AfKára

skapur er þetta í honum Kára klára að skrifa svona skít um hann Sigmund okkar Davíð. Það bjargar talsverðu að fáir lesa þetta í Fréttablaðinu. En þar sem ég ber endalausa virðingu fyrir honum Kára Stefánssyni  þá get ég ekki sagt neitt sem hæfir í raun svona skrifi og verð því að reyna a vera málefnalegur.

Kári skrifar  svona og ég feitletra:

" Það var merkilegur kapítuli í kvöldfréttum sjónvarps á laugardaginn var sem sýndi Sigmund Davíð Gunnlaugsson á vorþingi Framsóknarflokksins. Hann sást ganga í salinn og grípa upp nokkara viðstadda eins og karakter úr bíómyndinni The Invasion of the Bodysnatchers (Innrás líkamshrifsaranna) og faðma þá. Ef viðstaddir hefðu ekki verið mannskepnur heldur af annarri dýrategund er ég hræddur um að þetta athæfi fyrrverandi forsætisráðherra hefði brotið í bága við dýraverndunarlög og talist refsivert.

Síðan sté hann í pontu og sagði ýmislegt skynsamlegt en hélt því líka fram að það hefði ekki verið honum að kenna heldur einhverjum öðrum þegar hann laug fyrir framan myndavélar sænska sjónvarpsins um aðkomu sína að Wintris, aflandsfélaginu fræga. Hann þvoði sem sagt hendur sínar algjörlega af ábyrgð á því sem hann hafði sagt og gaf það beinlínis í skyn að einhver hefði talað í gegnum hann.

Þetta minnti mig óþægilega á atburð úr lífi fjöskyldu minnar sem átti sér stað fyrir þrjátíu árum. Hún Sólveig dóttir mín var þá tveggja ára, ótrúlega dugleg stelpa sem hafði farið að ganga 9 mánaða og hætt að nota bleyjur 15 mánaða. Móðir hennar hafði farið í verslunarleiðangur og mitt hlutskipti var að annast hana og níu ára systur hennar, Svanhildi. Mér varð það á sem oft áður (og síðar) að gefa þeim of mikið sælgæti og það endaði á því að fara illa í magann á Sólveigu og hún kúkaði í buxurnar. Þegar móðir hennar kom heim spurði hún Sólveigu: „Er það satt sem pabbi segir að þú hafir kúkað í buxurnar?“ Svarið var: „Nei, það var Svanhildur.“ „Hvað áttu við,“ spurði móðirin, „kúkaði Svanhildur í buxurnar þínar?“ „Já“, svaraði Sólveig. Þetta er svolítið fyndið og jafnvel sætt út úr munni tveggja ára barns en eitthvað allt annað þegar það heyrist frá fyrrverandi forsætisráðherra lýðveldisins.

Það vill meira að segja svo til að upptakan af Sigmundi Davíð, forsætisráðherra Íslands, þar sem hann sat aulalegur fyrir framan myndavélina og tafsaði og laug, barst um allan heim og varð til þess að grínistar í sjónvarpi og útvarpi, frá Íslandi til Ástralíu, hæddust að honum og landi og þjóð. Það má því leiða að því rök að Sigmundur Davíð hafi ekki bara gert í eigin buxur heldur buxurnar heillar þjóðar. Þetta er að vísu bara saga sem við verðum að búa við þótt það sé ljóst að í henni hafi íslensk menning ekki risið sérstaklega hátt.

Hitt er hins vegar ógnvekjandi að Sigmundur Davíð gengur nú um eins og grenjandi ljón við að reyna að sannfæra framsóknarmenn um að kjósa sig aftur sem formann. Og það lítur út fyrir að honum gæti tekist það. Það yrði þjóðinni til ævarandi skammar að maðurinn sem heimsbyggðin lítur á sem ljúgandi aula yrði kosinn í forystusveit íslenskra stjórnmála.

Það verður að koma í veg fyrir það. Framsókn skuldar þjóðinni að verja hana gegn Sigmundi Davíð. Hann er hennar Frankenstein. Framsóknarflokkurinn hefur unnið með þjóðinni á farsælan hátt í eitt hundrað ár og því ekki við öðru að búast en að hann sjái um þetta. Ef hann gerir það ekki ber okkur skylda til þess að kjósa þennan XBé-vítans flokk út af kortinu."

Kári minn klári. Getur ekki verið að Sigmundur auminginn hafi bara tafsað þetta í einskærri vitleysu. Var ekki kallinn bara í sjokki og þar með viti sínu fjær. Á að hánka menn á því? einu sinni sagði Reagan rétt fyrir útsendingu að sprengjuárás á Sovétríkin hæfist innan fimm mínútna. Nema það að þetta fór út. Hvað hefði skeð ef Sovét hefði verið að hlusta?

