Vinstri stjórn i pípunum

 Óli Björn skrifar ágæta áminningu hvers sé að vænta að afloknum kosningum. Óli Björn  segir í Morgunblaðinu í dag:

"Kjósendur þurfa ekki að velkjast í neinum vafa um fyrirætlan vinstri flokkanna, komist þeir í ríkisstjórn að loknum kosningum: Skattar og álögur á einstaklinga og fyrirtæki munu hækka. Fyrirheitin (hótanirnar) liggja fyrir. VG lofar nær 334 milljörðum í auknar álögur á fimm árum en Samfylkingin »aðeins« 236 milljörðum.

 

Þrátt fyrir að tekjuáætlun fjármálaáætlunar geri ráð fyrir að skatttekjur ríkissjóðs verði 185 milljörðum króna hærri árið 2022 en í fjárlögum yfirstandandi árs, eru vinstri menn sannfærðir um að auka þurfi tekjur enn meira - fara verði dýpra í vasa einstaklinga og fyrirtækja. Um 83 milljarða raunhækkun útgjalda - fyrir utan stofnkostnað - er ekki nægjanleg og því haldið fram að um »blóðugan niðurskurð« sé að ræða.

 

Þessi fyrirheit eða hótanir, eins og margir kalla skattastefnu vinstri flokkanna, komu fram með skýrum hætti á liðnu vori í nefndarálitum fulltrúa flokkanna um fjármálaáætlun 2018-2022. Í breytingatillögu fulltrúa Vinstri grænna voru skattahækkanirnar settar undir einn hatt - ýmsar skatta- og eignatillögur. Fulltrúi Samfylkingarinnar lagði hins vegar fram nokkuð sundurliðaðar tillögur. Í andsvörum á þingi upplýsti fulltrúi Vinstri grænna félaga sinn í Samfylkingunni um eftirfarandi: »Ég get þó upplýst háttvirtan þingmann um að það liggur fyrir að við höfum rætt um tekjuskatt, þ.e. þrepaskipt tekjuskattskerfi. Við höfum talað um auðlegðarskatt, auðlindagjöld, fjármagnstekjuskatt, kolefnisgjald, gjöld á ferðaþjónustu, bætta skattheimtu, sykurskatt o.s.frv. Þetta er ekkert nýtt í málflutningi Vinstri grænna og það hefur í sjálfu sér ekkert breyst frá því við vorum saman í ríkisstjórn hvar við viljum helst taka tekjurnar og setja þær niður.«

 

Samkeppni um hækkun skatta

 

Í samkeppninni um auknar álögur hefur VG ótvírætt vinninginn. Fái Vinstri grænir umboð kjósenda mega þeir reikna með þyngri byrðum - ígildi um 987 þúsund kr. á hvert mannsbarn eða 3,9 milljóna á hverja fjögurra manna fjölskyldu á fimm árum. Í samanburði eru hugmyndir Samfylkingar næstum hógværar. Tillögur þeirra jafngilda um 698 þúsund krónum á hvern Íslending eða tæplega 2,8 milljónum á fjölskyldu.

 

Vinstri menn voru ekki í hópi þeirra sem fögnuðu þegar Bjarni Benediktsson, þáverandi fjármálaráðherra, tilkynnti haustið 2015 um fyrirætlanir ríkisstjórnarinnar um að lækka tekjuskatt einstaklinga. Neðsta þrepið lækkaði sem og milliþrepið sem var síðan fellt niður um síðustu áramót. Fækkun skattþrepa og þar með einföldun skattkerfisins er eitur í beinum þeirra sem líta á lækkun skatta sem »afsal« ríkisins á tekjum.

 

Þegar ákveðið var að lækka efra þrep virðisaukaskatts úr 25,5% í 24% fannst skattaglöðum vinstri mönnum fremur að verið væri að veikja skattastofna en að stuðla að lækkun vöruverðs og þar með bættum hag neytenda. Afnám almennra vörugjalda og niðurfelling tolla, sem hefur stuðlað að aukinni samkeppni og lægra vöruverði, enda töldu erlend verslunarfyrirtæki hægt að hasla sér völl hér á landi (Costco og H&M), var lítt til að gleðja talsmenn skattheimtu. Formaður Samfylkingarinnar heldur því fram að með lækkun virðisaukaskatts sé ríkið »að missa marga milljarða« og telur þá er vilja lægri álögur vera illa haldna af » einhverju skattalækkunar-fetish«.

