Pólitísk tíðindi

eru það þegar fyrrum formaður Sjálfstæðisflokksins og varaformaður ganga til framboðs á vegum Viðreisnar,flokks sem fyrst og fremst er Evrópusambandsflokkur. 

 

Er ég eitthvað skúffaður eða ekki? Nei,mér er barasta slétt sama. Ég var á landsfundinum þegar Davíð steypti Þorsteini og stóð þá með Þorsteini af því að ég er líklega kurteis kerfismaður í mér.En ég er ekki í vafa núna að þetta varð flokknum og þjóðinni til góðs.

Ég var ánægður með Þorgerði Katrín lengi vel þangað til að hún sýndi af sér bruðlarahegðun sem ráðherra. Ég legg ekki dóm á kúlulánin þeirra hjóna en gleðst bara yfir því að þau héldu húsinu sínu meðan aðrir misstu sín.  

Mér líkaði ekki við Þorstein þegar hann orsakaði klofning flokksins með einstrengingshætti gagnvart Albert. Ekki heldur þegar hann lét slíta á sig ríkisstjórninni í beinni. Heldur ekki þegar hann gekk í raðir Baugsliða og með Fréttablaðsritstjórninni. Ekki heldur þegar hann fór til Brussel á vegum Steingríms J. og Jóhönnu að semja um inngöngu í ESB. Það er eins og hann hafi alltaf skort eitthvað í mannlegum samskiptum sem stjórnmálamenn þurfa að hafa.

 

Mér líkar í það heila tekið ekki við fólk sem fer í aðra flokka sem þar sem það hefur lengst af verið.Eins og þau tvö og Benedikt Jóhannesson. Aðra er mér sama um.

Í sjónvarpinu veltir ritari Sjálfstæðisflokksins Áslaug Arna og efsti maður á lista Viðreisnar í Norðvesturkjördæmi Gylfi Ólafsson því fyrir sér hvort þau séu ekki að fara á þing til að breyta þar málum. Líklega finnst þeim þá báðum að þar sé flest ómögulegt. Ekki sé það kaupið sem trekki segir Logi Bergmann. Þau eru sammál um að þau verði góðir þingmenn og Gylfi vill að á Íslandi ríki viðskiptafrelsi og eitthvað fleira fallegt. Maður spyr sig hvar hefur þessi maður búið undanfarið?

Ég er á móti inngöngu Íslands í tollabandalagið Evrópusambandið sem stefnt er gegn restinni af veröldinni. Ég bendi á að hagsveifla Íslands er allt öðruvísi en gerist þar. Ég sé að ástandið hér er miklu betra en víðast þar.  Ég vona að Viðreisn fari að tína saman yfirburði ESB-ríkjanna yfir Ísland eða Canada til dæmis. Þeir þurfa aldeilis á góðum rökum að halda.

Ég vona að fleiri Íslendingar komi auga á muninn en ég þegar þeir velta fyrir sér að kjósa Viðreisn eða Pírata sem eru framlenging á Samfylkingunni að því að Össur segir.

Ég hef ekki trú á því að þessar tvær nýju persónur í liði Viðreisnar valdi straumhvörfum í komandi kosningum. Er afrekasaga þeirra sem stjórnmálamanna þvílikt afbragð að fók hljóti að kjósa þær blindandi?

Ef Sjálfstæðisflokkurinn berst hinni góðu baráttu og er trúr hugsjónum sínum, óttast ég ekki þó einhverjir veifi einhverjum páfuglsfjöðrum sem varla fljúga langt þegar þær eru dottnar af vængjunum sem báru þær sjálfar lengst og tryggast.

En pólitísk tíðindi eru þetta vissulega.

 

Athugasemdir

[Tómas Ibsen Halldórsson, 7.9.2016 kl. 20:28]

Er þá Viðreisn ekki bara framlenging af Samfylkingunni eins og Píratar ef marka má ályktun Össurar í þeim efnum?

Mér sýnist Viðreisn vera enn einn krataflokkurinn. Alla vega virðast kratarnir úr Sjálfstæðisflokknum finna sér athvarf þar.

[Heimir Lárusson Fjeldsted, 7.9.2016 kl. 21:29]

Þau eiga sér ekki viðreisnar von eftir þessa ferð.

[Halldór Jónsson, 7.9.2016 kl. 22:22]

Tómas, ég held að  þú hafir réttara fyrir þér en Sjálfstæðiflokkssspekingurinn doktor Eiríkur Bergmann sem heldur að þetta sé klofningur úr þeim flokki. Það var búið að kanna þetta og aðeins 17 % af fylgi Viðreisnar kemur úr D.Mikið meira úr Samfó.

Heimir, þetta fólk er ekki með okkur lengur og enginn saknar þeirra. Fólk sem hugsar meira um eigin metorð en flokkinn sinn hefur hvergi orðið langlíft í pólitík. Liðhlaupar virðast óvíða vera í miklu uppáhaldi í hvaða aðstæðum sem eru. 

[Hrólfur Þ Hraundal, 7.9.2016 kl. 22:50]

Bjarni Ben undrast að manneskja sem hefur unnið með honum að stefnumálum Sjálfstæðisflokksins, fari svo bara í framboð með allt öðrum flokki.   Dómgreindin er alltaf jafn helfrosin á þeim bænum.

Ég undrast ekki,  því að þó Þorgerður Katrín sé skeleggur málflytjandi, þá er hún ekki Sjálfstæðis maður frekar en rolan Þorsteinn Pálsson fyrrverandi fjórtán mánaða forsætisráðherra.

Það samrýmist ekki grundvallar stefnu Sjálfstæðisflokksins að gefa frá Íslendingum auðlindir þeirra og sjálfstæði.  Þannig er bara vel að sambandssinnarnir finni sér samastað utan Sjálfstæðisflokksins, svo friður gefist til að hreinsa upp sóðaskapinn eftir  hina ósvífnu umsókn Jóhönnu, Össurar, Steingríms og katta hjarðar þeirra.

Það eru eiginhagsmuna peninga menn sem fastast sækja á Evrópusambands aðild og hafa stuðning allrar vinstrihjarðarinnar, að Framsókn undanskilinni en þá.  

[Halldór Egill Guðnason, 8.9.2016 kl. 08:03]

Hef áður sagt það nafni að innan Sjálfstæðisflokksins væru orðnir of margir kratar. Nú virðist sem þeir séu einhverjir á förum úr flokknum og er það vel. Farið hefur fé betra og ekki nokkur einasta eftirsjá af þeim. Ekki nokkur. Krataeðlið er samt við sig, þegar síðan kemur að útskýringum vegna "sinnaskiptanna". Umsókn um aðild að evrópusambandinu er eitt helsta keppikefli viðreisnar, en af einhverjum orsökum er það ekki nfnt einu orði þessa dagana. Sérdeilis trúverðugur flokkur, eða hitt þó heldur! Verði viðreisn að góðu með nýja innlimunar og sjálfstæðisafsalssinna sína.

 Góðar stundir, með kveðju að sunnan.