Bresk móðir Theresa?

May er hugsanlega að renna uppá stjörnuhiminn þarlendra stjórnmála. Hugsanlega ekki jafnoki hinnar betur þekktu í alhliða kærleika. En hugsanlega rödd sem á eftir að heyrast meira. Manni heyrist líka braka í Evrópusambandinu þegar maður hlustar.

Svo stendur í Morgunblaðinu:

"May hét breytingum á reglum um hælisleitendur með það að markmiði að fækka þeim sem fá hæli í Bretlandi. Hún sagði m.a. að núverandi fyrirkomulag umbunaði þeim farandmönnum sem kæmust til landsins, »þeim auðugustu, heppnustu og sterkustu«, en leggja þyrfti áherslu á að »hjálpa þeim verst stöddu á hættulegustu stöðum heimsins«. 

Bretar myndu aldrei samþykkja sameiginlega stefnu Evrópusambandsins í málefnum flóttafólks og stjórnin hygðist taka harðar á málum hælisleitenda sem kæmu til Bretlands frá »öruggum löndum«.

 

May var einkum gagnrýnd fyrir að halda því fram að innflytjendur tækju störf frá innfæddum Bretum, hefðu valdið launalækkunum, að landið hefði ekki þörf fyrir þann fjölda innflytjenda sem kæmi núna til landsins og efnahagsleg áhrif innflytjenda væru »nálægt núlli«.

  

Simon Walker, framkvæmdastjóri Institute of Directors, stærstu samtaka frammámanna í breska atvinnulífinu, kvaðst vera »forviða á ábyrgðarlausu orðagjálfri« innanríkisráðherrans sem hefði kosið að ala á andúð á innflytjendum með ræðu sem þjónaði hagsmunum samkeppnislanda en ekki Bretlands. »Goðsögnin um innflytjendur sem stela störfum er þvættingur.«

 

James Kirkup, aðstoðarstjórnmálaritstjóri The Telegraph, sem hefur stutt Íhaldsflokkinn, tekur í sama streng og segir að innanríkisráðherrann sé að »glæða elda fordóma í kaldrifjaðri tilraun til að verða leiðtogi Íhaldsflokksins«. »Það er erfitt að sjá hvar hægt er að byrja á hræðilegri, ljótri, villandi, kaldranalegri og ábyrgðarlausri ræðu Theresu May á flokksþingi Íhaldsflokksins. Ef þið hafið ekki lesið fréttir um ræðuna skal ég segja frá aðalatriðunum í stuttu máli: »Innflytjendur eru að stela vinnunni ykkar, gera ykkur fátækari og eyðileggja landið ykkar. Staðreyndirnar skipta engu, verið bara reið út í útlendinga. Og gerið mig að leiðtoga Íhaldsflokksins.«..

 

Kirkup skírskotar til þess að David Cameron, forsætisráðherra Bretlands, hyggst víkja sem leiðtogi Íhaldsflokksins eftir þetta kjörtímabil. Hann segir m.a. í grein sinni að embættismenn í ráðuneyti innanríkisráðherrans hafi komist að þeirri niðurstöðu í skýrslu í fyrra að »tiltölulegar fáar vísbendingar« séu um að innflytjendur hafi tekið störf frá innfæddum íbúum Bretlands þegar efnahagurinn er sterkur eins og hann er nú.

Breska fjármálaráðuneytið hafi komist að þeirri niðurstöðu að innflytjendur hafi aukið hagvöxtinn í Bretlandi um 0,25% á ári. Þá telji OBR, óháð fjármálaráð á vegum bresku stjórnarinnar, að innflytjendur stuðli að minni fjárlagahalla með skattgreiðslum sínum.

 

The Telegraph segir í forystugrein um málið að fjöldi innflytjenda sem komi til Bretlands hafi sexfaldast frá árinu 1997 og engin ríkisstjórn geti leitt áhrif slíkra breytinga hjá sér. Flestir ætlist til þess að haldið sé uppi lögum og reglu á landamærunum og vilji ekki að öllum sé hleypt inn í landið. »Það sem þessi ríkisstjórn - og allar aðrar - þurfa að gera er að marka stefnu þar sem tilgreint er hverja við viljum fá til landsins og hverja við viljum ekki, stefnu sem gerir þeim fyrrnefndu kleift að koma en letur hina síðarnefndu til þess.

Þetta er kjarninn í stjórnarstefnu í málefnum innflytjenda. Það sama er að segja um hælisleitendur: það ætti ekki að vera umdeilt að segja að þeir sem flýja ofsóknir í raun og veru eigi að fá hæli en vísa eigi burt þeim sem ekki eru raunverulegir flóttamenn."

Theresa May er innanríkisráðherra Breta eða í sama embætti og Ólöf Nordla hjá okkur. Báðar eiga framtíðina fyrir sér þar sem þær stefna á landsfundi flokka sinna. Spurning er hvort skoðanir þeirra á innflytjendamálum eigi eftir að renna saman einhvern tímann? 

Geta vestrænar þjóðir haldið áfram með því að sýna skilyrðislausan kærleika í málefnum flóttamanna eins og móðir Theresa sýndi á sinni tíð og að "Góða fólkið" okkar eigi að ráða öllu í innflytjendamálum?