Hræðilegt ástand hjá launþegum

getur maður ímyndað sér þegar hlustað er á fréttir. Heilu stéttirnar hafa dregist aftur úr, allir kvarta um að taxtar verði að hækka til að ná aftur mannsæmandi launum.

Bjarni Benediktsson upplýsir í Morgunblaðsgrein í dag um þróun kaupmáttar. Hann segir í greininni:

"...Mikilvægi stöðugleikans Stöðugleiki í efnahagsmálum er mikils virði, ekki síst þegar hann helst í hendur við heilbrigðan hagvöxt og almennt gott ástand í hagkerfinu; mikla atvinnuþátttöku, lítið atvinnuleysi, stöðugt gengi, litla verðbólgu og kaupmáttaraukningu.

Árið 2017 skilaði hinum almenna launþega 5% kaupmáttaraukningu, ofan á um 7% árið 2016 og 8% aukningu árið 2015.

Skuggahlið þessarar sóknar í lífskjörum er að samkeppnishæfni íslensks atvinnulífs hefur dalað. Hærri laun og sterkara gengi krónunnar setur þrýsting á útflutningsgreinar okkar og augljóst að sameiginlegir hagsmunir okkar liggja í því að leggja nú áherslu á stöðugleika, efnahagslegan- og félagslegan, og fjárfestingu til framtíðar.

Slíkar áherslur eru líklegastar til að skila okkur öllum betri niðurstöðu til lengri tíma. Það svigrúm sem skapast hefur til aukinnar fjárfestingar og styrkingar á ýmsum sviðum ætlar ríkisstjórnin að nýta á ákveðinn en ábyrgan hátt..."

Til viðbótar við þetta rekur Bjarni verðlækkanir og skattalækkanir sem koma líka fram sem kaupmáttaraukning á næstu mánuðum.

1.08 x 1.07 x 1.05  eru það ekki 1.213%

21 % kaupmáttaraukning vegna mest ytri aðstæðna en ekki vegna  hetjulegrar baráttu verkfallaforystunnar?

Nú er allt í hönk, ljósmæður hætta störfum, sjúkraliðar fást ekki og kennarar að niðurlotum komnir í skóla án aðgreiningar sem skilar mörgu ólæsu fólki frá sér. 

Verkfall getur lagað allt þetta. Mánaðarverkfall í 3 % verðbólgu sem gefur 10% hækkun á taxta nær ekki jöfnu á heilu ári miðað við ekkert verkfall.

En það er ekkert gaman að skynsemi. Hvernig getum við komið þá  í veg fyrir kaupmáttaraukningu vegna ytri aðstæðna eins og gengishækkun og gjaldalækkun? Svarið  er auðvitað skipulagt gengisfall eins og var í gamla daga. "Situr einn með solli fés, Seðlabanka Jóhannes. Fellir gengið fyrsta des.fer þá allt til helvítes."

En það man enginn lengur heldur neina þjóðarsátt eða hvernig Einar Oddur tuggði hana í okkur.

Já það er hræðilegt ástand hjá launþegum, öryrkjum og eldri borgurum.

 

Athugasemdir

[Jóhannes Laxdal Baldvinsson, 5.4.2018 kl. 21:31]

Sennilega má skrifa það á elliglöp en þú virðist búinn að gleyma raunverulegu orsökinni fyrir þeim óróa og óánægju sem nú ríkir meðal launamanna almennt. Óánægjan snýst nefnilega ekki um þann árangur sem náðst hefur í kaupmáttaraukningu heldur þeim vaxandi ójöfnuði sem m.a. verkfæri Alþingis og Ríkisstjórnar, Kjararáð, ber ábyrgð á! Á þessum mánuðum sem ríkisstjórnin undir forystu Bjarna Ben, hefur haft til að vinda ofan af sjálftöku og ofurlaunahækkunum hefur ekkert gerst. Þess vegna má álykta að öllum beri sambærilegar kjarabætur í krónum talið!  Ekki satt?

[Halldór Jónsson, 5.4.2018 kl. 21:48]

Mér yfirsést ekki um þetta Jóhannes. Því miður hefurðu rétt fyrir þér um samanburðarfræðína sem er miklu erfiðari en hvað er sett í budduna að lokum.