Flóttamenn

eru fyrirbrigði sem menn geta velt fyrir sér.

Virðist það ekki svo vera, að reki glæpafélög úti í heimi hornin hvert í annað, tvö eða fleiri,þá séu þeir sem vopnlausir eru orðnir að viðfangsefni almennings í öðrum ríkjum.

Tökum Sýrland sem dæmi. Þar er Assad augnlæknir við völd yfir ríkishernum með einhverjum rétti víst. Gegn honum er gerð uppreisn. Þar koma stórveldin strax að og punda inn vopnum til sinna uppáhaldshópa, sem eru hugsanlega líklegir til að geta stolið olíu frá Assad. Aðrir ausa vopnum í Assad til að hann geti drepið hina. Svo verða vopnlausir, konur, börn, gamalmenni og sjúklingar fyrir sprengjunum sem þetta lið kastar hvort á annað. Þá leggur þetta fólk á flótta. Og fjölmiðlar birta myndir af eymd þess og ófeiti.

Allt í einu er þetta fólk ekki lengur vandamál glæpafélaganna, Assads, ISIS og hvað þeir heita nú allir sem hrekktu fólkið, heldur Íslendinga meðal annarra þjóða. Í minna máli vopnasöluþjóðanna og þeirra sem eru að hræra í pottinum.

Af hverju er það vandamál Íslendinga þegar glæpalýður sem okkur kemur ekki við bombar spítala og heggur hausa af saklausum? Af hverju ber okkur skylda til að flytja þetta fólk heim til okkar og taka það á okkar framfæri?

Ef svona stríðshamfarir dundu á út í heimi þá söfnuðu góðhjartaðir stundum mat og vistum til að senda sem neyðaraðstoð. Þetta var gert í gamla daga. Núna dugar ekkert minna en að sækja þá hrjáðu og flytja til annarra landa frá bandíttunum. 

Hver skyldi annars vera skylda borgara í einu ríki gagnvart öðrum borgurum þess ríkis sem vilja hafa borgarstríð? Á hann að blanda sér í stríðið eða ekki ef hann getur? Má hann flýja sína eigin þjóð? Hvað urðu menn að gera í bandaríska borgarastríðinu? Veita annaðhvort Lincoln eða Lee? Vera skotnir annars? Af hverju flúðu þeir ekki til Íslands ef þeir vildu ekki fara í stríð? Hvað ættum við að gera ef hér yrði uppreisn?

Hvort á að reyna að senda hjálp til fólksins eða sækja fólkið og flytja það til sín? Hitler kaus að drepa það skipulega heima hjá sér heldur en að sleppa því burt enda þá hugsanlega efni í hermenn. Napóleon lét skjóta stríðsfanga í Afríku frekar en að taka áhættuna af að fá þá á móti sér. Borgarastríð eru hugsanlega verri viðfangs en stríð milli ríkja.

Það er vandlifað með flóttamenn.