 

»Þær breytingar sem gerðar hafa verið undanfarin ár [á sköttum] fólu í flestum tilfellum í sér afsal á tekjum í ríkissjóð en eru látnar heita einfaldanir, en ekki skattalækkanir eins og rétt væri,« sagði fulltrúi Vinstri grænna í umræðum um fjármálaáætlunina í maí síðastliðnum.

 

Í hugarheimi vinstri manna er það vísbending um skattstofnar séu »vannýttir« og að ríkissjóður hafi »afsalað« sér tekjum ef eitthvað hreyfist.

 

Stoðir velferðar

 

Hugmyndafræði skattaflokkanna sem boða stóraukin útgjöld samhliða auknum álögum og þyngri sköttum, liggur fyrir enda eru þeir sannfærðir um að vel hafi tekist til í skattamálum 2009 til 2013. Vinstri grænir líta svo á að nær 200 breytingar á skattalögum hafi verið stærsti hugmyndafræðilegi sigur þeirra. Og það er einbeittur vilji þeirra að endurtaka leikinn.

 

Það er gegn þessari hugmyndafræði sem Sjálfstæðisflokkurinn stendur einn og getur haft burði til að koma í veg fyrir að skattagleðin taki aftur völdin og skattmann leiki lausum hala. Það hefur verið og verður alltaf meginstef í stefnu Sjálfstæðismanna að halda sköttum í lágmarki og að fólk haldi sem mestu af því sem það aflar. Það er í anda þessarar grunnstefnu sem ég hef starfað og mun starfa.

 

Þorbjörn Þórðarson greinir kosningarnar með ágætum hætti í leiðara Fréttablaðsins síðastliðinn mánudag. Í niðurlagi skrifaði Þorbjörn:

 

»Óháð stuðningi við einstaka flokka er mikilvægt að kjósendur geri sér grein fyrir að atkvæði með auknum ríkisútgjöldum mun til lengri tíma ýta undir óstöðugleika í hagkerfinu hér á landi og veikja þá vinnu sem ráðist hefur verið í á undanförnum árum til að styrkja umgjörð peningastefnunnar. Án ábyrgrar stefnu í ríkisfjármálum verður aldrei hægt að treysta stoðir velferðarkerfisins til langframa.«

 

Kosningarnar snúast um þetta - um festu, stöðugleika og velferð eða afturhvarf til skattagleðinnar 2009 til 2013. "

 

Ég hitti athafnamann sem viðraði áhyggjur sínar um framtíð þjóðarinnar eftir kosningar.Hann sagði að fyrst að andlitið á Indriða H. Þorlákssyni vaæri farið að sjást aftur á sjónvarpi í sambandi við uppgang VG þá byggist hann við því versta. Hann sagðist ætla að skrá sig burt af landinu í tæka tíð og koma sér í skjól. Koma hingað sem gestur aðeins.Og það myndi muna um þennan mann get ég sagt af reynslu.

Það er vissulega vá fyrir dyrum hjá þjóðinni ef á að fara að enduvekja stjórninina frá 2009. Það er eins og Íslendingar læri aldrei af reynslunni hversu bitur sem hún er. Við erum varla lausir undan einokunarverslun Dana og búnir að stofna lýðveldi þegar hálf þjóðin er ólm í að ganga í ESB og komast undir forræði frú Merkel á sama tíma sem Katalónar eru að gera uppreisn gegn þessu öllu.

En þegar vinstristjórnarandlit Indriða H. Þorlákssonar guðar á gluggann þegar skattamálin eru til umræðu þá boðar það  ekki góða tima fyrir frjálshyggjumenn. 

Athugasemdir

[Jóhann Elíasson, 4.10.2017 kl. 15:15]

Já, gullfiskaminnið hjá Íslenskum kjósendum lætur ekki að sér hæða.  Menn eru búnir að GLEYMA skattabrjálæðinu, sem greip um sig hjá Gunnarsstaða Móra, síðast þegar hérna var VINSTRI STJÓRN.  En það er sagt að hver þjóð fái yfir sig þá ríkisstjórn sem hún á skilið.  HVAÐ HAFA ÍSLENDINGAR GERT, SEM VELDUR SVONA HARÐRI REFSINGU??????????

