Óábyrgt kúkerí

hefur víst átt sér stað við Mývatn. 

Þar hefur framtaksemi íbúa við að afla sér tekna af ferðamönnum frá því að Kísiliðjan hætti að dæla úr vatninu leitt til þess að þörungagróður sem þrífst af þvottaefnum líklega eins og gerðist í Lake Erie hefur útrýmt kúluskít og fleiru af botngróðri.

Þá er allt í einu fjör á Alþingi. Engum þótti merkilegt að Þistilfirðingurinn Steingrímur J. væri fremstur í flokki að garga á að hundruð milljóna verði strax settir í kaupa rotþrær handa mývetnskum ferðamönnum að kúka í.

Nú er mengun af blómlegri ferðamannastarfsemi Mývetninga orðið málefni þjóðarinnar að leysa strax. Og þingmaður eftir þingmann jafnvel af Suðurlandi tekur undir sönginn. Mývetningar geta ekki keypt sér rotþrær, það er svo dýrt. 

Áður en þetta varð urðum menn langa vegu frá Þingvallavatni að hlíta fyrirmælum Þingvallanefndar og kaupa rándýrar rotþrær til allra nýbygginga á svæðinu. Ekkert heyrðist þá frá Steingrími Jóhanni sparisjóðakóngi  eða hysteríska liðinu á Alþingi vegna vegna ágangs ferðamanna hér sunnanlands á gullna hringnum til dæmis. Við máttum borga allar mengunarvarnir styrkjalaust.

Einu sinni var sagt að félli hæfileg rigning félli á jarðir bænda þá væri afrakstur túnanna þeirra eign. Ef óþurrkar væru væri það málefni þjóðarinnar að borga ónýt hey og kalskemmdir.

Það var svo sem auðvitað hversu botninn í Mývatni er allt í einu orðinn vandamál þjóðarinnar. Ég hélt að hann óhjákvæmilega myndi fara í fyrra horf ef Mývetningar tækju upp ábyrgt kúkerí eins og við hér sunnanlands.

Athugasemdir

[Snorri Hansson, 11.5.2016 kl. 10:02]

Það hefur rækileg komið fram í fréttamiðlum að það eru engin opin ræsi í Mývatnsveit

 Allir hafa rotþrær.  En þær uppfylla vist ekki einhverja staðla.

En auðvitað er ekki hægt að jafna saman kúkmenningu  sunnan og norðanmanna.

Það er jafnvel spurning hvort sunnlendingar kúka yfirleitt.

[Sigurður Antonsson, 11.5.2016 kl. 13:42]

Að gera út á almenning er  helsta boðorð margar þingmanna. Nefnt þingmannapot. Skiljanlegt með núvera kjördæmaskipan þegar héraðsþingmenn kvaka en þegar sjálfstæðismenn langt að vilja eyða milljörðum í rotþrær hrökkva menn við.

Kaupmaðurinn úr Reykjavík sem ræður umhverfismálum hefur sagt réttilega að vandamál Mývatns séu af öðrum óþekktum toga. Það viðurkenna flestir skynbornir menn að þingmenn geta ekki öllu stjórnað náttúrunni með fjárveitingum.

Kór þingmanna getur með endalausum upphrópunum orðið sammála um að nú sé þeirra að kaupa peningaþrær sem þeir einir kunni skil á . Því er einfaldlega haldi fram að allt sé í ólagi af ágangi og að dæla þurfi fé. Þannig þenst ríkisbáknið út.

[Sigurður I B Guðmundsson, 11.5.2016 kl. 16:16]

Auðvita er þetta allt vonda fólkinu á Suðvestur horninu að kenna!!

[Bjarni Jónsson, 11.5.2016 kl. 17:20]

Hvernig stendur á því, að hótel og veitingahús fá að stunda sína mengandi starfsemi í hjarta einnar helztu náttúruperlu Íslands án þess að beita beztu hreinsitækni, sem völ er á ?