Er Reagan að öllu ómerkur eftir að hafa sagt svona hluti? Er Sigmundur Davíð óalandi og óferjandi eftir að hafa látið klumsa sig svona? Hvað er maðurinn ekki búinn að gera fyrir þjóðina? Stóð í lappirnar í Icesave? Lagaði stöðuna fyrir heimilin á ótrúlegan hátt? Sagðist hann ekki myndi ná milljörðum af þrotabúunum? Hefur hann ekki staðið við sín loforð? Þó að að við Sjálfstæðismenn höfum hjálpað honum þá er hann formaðurinn á skútunni?

Hefur þú alltaf staðið við öll þin loforð Kári minn klári? Aldrei sagt neina vitleysu?

 

Hvernig yrði þér við ef þér væri stillt í sjónvarpi upp til að tala um uppfundningar þínar á vísindasviðinu fyrir framan kommamaskínurnar frá RÚV en svo birtist einhver indriði utan úr bæ og færi að spyrja þig út í einhver hlutabréf, hannesa, panama og tortólur?  Gæti ekki komið fyrir að þú færir að tafsa? Nema að þú hefðir kannski bara staðið upp og lúðrað spyrilinn og klárað málið. Hefði Simmi gert það í stað þess að blaðra vitleysu þá hefði hann orðið heimsfrægur og framsókn fengið fjörtíuprósent. Ekki satt?

Passaðu þínar eigin buxur Kári minn klári, við búumst við meiru af þér en svona AfKáraskrif í Samfylkingarblaðið.

Athugasemdir

[Agla, 8.6.2016 kl. 16:01]

Þakka þér kærlega fyrir að birta þessi skrif Kára.

Ég skemmti mér konunglega við lesturinn og er Kára að mestu leiti sammála.

Hélt annars að SDG væri gamall sjónvarpsmaður og ætti því að geta brugðist við óþægilegum spurningum án þess að grípa til fótanna.

Kannski gæti hann líka einfaldlega hafnað sjónvarps/útvarps/blaðaviðtölum nema hann hafi "neitunarrétt" á hvað eftir honum er haft?

[Helga Kristjánsdóttir, 8.6.2016 kl. 17:29]

          ÞAÐ VAR UPPTÖKULIÐIÐ SEM LAUG OG SVÍVIRTI ÍSLAND MEÐ ÞVÍ AÐ ÞAÐ VAR FORSÆTISRÁÐHERRA ÞESS SEM VARÐ FYRIR ÁRÁSINNI. REYNIÐ AÐ STÆRA YKKUR SEM ALDREI TAKIÐ ÁHÆTTU FYRIR LANDIÐ YKKAR. ÞETTA VERKAR Á UNGAN MANN EINS OG EÐLILEGT LÍF FJÖLSKYLDU HANS HÉNGI Á BLÁÞRÆÐI. 

[Jóhann Kristinsson, 8.6.2016 kl. 17:34]

Það var til í vilta vestrinu menn sem voru kallaðir "snakeoil salesmen" og eru til enn. Ekki get ég sagt að ég hafi eða beri virðingu fyrir svoleiðis sölumönnum. 

Fólk sem býr í glerhúsi ætti ekki að kasta grjóti.

Kveðja frá Houston

[bjarni (IP-tala skráð) 8.6.2016 kl. 20:27]

er furða að traust á alþingi mælist eitthvað um 10% reglulega, þegar svona bellibrögð og viðbjóður viðgengst er það kannski ekki furða. Það er mikið vanþakklæti og vanvirðing líka að koma svona fram við æðsta fulltrúa þjóðarinnar, sem lagt hefur nótt við dag að gæta hagsmuna þjóðarinnar. En ég er sammála Halldóri að það má ekki dæma menn fyrirfram eins og í þessu máli

[Agla (IP-tala skráð) 18.6.2016 kl. 16:19]

Ég er Helgu , aldrei þessu vant, ekki sammála. Ég er hinsvegar sammála SD sem taldi frammistöðu sína í þessu viðtali, ömurlega (eitthvað í þá átt).

Auðvitað kennir maður í brjóst um aumingja manninn sem getur ekki klárað sig frá erfiðu embættistengdu sjónvarpsviðtali án þess að grípa til fótanna en mér er fyrirmunað að sjá að ásetningur viðtalsspurjenda hafi verið að svívirða Ísland.