[Helga Kristjánsdóttir, 4.10.2017 kl. 16:45]

.....Og enginn var jafnfljótur að svíkja kosningaloforð sitt en Steingrímur 2008(9),3x nei viljum ekki í esb.

[Jóhann Elíasson, 4.10.2017 kl. 18:11]

Karvel, ertu sjónlaus og heyrnarlaus á ALLT sem "Vinstri Hjörðin" gerir???? 

[Guðbjörg Snót Jónsdóttir (IP-tala skráð) 4.10.2017 kl. 23:48]

Ég get tekið undir hvert orð, sem Óli Björn segir í greininni, en er nú samt ekki trúuð á, að þessar spár um vinstri stjórn gangi eftir. Mér finnst þetta byggjast á tómri óskhyggju Sovétfréttastofumanna Rúv og 365 miðla með tilraun til að hafa áhrif á kjósendur - því miður. Það er engu líkara, en þeir hjá Rúv og 365 auk Félagsvísindastofnunar og MMR hafi félagaskrá og kjósendalista VG og Samfó hjá sér og taki úrtak úr þeim listum, þegar þeir eru að gera þessar kannanir, en reyni svo að spyrja aðra að auki, sem ekki eru á listunum, og kjósa aðra flokka, til þess að skoðanakannanirnar líti trúverðuglega út. Mér finnst þetta alls ekki marktækt, enda hefur það sýnt sig líka. Við gætum búið til eða látið gera svona skoðanakannanir fyrir okkur, þar sem tekið er gott úrtak úr félagaskrám og kjósendalistum Sjálfstæðisflokksins og Framsóknar, og tekið svo fleiri með, sem kjósa aðra flokka til þess að þetta líti nú trúverðuglega út, en ósköp væri nú lítið að marka slíkar kannanir. Svona lítt trúverðugar kannanir eru samt ekki bundnar við Ísland eitt. Það höfum við getað séð, t.d. varðandi forsetakosningarnar í Bandaríkjunum og Frakklandi, og svo Brexit. Við getum bara þakkað fyrir, að þessar skoðanakannanir skuli ekki vera kosningar. Við skulum spyrja að leikslokum í enda mánaðarins, enda er ég ekki viss um, að fólki hugnist önnur vinstri stjórn, hvað þá Reykjavíkurmunstrið, eins gæfulegt og það er eða hitt þó. Björn Bjarnason, fv. ráðherra, sagði mér líka, að VG væri klofin, þar sem Svandís ynni alltaf á móti Kötu og hennar liði. Ef Kata vildi fara í ríkisstjórn með Sjálfstæðisflokknum, eins og margir virðast vera að fiska eftir, þá vildi Svandís ekki heyra á slíkt minnst, og berðist harðri baráttu á móti slíkri ríkisstjórn, þar sem hún sæi allt svart og rautt, þar sem Sjálfstæðisflokkurinn er. Svo að VG er nú ekki traustvekjandi flokkur svo sem, frekar en Píratarnir, sem koma aldrei með neinar lausnir, heldur vilji frekari skýringar og spyrji og spyrji æ fleiri spurninga. Þeir eru ekki gjaldgengir heldur fyrir það eitt. Ég hef nú ekki trú á því, að Samfó fái svona mikið, eins og sagt er, að þeir muni fá, og tóm óskhyggja. Dagur og Hjálmar sjá fyrir því, enda vill fólk ekkert með þessa Samfójólasveina hafa, hvort heldur í borg eða á Alþingi. Svo að við skulum anda rólega og vona það besta.

[Þórir Kjartansson, 5.10.2017 kl. 08:35]

Ég held að það væri nær fyrir Óla Björn og aðra sjálfstæðismenn að líta í eigin barm og spyrja sig af hverju kjósendum Sjálfstæðisflokksins er alltaf að fækka, frekar en að eyða tíma sínum í spádóma um allan þann skaða sem hugsanleg vinstri stjórn gæti valdið landi og þjóð.