Iðnaðinum er gert að setja upp fullkomnustu mengunarvarnir, sem völ er á, að viðlagðri sviptingu starfsleyfis, og hann fær enga opinbera styrki til þessara framkvæmda. 

"Náttúruverndarsinnar" hafa haft hljótt um sig, frá því að blóraböggullinn þeirra, Kísiliðjan við Mývatn, var rifin.  Það reyndist engu breyta til batnaðar fyrir lífríkið í vatninu.

Mikið hefur verið rannsakað, en ekkert gert til úrbóta fyrr en veiðiréttareigendur og handhafar veiðiréttar skera upp herör. 

Loddarar skulu þeir heita, sem beita fyrir sig náttúruverndarsjónarmiðum í afturhaldsáróðri sínum gegn iðnaði, raforkuvinnslu og flutningi raforku með loftlínum

[Halldór Jónsson, 12.5.2016 kl. 08:39]

Jón fisku hefur aðrar skýringar á Mývatnsdauðanum sem mér þykja athyglisverðar. Hann segir þetta vera eðlilegar náttúrusveiflur.

"Stundum hefur þetta verið svipað í Mývatni. Byrjum með hreint borð:

1. Vatnið er tært að vori, mikið af krabbaflóm í vatninu, mikið mý, nóg fæða fyrir silung sem þrífst vel, engin hornsíli.

2. 1-2 árum síðar, hornsílum fjölgar, krabbaflóm fækkar og vatnið fer að gruggast, dregur úr vexti silunga.

3. Vatnið grænt, fullt af hornsílum, krabbinn horfinn, silungur horaður. Allt fiskafóður upp étið og það endar með því að hornsílin yfirgefa vatnið. Ég hef séð þau synda úr vatninu niður Laxá í milljónatali.

4. Aftur á byrjunarreit, hornsílin farin, krabbaflær komnar aftur og vatnið tært. Þessi hringrás endurtekur sig á 5-7 árum.

Sé rétt að hornsílin séu nú horfin úr Mývatni (stofninn hruninn eins og sagt er) þá er vatnið að færast yfir á stig 4 hér að ofan og verða tært næsta sumar. Sjáum hvað setur.

Kúluskítur og annar botngróður er horfinn vegna þess að bláþörungasúpan kemur í veg fyrir að ljósið nái niður á botninn. Vandamálið er því bláþörungurinn, hvað veldur því að hann blossar svona upp? Þekkt er að það hafa skipst á tímabil með u.þ.b. 7 ára millibili, þar sem vatnið skiptist á að vera tært og gruggugt af þörungum. Alltaf er samt sama innstreymi af næringarefnum. Hvernig má vera að stundum valdi þau þörungablóma og stundum ekki? Það hljóta að vera aðrir líf- og vistfræðilegir þættir sem þarna eru að verki. Samt er það eina sem mönnum dettur í hug núna er að ráðast í að lagfæra klóak, sem aðeins stendur fyrir um 1% af innstreymi næringarefna ef marka má nýútkomna rannsóknaskýrslu. Ráðherrann vitnar í skýrsluna og telur að ástand vatnsins sé ekki af manna völdum. Samt á að ráðast í dýrar framkvæmdir því "það er það eina sem við getum gert. Hvernig væri nú að skyggnast í hugmyndir og tillögur sem stungið hefur verið undir stólinn?

Ég stundaði rannsóknir í Laxá og Mývatni samfellt frá 1974 til 1986, var í sérfræðinganefnd um Mývatnsrannsóknir í mörg ár og var í stýrihópi um rannsóknir erlendu sérfræðinganna 1998 og 1999. Ég hef sett upp síðu um Mývatnsmál hér. Þar eru slóðir, m.a. á skýrslu erlendu sérfræðinganna."

Er ekki ástæða til að hlusta á Jón Kristjánsson  svona meðfram áður en skrúfað er frá ríkisspenanum?