Atlaga Jóhannesar Kr.

hjá Reykjavik Media að lýðræðinu í landinu er nú hafin. Til þess nokkuð  auðsjáanlega að koma hér á vinstri stjórn eftir þrjár vikur. 

Nú dreifir Jóhannes Kr. Kristjánsson óhróðri um formann Sjálfstæðisflokksins um víða veröld í erlenda fjölmiðla,  sem er svo auðvitað blásið upp hér innanlands af bandamönnum Jóhannesar á RÚV. Nú skal Bjarni Benediktsson felldur á sama hátt og Sigmundur Davíð.

Formúluna kann Jóhannes upp á hár. Kveiktar eru upp grunsemdir um saknæmt athæfi sem brenna nægilega skært allan þann tíma sem eftir er fram að kosningum og þannig fá illan grun um óheiðarleika til að loða við Sjálfstæðisflokkinn eins og smjörklípu sem nægir til að fæla grandvart fólk frá því að kjósa nokkuð sem tvímælis getur orkað. Skýrari getur þessi áætlun vinstri manna eins og þessa Jóhannesar ekki orðið fyrir áhorfendum. 

Bjarni Benediktsson hefur gert grein fyrir inni hlið á málinu.Hún er svohljóðandi:

" Í  tilefni af fréttum um sölu á hlutabréfum í Glitni á árinu 2008 og í Sjóði 9 dagana fyrir fall bankanna vil ég koma eftirfarandi á framfæri:

Öll mín viðskipti við Glitni banka voru eðlileg. Þau hafa staðist ítrekaða skoðun. Það er aðalatriði málsins.

Eins og áður hefur komið fram seldi ég hlutabréf mín í Glitni árið 2008. Söluandvirðið var geymt áfram í bankanum, fyrst og fremst í Sjóði 9. Ég seldi smám saman þá eign yfir árið og færði að hluta í aðra sjóði og á innlánsreikninga hjá bankanum.

Látið er að því liggja í fréttum í dag að ég hafi búið yfir trúnaðarupplýsingum um stöðu fjármálakerfisins, eða Glitnis, annars vegar þegar ég seldi hlutabréfin, og hins vegar þegar ég seldi eftirstöðvar eignar minnar í Sjóði 9 dagana fyrir fall bankans. Þetta eru alvarlegar ásakanir. Hér er verið dylgja um að ég hafi misnotað stöðu mína og stundað innherjasvik. Hvort tveggja er rangt.

Allt árið 2008 geisaði alþjóðleg fjármálakrísa sem Ísland fór ekki varhluta af. Í upphafi árs mistókust tilraunir íslensku bankanna við að endurfjármagna skuldbindingar og hlutabréfaverð lækkaði ört. Þessi staða varð mér tilefni til greinarskrifa í febrúarmánuði 2008 með Illuga Gunnarssyni þar sem við vöktum sérstaka athygli á alvarleika málsins og komum með tillögur til úrbóta. Við undirbúning greinarskrifanna áttum við samtöl við fjölmarga sérfræðinga innan og utan fjármálakerfisins, sem einkum sneru að því til hvaða ráðstafana mögulegt væri að grípa til að koma í veg fyrir tjón. Tillögur okkar mótuðust af þessum samskiptum.

Nokkur atriði skipta hér mestu:

Í fyrsta lagi er rétt að vekja athygli á því að 29. september 2008 var tilkynnt að ríkið hygðist yfirtaka 75% í Glitni en tveimur vikum áður hafði Lehman Brothers bankinn fallið. Engum gat dulist að upp var komin grafalvarleg staða í íslenska fjármálakerfinu. Dagana frá yfirlýsingu um yfirtökuna og fram að setningu neyðarlaganna, 6. október, voru markaðir á Íslandi í frjálsu falli.

Í öðru lagi er það rangt að ég hafi beðið um sölu á hlut mínum sama dag og neyðarlögin voru sett, 6. október 2008. Hið rétta er að ég óskaði eftir því 2. október, eins og framkomin gögn sýna, en uppgjör tók 2-3 viðskiptadaga. Ég seldi í Sjóði 9 en keypti m.a. í sjóðum 5 og 7, sem voru áhættuminni og geymdi peningana áfram í bankanum.

