaki í takt við þrumandi rapptónlist?

[Ingibjörg Magnúsdóttir, 3.5.2015 kl. 01:14]

Rusl er eitt og göttóttar götur annað. Vissulega þarf borgarstjóri og hans næstráðandi að hafa frumkvæði með því að leggja áherslu á vorhreingerningu í borginni.

En íbúarnir, hver á sinn hátt, geta lagt lið, með því að hirða rusl og einnig með því að henda ekki rusli úr bílum sínum.

En besti árangur næst í ruslatýnslu, er að auglýsa þetta og hvetja borgarana til að koma sér út úr húsi, í göngutúr, meö ruslapoka, og hreinsa til í leiðinni.

[Jón Valur Jensson, 3.5.2015 kl. 09:37]

Hrein torg, fögur borg var metnaður Geirs, Birgis Ísleifs og Davíðs. Nú er ástand ferðamannaborgarinnar Reykjavíkur orðið borgarbúum og jafnvel þjóðinni til skammar. Vinstri menn hafa starfslið til ruslatínslu, en skera við nögl fjármagn til hennar. Það er eins og með lagfæringar á gatnakerfinu. Reykjavík vikublað vogar sér í gær að nánast grobba af auknu fé úr borgarsjóði á þessu ári í að fylla upp í götin, þótt vanrækslan hafi verið slík, að langtum, langtum meira þarf til.

Á sama tíma ákveður borgarráð að eyða 40 milljónum í "hjólastíg milli Laugavegar og Miklubrautar". Til hvers í ósköpunum? Það er eins og þessir menn kunni ekki á hjól. Menn komast allra sinna ferða á hjólum nánast hvar sem er og hvert sem er!