Í þriðja lagi vil ég að fram komi að ég, líkt og margir aðrir viðskiptavinir bankans, var læstur í mörg ár með peninga í sjóði bankans.

Í fjórða lagi er látið að því liggja að ég hafi miðlað upplýsingum um störf Fjármálaeftirlitsins (FME) til starfsmanns bankans. Þetta á sér enga stoð í raunveruleikanum. Engum slíkum upplýsingum var miðlað enda bjó ég ekki yfir slíkum upplýsingum. Hins vegar mátti öllum vera ljóst að FME væri að vinna í málunum. Þetta er eftir að tilkynnt hafði verið um yfirtöku ríkisins á bankanum. Það hefði verið ábyrgðarlaust ef menn hefðu ekki verið að róa öllum árum að því að bjarga málum í FME á þessum tíma og ekkert fréttnæmt við að ég hafi mögulega látið slík orð falla.

Í fimmta lagi liggur fyrir að Rannsóknarnefnd Alþingis (RNA) fékk víðtækustu rannsóknarheimildir sem mögulegt var. Öllum steinum var velt við. Sérstaklega var hugað að öllu því sem gerðist í aðdraganda hrunsins. Um þetta allt er fjallað í skýrslu RNA. 
Þá tók slitastjórn bankans öll viðskipti í aðdraganda hrunsins til skoðunar. Allt sem gerðist í aðdraganda falls bankanna hefur því í tvígang verið rannsakað. Engar athugasemdir hafa nokkru sinni verið gerðar við viðskipti mín. Ég hef aldrei verið sakaður, af öðrum en ákveðnum blaðamönnum og einstaka pólitískum andstæðingi, um að hafa gert eitthvað misjafnt.

Í sjötta lagi vil ég taka fram að ég tók ákvörðun fyrir mörgum árum um að segja mig frá öllum stjórnarstörfum fyrir fyrirtæki og losaði mig við öll hlutabréf sem ég átti í þeim tilgangi að helga alla mína starfskrafta forystuhlutverki í íslenskum stjórnmálum. Ég geri engan ágreining við þá sem segja óviðeigandi að forystufólk í stjórnmálum stundi á sama tíma viðskipti. Ég hef sýnt það í verki hvernig ég tel best að gera skil þarna á milli.

Hrun fjármálakerfisins, sem olli hrikalegu áfalli fyrir íslenskan efnahag, hefur verið skoðað ofan í kjölinn. Okkur Íslendingum hefur tekist vel að byggja landið okkar upp að nýju. Við þurfum að beina kröftum okkar að uppbyggingu og nýta þau fjölmörgu tækifæri til bættra lífskjara.

Kosningarnar framundan eru tækifæri til þess."

Það þarf ekki að leita langt yfir til að sjá í hvaða tilgangi þessi launráðamaður Jóhannes og trúlega í samvinnu við gamla bandamenn sína á RÚV  er kominn af stað með að reyna að kveikja óslökkvandi eld svona skömmu fyrir kosningar. Ef maður bara endurtekur lygina nógu oft sagði dr. Göbbels þá verður hún að sannleika. Þessir aðilar eru búnir að sýna landsmönnum sambærileg vinnubrögð sín áður í sambandi við mál Sigmundar Davíðs og eiginkonu hans. Þeim tókst þá að fella Sigmund Davíð og ríkisstjórn hans með síbylju um hluti sem svo reyndust ekki á rökum reistir. En þá var skaðinn skeður og of seint að snúa við. Þetta á að endurtaka núna. 

Allt það mál Sigmundar Davíðs og konu hans hefur verið afsannað sem hreinar lygar og ásakanir sem við engin rök áttu að styðjast. Sviðsetningin tókst hinsvegar svo fullkomlega að Sigmundur Davíð missti tökin. Jóhannes þessi hreykir sér hátt sem snillingur og alþjóðlegur rannsóknarblaðamaður og tilnefnir sjálfan sig sem afburðamann um víða veröld. Nú ætlar hann að láta að sér kveða svo um muni. Stjórna því hverskonar ríkisstjórn verði mynduð eftir kosningar á Íslandi með því að slasa Sjálfstæðisflokkinn nægilega með grundsemdum um óheiðarlegt eðli formanns hans svona skömmu fyrir kosningar.

Einmitt þegar allir hagvísar stefna upp á við þá er þessu fólki efst í huga að skapa óstöðugleika í samfélaginu. Þá ráðast vinstri menn gegn markaðshagkerfinu og öllum stuðningsmönnum þess  með áformum sínum um stóraukna skattheimtu í stíl síðustu vinstri stjórnar. Sama fólkið og vildi leggja Icesave klyfjarnar á þjóðina og veitti vogunarsjóðunum skotleyfi á almenning. Skyldi fólk vera búið að gleyma því hverjir voru ráðherrar í þeirri stjórn? Eru nöfnin Katrín Jakobsdóttir og Steingrímur J. Sigfússon gleymd?

Núverandi formaður VG, Katrin Jakobsdóttir,  hefur enda boðað hundruð milljarða auknar álögur til samneyslunnar að sínum hætti. Þetta er dulklætt eins og var í tíð þeirra stjórnar sem aðeins auknar álögur á þá efnameiri. En sem menn muna kannski þá lentu þær á öllum almenningi og þyngst á þeim sem síst máttu við, öldruðum og öryrkjum með skerðingunum krónu á móti krónu.

Íslands óhamingju verður allt að vopni var eitt sinn sagt. Það er eins og sumu fólki sé mest í mun að valda sem mestum usla í þjóðfélaginu sjálfum sér til tímabundinnar frægðar. Þessi nýjasta atlaga Jóhannesar  er í þessum dúr.

 

Athugasemdir

[Óskar Helgi Helgason (IP-tala skráð) 6.10.2017 kl. 13:18]

Sæll Halldór jafnan - sem og aðrir gestir, þínir !

Halldór !

Rétt áðan: náði ég góðu símasambandi við Jóhannes Kr. Kristjánsson:: hvar, ég hvatti hann og Reykjavíkur Medíu hans til, að fletta ekki síður:: ofan af vinnubrögðum Steingríms J. Sigfússonar og Össurar Skarphéðinssonar, í þeirra fjárglæfrum - fyrr: og síðar.

Það er heillamerki eitt Halldór - sé skúbbað ofan af óviðurkvæmilegum starfsháttum íslenzkra stjórnmálamanna, án tillits til, hvar í flokkum þeir standa. Landsmenn eiga heimtingu á, að skafið sé ofan af hvers kyns sóðaskap: fjármálalegum, ekki síður en á öðrum sviðum.

Sé: einhver lágmarks töggur, í Guðna Th. Jóhannessyni, á hann að skipa, nú þegar,, Utanþingsstjórn / og gefa alþingi mjög langt frí, með frestun fyrirhugaðra kosninga, þann 28. Október, n.k.

Ég veit - um fjölda dugandi Bænda / sem og Útvegs- og Iðnaðarmanna, víðs vegar um land, sem skipað gætu slíka stjórn, fonvinur góður.

Með beztu kvaðjum: sem endranær, af Suðurlandi / 

[Halldór Jónsson, 6.10.2017 kl. 16:37]

Þú ert nú varla staddur í veruleikanum í lýðveldinu Íslandi  fornvinur góður ef þú heldur að þessi Forseti geti gert eitthvað í þessa veru. Algerlega óraunhæfar hugmyndir alvega sama hvursu góða bændur, drykkfellda og fjárglögga  þú þekkir.

[Óskar Helgi Helgason (IP-tala skráð) 6.10.2017 kl. 16:50]

Sæll á ný - Halldór: mætur Verkfræðingurinn !

Nei: kannski er það full mikil ofætlan, að búast við einhverjum afdráttarlausum aðgerðum, af hendi Guðna Th., þó brýnar væru.

Skraut fígúra - af 1°, sem fylgir straumi viðhlægjenda sinna, í takmarkalausri sjálfs upphafningu:: blendinni snobbi og annarrs konar lágkúru, ýmisskonar.

En: ekki verður unað við óbreytt ástand, svo ekki fari hlutir á II. hjar, að óþörfu, Halldór minn.

Um það - munum við geta verið sammála, að nokkru.

Ekki síðri kveðjur: þeim fyrri /

[JR (IP-tala skráð) 6.10.2017 kl. 19:24]

Hér umsögn sjálfstæðismanns :

 

,,Það er óhætt að segja að þessar upplýsingar séu gífurlegt áfall og vonbrigði fyrir sjálfstæðismenn um allt land. Trúnaðarbrestur hefur orðið milli forystu Sjálfstæðisflokksins og flokksmanna. Trúverðugleiki Sjálfstæðisflokksins gagnvart þjóðinni hefur beðið hnekki, og það rétt fyrir alþingiskosningar, enda ber flokkurinn ábyrgð á forystu flokksins.

Svona ósvífin framkoma forystumanns Sjálfstæðisflokksins í öll þessi ár og trúnaðarmanna formannsins innan flokksins er sannanlega ótrúleg og setur hinn almenna sjálfstæðismann í óþolandi stöðu."

Jón Baldur Lorange

[Jón Ingi Cæsarsson, 6.10.2017 kl. 19:37]

Nú eru Sjálfstæðismenn komnir í sömu afneitun og Framsóknarmenn þegar flett var ofan af SDG

Hversu lengi verða fótgönguliðarnir í þessum gír, verja formann sinn sama hvað það er auglóst að staða hans er slæm og málstaðurinn vafassamur.

En það má ekki segja frá því,,,heldur tala um einhverja aðra...ótrúleg hjarðhegðun.

[Hörður Þormar (IP-tala skráð) 6.10.2017 kl. 21:16]

Þótt ég trúi hverju orði sem Bjarni Benediktsson segir, þá breytir það ekki því að peningar og stjórnmál er slæm blanda.

Bjarni Benediktsson yrði meiri maður, ef hann tæki áhættuna og byði sig fram í baráttusætið í Kraganum.

[Halldór Jónsson, 6.10.2017 kl. 21:18]

Hvað verður úr flokknum ef krakkinn Ásaug Arna ætti að leiða flokkinn? Verðum við ekki bara að fara niður með skipinu með kapteininum með fánann við hún? Getum við nokkuð annað?

[Hörður Þormar (IP-tala skráð) 6.10.2017 kl. 21:44]

Hefðin var sú að ef skipið sökk þá fór kapteinninn með því.

[Gunnar Rögnvaldsson, 6.10.2017 kl. 23:47]

Gott hjá Herði að benda á að peningar og DDRÚV fara illa saman. Það sjá allir.

Verði þeim að góðu sem mælast til að öreigar einir megi koma nálægt stjórnmálum. Ég hélt satt að segja að sú hugmynd væri útdauð nú á 100 ára afmæli rússnesku byltingarinnar, sem er í þessum mánuði.

Takið ykkur vinsamlegast saman. Varla vilja menn fá land þar sem allt byggist á vottaðri örbyrgð og opinberri framfærslu (pólitískum matarmiðum fyrir þá sem ætla í framboð, eftir að þeir eru neyddir til að brenna eigur sínar fyrst). Þið sjáið nú þegar hvert laun opinberra starfsmanna eru komin; upp til himna!

Af hverju á ég að borga fyrir framboð flokka sem ég þoli ekki? Ef þeir eru svona vinsælir þá ættu kjósendur þeirra að geta haldið þeim gangandi. Eða er það ekki? En af hverju á ég að gera það? Ofan í það að halda DDRÚV uppi!

Takk fyrir kaffið Halldór og Hörður.

Bestu kveðjur.

[Halldór Jónsson, 7.10.2017 kl. 17:32]

 Takk fyri innlitið í kaffið Gunnar. það var ljóta slysið þear Sjálfstæðisflokkurinn lét litlu ljótu flokkana tala sig inn á að setja flokka á ríkisframfæri og alla þá spillingu sem í kjölfarið hefur fylgt. Álíka fáránlegt og að setja saumaklúbba eða Liomnsfélög á ríkispenann.Algerlega fáránlegt að setja frjáls félög á samkostnaðinn og er bara viðbjóðsélg spilling og þjófnaður á almannafé.